ឃាតកម្មប្លន់សម្លាប់តែងកើតមានជាហូរហែនៅក្នុងប្រទេសកម្ពុជាពីមួយថ្ងៃទៅមួយថ្ងៃ។ ការប្លន់ពីសំណាក់ជនមិនស្គាល់មុខវាគឺមិនសូវជាបញ្ហាក្តៅគគុកប៉ុន្មាននោះទេសម្រាប់សង្គមកម្ពុជា ពីព្រោះគេសឹងតែបានដឹងឮករណីទាំងនោះជារឿយៗរួចមកហើយ។ តែករណីលួចប្លន់ ហើយចាក់សម្លាប់សង្សាររបស់ខ្លួន ទើបជាហេតុការណ៍ដ៏គួរឲ្យសាហាវ និងជាបទពិសោធន៍មួយសម្រាប់ប្រជាជនខ្មែរត្រិះរិះគិតពិចារណាការទុកចិត្តចំពោះមនុស្សណាម្នាក់។
មន្ត្រីយោធាម្នាក់ត្រូវនគរបាលប៉ុស្តិ៍ទឹកល្អក់ទី៣ ចាប់ខ្លួនកាលពីវេលាម៉ោង១០ព្រឹក ថ្ងៃទី៤ មេសា នៅផ្ទះកុងស៊ីបញ្ចាំលេខ៧AE0 ផ្លូវលេខ១៨៦ សង្កាត់ទឹកល្អក់ទី៣ ខណ្ឌទួលគោក ភ្នំពេញ បន្ទាប់ពីធ្វើសកម្មភាពនាំសង្សារទៅចាក់សម្លាប់នៅតាមផ្លូវលេខ៥៩៨ ខណ្ឌឫស្សីកែវ ប្លន់យកម៉ូតូម៉ាកគុបសេ៥០ ពណ៌ទឹកប៊ិច១គ្រឿងទៅដាក់បញ្ចាំ ។ នេះបើយោងតាមការចេញផ្សាយរបស់សារព័ត៌មានកោះសន្តិភាព។
ក្នុងសកម្មភាពដែលត្រូវចោទថាប្លន់នោះ គឺបន្ទាប់ពីមន្រ្តីយោធារូបនេះបានប្រើកាំបិតចុងស្រួចចាក់ទៅលើនាងជាសង្សាររបស់ខ្លួនចំនួន៤កាំបិតនៅកណ្តាលដីឡូត៍មួយកន្លែង ហើយស្មានតែស្លាប់ក៏យកម៉ូតូជិះគេចខ្លួន តែក្រោយមកស្ត្រីជាសង្សារបានមកដាក់ពាក្យប្តឹង ទើបឈានដល់ការចាប់ឃាត់ខ្លួនតែម្តង ។ នៅក្នុងការចាប់ខ្លួននេះសមត្ថកិច្ចក៏បានឃាត់ខ្លួនបុរសម្នាក់ទៀត ដែលជាអ្នកជូនទៅយកប្រាក់ពីកុងស៊ីផងដែរ ។
ជនសង្ស័យចាក់សម្លាប់សង្សារប្លន់យកម៉ូតូនោះឈ្មោះ ម៉ន ច័ន្ទដារ៉ា អាយុ២៤ឆ្នាំ ជាមន្ត្រីយោធាសក្តិ១ មានទីលំនៅផ្ទះលេខ៣៦៥ ផ្លូវលេខ៩៣ សង្កាត់អូរឫស្សីទី៤ ខណ្ឌ៧មករា ភ្នំពេញ។ ចំណែកស្រ្តីជាសង្សារឈ្មោះ ហុក សុលក្ខិណា អាយុ២២ឆ្នាំ ជាអ្នកលក់ថ្នាំពេទ្យនៅផ្សារតាប៉ាងស្នាក់នៅផ្ទះជួល ផ្លូវលេខ២៦១ សង្កាត់បឹងសាឡាង ខណ្ឌទួលគោក ភ្នំពេញ រងរបួសចំនួន៤កាំបិតប៉ុន្តែសំណាងល្អត្រូវបានសង្គ្រោះទាន់ពេលបានរួចជីវិត។
តាមប្រភពព័ត៌មានឱ្យដឹងថា ទាក់ទិននឹងការចាក់សម្លាប់ស្រ្តីជាសង្សារប្លន់យកម៉ូតូនេះ ទំនងជាមានលាយឡំដោយគំនុំផងដែរ ។ បន្ទាប់ពីត្រូវចាប់ខ្លួន ម៉ូតូម៉ាកគុប១គ្រឿងត្រូវបានសមត្ថកិច្ចដកហូតបានមកវិញ ។ តាមព័ត៌មានបានឱ្យដឹងថា កាលពីវេលាម៉ោង១០យប់ថ្ងៃទី៣ មេសា ជនសង្ស័យឈ្មោះ ម៉ន ច័ន្ទដារ៉ា បាននាំសង្សារឈ្មោះ ហុក សុលក្ខិណា ដើរលេងហើយនាំទៅកន្លែងស្ងាត់តាមផ្លូវលេខ៥៩៨ ក្នុងខណ្ឌឫស្សីកែវ រួចបានធ្វើសកម្មភាពចាក់សម្លាប់ប្លន់យកម៉ូតូជិះគេចខ្លួនតែម្តង ។ លុះក្រោយមក ជនរងគ្រោះបានដឹងខ្លួនវិញ ឱ្យអ្នករត់ម៉ូតូឌុបជួយដឹកទៅកាន់មន្ទីរពេទ្យសន្តិភាពនៅសង្កាត់ស្វាយប៉ាក ព្យាបាលរបួសហើយបានប្តឹងប៉ូលិសខណ្ឌទួលគោក ។
