ជម្ងឺដុះសាច់ច្រមុះតាមពិតមិនមែនជាជម្ងឺដុះសាច់បន្ថែមនោះទេ តែវាជាការរីកប៉ោងរបស់សាច់ច្រមុះ ដែលបណ្ដាលមកពី ឈាមច្រាលក្នុងសាច់ច្រមុះខ្លាំង ធ្វើឱ្យសាច់ច្រមុះរីកធំខុសពីធម្មតា ឬប៉ោងហើយក្រិននាំឱ្យស្ទះរន្ធច្រមុះ និងពិបាកនៅក្នុងការដក ដង្ហើម។ ជួនកាលវាអាចរីកសាច់ច្រមុះទាំងអស់ដែលមាននៅក្នុងច្រមុះដោយរួមមានសាច់ច្រមុះខាងក្រោម កណ្ដាល និងខាងលើ ដែលជាទូទៅឧស្សាហ៍ឃើញកើតមាននៅខាងក្រោម។ ករណីដុះសាច់ច្រមុះភាគច្រើនកើតនៅលើមនុស្សពេញវ័យ និងមនុស្សចំណាស់ចាប់ពីអាយុ៥០ឆ្នាំឡើងទៅ ចំពោះក្មេងអាយុក្រោម១៥ឆ្នាំមិនសូវឃើញកើតមានទេ ពួកគេគ្រាន់តែកើតរលាកច្រមុះធម្មតា តែការលាកយូរៗទៅក៏អាចនាំឱ្យដុះសាច់ច្រមុះដូចគ្នាដែរ។
កាលពីលេខមុនៗ លោកអ្នកនាងកញ្ញាបានជ្រាបអំពីបទពិសោធន៍របស់អ្នកជម្ងឺជាច្រើនបន្ដបន្ទាប់រួចមកហើយ។ ជាមួយ គ្នានេះ ទស្សនាវដ្ដី សុខភាពយើង បានជួបជាមួយលោក វាសនា អាយុ២៥ឆ្នាំ រស់នៅខេត្ដស្វាយរៀង។ លោកបានរៀបរាប់អំពីផលលំបាកនៃជម្ងឺដុះសាច់ច្រមុះ ដើម្បីឱ្យមិត្ដអ្នកអានបានជ្រាបកាន់តែច្បាស់អំពីបញ្ហានេះ។
លោក វាសនា បានរៀបរាប់ឱ្យដឹងថា លោកមិនដឹងថាលោកកើតមានជម្ងឺនេះតាំងពីពេលណាមកនោះទេ ប៉ុន្ដែ៥ខែមកនេះលោកតែងតែមានអាការៈតឹងច្រមុះជាប់គ្នារហូត តែលោកមិនបានចាប់អារម្មណ៍នោះទេ ដោយលោកគិតថាវាជាជម្ងឺផ្ដាសាយ។ អាការៈតឹងច្រមុះនេះនៅតែបន្ដរហូតមិនព្រមបាត់សោះ ដែលធ្វើឱ្យលោកពិបាកនៅក្នុងការដកដង្ហើម មិនត្រឹមតែប៉ុណ្ណោះវាបណ្ដាលឱ្យលោកឈឺក្បាលខ្លាំងថែមទៀតផង។ អាការៈនេះចេះតែបន្ដមិនឈប់ ទោះបីជាលោកទទួលទានថ្នាំផ្ដាសាយក៏នៅតែមិនបាត់ លោកក៏មានការសង្ស័យថា លោកអាចនឹងកើតមានជម្ងឺដុះសាច់ច្រមុះ លោកក៏សម្រេចចិត្ដទៅមន្ទីរពេទ្យដើម្បីពិនិត្យមើលសុខភាព។ លទ្ធផលចេញមកគឺលោកមានជម្ងឺដុះសាច់ច្រមុះ។ នៅមុនពេលព្យាបាល គ្រូពេទ្យឱ្យលោកទទួលទានថ្នាំរយៈពេលបីថ្ងៃ បន្ទាប់ពីបីថ្ងៃ ក្រោយមកលោកក៏មកធ្វើការដុតសាច់ច្រមុះចេញ។ លោក វាសនា បានរម្លឹកបន្ថែមទៀតថា នៅពេលធ្វើការព្យាបាលលោកពិបាក ខ្លាំងណាស់ ទ្រាំស្ទើរតែមិនបាន។ នៅពេលដុតសាច់ច្រមុះហើយ គ្រូពេទ្យបានឱ្យលោកទទួលទានថ្នាំរយៈពេល១០ថ្ងៃ។
