ការបោះឆ្នោតជាសកលនៅកម្ពុជានឹងប្រព្រឹត្ដទៅនៅថ្ងៃទី២៧ ខែកក្កដា ឆ្នាំ២០០៨ខាងមុខនេះ ដែលជាការបោះឆ្នោត សម្រាប់អាណត្ដិទី៤។ ជាធម្មតានៅពេលរដូវកាលបោះឆ្នោត ប្រជាពលរដ្ឋកម្ពុជាភាគច្រើនបានសម្ដែងនូវការព្រួយបារម្ភអំពីបញ្ហា ដែលអាចនិងកើតឡើងនៅក្រោយពេលបោះឆ្នោត។ រហូតមកដល់ពេលនេះ គណបក្សនយោបាយទាំង១១គណបក្សបានចាប់យក លំដាប់លេខរៀងសម្រាប់គណបក្សរៀងៗខ្លួនរួចរាល់ហើយ រង់ចាំតែធ្វើការឃោសនាចូលមកដល់ពួកគេ និងចាប់ផ្ដើមយុទ្ធនាការ ឃោសនារកសម្លេងឆ្នោតឱ្យគណបក្សរបស់ខ្លួន។ ក្នុងស្ថានភាពនេះ គណបក្សធំៗក្នុងប្រទេសបាននិងកំពុងរៀបចំផែនការយុទ្ធសាស្ដ្រ និងគោលនយោបាយរបស់ខ្លួន ដើម្បីឈានទៅរកការទទួលបាននូវអសនៈក្នុងសភាកាន់តែច្រើនឡើង។
មតិរបស់ប្រជាពលរដ្ឋជុំវិញការបោះឆ្នោត
តាមសេចក្ដីប្រកាសរបស់គណៈកម្មាធិការជាតិរៀបចំការបោះឆ្នោះបានឱ្យដឹងថា សម្រាប់អាណត្ដិទី៤នេះ មានអ្នកបោះ ឆ្នោតសរុបចំនួន៨.១២៥.៥២៩នាក់។ ក្នុងចំនួននេះមានប្រជាពលរដ្ឋមួយចំនួនសម្ដែងនូវការយល់ឃើញផ្សេងៗពីគ្នាអំពីផែនការ ដែលកើតមានឡើង និងការព្រួយបារម្ភរបស់ពួកគេ។
- លោក លី ឆេង អាជីវករលក់ម៉ូតូបានមានប្រសាសន៍ថា “ខ្ញុំមានការព្រួយបារម្ភខ្លះដែរ ចំពោះការបោះឆ្នោតនៅពេលខាង មុខនេះ ព្រោះថាមិនទាន់បោះឆ្នោតផងទំនិញឡើងថ្លៃសព្វសារពើទៅហើយ ចុះទម្រាំដល់ការបោះឆ្នោតហើយប្រសិនបើជាប់គាំងដូច អាណត្ដិទី៣ទៀតនោះ ប្រាកដជាដាច់ពោះស្លាប់មិនខាន ព្រោះខ្ញុំលក់ម៉ូតូបើប្រជាជនគ្មានលុយទិញម៉ូតូ ខ្ញុំបានអីរស់”។ ទោះបីជាយ៉ាង ណា លោក លី ឆេង សង្ឃឹមថាអ្វីៗនឹងប្រសើរឡើងនៅក្រោយបោះឆ្នោត ព្រោះគណបក្សនយោបាយក៏តិចជាងមុនប្រហែលជាងាយ ស្រួលដោះស្រាយ។
- អ្នកស្រី កែវ បុទុម អ្នកកាត់ដេរក៏បានសម្ដែងការយល់ឃើញថា “ខ្ញុំពិតជាភ័យខ្លាចខ្លះៗដែរ តែសង្ឃឹមថាមិនអីទេ ព្រោះ ការកសាងប្រទេសមកដល់ថ្ងៃនេះមានការលំបាកណាស់ ដូចនេះមិនគួរបំផ្លាញទៅវិញទេ ហើយខ្ញុំក៏មានការជឿជាក់លើទឹកចិត្ដស្នេហា ជាតិរបស់គណបក្សនីមួយៗដែរ”។
- កញ្ញា ប៊ុន លក្ខិណា និស្សិតមហាវិទ្យាល័យមួយបានបង្ហាញអំពីអារម្មណ៍របស់ខ្លួនថា “ខ្ញុំជឿជាក់អ្នកនយោបាយទាំងអស់ ពិតជាមិនធ្វើឱ្យប្រទេសជាតិធ្លាក់ចុះជាថ្មីម្ដងទៀត ព្រោះបើតាមស្ដាប់អំពីជំហររបស់គណៈបក្សនីមួយៗ គឺម្នាក់សុទ្ធតែស្រឡាញ់ប្រ ទេសជាតិដូចៗគ្នា។ ទោះជាគណៈបក្សណាឈ្នះក៏ដោយសុំកុំឱ្យមានសង្គ្រាមឱ្យសោះ ហើយធ្វើយ៉ាងណាឱ្យនិស្សិតមានការងារធ្វើ ផង”។