តាមព័ត៌មានបន្តទៀតថា បន្ទាប់ពីទទួលព័ត៌មាន ប៉ូលិសខណ្ឌទួលគោកបានទាក់ទងទៅប៉ុស្តិ៍ទឹកល្អក់ទី៣ ដើម្បីត្រួតពិនិត្យតាមកុងស៊ី ទើបឈានទៅឃាត់ខ្លួនជនសង្ស័យដែលយកម៉ូតូជនរងគ្រោះទៅដាក់បញ្ចាំតម្លៃ២៥០ដុល្លារ នៅវេលាម៉ោង៧ព្រឹកថ្ងៃទី៤ មេសា ។ លុះដល់ម៉ោងប្រមាណ១០ព្រឹកជននោះបានឱ្យម៉ូតូឌុបទៅយកប្រាក់បន្ថែម៥០ដុល្លារទៀត ក៏ត្រូវប៉ូលិសប៉ុស្តិ៍ទឹកល្អក់ទី៣ ចាប់ខ្លួនបានតែម្តង ព្រមទាំងដកហូតបានម៉ូតូត្រឡប់មកវិញ ។
តាមស្ត្រីរងគ្រោះបានឱ្យដឹងថា ខ្លួនមានទំនាក់ទំនងជាមួយជនសង្ស័យរយៈពេលប្រមាណ២ឆ្នាំមកហើយដោយជននោះស្រឡាញ់នាងតែនាងពុំស្រឡាញ់ឡើយ គ្រាន់តែរាប់អានគ្នាតែប៉ុណ្ណោះ ។ កាលពីវេលាម៉ោង៤រសៀលថ្ងៃទី៣ មេសា ជនសង្ស័យឈ្មោះម៉ន ច័ន្ទដារ៉ា បានទូរស័ព្ទបបួលនាងទៅញ៉ាំអាហារ លុះដល់វេលាម៉ោងប្រមាណ៨យប់នាងបានជិះម៉ូតូគុបទៅឌុបជននោះនៅសង្កាត់បឹងត្របែក ហើយជិះម៉ូតូដើរលេងនៅកោះពេជ្រ និងនាំគ្នាទៅហូបសាច់គោអាំងនៅទួលគោករហូតដល់ម៉ោងប្រមាណ១០យប់ក៏បានជិះម៉ូតូដើរលេងតាមផ្លូវលេខ៥៩៨ ហើយចូលទៅក្នុងដីឡូត៍មួយដោយប្រាប់នាងថាចូលបត់ជើង ។
ស្រី្តរងគ្រោះបន្តទៀតថា នៅពេលនោះឈ្មោះម៉ន ច័ន្ទដារ៉ា បានចាប់នាងសួរថាស្រឡាញ់គេឬទេ និងសុំថើបតែនាងបដិសេធ ។ ភ្លាមនោះជននោះបានចាប់នាងផ្តួលលើដីរួចទាញកូនកាំបិតចាក់នាងចំនួន៣កាំបិត នាងក៏ធ្វើពុតជាស្លាប់ តែជននោះសង្ស័យបានយកដៃបើកភ្នែក និងស្តាប់ដង្ហើមច្រមុះនាង ។ ក្រោយមកគេបានចាក់នាងមួយកាំបិតទៀតរួចយកទូរស័ព្ទម៉ាក Hello ស៊ីម២មួយគ្រឿងរបស់នាង និងទាញម៉ូតូជិះគេចខ្លួនបាត់។ បន្ទាប់ពីជននោះទៅបាត់នាងបានក្រោកងើបដោះអាវខ្ទប់ឈាមដើរចេញមកក្រៅហៅម៉ូតូឌុបជិះទៅមន្ទីរពេទ្យឯកជនសន្តិភាពដើម្បីព្យាបាលរបួស ។ ពេលត្រឡប់មកដល់ផ្ទះក៏បានដាក់ពាក្យបណ្តឹងនៅប៉ុស្តិ៍ ក្រោយមកក៏ត្រូវសមត្ថកិច្ចចាប់ខ្លួនជននោះតែម្តង ។
តាមព័ត៌មានបន្តទៀតថា នៅក្នុងការទំនាក់ទំនងគ្នា ជនសង្ស័យបានទូរស័ព្ទទៅម្តាយស្រ្តីរងគ្រោះប្រាប់ថា ក្នុងឱកាសចូលឆ្នាំខ្មែរគេនឹងឱ្យឪពុកម្តាយចូលទៅស្តីដណ្តឹងកូនស្រីគាត់តាមច្បាប់ មិននឹកស្មានថា គេហៅស្រី្តដែលខ្លួនស្រឡាញ់ទៅដើរលេង បែរជានាំទៅចាក់សម្លាប់ប្លន់យកម៉ូតូបែបនេះទេ ៕
អត្តបទដោយ ៖ សៀង វិរៈ
ចេញផ្សាយ ៖ ថ្ងៃទី ៦ មេសា ឆ្នាំ ២០១២
Leave a Reply