បញ្ហាអាកាសធាតុចំពោះសំណង់ផ្ទះគឺជារឿងចោទសំខាន់មួយដែលអាចបង្កឱ្យមានបញ្ហាចំពោះការរស់នៅប្រចាំថ្ងៃរបស់លោកអ្នក។ ដូចនេះបច្ចេកទេសនៃការសាងសង់ចាំបាច់ត្រូវគិតគូរឱ្យបានល្អចំពោះបញ្ហាធាតុអាកាសសម្រាប់ប្រទេស និងតំបន់នីមួយៗដែលកំពុងរស់នៅ។ បើសិនជាការសាងសង់ផ្ទះមិនបានគិតគូរទៅលើកត្ដាអាកាសធាតុនេះទេ នឹងអាចបង្កឱ្យមានផលប៉ះពាល់ ចំពោះការរស់នៅក៏ដូចជាសុខភាពរបស់លោកអ្នក។
ដើម្បីកាន់តែជ្រាបច្បាស់អំពីបញ្ហានេះ ទស្សនាវដ្ដី សុខភាពយើង បានជួបសម្ភាសជាមួយលោក ជា សារិន នាយកក្រុមហ៊ុន គ្រីនហ្គោល។
ទំនាក់ទំនងបញ្ហាអាកាសធាតុ និងសំណង់ផ្ទះ
ការសាងសង់ផ្ទះទៅតាមអាកាសធាតុគឺសំដៅទៅលើតំបន់ប្រទេសនីមួយៗ មានតំបន់មួយចំនួនអាកាសធាតុមានការប្រែប្រួលគួរឱ្យកត់សម្គាល់នៅពេលថ្ងៃ និងពេលយប់។ ប្រទេសអាហ្វ្រិចគឺមានការេប្រែប្រួលអាកាសធាតុខុសគ្នាខ្លាំងតែម្ដង រីឯតំបន់ អេក្វាទ័រមានអាកាសធាតុលក្ខណៈថេរ តំបន់មានលក្ខណៈប្រែប្រួលថេរ និងលក្ខណៈអាកាសធាតុត្រជាក់ដូចជានៅប៉ែកខាងតំបន់ អឺរ៉ុបជាដើម។ ប្រទេសកម្ពុជាគឺស្ថិតនៅក្នុងតំបន់ត្រូពិចដែលទទួលរងអាកាសធាតុក្ដៅហើយសើមច្រើន ដែលមានសំណើមបរិយាកាស រហូតទៅដល់៧០ភាគរយ ហើយទិសខ្យល់បក់គឺមានលក្ខណៈមិនច្បាស់លាស់នោះទេ។ ៩ខែពីនិរតី ៣ខែពីឦសាន ប៉ុន្ដែបើការរស់នៅក្នុងទីក្រុងគឺមានការសម្គាល់ឃើញថា ទិសខ្យល់មិនមានលក្ខណៈច្បាស់លាស់ ដោយសារតែឥទ្ធិពលសំណង់អគារ និងដោយសារវត្ថុផ្សេងៗទៀត។ ចំពោះល្បឿនខ្យល់ក៏មានលក្ខណៈប្រែប្រួលច្រើន ពេលខ្លះហប់ខ្យល់ ពេលខ្លះខ្យល់ខ្លាំងតែម្ដង។ ដូចនេះការសាងសង់ផ្ទះតាមលក្ខណៈអាកាសធាតុគឺមានលក្ខណៈពិបាកបន្ដិចចំពោះស្ថាបត្យករ។
1 . កត្ដាព្រះអាទិត្យ ៖ ដើម្បីឱ្យការសាងសង់ផ្ទះមានលក្ខណៈផាសុកភាពនៅផ្នែកខាងក្នុង គឺត្រូវឱ្យការសាងសង់យ៉ាងណា មានការកាត់បន្ថយការប៉ះពាល់រវាងអគារទៅនឹងពន្លឺព្រះអាទិត្យដែលចាំងមកផ្ទាល់ឱ្យនៅសល់តិច។ ទិសនៃផ្ទៃសំណង់អគារដែលត្រូវប៉ះផ្ទាល់ជាមួយនឹងពន្លឺព្រះអាទិត្យនោះគឺទិសខាងលិច និងខាងត្បូង។ ចំណែកទិសខាងជើងគឺប៉ះនឹងពន្លឺព្រះអាទិត្យតែរយៈពេលបីខែប៉ុណ្ណោះក្នុងមួយឆ្នាំ។ រីឯទិសខាងកើតមិនសូវជាធ្វើឱ្យមានផលប៉ះពាល់ចំពោះសំណង់អគារនោះទេ ដោយសារទិសនេះរងតែពន្លឺ ព្រះអាទិត្យនៅពេលព្រឹកព្រលឹម កម្ដៅមិនទាន់ជាក្ដៅខ្លាំងដូចជាពេលថ្ងៃ ដោយសារការសល់កម្លាំងចំហាយត្រជាក់នៅពេលយប់។ ដោយឡែកនៅពេលចាប់ពីម៉ោង១២រហូតដល់ម៉ោង៤គឺជាកម្ដៅដែលក្ដៅខ្លាំង ដូចនេះសំណង់ផ្ទះរបស់លោកអ្នកគប្បីចៀសវាងការប៉ះចំដោយផ្ទាល់នឹងពន្លឺព្រះអាទិត្យនាវេលានេះ។ លោកអ្នកគប្បីរៀបចំសំណង់អគារដែលប៉ះនឹងពន្លឺថ្ងៃបញ្ឆិត ទោះបីជាស្ថិតក្នុងភាពងងឹតក៏ក្នុងផ្ទះនៅមានពន្លឺ តែពន្លឺនោះមិនប៉ះផ្ទាល់នោះទេ។ ការរៀបចំទាំងអស់នេះគឺជាបច្ចេកទេសរបស់វិស្វករដែលបានរៀបចំប្លង់ក្នុងការសាងសង់ផ្ទះរបស់លោកអ្នក។ កាលណាពន្លឺព្រះអាទិត្យប៉ះផ្ទាល់នឹងផ្ទៃអគារគឺមានផលប៉ះពាល់យ៉ាងខ្លាំងចំពោះផ្ទះ និងការរស់នៅ។ នៅពេលដែលកម្ដៅប៉ះដល់ផ្ទៃអគារ កម្ដៅវានឹងជ្រាបចូលរួចវានឹងភាយចេញ ដូចជានៅពេលដែលលោកអ្នក យកដៃស្ទាបជញ្ជាំងនៅពេលថ្ងៃក្ដៅ ជញ្ជាំងក្ដៅ។ ទោះបីជានៅពេលដែលកម្ដៅព្រះអាទិត្យលេចទៅវិញក៏នៅតែក្ដៅ នេះដោយសារតែផ្ទៃជញ្ជាំង ឬសម្ភារៈនោះបានរងការប៉ះផ្ទាល់ទៅនឹងពន្លឺព្រះអាទិត្យ ហើយធ្វើឱ្យបៀមជាប់កម្ដៅ។ នេះជាកត្ដាពន្លឺព្រះអាទិត្យដែលមានការជះឥទ្ធិពលចំពោះសំណង់ផ្ទះ។ ដូច្នេះហើយការសាងសង់ផ្ទះត្រូវធ្វើយ៉ាងណាឱ្យចៀសផុតពីទិសដែលពន្លឺព្រះអាទិត្យជះចូលក្នុងផ្ទះដោយផ្ទាល់។
2 . កត្ដាខ្យល់ ៖ បញ្ហាខ្យល់ជាបញ្ហាដែលចៀសមិនផុតនោះទេ។ ដូចនេះសំណង់អគារឬផ្ទះនីមួយៗចាំបាច់ត្រូវតែមានចរន្ដខ្យល់ពីរ ព្រោះអាកាសធាតុនៅក្នុងប្រទេសកម្ពុជាគឺមានលក្ខណៈក្ដៅហើយសើម ខុសពីប្រទេសដទៃដែលមួយចំនួនមានលក្ខណៈក្ដៅ ហើយស្ងួត ដូចជានៅប្រទេសអាហ្វ្រិកជាដើម។ ការរស់នៅក្នុងប្រទេសកម្ពុជាឱ្យតែក្ដៅគឺបែកញើសស្អិតខ្លួន ធ្វើឱ្យមានអារម្មណ៍ មិនស្រួល ដូចនេះចរន្ដខ្យល់ក្នុងអគារឬផ្ទះរបស់លោកអ្នកមានតួនាទីសំខាន់ក្នុងការដោះស្រាយបញ្ហានេះ ដើម្បីផ្លាស់ប្ដូរកម្ដៅ និងជាតិទឹក ហួតយកជាតិទឹកជាមួយស្បែក ដូចនេះគឺអាចធ្វើឱ្យខ្លួនរបស់លោកអ្នកមានសភាពត្រជាក់។ ការសាងសង់ផ្ទះដែលមានពិដានគឺត្រូវធ្វើឱ្យមានប្រឡោះពីដំបូល និងពិដានដើម្បីឱ្យមានចរន្ដខ្យល់ឆ្លងកាត់ ចៀសវាងការបិទជិត ព្រោះនៅពេលណាបិទជិត កម្ដៅដែលមកប៉ះនឹងធ្វើឱ្យហប់ ពេលនោះកម្ដៅនឹងជះត្រឡប់ចុះមកក្រោមតាមរយៈពិដាន ដូច្នេះធ្វើឱ្យក្នុងផ្ទះមានសភាពក្ដៅ។ ការសាងសង់ឱ្យមានប្រឡោះរវាងដំបូល និងពិដាន គឺដើម្បីឱ្យមានចរន្ដខ្យល់ចេញចូលមានសភាពត្រជាក់ ដោយសារតែនៅពេលណា ដែលមានខ្យល់ក្ដៅវានឹងរត់ចេញតាមប្រឡោះដែលទុកនោះតែម្ដង ពេលនោះនឹងធ្វើឱ្យមានការផ្លាស់ប្ដូរពីខ្យល់ក្ដៅទៅជាត្រជាក់។ ការគិតគូរចំពោះបញ្ហាចរន្ដខ្យល់គឺមានប្រយោជន៍សំខាន់ចំពោះការរស់នៅជាប្រចាំថ្ងៃរបស់លោកអ្នក ដែលជាតម្រូវការចាំបាច់ដែល ត្រូវមានខ្យល់ដកដង្ហើមបរិសុទ្ធពោរពេញដោយផាសុកភាពក្នុងគេហដ្ឋាន។
3 . កត្ដាទឹកភ្លៀង ៖ ការសាងសង់ផ្ទះចាំបាច់បំផុតគឺការគិតគូរពីកត្ដាទឹកភ្លៀង បើមិនបានរៀបចំឱ្យបានត្រឹមត្រូវនោះទេ វានឹងអាចធ្វើឱ្យទឹកភ្លៀងសាចចូលទៅក្នុងផ្ទះរបស់លោកអ្នកបង្កនូវផលវិបាក។ ជាដំណោះស្រាយដ៏ល្អ ដំបូលផ្ទះរបស់លោកអ្នកគួរមានសំយាបវែង ដែលជាផលប្រយោជន៍ជួយទប់ស្កាត់ការទទួលរងពន្លឺព្រះអាទិត្យដោយផ្ទាល់ចំជញ្ជាំងផ្ទះ និងជួយទប់ស្កាត់ពីទឹកភ្លៀង ដើម្បីកុំឱ្យសាចចូលក្នុងផ្ទះរបស់លោកអ្នកតាមរយៈទ្វារ ឬបង្អួច។
ដំបូន្មានអ្នកជំនាញ
ការការពារលក្ខណៈអាកាសធាតុក្ដៅ និងត្រជាក់ជាការចាំបាច់សម្រាប់ការរស់នៅប្រចាំថ្ងៃរបស់លោកអ្នក។ នៅពេលអាកាសត្រជាក់ លោកអ្នកប្រាកដជាត្រូវការឱ្យមានកម្ដៅនៅក្នុងផ្ទះដើម្បីភាពកក់ក្ដៅ ហើយនៅពេលដែលមានអាកាសធាតុក្ដៅ លោកអ្នកពិតជាត្រូវការភាពត្រជាក់។ ដូចនេះដំណោះស្រាយក្នុងការទប់ស្កាត់លក្ខណៈអាកាសធាតុទាំងពីរនេះ គឺការជ្រើសរើសសម្ភារៈក្នុងការសាងសង់ផ្ទះឱ្យបានត្រឹមត្រូវ ដូចជាជញ្ជាំងត្រូវរើសយកសម្ភារៈជញ្ជាំងណាដែលមិនបៀមកម្ដៅ ឬបៀមតិច។ ហើយសម្ភារៈទាំងនោះមិនមែនជាសម្ភារៈចម្លងកម្ដៅនោះទេ សម្ភារៈដែលល្អបំផុតនោះគឺជាឈើ ព្រោះឈើមិនងាយចម្លងកម្ដៅ ដូចពពួកដែក ទង់ដែង និងអាលុយមីញ៉ូមនោះទេ។
ប្រភព ៖ ទស្សនាវដ្តី សុខភាពយើង លេខ៥២ ខែឧសភា ឆ្នាំ២០១០
Leave a Reply