ដើម្បីរួមចំណែកទប់ស្ដាត់ការរាលដាលជម្ងឺអេដស៍នៅកម្ពុជា ទស្សនាវដ្ដី សុខភាពយើង បានជួបសម្ភាសន៍ជាមួយ លោកវេជ្ជបណ្ឌិត ណុប សុធារ៉ា ជាប្រធានផ្នែកទំនាក់ទំនងសាធារណៈ នៃអង្គការអន្ដរជាតិបម្រើសុខភាពប្រជាពលរដ្ឋ ភីអេស អាយ។
ស្រោមអនាម័យ ជាអ្វី?
ស្រោមអនាម័យ គឺជាកៅស៊ូយឺតមានជាតិឡាតិច ផលិតឡើងដោយក្រុមហ៊ុនជាច្រើននៅលើពិភពលោក។ ស្រោម អនាម័យមានច្រើនប្រភេទ ច្រើនយីហោ ច្រើនសណ្ឋាន មានប្រយោជន៍ និងតម្លៃផ្សេងៗគ្នា ដូចជាស្រោមអនាម័យគ្រើម ស្រោម អនាម័យជាតិស្បែកតិចជាដើម។ ស្រោមអនាម័យប្រើប្រាស់ដើម្បីបង្ការការមានផ្ទៃពោះ ការឆ្លងមេរោគអេដស៍ ឬមេរោគឆ្លង តាមរយៈការរួមភេទ។ ស្រោមអនាម័យមានប្រសិទ្ធភាពអាចបង្ការបានខ្ពស់ ប្រសិនបើប្រើប្រាស់បានត្រឹមត្រូវ។ ស្រោមអនាម័យដែលមានស្ដង់ដាសម្រាប់ប្រជាពលរដ្ឋកម្ពុជា គឺមុខកាត់៤៩បូក ឬដក២មីលីម៉ែត្រ និងឆ្លងកាត់ការធ្វើតេស្ដសាកល្បងពី លក្ខណៈស្ដង់ដានោះ។
អត្ថប្រយោជន៍របស់ស្រោមអនាម័យ
តាមការសិក្សាស្ដីពីការប្រព្រឹត្ដផ្លូវភេទ ស្រោមអនាម័យអាចជួយបានច្រើនយ៉ាង ដូចជាជួយការពារមិនឱ្យមានផ្ទៃពោះរហូតដល់ទៅ៨៩% ជួយការពារមិនឱ្យឆ្លងជម្ងឺកាមរោគបានរហូតដល់៩១%ជាដើម។ មានប្រជាពលរដ្ឋប្រមាណជា៩០% ដែលបានដឹងអំពីចំណេះដឹងទាក់ទងទៅនឹងជម្ងឺអេដស៍។ បច្ចុប្បន្ននេះ សម្រាប់អ្នកដែលស្វែងរកការសប្បាយនៅតាមផ្ទះបន ការ ប្រើប្រាស់ស្រោមអនាម័យមានសារៈសំខាន់ការពារខ្លួនកុំឱ្យឆ្លងជម្ងឺកាមរោគ ពិសេសគឺជម្ងឺអេដស៍តែម្ដង។
បច្ចុប្បន្ន ការប្រើប្រាស់ស្រោមអនាម័យមានការទទួលស្គាល់ច្រើន បើប្រៀបធៀបនឹងប៉ុន្មានឆ្នាំចុងក្រោយនេះ។ ទោះ បីជាមានការយល់ឃើញខ្លះថាស្រោមអនាម័យមានការប៉ះពាល់ដល់អារម្មណ៍ផ្លូវភេទ ឬសុខភាពផ្លូវភេទ តែមិនទាន់មានការអះ អាងណាមួយអំពីកម្រិតប៉ះពាល់យ៉ាងណាទេ។ ស្រោមអនាម័យធានាសុវត្ថិភាពផ្ទាល់ខ្លួនរបស់អ្នកប្រើនៅពេលរួមភេទ។ ស្ដ្រីរក ស៊ីផ្លូវភេទខ្លះបានត្អូញត្អែរថាការប្រើប្រាស់ស្រោមអនាម័យបណ្ដាលឱ្យពួកគាត់មានអាការរមាស់។ មូលហេតុ គឺមកពីពួកគាត់ ស្ងួតទឹករំអិលដោយសារការរួមភេទច្រើនដងក្នុងមួយថ្ងៃ តែសូមជ្រើសរើសស្រោមប្រភេទថ្មីៗ ដែលមានបន្ថែមទឹករំអិលដែល អាចជួយបានមួយកម្រិត។
