លោកអ្នកតែងតែជួបប្រទះនូវអាការមួយចំនួនដែលបណ្ដាលមកពីច្រមុះដោយមិនដឹងពីមូលហេតុច្បាស់លាស់ ដោយចេះ តែកណ្ដាស់ តឹងច្រមុះ ចេះតែឧស្សាហ៍ហូរសម្បោរ មិនដឹងក្លិនអ្វីជាដើម។ ជម្ងឺឫសដូងច្រមុះបានក្លាយទៅជាចំណុចចាប់អារម្មណ៍ខ្លាំងណាស់ដែរ ពីសំណាក់លោកអ្នកមួយចំនួន ដែលពួកគាត់មានបញ្ហាផ្សេងៗទាក់ទងទៅនឹងច្រមុះ។ ច្រមុះមានសារៈសំខាន់ណាស់ សម្រាប់ហិតក្លិនផ្សេងៗ និងសំខាន់សម្រាប់ការដកដង្ហើមរបស់មនុស្ស គប្បីថែរក្សាច្រមុះរបស់លោកអ្នកដោយរបៀបណា ទើបអាចចៀសផុតពីជម្ងឺនានារបស់ច្រមុះបាន។
ទស្សនាវដ្ដី សុខភាពយើង ជួបជាមួយលោកវេជ្ជបណ្ឌិត ប្រាក់ ស៊ីថា ឯកទេសត្រចៀក ច្រមុះ បំពង់ក នៃមន្ទីរពេទ្យ ព្រះអង្គឌួង ដើម្បីបកស្រាយយ៉ាងក្បោះក្បាយអំពីឫសដូងច្រមុះ។
ជម្ងឺឫសដូងច្រមុះជាអ្វី?
ឫសដូងច្រមុះគឺជាការដុះសាច់ក្នុងច្រមុះមួយប្រភេទ ដែលអាចកើតឡើងបានដោយសារការរលាករ៉ាំរ៉ៃ ឬអាចដោយសារ មេរោគផ្សិត ឬអាឡែកស៊ីជាដើម។
មូលហេតុបង្កជម្ងឺឫសដូងច្រមុះ
មូលហេតុពិតប្រាកដនៃជម្ងឺឫសដូងច្រមុះនៅមិនទាន់អាចដឹងថាបណ្ដ្កាលមកពីអ្វីមួយច្បាស់លាស់នៅឡើយទេ។ គ្រាន់តែ អាចដឹងថា វាអាចបង្កមកពីការរលាកច្រមុះរ៉ាំរ៉ៃដោយសារអាឡែកស៊ី និងដោយសារមេរោគបង្កមួយចំនួនតែប៉ុណ្ណោះ ដែលធ្វើឱ្យមានដុះសាច់ឫសដូងច្រមុះនេះកើតឡើង។ ជម្ងឺឫសដូងច្រមុះភាគច្រើនមានការរួមផ្សំគ្នាជាមួយជម្ងឺដទៃទៀត ដែលមានដូចជា អ្នកជម្ងឺប្រើប្រាស់ថ្នាំប្រភេទអាសស្ពៀរីនមិនបាន និងអ្នកជម្ងឺមានជម្ងឺហឺត។ ហើយវាក៏អាចបណ្ដាលមកពីអាឡែកស៊ីផងដែរ ទើបឈានទៅដល់មានឫសដូងច្រមុះនេះ។ ចំពោះក្មេង ជម្ងឺឫសដូងច្រមុះអាចរួមផ្សំជាមួយពួកជម្ងឺស៊ីស្ទេចហ្វាយប្រូប្រីស ជាប្រភេទជម្ងឺដែលមានគេជួបតែនៅលើក្មេងតែប៉ុណ្ណោះ។
រោគសញ្ញាជម្ងឺឫសដូងច្រមុះ
ឫសដូងច្រមុះមានរោគសញ្ញាធ្វើឱ្យអ្នកជម្ងឺមានអាការដូចជា ៖
- តឹងច្រមុះ
- ហិតក្លិនមិនដឹង
- ហូរទឹកសម្បោរ
- មានដុះសាច់ពណ៌ស ឬពណ៌ប្រផេះ។
ការធ្វើរោគវិនិច្ឆ័យជម្ងឺឫសដូងច្រមុះ
មុននឹងធ្វើការព្យាបាល គ្រូពេទ្យត្រូវធ្វើរោគវិនិច្ឆ័យជាមុនសិន ដោយយកឧបករណ៍ម្យ៉ាងដែលមានឈ្មោះថា ស្ពេកុយឡូម ដើម្បីបើកមើលច្រមុះ និងធ្វើការពិនិត្យទៅលើច្រមុះអ្នកជម្ងឺ ថាអ្នកជម្ងឺពិតជាមានឫសដូងច្រមុះមែនឬក៏អត់។ មានវិធីមួយទៀត ដែលមើលរឹតតែច្បាស់ គឺការមើលតាមអង់ដូស្គុបពី ដែលតម្រូវឱ្យអ្នកជម្ងឺដេក ឬអង្គុយដាក់ថ្នាំស្ពឹកបន្ដិច ហើយដាក់បំពង់មួយស៊ក ចូលទៅក្នុងច្រមុះ។ ភ្លាមនោះយើងនឹងឃើញរូបភាពនៃឫសដូងច្រមុះចេញតាមកញ្ចក់ទូរទស្សន៍ ទោះបីជាឫសដូងនោះតូចយ៉ាងណាក៏ដោយ ក៏គ្រូពេទ្យអាចមើលឃើញដែរ។ ម្យ៉ាងវិញទៀតគេអាចប្រើវិធីមួយទៀត ដោយការថតកាំរស្មីអ៊ិច ឬអាចថតស៊ីធីស្គេន ដើម្បីមើលទៅក្នុងច្រមុះឱ្យកាន់តែច្បាស់លាស់ ទើបឈានទៅដល់ការព្យាបាលអ្នកជម្ងឺ។
