ក្រសួងសុខាភិបាល អង្គការសុខភាពពិភពលោក និងវិទ្យាសា្ថនប៉ាស្ទ័រកម្ពុជា កាលពីពេលថ្មីៗនេះ បានរកឃើញមេរោគដែលបង្កឲ្យមានអ្នកជម្ងឺកុមាររាប់សិបនាក់ស្លាប់បាត់បង់ជីវិតនោះហើយ។ មេរោគនោះមានឈ្មោះថា Enterovirus-71 (EV-71) ដែលបង្កជាពងបែកត្រង់ដៃ ជើង និងត្រង់មាត់។ មេរោគនេះបានបង្កផលវិបាកយ៉ាងធ្ងន់ធ្ងរដល់អ្នកជម្ងឺ ហើយជម្ងឺនេះបានឆ្លងមកពីប្រទេសវៀតណាម និងប្រទេសចិន។
យោងតាមសេចក្តីប្រកាសព័ត៌មានរបស់ក្រសួងសុខាភិបាល និងអង្គការសុខភាពពិភពលោកនាពេលថ្មីៗនេះ បានឲ្យដឹងថា ចំនួនកុមារដែលបានឆ្លងជម្ងឺអាថ៌កំបាំង ហើយបានមកសម្រាកនៅមន្ទីរពេទ្យរយៈពេលកន្លងទៅនេះ មានចំនួនសរុប ៧៤នាក់ក្នុងនោះមាន ៥៦នាក់បានស្លាប់។ កុមារទាំងនោះមានអាយុពី៣ខែដល់១១ឆ្នាំ ប៉ុន្តែភាគច្រើននៃអ្នកជម្ងឺមានអាយុតិចជាង៥ឆ្នាំដែលមកពីភូមិភាគខាងត្បូងនៃប្រទេសកម្ពុជា ហើយបានទទួលការព្យាបាលនៅមន្ទីរពេទ្យ។ ប៉ុន្តែបើទោះបីជាមានកិច្ចខិតខំប្រឹងប្រែងយកចិត្តទុកដាក់ព្យាបាលពីសំណាក់គ្រូពេទ្យយ៉ាងណាក៏ដោយ ក៏កុមារទាំងនោះបានបាត់បង់ជីវិតក្នុងអំឡុងពេល២៤ម៉ោង បន្ទាប់ពីដាក់ឲ្យសម្រាកនៅក្នុងមន្ទីរពេទ្យ។
លោកវេជ្ជបណ្ឌិត លី សូវ៉ាន់ បានឲ្យដឹងនៅក្នុងសេចក្តីប្រកាសនោះផងដែរថា ការស្រាវជ្រាវទាក់ទិនបញ្ហានេះកំពុងតែបន្ត ហើយគេសង្ឃឹមថា លទ្ធផលចុងក្រោយនឹងចេញផ្សាយក្នុងរយៈពេលប៉ុន្មានថ្ងៃខាងមុខនេះ។ បច្ចុប្បន្ននេះ អង្គការសុខភាពពិភពលោក និងដៃគូដែលមានវិទ្យាស្ថានប៉ាស្ទ័រកម្ពុជា និងមជ្ឈមណ្ឌលតាមដានជម្ងឺឆ្លងសហរដ្ឋអាមេរិកប្រចាំកម្ពុជាកំពុងតាមដាន និងផ្តល់ជំនួយបច្ចេកទេសដល់ក្រសួងសុខាភិបាលកម្ពុជាក្នុងការស្រាវជ្រាវរកមេរោគនេះ។ វត្ថុវិភាគមួយចំនួន ត្រូវបានវិភាគនៅវិទ្យាស្ថានប៉ាស្ទ័រក្នុងប្រទេសកម្ពុជា ដែលបានបញ្ជាក់ថា មានភាពអវិជ្ជមានចំពោះវីរុសផ្តាសាយបក្សី វីរុសផ្តាសាយដទៃទៀត វីរុសសារស៍ និងវីរុសនីប៉ា។ នាពេលបច្ចុប្បន្ននេះ ក្រសួងអាចកំណត់អត្តសញ្ញាណនៃភ្នាក់ងារបង្ករជម្ងឺបានខ្លះៗហើយ ប៉ុន្តែក្រសួងត្រូវការពេលវេលាសិក្សាស្រាវជ្រាវបញ្ជាក់បន្ថែមទៀតឲ្យកាន់តែច្បាស់។
ចំណែកឯ កាលពីម្សិលមិញវិទ្យាស្ថានប៉ាស្ទ័រកម្ពុជា ក៏បានប្រកាសលទ្ធផលនៃការវិភាគ ឲ្យដឹងផងដែរថា ជម្ងឺអាថ៌កំបាំង ដែលបានបង្កឱ្យមានកុមារកម្ពុជាស្លាប់អស់៦៤នាក់ ក្នុងរយៈពេលតែបីខែកន្លងមកនេះ គឺបណ្តាលមកពីវត្តមាននៃវីរ៉ុស Entérovirus លេខ៧១ នៅកម្ពុជា។ ការណ៍នេះមានន័យថា កម្ពុជាកំពុងជួបករណីជម្ងឺឆ្លងធ្ងន់ធ្ងរខ្លាំង។ ក្រុមគ្រូពេទ្យស្គាល់ច្បាស់វីរ៉ុសនេះ ព្រោះវាធ្លាប់មានកើតនៅក្នុងប្រទេសវៀតណាមភាគកណ្តាល និងនៅក្នុងប្រទេសចិន ហើយបានសម្លាប់ជីវិតមនុស្សអស់ជាច្រើននាក់។ វីរុស អង់តេរ៉ូវីរ៉ុស ៧១នេះ បានបង្កផលប៉ះពាល់យ៉ាងខ្លាំងទៅលើកុមារ និងអាចផ្តល់ជារោគសញ្ញាពងកន្ទួលក្រហមនៅលើបាតដៃ ជើង និងមាត់។ រីឯរោគសញ្ញានៃជម្ងឺនេះគឺ ក្តៅខ្លួន ឈឺក្នុងមាត់ ពងកន្តួល និងមានពងបែកលើដៃ ជើង និងគូថ។ ក្រសួងសុខាភិបាល និងអង្គការសុខភាពពិភពលោកបានផ្តល់ដំបូន្មានថា ការស្វែងរកការពិគ្រោះជម្ងឺជាមួយគ្រូពេទ្យ គឺជាការចាំបាច់ ពីព្រោះនៅមិនទាន់មានវិធីព្យាបាលជាក់លាក់ណាមួយសម្រាប់ជម្ងឺពងបែកនេះនៅឡើយទេ។ តែគួរឲ្យអ្នកជម្ងឺផឹកទឹក និងវត្ថុរាវឲ្យបានច្រើន។ ជាពិសេសជាងនេះទៅទៀតនោះ គឺគ្រូពេទ្យគួរព្យាបាលតាមរោគសញ្ញាដោយមិនត្រូវប្រើថ្នាំSteroids ឡើយ។
បើតាមតួលេខរបស់មន្ទីរពេទ្យគន្ធបុប្ផាវិញបានឲ្យដឹងថាមានកុមារស្លាប់ដោយសារជម្ងឺនេះរហូតដល់៦៦នាក់។ លោក Beat Richner វេជ្ជបណ្ឌិតស្ថាបនិកមន្ទីរពេទ្យគន្ធបុប្ផា បានមានប្រសាសន៍ថា មេរោគមួយនេះបានបំផ្លាញផ្លូវដង្ហើមទាំងមូលរបស់កុមារ។ លោកបន្តថា រហូតមកទល់ពេលនេះ យើងមិនទាន់ដឹងច្បាស់ ពីមូលហេតុនៃការឆ្លងមេរោគនេះ និងការស្លាប់របស់កុមារទេ។ មិនដឹងថា ការពុលថ្នាំអាចជាកត្តារួមចំណែកក្នុងការស្លាប់របស់កុមារដែរឬទេ។
ចំណែកឯ ឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាល បានមានប្រសាសន៍ថា៖ «ក្នុងអំឡុងពេលដែលក្រសួងសុខាភិបាលកំពុងតែធ្វើការអង្កេតស្រាវជ្រាវដោយសកម្មដើម្បីរកមូលហេតុនៃជម្ងឺនេះ សារធារណៈជនគួរយកចិត្តទុកដាក់ផងដែរទៅលើជម្ងឺដែលកំពុងតែកើតមាននៅក្នុងប្រទេសកម្ពុជាយើង ក្នុងនោះមានជម្ងឺដូចជា ជម្ងឺគ្រុនឈាម ជម្ងឺគ្រុនឈីក ជម្ងឺពងបែក នៅដៃជើង និងក្នុងមាត់។ ឯកឧត្តមក៏បានក្រើនរំឮកដល់ប្រជាជនកម្ពុជាផងដែរថា ឪពុកមា្តយ និងអ្នកថែទាំកុមារទាំងអស់ ត្រូវនាំកូនទៅមន្ទីរពេទ្យ នៅពេលដែលកូនរបស់ពួកគាត់ មានចេញរោគសញ្ញាខុសធម្មតា។ ដើម្បីចូលរួមចំណែក ថែទាំងសុខភាពប្រជាពលរដ្ឋកម្ពុជា គេហទំព័រ សុខភាពកម្ពុជា បានជួបសម្ភាសន៍ជាមួយលោកវេជ្ជបណ្ឌិត លី ចេងហ៊ុយ អំពីជម្ងឺចម្លែក ឬជម្ងឺអ៊ីវី71នេះ។ សូមចូលអាន «ជម្ងឺចម្លែក ឬជម្ងឺវីរុសអ៊ីវី71, ជម្ងឺប្រភេទថ្មីកំពុងសម្លាប់កុមារកម្ពុជាមួយរូបទៀតហើយ, ជម្ងឺថ្មីកំពុងសម្លាប់កុមារកម្ពុជា, ជម្ងឺសើរស្បែកចម្លែកនៅវៀតណាមបានធ្វើឲ្យអង្គការសុខភាពពិភពលោកព្រួយបារម្ភ»។
អត្ថបទដោយ ៖ សៀង វិរៈ
ចេញផ្សាយ ៖ ថ្ងៃទី០៩ ខែកក្កដា ឆ្នាំ២០១២
Leave a Reply