កម្រិតនៃការប្រើស្រោមអនាម័យ
មិនទាន់មានចម្លើយសមស្របដែលថាតើហេតុអ្វីបានជាពួកគាត់ចូលចិត្ដ ឬមិនចូលចិត្ដប្រើស្រោមអនាម័យទេ។ វាជា ការទទួលខុសត្រូវមួយរបស់អ្នកដែលប្រព្រឹត្ដិស្នេហាជាមួយដៃគូច្រើន មានជម្រើសពីរ គឺប្រើស្រោមអនាម័យពេលរួមភេទ ឬ ព្រមទទួលយកគ្រោះថ្នាក់ឆ្លងជម្ងឺកាមរោគ ឬជម្ងឺអេដស៍។ ទោះបីជាមានបុរសជាច្រើនទទួលស្គាល់ថាអត្ថប្រយោជន៍របស់ ស្រោមអនាម័យក៏ដោយ តែស្រោមអនាម័យនៅតែជាការទើសទាល់។ ការប្រើប្រាស់ស្រោមអនាម័យនឹងមានការគាំទ្រពី សំណាក់អ្នកប្រើប្រាស់ និងសង្គម។ តាមការអង្កេតស្រាវជ្រាវដែលធ្វើឡើងដោយមជ្ឈមណ្ឌលជាតិប្រយុទ្ធនឹងជម្ងឺអេដស៍ និងអង្គ ការក្រៅរដ្ឋាភិបាលដទៃទៀត បានបញ្ជាក់ពីការប្រើប្រាស់ស្រោមអនាម័យថានៅមានកម្រិតទាបក្នុងចំណោមដៃគូស្នេហាដែល មានការជឿជាក់លើគ្នា ដែលឆ្លុះបញ្ចាំងពីភាពប្រឈមមុខនឹងគ្រោះថ្នាក់នៅឡើយ។
របៀបប្រើស្រោមអនាម័យ
ទោះបីជាមានការអប់រំ និងផ្សព្វផ្សាយជាច្រើនអំពីចំណេះដឹងនៃការប្រើប្រាស់ស្រោមអនាម័យ ក៏ការប្រើប្រាស់មិន ទាន់បានត្រឹមត្រូវ១០០%ដែរ។ ការប្រើប្រាស់ដែលត្រឹមត្រូវ គឺត្រូវពិនិត្យមើលលក្ខណៈរបស់ស្រោម ចៀសវាងប្រើស្រោមខូច ទ្រង់ទ្រាយ ហួសកាលបរិច្ឆេទ ឬផុតកំណត់នៃការប្រើប្រាស់។ បើពិនិត្យឃើញមានជាតិប្រេង ឬទឹករំអិលជាប់លើកញ្ចប់ បញ្ជាក់ ថាស្រោមអាចមានបញ្ហា មិនគួរជ្រើសប្រើទេ គួរប្ដូរស្រោមអនាម័យថ្មីដែលមិនខូចគុណភាព។ វិធីប្រើប្រាស់ស្រោមអនាម័យឱ្យ បានត្រឹមត្រូវជាកត្ដាសំខាន់។ សូមចាប់ផ្ដើមដោយហែកកញ្ចប់ស្រោមដោយប្រុងប្រយ័ត្ន ការពារការដាច់ដោច ឬខូចទ្រង់ទ្រាយស្រោម រួចពាក់នៅ លើលិង្គដែលកំពុងរឹងខ្លាំង ពិសេសពេលរៀបនឹងស៊កបញ្ចូល មិនមែនពាក់ហើយនៅប្រលែងគ្នាលេងទេ ព្រោះវាអាចហួតទឹក រំអិលដែលជាប់នៅលើស្រោមអនាម័យ។ ម្យ៉ាងទៀត ការដែលពាក់ហើយទុកយូរ វាអាចនាំឱ្យលិង្គស្រក ឬលែងរឹងដែលអាច បណ្ដាលឱ្យខ្យល់ចូលក្នុងស្រោមអនាម័យដែលអាចបែក រហែក ឬរបូតពីលិង្គ។ សូមពាក់ដោយយកដៃម្ខាងកាន់ចុងថ្នក់ស្រោម