ជារៀងរាល់ឆ្នាំ ប្រជាជនកម្ពុជាបានរងគ្រោះដោយសារការជក់បារីមានចំនួនច្រើនគួរឲ្យព្រួយបារម្ភ បើទោះជាប្រជាជនមួយចំនួន មិនមានការជក់បារីក្តី។ ការស្រូបផ្សែងបារីពីអ្នកដទៃច្រើន ក៏ជាបញ្ហាមួយដែលបង្កឲ្យមនុស្សនៅទូទាំងសកលលោកច្រើនផងដែរ។ ដោយយល់ឃើញយ៉ាងដូច្នេះ ក្រសួងអប់រំយុវជន និងកីឡា បានសហការជាមួយអង្គការជាតិ-អន្តរជាតិនានា ធ្វើការផ្សព្វផ្សាយអំពីផលប៉ះពាល់នៃការជក់បារី និងស្រូបផ្សែងបារីពីអ្នកជក់ នៅក្នុងពីធីផ្តើមការប្រកូតកីឡា និស្សិតឧត្តមសិក្សា និងមធ្យមសិក្សានៅក្នុងឆ្នាំ២០១២នេះ ទៅក្នុងវិស័យកីឡា។
កាលពីពេលកន្លងទៅ គេហទំព័រសុខភាពកម្ពុជា បានចេញផ្សាយនូវអត្ថបទបម្រាមមួយទាក់ទិនទៅនឹងការជក់បារីនៅតាមទីសារធារណៈម្តងរួចមកហើយ ដែលអត្ថបទនោះមានចំណងជើងថា «ហាមប្រាមការជក់បារីនៅកន្លែងធ្វើការនិងបរិវេណរមណីយដ្ឋានអង្គរ»។ ហើយកាលពីថ្ងៃពុធ ទី២០ ខែមិថុនា ឆ្នាំ២០១២ នាពេលកន្លងទៅថ្មីៗនេះ ក្រសួងអប់រំយុវជន និងកីឡា បានចាប់ផ្តើមប្រារព្ធពិធីបើកការប្រកួត កីឡានិស្សិតឧត្តមសិក្សា និងមធ្យមសិក្សាបច្ចេកទេស ដោយធ្វើការជ្រើសរើសជើងឯកទូទាំងប្រទេសប្រចាំឆ្នាំ២០១១-២០១២។ នៅក្នុងពិធីនោះ ក៏មានការផ្សព្វផ្សាយអំពីការមិនមានផ្សែងបារីនៅក្នុងវិស័យកីឡាដល់កីឡាករ និងប្រជាជនទូទៅឲ្យយល់ដឹងអំពីផលប៉ះពាល់នៃផ្សែងបារីចំពោះសុខភាពផងដែរ។
ជារៀងរាល់ឆ្នាំក្រសួងអប់រំយុវជន និងកីឡា តែងតែរៀបចំការប្រកួតកីឡាសិស្សនិស្សិតប្រចាំឆ្នាំជានិច្ច។ ដោយឡែកនៅក្នុងឆ្នាំនេះ ដោយយល់ឃើញពីផលប៉ះពាល់ និងការស្លាប់ដោយសារការប្រើប្រាស់ថ្នាំជក់ ដែលធ្វើឱ្យប្រជាជនកម្ពុជាស្លាប់រហូតដល់ទៅ១ម៉ឺននាក់ជារៀងរាល់ឆ្នាំ ក្រសួងអប់រំយុវជន និងកីឡាបានសហការជាមួយអង្គការចលនាដើម្បីសុខភាពកម្ពុជា រួមជាមួយអង្គការសុខភាពពិភពលោក បានចូលរួមផ្សព្វផ្សាយ ក៏ដូចជាលុបបំបាត់ការមិនមានផ្សែងបារីក្នុងវិស័យកីឡា ក្រោមរូបភាពដូចខាងក្រោមៈ
1 . កីឡាករ គ្រូបង្វឹក និងអ្នកគ្រប់គ្រងកីឡាទាំងអស់មិនត្រូវជក់បារី នៅពេលពាក់ព័ន្ធជាមួយនឹងសកម្មភាពកីឡា
2 . ការពារទស្សនិកជន និងអ្នកចូលរួមទាំងអស់ពីការស្រូបផ្សែងបារីពីគេ
3 . គ្មានការផ្សាយពាណិជ្ជកម្មបារី និងមិនទទួលការឧបត្ថម្ភរបស់ក្រុមហ៊ុនថ្នាំជក់
4 . បង្ហាញសញ្ញា “ហាមជក់បារី” ឱ្យបានគ្រប់កន្លែងដែលពាក់ព័ន្ធជាមួយនឹងការប្រកួតកីឡា
5 . ផ្តល់ព័ត៌មាន និងគាំទ្រដល់ការឈប់ជក់បារី ។
លោក ដួង មាសចំរើន ប្រធាននាយកដ្ឋានអប់រំកាយ និងកីឡាសិស្ស-និស្សិត បានឲ្យដឹងថា គ្រឹះស្ថាន ឧត្តមសិក្សា និង មធ្យមសិក្សាឯកទេសដែលនឹងចូលរួមប្រកួតមានចំនួន២៩ ក្នុងនោះមានអត្តពលិកសរុបចំនួន១.២៤៥នាក់ និងកីឡាការិនី ចំនួន១១២នាក់។ លោកបានបន្ថែមថា ប្រភេទកីឡាដែលដាក់ឲ្យប្រកួតនោះរួមមាន បាល់ទាត់ បាល់ទះ បាល់បោះ និង អត្តពលកម្ម ដែលនឹងចាប់ផ្តើមប្រកួតចាប់ពីថ្ងៃនេះតទៅរហូតដល់ថ្ងៃទី០៣ ខែកក្កដា ឆ្នាំ២០១២។
សូមបញ្ជាក់ថា នៅមុនការប្រកួត ក្រុមនីមួយៗត្រូវឲ្យគណៈកម្មការធ្វើការត្រួតពិនិត្យកីឡាករជាមុនសិន ដើម្បីបញ្ជាក់ថា កីឡាករនឹងមិនមានការពាក់ព័ន្ធជាមួយនឹងការប្រើប្រាស់ថ្នាំជក់ ដោយប្រើប្រាស់ឧបករណ៍មួយ ដែលហៅថា “ឧបករណ៍វាស់ស្ទង់សារធាតុកាបូនម៉ូណូអុកស៊ីត” ក្នុងខ្យល់ដង្ហើម។ ហើយក្នុងពិធីនោះក៏មានការអញ្ជើញចូលរួមពីសំណាក់ឯកឧត្តម ប៊ុន សុខ រដ្ឋលេខាធិការក្រសួងអប់រំយុវជន និងកីឡា និងកីឡាករ កីឡាការនី១០០០នាក់ ព្រមទាំងសិស្សនិស្សិតប្រមាណ៣០០០នាក់ផងដែរ។
អត្ថបទដោយ ៖ សេង វីរះ
ចេញផ្សាយ ៖ ថ្ងៃទី២១ ខែមិថុនា ឆ្នាំ២០១២
Leave a Reply