មួយទៀតគេអាចធ្វើរោគវិនិច្ឆ័យមួយដែលហៅថា រោគវិនិច្ឆ័យលើកលែងចំពោះអ្នកជម្ងឺបានដោយសារតែឫសដូងច្រមុះ នេះអាចច្រឡំជាមួយជម្ងឺមួយទៀតដែលចេញពីខួរក្បាល(មេណាំស្យូស៊ែល) ដែលភាគច្រើនចេញពីស៊ីនុស។ បើធ្វើការពិនិត្យឱ្យបាន ច្បាស់លាស់នោះ គ្មានការច្រឡំទេ តែបើមិនបានពិនិត្យច្បាស់លាស់វិញនោះ អាចបណ្ដាលឱ្យមានគ្រោះថ្នាក់ចំពោះអ្នកជម្ងឺបានដោយងាយ។ ផ្សេងពីនេះទៀត អាចមានការច្រឡំជាមួយជម្ងឺមហារីកទៀតផង ដូច្នេះការធ្វើរោគវិនិច្ឆ័យជាវិធីល្អមួយសម្រាប់អ្នកជម្ងឺមុននឹងឈានទៅដល់ការព្យាបាល។
វិធីព្យាបាលឫសដូងច្រមុះ
ការព្យាបាលអាចធ្វើទៅបានដោយគ្រូពេទ្យមើលទៅតាមទំហំ និងកម្រិតនៃឫសដូងដែលមាន។ ជម្ងឺឫសដូងច្រមុះនេះមានបួនកម្រិត ដោយកម្រិតទីមួយគឺមានបន្ដិចបន្ដួច ទីពីរគឺមានធំបន្ដិច ទីបីគឺដុះស្មើនឹងក័រណេ និងទីបួនគឺដុះពេញច្រមុះតែម្ដង។ ក្នុងករណីទីមួយ និងទីពីរ គ្រូពេទ្យអាចព្យាបាលដោយការប្រើប្រាស់ថ្នាំ ប៉ុន្ដែបើកម្រិតទីបី និងទីបួន ដែលឫសដូងច្រមុះមានសភាព រីកធំទៅហើយនោះ ត្រូវទាមទារឱ្យមានការវះកាត់ ដោយកាត់សាច់ឫសដូងនោះចេញ ទើបអាចជួយសង្គ្រោះអ្នកជម្ងឺបាន។ ពេលខ្លះ ទៀតគ្រូពេទ្យក៏អាចធ្វើការវះកាត់ដោយអង់ដូស្កូពី (Endoscopy) ដែលជាវិធីមួយល្អប្រសើរសម្រាប់អ្នកជម្ងឺនៅពេលបច្ចុប្បន្ននេះ។
ផលពិបាកនៃឫសដូងច្រមុះ
ករណីដែលជម្ងឺស្ថិតនៅកម្រិតតិចតួច អាចប្រើប្រាស់ថ្នាំបាន ដូចជាស្ប្រាយកូទីកូអ៊ីដ តែត្រូវប្រយ័ត្នចំពោះអ្នកជម្ងឺ ដែលមានជម្ងឺរលាកក្រពះ ជម្ងឺទឹកនោមផ្អែម និងជម្ងឺលើសឈាមជាដើម។ ជម្ងឺឫសដូងច្រមុះភាគច្រើនធ្វើការព្យាបាលជាសះសើ្បយ ហើយអាចមានការរើមកវិញ ដោយសារសាច់ឫសដូងដុះមកវិញនៅថ្ងៃណាមួយ។
ដំបូន្មានអ្នកឯកទេស
ចំពោះជម្ងឺប្រភេទនេះ ពេលធ្វើការព្យាបាល ទាមទារឱ្យអ្នកជម្ងឺធ្វើការតាមដានជាដំណាក់កាល ដើម្បីជួយបន្ថយការរើមកវិញ ឬការដុះមកវិញនូវសាច់ឫសដូង។ វានៅតែអាចដុះមកវិញទៀត គ្រាន់តែថាបើអ្នកជម្ងឺធ្វើការតាមដាន និងប្រើប្រាស់ថ្នាំមួយចំនួនដើម្បីជួយទប់ស្កាត់នោះ វាអាចពន្យារការរើឡើងវិញបានហើយ។
ប្រភព ៖ ទស្សនាវដ្តី សុខភាពយើង លេខ៥៦ ខែកញ្ញា ឆ្នាំ២០១០
Leave a Reply