សរសៃសក់ទន់រលោងស្រស់ស្អាតអាស្រ័យលើការយកចិត្ដទុកដាក់ថែរក្សាឱ្យបានល្អ។ ប៉ុន្ដែទោះជាយ៉ាងណាក៏ដោយគ្មាន អ្នកណាម្នាក់អាចចៀសផុតឡើយពីសក់មានបញ្ហា។ សក់ខ្លាញ់អាចបណ្ដាលមកពីប្រការជាច្រើនក្នុងការរស់នៅប្រចាំថ្ងៃ ឬក៏ការប្រើ ផលិតផលខុស។ ប្រសិនបើលោកអ្នកមានបញ្ហាបែបនេះអាចធ្វើឱ្យបាត់បង់ឱកាសមួយចំនួនដូចជាពិបាកក្នុងការតុបតែងសក់ ជាដើម។
លោកស្រី មាស ម៉ូលីណា ម្ចាស់ហាងម៉ូលីណាអ៊ុតសក់បានចូលរួមបកស្រាយជូនលោកអ្នកអានឱ្យបានជ្រាបអំពីសក់ខ្លាញ់ តាមរយៈជួបជាមួយទស្សនាវដ្ដី សុខភាពយើង។
មូលហេតុដែលបង្កឱ្យមានសក់ខ្លាញ់
សក់ខ្លាញ់អាចបណ្ដាលមកពីការរស់នៅប្រចាំថ្ងៃដោយខ្វះអនាម័យចំពោះសរសៃសក់។ កង្វះអនាម័យអាចកើតចេញមកពីការយកដៃមិនស្អាតទៅអេះស្បែកក្បាល ឬប៉ះសរសៃសក់។ ម្យ៉ាងទៀតវាអាចកើតចេញមកពីស្បែកក្បាលដែលមានបញ្ហាកមរមាស់ កន្ទួល អង្គែជាដើម។ ចំណែកការជ្រើសរើសផលិតផលប្រើប្រាស់ជាប្រចាំដែលទាក់ទងនឹងសរសៃសក់ក៏ជាប្រការសំខាន់នៅក្នុងបញ្ហា សក់ខ្លាញ់នេះផងដែរ។ ជាមួយគ្នានេះ ប្រសិនបើលោកអ្នកមិនសូវកក់សម្អាតសក់ទេនោះជាការងាយស្រួលដែលកម្ទេចធូលីប៉ះនឹង សរសៃសក់នាំឱ្យកើតជាអង្គែ និងខ្លាញ់សក់បាន។
វិធីការពារមិនឱ្យសក់ខ្លាញ់
វិធីការពារសក់ខ្លាញ់ត្រូវពឹងផ្អែកទៅលើការកម្ចាត់មូលហេតុបង្ក។
1 . ប្រសិនបើលោកអ្នកមានបញ្ហាសក់ខ្លាញ់បណ្ដាលមកពីស្បែកក្បាលត្រូវទៅជួបគ្រូពេទ្យមានជំនាញដើម្បីពិនិត្យនិង ព្យាបាលបំបាត់ជាតិខ្លាញ់នៅលើសក់។
2 . លោកអ្នកគួរតែរើសសាប៊ូដែលត្រូវជាមួយស្បែកក្បាល និងសរសៃសក់ហើយមិនគួរឧស្សាហ៍ផ្លាស់ប្ដូរសាប៊ូឡើយ ចំពោះប្រេងជំនួយសក់ក៏មិនត្រូវប្រើជាញឹកញាប់ពេកដែរ។
3 . គួរធ្វើអនាម័យដៃឱ្យបានស្អាតមុនពេលយកដៃទៅប៉ះជាមួយសរសៃសក់ ឬស្បែកក្បាល។
ផលរំខានពេលសក់ខ្លាញ់
លោកអ្នកមួយចំនួនដែលមានសក់ខ្លាញ់ធ្វើឱ្យពិបាកក្នុងការថែរក្សា ព្រមទាំងបង្កឱ្យមានការរមាស់ដល់ស្បែកក្បាលរហូត ក្លាយជាដំបៅក៏មាន។ ចំពោះការតុបតែងសក់ក៏អាចមានការរំខាន ព្រោះម៉ូតសក់ខ្លះសក់ខ្លាញ់មិនអាចតុបតែងបានទេ។
ដំបូន្មានអ្នកប្រឹក្សា
ដើម្បីថែរក្សាសក់ឱ្យចៀសផុតពីបញ្ហាខ្លាញ់សក់ លោកអ្នកគួរតែប្រើផលិតផលដែលជួយកម្ចាត់ជាតិខ្លាញ់ចេញពីស្បែក ក្បាល និងសរសៃសក់។ ពេលងូតទឹកគប្បីឧស្សាហ៍កក់សក់ឱ្យបានញឹកញាប់ដើម្បីជួយកាត់បន្ថយជាតិខ្លាញ់នៅលើសរសៃសក់ តែមិន គួរប្រើប្រេងអប់សក់ឡើយ។
ប្រភព ៖ ទស្សនាវដ្តី សុខភាពយើង លេខ០២៦ ខែមីនា ឆ្នាំ២០០៨
Leave a Reply