លោកអ្នកបានជ្រាបរួចមកហើយអំពីគ្រោះថ្នាក់នៃការពុលអាហារ។ ហេតុនេះដើម្បីកុំឱ្យមានបញ្ហាពុលអាហារកើតមាន ចំពោះលោកអ្នក។ លោកអ្នកត្រូវតែចេះការពារសុខភាពរបស់ខ្លួន និងសមាជិកនៅក្នុងគ្រួសារ បើលោកអ្នកជាមេផ្ទះ និងមេគ្រួសារ។ ផ្ទុយទៅវិញបើលោកអ្នកជាអ្នកផលិត លោកអ្នកចាំបាច់ត្រូវតែធានាសុវត្ថិភាពចំណីអាហារចំពោះភ្ញៀវរបស់លោកអ្នក។
សូមស្វែងយល់ពីការការពារការពុលអាហារជាមួយទស្សនាវដ្ដី សុខភាពយើង តាមរយៈការបកស្រាយរបស់លោក វេជ្ជបណ្ឌិត សែន ពិសិដ្ឋ អនុប្រធានមន្ទីរសុខាភិបាលរាជធានីភ្នំពេញ។
វិធីការពារការពុលអាហារ
បន្ទាប់ពីយល់ដឹងពីដំណើរដែលចំណីអាហារត្រូវបានបង្កឱ្យកើតមានជម្ងឺហើយ សូមអនុវត្ដគោលការណ៍សម្រាប់ផលិត អាហារ ដើម្បីការពាររាំងស្កាត់ការពុលអាហារមិនឱ្យកើតឡើងបាន។
1 . កិច្ចការពារការចម្លងរោគ ៖ យើងអាចទប់ស្កាត់ការចម្លងរោគដោយវិធានការណ៍ការពារដូចតទៅ ៖
- ការទុកដាក់អាហារឆៅ និងអាហារឆ្អិនឱ្យនៅដាច់ពីគ្នា ដើម្បីចៀសវាងការចម្លងមេរោគ។
- ការទុកដាក់អាហារឆ្អិនលើអាហារឆៅនៅក្នុងទូទឹកកក។ ធ្វើដូចនេះដើម្បីកុំឱ្យអាហារឆៅស្រក់ ឬក៏មានការចម្លងរោគ
ដល់អាហារឆ្អិន។ - ត្រូវមានជ្រញ់៣ មួយសម្រាប់កាប់សាច់ឆ្អិន មួយសម្រាប់កាប់សាច់ឆៅ និងមួយហាន់បន្លែ។ ហើយត្រូវចាំឱ្យច្បាស់រាល់ ជ្រញ់មួយៗសម្រាប់ប្រើធ្វើអ្វី កុំឱ្យឡូកឡំគ្នា។
- យើងត្រូវប្រើសម្ភារៈសម្រាប់អាហារឆៅផ្សេង ហើយសម្រាប់អាហារឆ្អិនផ្សេង ឧទាហរណ៍ កាំបិត និងចានជាដើម
- បន្ទាប់ពីកាន់អាហារឆៅហើយ ត្រូវលាងដៃសិនមុននឹងកាន់អាហារឆ្អិន។
- គេមិនដែលដាក់ឡូកឡំអាហារចាស់ជាមួយអាហារថ្មីទេ។
- យើងប្រើតែសម្ភារៈស្អាតប៉ុណ្ណោះសម្រាប់ដាក់អាហារផ្សេងៗ។
- គ្រប់គ្រងសត្វផ្សេងៗឱ្យនៅក្រៅកន្លែងផលិតអាហារ និងថែរក្សាទីនោះឱ្យបានម៉ត់ចត់។
2 . ការត្រួតពិនិត្យសីតុណ្ហភាព ៖ ដើម្បីការពារមិនឱ្យមានមេរោគដែលមានពិសពុលលូតលាស់បាននៅក្នុងអាហារ ហើយ ដែលមិនឱ្យមានអានុភាពបង្កគ្រោះថ្នាក់ច្រើនទៅក្នុងអាហារនោះ គេគួរតែរក្សាអាហារទាំងអស់ឱ្យនៅក្រៅមណ្ឌលសីតុណ្ហភាពដែល បង្ហាញគ្រោះថ្នាក់។
- រក្សាឱ្យនៅក្ដៅ(លើសពី៦០អង្សាសេ)
