ស្បែកស ទន់ ភ្លឺរលោង មានសំណើមគឺជាបំណងប្រាថ្នារបស់មនុស្សគ្រប់រូប ជាពិសេសចំពោះស្ដ្រី។ មានស្ដ្រីមួយចំនួន ដែលជួបបញ្ហាស្បែកស្ងួតបែកស្រកា បានខិតខំរិះរកគ្រប់មធ្យោបាយ ចំណាយពេលវេលា និងប្រាក់ជាច្រើន ក្នុងការស្វះស្វែងរក ការព្យាបាល និងដំណោះស្រាយច្រើនយ៉ាងធ្វើឱ្យស្បែកចៀសផុតពីភាពក្រៀមបែកស្រកានេះ។ ប៉ុន្ដែការខិតខំ និងការចំណាយ ទាំងអស់នោះ ទទួលបានលទ្ធផលត្រឡប់មកវិញ ខ្លះសម្រេច ខ្លះទៀតបរាជ័យ។ បើដូច្នេះ តើមានវិធីណាអាចកែខៃបញ្ហានេះបាន?
ដើម្បីឆ្លើយតបទៅនឹងបញ្ហាខាងលើនេះ លោកស្រី លីរ៉ា នីរ៉ាន់ នាយិកាហាងកែសម្ផស្សសម្រស់ភ្នំពេញ បានចូលរួម ធ្វើការបកស្រាយ និងបង្ហាញពីវិធីសាស្ដ្រខ្លះៗ ចែកជូនដល់បណ្ដាប្រិយមិត្ដទាំងអស់ដែលមានបញ្ហាដូចខាងលើ ទុកគ្រាន់ជាចំណេះដឹង ខ្លះៗ និងជាជម្រើសសម្រាប់យកទៅអនុវត្ដ។
មូលហេតុស្បែកបែកស្រកា
មូលហេតុដែលបណ្ដាលឱ្យស្បែកស្ងួត បែកស្រកា មិនមានសំណើមភ្លឺរលោង គឺបណ្ដាលមកពីកត្ដាពីរយ៉ាង។
1 . កត្ដាទី១ ៖ អាចបណ្ដាលមកពីកត្ដាធម្មជាតិ ដូចជាកម្ដៅថ្ងៃខ្លាំង ប៉ះពាល់ជាមួយអាកាសធាតុក្ដៅស្ងួត ខ្យល់ស្ងួតនារដូវ រំហើយ ឬរដូវស្លឹកឈើជ្រុះ និងមកពីការអំណោយទានពីធម្មជាតិនៃស្បែក។
2 . កត្ដាទី២ ៖ អាចបណ្ដាលមកពីទង្វើ និងសកម្មភាពរបស់យើងផ្ទាល់ តាមរយៈនៃការប្រើប្រាស់នូវផលិតផលខាត់ស្បែក បកស្បែកមួយចំនួន ដែលពុំមានគុណភាពត្រឹមត្រូវ។ ការប្រើប្រាស់នូវគ្រឿងសម្អាងជំនួយស្បែកចម្រុះ ដោយពុំបានធ្វើការវិភាគទៅ លើសុខភាព និងប្រភេទនៃស្បែកជាមួយអ្នកជំនាញ ឬការប្រើផលិតផលខាត់ស្បែកដែលសម្បូរទៅដោយជាតិអាស៊ីតច្រើន និងការ កង្វះជាតិទឹកនៅក្នុងរាងកាយ។
វិធីព្យាបាលស្បែកបែកស្រកា
ជាការពិតណាស់ ស្បែកនៅលើដងខ្លួនរបស់មនុស្សមានច្រើនស្រទាប់ និងមានសភាពខុសប្លែកៗពីគ្នាទៅតាមទីកន្លែង តំបន់ នីមួយៗ។ ជាទូទៅស្រទាប់ស្បែកខាងក្រៅអាចមានសំណើមភ្លឺរលោងទៅបាន គឺអាស្រ័យទៅលើសារធាតុចិញ្ចឹមមួយចំនួនដែលមាន នៅក្នុងរាងកាយ ដែលទទួលបានមកតាមរយៈការបរិភោគនូវចំណីអាហារប្រចាំថ្ងៃ ជាពិសេសជាតិទឹក និងវីតាមីនសំខាន់ៗមួយចំនួន។