អនាម័យ ហើយដៃម្ខាងទៀតពន្លាត់វាតាំងពីចុងរហូតដល់គល់លិង្គ ដោយទុកតែថ្នក់ខាងចុងនៃស្រោមអនាម័យបន្ដិចបានហើយ។ នៅលើស្រោមអនាម័យតែងតែមានជាតិទឹករំអិលដែលអាចជួយសម្រួលដល់ការស៊កបញ្ចូល និងការរួមភេទ។ បន្ទាប់ពីចេញទឹក កាមហើយ ឬក៏លិង្គចាប់ផ្ដើមស្រក ត្រូវប្រញាប់ដកលិង្គចេញ ដោយយកដៃម្ខាងកាន់គល់ស្រោមអនាម័យដោយប្រុងប្រយ័ត្ន ចៀសវាងការហៀរកំពប់ចេញទឹកកាមតាមស្រោមអនាម័យ ឬរបូតស្រោមអនាម័យ។ ត្រូវចោលស្រោមអនាម័យឱ្យមានរបៀប ចៀសវាងការចោលពាសវាលពាសកាល ព្រោះនាំឱ្យខូចបរិស្ថាន។ ដូច្នេះគួរជ្រើសរើសការប្រើប្រាស់ស្រោមអនាម័យនៅពេលដែលលោកអ្នកមានដៃគូរួមភេទច្រើន ឬនៅពេលមានការ រួមភេទជាមួយនឹងស្ដ្រីដែលរកស៊ីផ្លូវភេទ ដើម្បីសុវត្ថិភាពរបស់លោកអ្នក និងដៃគូស្នេហារបស់លោកអ្នក។ បុរសដែលចូលចិត្ដ ស្វែងរកសេវាផ្លូវភេទ គួរមានស្រោមអនាម័យជាប់នឹងខ្លួន និងប្រើប្រាស់ស្រោមអនាម័យជាប់ជានិច្ច ព្រោះពួកគាត់ងាយប្រឈម មុខនឹងគ្រោះថ្នាក់ខ្លាំងណាស់។ ស្រោមអនាម័យអាចនឹងមិនចាំបាច់ប្រើនៅពេលដែលលោកអ្នកសម្រេចចិត្ដតមរួមភេទ ឬមានដៃ គូស្នេហាត្រឹមតែមួយ ដែលបានធ្វើតេស្ដឈាមរួច ថាគ្មានមេរោគអេដស៍។
ដំបូន្មានអ្នកប្រឹក្សា
ការរួមភេទសប្បាយបានតែមួយភ្លែត តែបើគ្មានសុវត្ថិភាព វាអាចមានផលប៉ះពាល់ដល់សុខភាពរាងកាយ ឬផលវិបាក ផ្សេងៗក្រោយពេលរួមភេទជាមិនខាន។ ការប្រើស្រោមអនាម័យជាជម្រើសមួយដ៏ឈ្លាសវៃ មានសុវត្ថិភាព និងមិនបង្កឱ្យមាន ការបាត់បង់អារម្មណ៍ក្នុងការរួមភេទនោះទេ។ ហើយការប្រើប្រាស់នេះបញ្ជាក់ពីការទទួលខុសត្រូវ និងការយកចិត្ដទុកដាក់របស់ លោកអ្នកទៅលើដៃគូស្នេហា។ វាមិនមែនជាការមើលងាយ ឬជាពាក្យអាសអាភាសទេ ពេលដែលលោកអ្នកនិយាយដោយ ចំហពីការប្រើប្រាស់ស្រោមអនាម័យជាមួយដៃគូស្នេហារបស់លោកអ្នក។ ទាក់ទងនឹងការរួមភេទភ្លេចពាក់ស្រោម និងរហែកស្រោមអនាម័យ ហើយដែលសង្ស័យថាឆ្លងមេរោគអេដស៍ ទស្សនាវដ្ដី សុខភាពយើង នឹងលើកយកមកបកស្រាយជូននៅលេខក្រោយទៀត។ សូមរង់ចាំអានដោយអនុគ្រោះ។
ប្រភព ៖ ទស្សនាវដ្តី សុខភាពយើង លេខ០១១ ខែធ្នូ ឆ្នាំ២០០៦
Leave a Reply