- រក្សាឱ្យវាត្រជាក់(ក្រោម៥អង្សាសេ)
- កម្ដៅភ្លាមៗ។
នៅក្នុងទូទឹកកក គេអាចប្រើប្រាស់វាដាក់អាហារក្ដៅឱ្យត្រជាក់ក្រោម៥អង្សាសេបាន។ ដើម្បីឱ្យអាហារឆាប់ត្រជាក់ គេត្រូវចែកវាជាដុំតូចៗដាក់ចូលក្នុងថាសតម្កល់ទុកក្នុងទូទឹកកក ព្រមទាំងផ្លាស់ប្ដូរវាឱ្យបានញឹកផងបើអាចធ្វើទៅបាន ហើយចៀសវាង ទុកអាហារចោលនៅក្នុងសីតុណ្ហភាពនៃបន្ទប់ធម្មតាឱ្យលើសពីមួយម៉ោងឡើយ។ គួរកម្ដៅអាហារក្នុងរយៈពេលខ្លីជាការល្អ បើអាចធ្វើ ទៅបាន យើងកម្ដៅអាហារបរិមាណតិច ហើយកូរត្រឡប់វាផង ដើម្បីឱ្យវាបានក្ដៅសព្វល្អ។ ឆ្នាំង និងខ្ទះត្រូវតែរក្សាឱ្យបានស្អាត ជានិច្ចសម្រាប់កម្ដៅអាហារឱ្យលើសពី៦០អង្សាសេ។ ជាទូទៅអាហារត្រូវនៅក្ដៅ ដែលទើបដាក់ចេញពីឡ ឬចង្ក្រាន មុននឹងដាក់ចូលទៅក្នុងឆ្នាំង។ ការធ្វើឱ្យកកមិនសម្លាប់បាក់តេរីបានទេ តែការរលាយអាចបង្ការការលូតលាស់មេរោគក្នុងរយៈពេល ទុកដាក់អាហារ។ អាហារដែលកកក្នុងទូទឹកកក ឬបន្ទប់ត្រជាក់ក្រោម៥អង្សាសេជាការល្អ ត្រូវទុកឱ្យវារលាយយឺតៗក្នុងរយៈពេល លើសពី២៤ម៉ោង។ មធ្យោបាយផ្សេងទៀតអាចធ្វើឱ្យអាហាររលាយបានយ៉ាងឆាប់នៅក្នុងចង្ក្រាន និងឡ។
3 . អនាម័យខ្លួនប្រាណ ៖ ជាមួយនឹងអាហារពិសពុល អាហារផ្អូមជូរមានមេរោគ ការមានអនាម័យខ្លួនប្រាណល្អ ជាករណី ពិសេសបំផុតដែលជាចំណុចត្រួតពិនិត្យមិនឱ្យមានការចម្លងរោគទៅលើអាហារ។ លាងសម្អាតដៃត្រូវធ្វើឱ្យបានម៉ត់ចត់ និងញឹកញាប់ យើងប្រើទឹកក្ដៅឧណ្ហៗនិងសាប៊ូ។ វាត្រូវតែមានការធ្វើបង្ហាញក្នុងរយៈពេលខ្លីឱ្យឃើញ ចំពោះទឹកត្រជាក់លាងទៅវាមិនងាប់មេរោគ ពីដៃទេ។ ដៃត្រូវតែស្ងួតដោយជូតនឹងក្រដាសស្អាតសម្រាប់ជូតដៃ ឬទុកឱ្យស្ងួតក្នុងលំហខ្យល់។ ដៃមានចលនាពិសេសមិនទៀងទាត់ ដោយ(ចេតនា និងអចេតនា) ដែលយើងទាំងអស់គ្នាច្រើនមានសកម្មភាពដដែលៗញឹកញាប់ មានដូចជាលូកច្រមុះ លូកមាត់ អេះគ្រប់សារពាង្គកាយ ស្ទាប ឬជ្រោងសក់ ឬអេះកមរមាស់។ ផ្ដើមចេញពីការយល់ដឹងលើទម្លាប់ទាំងនេះ យើងសាកល្បងចៀសវាង អំពីករណីអស់ទាំងនេះ និងត្រូវលាងសម្អាតដៃជានិច្ច ក្រោយពេលចប់កិច្ចការហើយ។
ប្រការគួរប្រតិបត្ដិ
