ការរត់មានច្រើនប្រភេទ ហើយនរណាក៏អាចរត់បានដែរ សូម្បីតែក្មេងអាយុ២ឆ្នាំ។ ការរត់មានលក្ខណៈផ្សេងៗគ្នាដូចជា ការរត់ធម្មតា និងរត់តាមបែបហាត់កីឡា។ ការរត់បែបកីឡាបានប្រព្រឹត្ដទៅតាមកម្លាំង មនុស្សតូចធំ ធាត់ និងស្គម។ វាអាចផ្ដល់នូវ អត្ថប្រយោជន៍៎ជាច្រើន ប៉ុន្ដែការរត់ក៏អាចផ្ដល់នូវផលវិបាក ប្រសិនបើមិនបានគោរពទៅតាមការណែនាំពីអ្នកបច្ចេកទេសឱ្យបានត្រឹម ត្រូវនោះទេ វាអាចបណ្ដាលឱ្យមានបញ្ហាច្រើនទៅថ្ងៃក្រោយជាមិនខាន។
ដើម្បីឱ្យកាន់តែជ្រាបច្បាស់ទាក់ទងទៅនឹងសុខភាពកីទ្បានៃការរត់ ទស្សនាវដ្ដី សុខភាពយើងសូមបង្ហាញជូនលោកអ្នក តាមរយៈបទសម្ភាសន៍ជាមួយលោក ឡុង ស៊ីវ៉ាន់ អ្នកគ្រប់គ្រងនៅក្លឹបកីឡា វីអាយភី បានធ្វើការបកស្រាយនិងផ្ដល់ជូនចំណេះដឹង ស្ដីពីកីឡារត់។
កីឡារត់ត្រឹក ជាអ្វី?
រត់ជាកាយវិការមួយឈានឆ្ពោះទៅមុខ ដែលមានលក្ខណៈប្លែកៗពីគ្នាទៅតាមការជ្រើសរើសរបស់មនុស្សម្នាក់ៗ។ ការរត់ មានច្រើនបែបច្រើនសណ្ឋាន ដូចជាការរត់យឺត ការរត់លឿន រត់ប្រយោលជាដើម។ ការរត់យឺតៗគឺជាចលនាមួយដែលប្រកបទៅ ដោយភាពសន្សឹមៗដែលធ្វើឡើងដោយកម្លាំងខ្សោយ និងយឺត សមស្របសម្រាប់មនុស្សធាត់និងស្គម។
ពេលវេលាដែលត្រូវហាត់រត់ត្រឹកៗ
ទោះបីជាលោកអ្នកមានការមមាញឹក និងការងារប្រចាំថ្ងៃយ៉ាងណាក៏ដោយ ក៏លោកអ្នកគួរចេះប្រើវេលាមួយរយៈតូច ដោយចំណាយពេលប្រហែលពី១៥ទៅ២០នាទី ធ្វើការហាត់ប្រាណសម្រាប់ចលនាដើម្បីរាងកាយ។ លោកអ្នកអាចចាប់ផ្ដើមហាត់រត់ យឺតៗនៅពេលព្រឹកព្រលឹម និងពេលរសៀល ព្រោះវេលានេះជាពេលដែលលោកអ្នកសម្រាកពីការងារនិងជាពេលវេលាមួយសម ស្របសម្រាប់វឹកហាត់ផងដែរ។
- រត់នៅពេលព្រឹកព្រលឹម ៖ ជាវេលាដែលលោកអ្នកទើបតែភ្ញាក់ពីដំណេក អារម្មណ៍នៅមិនទាន់ជ្រះស្រឡះរីឯចលនា ឈាម និងសរសៃដៃជើងក៏ត្រូវចាប់ផ្ដើមដំណើរការ នៅខណៈនោះដែរ។ ព្រឹកព្រលឹមជាវេលាដែលលោកអ្នកទទួលបាននូវភាពស្រស់ បំព្រងពីអំណោយធម្មជាតិ និងបរិយាកាសល្អបរិសុទ្ធហើយស្មារតីក៏មានភាពភ្លឺថ្លាជាងពេលណាៗទាំងអស់។ លោកអ្នកគួរចាប់ផ្ដើម អនុវត្ដន៍លំហាត់ប្រាណដោយរត់យឺតៗសន្សឹមៗបន្ដិចម្ដងៗ កុំរត់ដោយបង្ខំ ព្រោះអាចបណ្ដាលឱ្យមានគ្រោះថ្នាក់ប៉ះពាល់ដល់ចង្វាក់ បេះដូង។
- រត់នៅពេលរសៀល ៖ ប្រសិនបើតុល្យភាពចំណីអាហារក្នុងសារពាង្គកាយរបស់លោកអ្នកបានពីការទទួលទានអាហារ ពេលថ្ងៃត្រង់គ្រប់គ្រាន់បរិបូរណ៍ លោកអ្នកអាចធ្វើការហាត់ប្រាណដោយរត់យឺតៗហើយលោកអ្នកមិនគួរទទួលទានចំណីអាហារ បន្ថែមនៅពេលរសៀលនោះទេ។
អត្ថប្រយោជន៍នៃការរត់ត្រឹកៗ
