ដើម្បីឆ្លើយតបទៅនឹងបញ្ហានេះ ទស្សនាវដ្ដីសុខភាពយើងបានជួបសមា្ភសជាមួយនឹងលោក សុខ ឌឺនី ជាអ្នកឯកទេសផ្នែកសក់។ លោកបានមាន ប្រសាសន៏ថា ការលាបពណ៌សក់ពិតជាអាចប៉ះពាល់ដល់សុខភាពសក់។ សព្វថ្ងៃនេះ ប្រជាពលរដ្ឋខ្មែរភាគច្រើន បានប្រើប្រាស់ថ្នាំប្ដូរពណ៌សក់ ដែលសុទ្ឋសឹងតែជាផលិតផលផ្សំពីសារធាតុគីមីដែលអាចប៉ះពាល់ដល់សុខភាពសក់។
ធាតុផ្សំថ្នាំលាបសក់
ជាទូទៅ នៅក្នុងសមាសធាតុផ្សំរបស់ថ្នាំប្ដូរពណ៌សក់ទាំងនោះ ត្រូវបានផ្សំឡើងពីសារធាតុគីមី ដូចជាអាម៉ូនីញ៉ាកជាដើម សម្រាប់បន្សាបពណ៌ធម្មជាតិរបស់សក់ ដើមី្បធ្វើឱ្យសារធាតុគីមីពណ៌មានប្រសិទ្ឋិភាពទៅលើសរសៃសក់។ សារធាតុគីមីអាម៉ូនីញ៉ាកនេះហើយ ដែលធ្វើឱ្យសក់អស់ជាតិសំណើមទៅជាស្ងួត និងអាចឈានទៅដល់បាត់បង់ជិវិត ដែលយើងហៅថាសក់ងាប់នោះ។
ផលប៉ះពាល់ដែលបង្ករដាយថ្នាំលាបសក់
ការលាបថ្នាំប្ដូរពណ៌សក់ញឹកញាប់ពេក និងមិនមានការប្រយ័ត្នប្រយែង លាបទៅតាមក្បួនខ្នាតឱ្យ បានត្រឹមត្រូវនោះទេ វាអាចបង្ក ការលាកស្បែកក្បាល របកស្បែកក្បាលមានអង្គែរ និងកន្ទួលផ្សេងៗ។ ទាំងនេះហៅថាជំងឺស្បែកក្បាលដែលធ្វើឱ្យសក់គា្មនសុខភាពល្អ និងឈានទៅដល់ការជ្រុះសក់ ពីព្រោះដោយសារតែជំងឺស្បែកក្បាលនេះបង្កលក្ខណៈងាយស្រួលដល់មេរោគ និងបាក់តេរីផ្សេងៗ ជ្រៀតចូលទៅក្នុងគល់សក់ និងឬសសក់ ធ្វើឱ្យសរសៃឈាមចិញ្ចឹមសក់ផ្ដាច់ខ្លួនចេញ ហើយឈប់ផ្ដល់សារធាតុចិញ្ចឹមដល់សរសៃសក់។
របៀបថែរក្សាសក់ដែលឧស្សាហ៍លាបពណ៌
ដើមី្បជៀសវាងការទទួលផលជាអវិជ្ជមានក្នុងការប្រើប្រាស់ថ្នាំលាបសក់ដែលបានរៀបរាប់ ការប្រីប្រាស់ថ្នាំលាបសក់ត្រូវមានគម្លាតពីគ្នាឱ្យបានយ៉ាងហោចណាស់ក៏មានរយៈពេលបីខែដែរ។ ពីព្រោះជារយៈពេល សម្រាប់ឱ្យសរសៃសក់មានសុខភាពល្អឡើងវិញ ហើយក៏ជាពេលដែលអាចឱ្យ យើងដឹងពីលទ្ឋផលពីការប្រើប្រាស់ថ្នាំលាបលើកមុនថា តើសរសៃសក់នោះអាចទទួលការលាបប្ដូរពណ៌បាន។
ទន្ទឹមគ្នានេះផងដែរ អ្នកជំនាញខាងសក់រូបនេះបានបន្ដទៀតថា មានថ្នាំលាបសក់ដែលមិនប៉ះពាល់ដល់សុខភាពសក់ ក៏ប៉ុន្ដែវាមិនបានលទ្ឋផល ដូចចិត្ដចង់បាននោះទេ ដូចជាបណ្ដាលឱ្យមានការឆាប់សាបពណ៌ជាដើម។ នោះគឺជាថ្នាំលាបសក់ផ្សំពីសារធាតុធម្មជាតិ។ ជាទីបញ្ចប់ លោក សុខ ឌឺនី បានឱ្យដឹងថាមិនទាន់ ឃើញមានផលិតផលថ្នាំលាបសក់ ដែលផ្សំពីសារធាតុធម្មជាតិមានលក់នៅលើទីផ្សារប្រទេសយើងទេ ប្រហែលជាដោយសារតែ ថ្នាំលាបសក់ផ្សំពីសារធាតុធម្មជាតិ មានតម្លៃថ្លៃ បើប្រៀបធៀបទៅនឹងផលិតផលដែលមានលក់នៅតាមទីផ្សារសព្វថ្ងៃ។ ម្យ៉ាងទៀតប្រជាពលរដ្ឋយើង ក៏នៅមិនទាន់បានឃើញពីផលិតផលបែបនេះ នៅឡើយទេ។
ប្រភព ៖ ទស្សនាវដ្តី សុខភាពយើង លេខ០០១ ខែកុម្ភៈ ឆ្នាំ២០០៦
Leave a Reply