ក្រៅពីនេះក៏នៅមានវិធីមួយចំនួនដែលលោកអ្នកត្រូវអនុវត្ដ ដូចជា ៖
- សាច់ទាំងអស់ត្រូវឆ្លងកាត់ការចម្អិនឱ្យបានត្រឹមត្រូវម៉ត់ចត់ ពិសេសពពួកសត្វស្លាប។ ចៀសវាងមានការឆ្លងរោគមក លើអាហារ។
- ត្រូវប្រើប្រាស់អាហារមុនរយៈពេលកំណត់ឱ្យឈប់ប្រើ
- អាហារណាដែលងាយបង្កការចម្លងរោគបានត្រូវទុកដាក់ដោយប្រុងប្រយ័ត្នបំផុត ហើយប្រើប្រាស់វាមុនគេ។ ស្ដ្រីមាន ផ្ទៃពោះត្រូវចៀសវាងប្រើអាហារណាដែលមានការមន្ទិលសង្ស័យថាមានការចម្លងរោគរួចហើយ
- មិនត្រូវបរិភោគត្រីសមុទ្រ លៀស គ្រំ ឬងាវសមុទ្រដែលចម្អិនមិនទាន់ឆ្អិនល្អ។ មិនត្រូវប្រើទឹកសមុទ្រក្នុងការលាង សម្អាតអាហារ ឬធ្វើឱ្យអាហារមានសម្រស់ល្អដោយមិនទាន់ឆ្លងកាត់កម្ដៅត្រឹមត្រូវនោះទេ។ ត្រូវប្រុងប្រយ័ត្នចំពោះការចម្លងរោគ ត្រូវរក្សាអាហារឱ្យនៅក្នុងទូទឹកកកជានិច្ច។
- រក្សាអាហារឱ្យនៅក្ដៅលើសពី៦០អង្សាសេ ឬដាក់អាហារក្នុងទូទឹកកកឱ្យបានក្រោម៥អង្សាសេ។ បើកកម្ដៅឱ្យបាន លើសពី៧០អង្សាសេ និងប្រើប្រាស់វាភ្លាមៗ កុំទុកយូរ។ ត្រូវមានការប្រុងប្រយ័ត្នការចម្លងមេរោគ។ លាងសម្អាតដៃឱ្យបាន ស្អាតម៉ត់ចត់ បន្ទាប់ពីកាន់អាហារឆៅរួចហើយ ឬបន្ទាប់ពីចេញពីបង្គន់វិញ។ មិនត្រូវឱ្យសត្វពាហនៈផ្សេងៗ កណ្ដុរ កន្លាត ឬរុយ ចូលមកកន្លែងរៀបចំម្ហូបអាហារឡើយ។
- លាងសម្អាតដៃឱ្យបានស្អាតក្រោយពេលត្រឡប់មកពីបង្គន់វិញ និងមុនពេលចាប់ផ្ដើមធ្វើម្ហូបអាហារ
- ត្រូវលាងបន្លែ និងផ្លែឈើឱ្យស្អាតជានិច្ច
- អាហារ និងភេសជ្ជៈ គួរតែរក្សាទុកដាក់ក្នុងសម្ភារៈធ្វើពីលោហៈធាតុគ្មានច្រែះ ឬសម្ភារៈដែលទទួលស្គាល់ថាសមស្រប។ សម្ភារៈសម្រាប់ដាក់អាហារ និងភេសជ្ជៈ មិនគួរនឹងយកទៅដាក់ជាតិគីមីទេ។ បន្ទាប់ពីធ្វើការសម្លាប់មេរោគលើសម្ភារៈប្រើប្រាស់ សម្រាប់ដាក់ចំណីអាហារហើយ ចាំបាច់ត្រូវតែលាងសម្អាតឱ្យបានត្រឹមត្រូវ។
ដំបូន្មានអ្នកជំនាញ
លោកអ្នកបានជ្រាបអំពីអ្វីដែលលោកអ្នកគួរអនុវត្ដដើម្បីការពារសុខភាពរបស់លោកអ្នករួចមកហើយ។ ហេតុនេះសូម អនុវត្ដឱ្យបានត្រឹមត្រូវ។ លោកអ្នកត្រូវការអាហារ តែលោកអ្នកក៏ត្រូវការសុខភាពដែរ។
ប្រភព ៖ ទស្សនាវដ្តី សុខភាពយើង លេខ៣៩ ខែមេសា ឆ្នាំ២០០៩
Leave a Reply