ការរត់ត្រឹកៗ ឬយឺតៗមានផលប្រយោជន៍ច្រើនសម្រាប់លោកអ្នក ដូចជា ៖
- ជួយសម្រួលដល់ដំណើរឈាមរត់ចុះឡើងបានល្អ
- ជួយរក្សាចង្វាក់បេះដូងឱ្យមានសភាពប្រក្រតី
- ទប់ស្កាត់ការឡើងទម្ងន់ និងជួយបញ្ចេញជាតិខ្លាញ់ និងជាតិពុលពីខាងក្នុងសរីរាង្គមកខាងក្រៅ
- អាចទប់ស្កាត់ការឱនងើបមិនរួចនៅពេលចាស់ជរា
- សម្រួលដល់ចលនាដង្ហើម និងសរីរាង្គគ្រប់ផ្នែកឱ្យមានភាពល្អប្រសើរ។
ប្រការគួរចៀសវាងពេលរត់ត្រឹកៗ
ការរត់យឺតៗធ្វើឱ្យលោកអ្នកមានអារម្មណ៍ភ្លឺថ្លា កាយសម្បទារឹងមាំ និងមានសុខភាពល្អ បើការហាត់រត់របស់លោកអ្នក បានប្រព្រឹត្ដិទៅដោយភាពត្រឹមត្រូវតាមលក្ខណៈបទដ្ឋាន។ ផ្ទុយទៅវិញបើការអនុវត្ដន៍របស់លោកអ្នកមិនបានត្រឹមត្រូវ លោកអ្នកនឹង ជួបនូវបញ្ហាខ្លះៗមិនខាន។ ផលប៉ះពាល់នៃកីឡាដែលធ្លាប់កើតឡើងជារឿយៗមានដូចជា ៖
- ការទទួលទានអាហារហើយចាប់ផ្ដើមហាត់ភ្លាម ៖ ជាផលអាក្រក់ចំពោះសុខភាពបំផុត កាលណាលោកអ្នកទទួលទានអា ហារហើយលោកអ្នកហាត់រត់ភ្លាមៗតែម្ដង នោះអាចបង្កឱ្យលោកអ្នកមានជម្ងឺឈឺក្រពះជាមិនខានឡើយ។
- សម្ភារៈកីឡាមិនត្រឹមត្រូវ ៖ សម្ភារៈមួយចំនួនសម្រាប់ប្រើប្រាស់មានដូចជាស្បែកជើងសម្រាប់ហាត់កីឡាគួរមានបង្កប់ ខ្យល់ ព្រោះវាអាចជំនួយដល់សរីរាង្គលោកអ្នកនៅពេលចាស់់ជរា លោកអ្នកមិនគួរចេះតែពាក់ស្បែកជើងតាមចិត្ដនឹកឃើញនោះទេ ព្រោះវាអាចបណ្ដាលឱ្យលោកអ្នកជួបនូវបញ្ហារលាកឆ្អឹងកែងជើង ឆ្អឹងខ្នង និងឆ្អឹងជង្គង់ជាដើម។
- សម្លៀកបំពាក់កីឡា ៖ នៅពេលធ្វើកីឡា ទោះជាកីឡាប្រភេទណាក៏ដោយក៏អាចជួយបញ្ចេញជាតិញើសពីខាងក្នុងមក ដែរ ដូចនេះលោកអ្នកគួរជ្រើសរើសសម្លៀកបំពាក់ដែលផលិតពីក្រណាត់យឺតព្រោះវាជាចំណែកមួយដែលអាចជួយបង្ខំជាតិញើសជា សារធាតុពុលនៅក្នុងខ្លួនចេញមកខាងក្រៅ។ ម្យ៉ាងទៀតក្រណាត់យឺតបឺតយកជាតិញើសចូលទៅក្នុងសាច់ក្រណាត់បានល្អទប់ស្កាត់ជម្ងឺ មួយចំនួនដែលអាចកើតមាន ថែមទាំងផ្ដល់ភាពងាយស្រួលនៅពេលហាត់ទៀតផង។
ដំបូន្មានអ្នកជំនាញ
លោកអ្នកដែលពុំសូវមានពេលវេលាទំនេរគ្រប់គ្រាន់ គួរគប្បីចំណាយពេលពី២០ទៅ៣០នាទី ដើម្បីហាត់ប្រាណសម្រាប់ សុខភាព និងរាងកាយរបស់លោកអ្នក។ លោកអ្នកគួរតែអញ្ជើញទៅជួបជាមួយគ្រូបង្វឹកកីឡា ឬអ្នកជំនាញដើម្បីទទួលព័ត៌មានខ្លះៗ ស្ដីពីការលេងកីឡាគ្រប់ប្រភេទ មុនចាប់ផ្ដើមហាត់កីឡា។ ម្យ៉ាងទៀតលោកអ្នកគួរពិនិត្យមើលទម្ងន់នៃដងខ្លួន កម្លាំង និងសម្ភារៈ កីឡាដែលត្រូវប្រើប្រាស់ជាមុនសិន មុនចាប់ផ្ដើមហាត់។
ប្រភព ៖ ទស្សនាវដ្តី សុខភាពយើង លេខ០១៩ ខែសីហាឆ្នាំ២០០៧
Leave a Reply