យើងអាចធ្វើការដោះស្រាយនូវបញ្ហាស្បែកស្ងួត បែកស្រកា ឱ្យក្លាយទៅជាស្បែកដែលមានសុខភាពល្អ មានសំណើម ស ភ្លឺរលោងទៅបាន តាមរយៈវិធីសាស្ដ្រងាយៗមួយចំនួនដូចខាងក្រោម ៖
- ចាំបាច់ត្រូវព្យាយាមបរិភោគទឹកឱ្យបានច្រើន ចាប់ពី២-៣លីត្រ ក្នុងមួយថ្ងៃយ៉ាងតិច
- ព្យាយាមបរិភោគទឹកផ្លែឈើណាដែលមានផ្ទុកទៅដោយវីតាមីនចិញ្ចឹមស្បែក និងជំនួយដល់រាងកាយឱ្យបានច្រើន ដែល មានដូចជាទឹកសណ្ដែក ឪឡឹក ត្រសក់ ប៉ោមជាដើម
- បរិភោគអាហារដែលមានផ្ទុកទៅដោយជីវជាតិឬវីតាមីនO។ E. B1. B12 ឱ្យបានច្រើន ដែលមានដូចជាសាច់ត្រី ថ្លើម ស៊ុត និងបន្លែពណ៌បៃតង
- ប្រើនូវផលិតផលណាដែលត្រូវជាមួយនឹងសុខភាពស្បែក និងកាលបរិច្ឆេទច្បាស់លាស់
- ត្រូវជួបពិគ្រោះជាមួយអ្នកជំនាញ ដើម្បីត្រួតពិនិត្យស្បែក និងជ្រើសរើសប្រភេទផលិតផលប្រើប្រាស់។
ប្រការគួរចៀសវាង ដើម្បីកុំឱ្យស្បែកបែកស្រកា
- ចៀសវាងការប្រើប្រាស់នូវផលិតផលសម្អាងផ្សេងៗដែលពុំមានគុណភាពត្រឹមត្រូវ
- ចៀសវាងធ្វើការបកស្បែកនៅតាមទីកន្លែងដែលគ្មានជំនាញច្បាស់លាស់
- មិនត្រូវប្រើផលិតផលសម្អាងដោយពុំមានប្រភពច្បាស់លាស់ និងការពិគ្រោះជាមួយអ្នកជំនាញទេ។
បណ្ដាំអ្នកជំនាញ
ស្បែក-ស មានសំណើម ភ្លឺរលោងគឺជាផ្នែកមួយយ៉ាងសំខាន់នៅក្នុងការជួយលើកសម្រស់ឱ្យមានសភាពស្រស់ស្អាតផូរផង់ គួរជាទីគយគន់។ ដូច្នេះលោកអ្នកត្រូវយកចិត្ដទុកដាក់ និងមានវិធីសាស្ដ្រក្នុងតំហែទាំ និងថែរក្សាសុខភាពស្បែកឱ្យបានល្អ ទើបជា ការប្រសើរ។ ជាពិសេសត្រូវជួបពិគ្រោះជាមួយអ្នកជំនាញ នៅពេលជួបបញ្ហាស្បែកបែកស្រកា ដើម្បីរកដំណោះស្រាយ ចៀសវាងការ ប្រើប្រាស់ផលិតផលដែលពុំមានប្រភពច្បាស់លាស់។
ប្រភព ៖ ទស្សនាវដ្តី សុខភាពយើង លេខ៣៩ ខែមេសា ឆ្នាំ២០០៩
Leave a Reply