លោក វាសនា បានបន្ថែមទៀតថា កាលដែលលោកមានជម្ងឺដុះសាច់ច្រមុះប្រហែលជាអាចបណ្ដាលមកពីទឹកកក ព្រោះ លោកជាមនុស្សម្នាក់ដែលចូលចិត្ដទទួលទានទឹកកកបំផុត ខ្វះមួយថ្ងៃមិនបាននោះទេ។
យោបល់របស់អ្នកជំនាញ
លោកវេជ្ជបណ្ឌិត ឃុត ស៊ីដេត គ្រូពេទ្យព្យាបាលជម្ងឺត្រចៀក ច្រមុះ បំពង់ក នៅមន្ទីរពេទ្យមិត្ដភាពខ្មែរ-សូវៀត បានមាន ប្រសាសន៍ប្រាប់ទស្សនាវដ្ដី សុខភាពយើង ថាពាក្យខ្មែរយើងហៅថាដុះសាច់ច្រមុះ តាមពិតវាមិនមែនដុះសាច់ច្រមុះនោះទេ វាកើតមានពីកំណើតមកម្ល៉េះដោយកើតមាននៅលើមនុស្សគ្រប់រូប ដោយរន្ធច្រមុះម្ខាងមានបី ខាងលើ ខាងកណ្ដាល និងខាងក្រោម។ ហើយខាងក្រោមនេះហើយទើបគេហៅថា ដុះសាច់ច្រមុះ។ ជម្ងឺដុះសាច់ច្រមុះនេះគឺមានពីរយ៉ាង ទី១ អ្នកជម្ងឺអាចដឹងខ្លួនឯងបាន ដោយមានអាការៈតឹងច្រមុះ ហៀរសម្បោរ ឈឺក្បាលខ្លះ វិលមុខជាដើម។ ទី២ ទាល់តែគ្រូពេទ្យឯកទេសពិនិត្យមើលទើបដឹងថា អ្នកជម្ងឺកើតមានដុះសាច់ច្រមុះឬក៏អត់។ កាលណាលោកអ្នកទទួលទានទឹកកក របស់ត្រជាក់ៗ ឬក៏អាហារផ្អាប់ នោះសាច់ច្រមុះគឺវា អាចរីកធំ ហើយសាច់ច្រមុះដែលរីកនោះគឺវាមានផលប្រយោជន៍ផងដែរ ដូចជាជួយទប់ធូលីដី និងទប់ខ្យល់។ ប៉ុន្ដែបើវារីកដុះ ធំពេកនោះក៏វាមិនល្អដែរ វាអាចធ្វើឱ្យអ្នកជម្ងឺវិលមុខ តឹងច្រមុះ ដែលពិបាកនៅក្នុងការដកដង្ហើម និងឈឺក្បាលជាដើម។ ដូចនេះចំពោះអ្នកដែលតឹងច្រមុះមិនត្រូវទទួលទានទឹកកក ត្រូវទទួលទានទឹកក្ដៅឧណ្ហៗវិញ។ ចំពោះថ្នាំក៏មិនអាចព្យាបាលជាមួយ រយភាគរយដែរ វាគ្រាន់តែអាចទប់ស្កាត់បានមួយរយៈតែប៉ុណ្ណោះ។ ហើយដើម្បីការពារកុំឱ្យកើតមានជម្ងឺដុះសាច់ច្រមុះ លោកអ្នកនាងកញ្ញាត្រូវអនាម័យជានិច្ចចំពោះច្រមុះ ជាពិសេសនៅពេលដែលចេញទៅណាមកណាម្ដងៗ ត្រូវតែពាក់ម៉ាសដើម្បីការពារ កុំឱ្យធូលីចូលក្នុងច្រមុះ និងមិនត្រូវទទួលទានទឹកកក និងអាហារផ្អាប់នោះទេ។
Leave a Reply