- លោក ខុន ពិសិដ្ឋ អ្នករកស៊ីគួកជេរដីបាននិយាយថា “ខ្ញុំបន់ឱ្យតែការបោះឆ្នោតបានរួចរាល់ឆាប់ៗនេះទេ ព្រោះនៅពេល ជិតបោះឆ្នោតរបររកស៊ីរបស់ខ្ញុំត្រូវរាំងស្ទះ ព្រោះអ្នកវិនិយោគដីធ្លីមួយចំនួននៅទ្រឹងរង់ចាំមើលលទ្ធផលបោះឆ្នោត។ ខ្ញុំក៏មានការភ័យ ខ្លាចណាស់ដែរ ខ្លាចគណបក្សមិនចុះសម្រុងគ្នា សេដ្ឋកិច្ចធ្លាក់ចុះ ជីវភាពរបស់ខ្ញុំនឹងមានបញ្ហាមិនខាន”។
- អ្នកនាង ជា សុខា ជាស្ដ្រីមេផ្ទះក៏បានបញ្ជាក់ពីអារម្មណ៍របស់ខ្លួនថា “គិតដល់ពេលបោះឆ្នោតខ្ញុំចេះតែភ័យខ្លាច ខ្ញុំបាន ទិញសម្ភារៈចាំបាច់មួយចំនួនទុក ជាពិសេសអង្ករ និងម្ហូបអាហារ។ សូម្បីតែលុយដែលទុក្ខនៅធនាគារក៏ដកមួយចំនួនទុកជាប់និងខ្លួន ដែរ”។
រូបភាពទស្សនាវដ្ដីសុខភាពយើង
ជំហររបស់គណៈបក្សនីមួយៗ
ទាក់ទងនឹងការយល់ឃើញរបស់ប្រជាពលរដ្ឋមួយចំនួនខាងលើដែលបានសម្ដែងការព្រួយបារម្ភនោះ មន្ដ្រីគណបក្សធំៗ ទាំង៣ ដែលមានអសនៈនៅក្នុងរដ្ឋសភាជាតិបញ្ជាក់ពីជំហរយ៉ាងដូច្នេះថា ៖
1 . ឯកឧត្ដម ខៀវ កញ្ញារិទ្ធ រដ្ឋមន្ដ្រីក្រសួងព័ត៌មាន និងជាអ្នកនាំពាក្យ រាជរដ្ឋាភិបាល បានមាន ប្រសាសន៍ថា “ខ្ញុំជឿថា ការបោះឆ្នោតនឹងប្រព្រឹត្ដទៅដោយរលូន និងគ្មានអំពើហិង្សា ព្រោះកម្ពុជាបានឆ្លងកាត់ការបោះឆ្នោត៣ដងរួចមកហើយ អាចចាត់ទុក ថាមានបទពិសោធន៍គ្រប់គ្រាន់ក្នុងការបោះឆ្នោត ម្យ៉ាងវិញទៀតអ្នកនយោបាយគ្រប់គណបក្សទាំងអស់សុទ្ធតែមានភាពចាស់ទុំជាង មុនច្រើនហើយដែរ”។
2 . ឯកឧត្ដម លឺ ឡាយស្រេង ឧបនាយករដ្ឋមន្ដ្រី និងជារដ្ឋមន្ដ្រី ក្រសួងអភិវឌ្ឍន៍ ជនបទបាន បញ្ជាក់ថា “ខ្ញុំគិតថាមិនអីទេ ព្រោះយើងទាំងអស់គ្នាធ្វើការជាមួយគ្នាក៏ច្រើនឆ្នាំមកហើយ យើង គួរតែរួមរួបគ្នាកសាងប្រទេសជាតិ។ សូមប្រជាពលរដ្ឋទាំងអស់កុំ ភិតភ័យ ហើយទៅបោះឆ្នោតឱ្យបានគ្រប់ៗគ្នា”។
3 . ឯកឧត្ដម ស៊ុន ឆ័យ តំណាងរាស្ដ្រគណបក្សសមរង្សីបានបញ្ជាក់ថា “អ្នកនយោបាយរបស់យើងមានភាពចាស់ទុំជាង មុនច្រើន ម្ល៉ោះហើយមិនមានរឿងអ្វីកើតឡើង តែនៅពេលបោះឆ្នោតអ្នកណាឈ្នះអ្នកនោះដឹកនាំប្រទេស”។
សូមទៅបោះឆ្នោតទាំងអស់គ្នា
នៅចុងខែកក្កដានេះ សូមប្រជាពលរដ្ឋទាំងអស់ទៅចូលរួមបោះឆ្នោតដើម្បីជ្រើសរើសអ្នកតំណាងរាស្ដ្រដែលលោកអ្នកគិត ថា មានសមត្ថភាពគ្រប់គ្រាន់ដើម្បីដឹកនាំប្រទេសបាន។ ជាពិសេសជាងនេះទៅទៀតសូមស្ងប់អារម្មណ៍ ព្រោះការបោះឆ្នោតនឹង ប្រព្រឹត្ដទៅដោយសេរី និងយុត្ដិធម៌ក្រោមក្រសែភ្នែកអ្នកសង្កេតការជាតិ និងអន្ដរជាតិ។
ប្រភព ៖ ទស្សនាវដ្តី សុខភាពយើង លេខ៣០ ខែកក្កដា ឆ្នាំ២០០៨
Leave a Reply