ដើម្បីឱ្យមានទម្ងន់សមរម្យមិនមែនជាការលំបាកទេ តែក៏ទាមទារឱ្យលោកអ្នកមានការព្យាយាមផងដែរសម្រាប់លោកអ្នក ដែលបានបណ្ដោយខ្លួនឱ្យធាត់ជ្រុលទៅហើយនោះ។ ការគ្រប់គ្រងទម្ងន់ឱ្យបានសមស្របជាមួយនឹងកម្ពស់ នោះជារឿងដែលលោក អ្នកគួរតែធ្វើឱ្យមានសុខភាពល្អ និងរូបសម្រស់ស្រស់ស្អាតមួយកម្រិតដែរ។
ខាងក្រោមនេះ ទស្សនាវដ្ដី សុខភាពយើង នឹងរៀបរាប់ជម្រាបជូនលោកអ្នកអំពីវិធីសាស្ដ្រមួយចំនួន ដើម្បីគ្រប់គ្រងទម្ងន់រាង កាយឱ្យបានល្អ តាមរយៈការបកស្រាយរបស់លោក ងួន សុភៈ អ្នកឯកទេសព្យាបាលស្បែកនៅហាងប្រីធីសាឡនខូសម៉ិកទិក។
ដើម្បីរាងកាយសមសួនដោយអាហារ
ក្នុងសកម្មភាពរស់នៅធម្មតា រាងកាយត្រូវការថាមពលប្រមាណ២០០០កាឡូរីក្នុង១ថ្ងៃ ថាមពលទាំងនេះបានមកពីចំណី អាហារដែលយើងទទួលទានទាំង៣ពេល។ ក្នុងករណីការទទួលទានលើសពីតម្រូវការថាមពលរបស់រាងកាយ ចំណីអាហារដែលមិន ប្រើការត្រូវបានបំប្លែង និងស្ដុកទុកជាខ្លាញ់ ដែលជាមូលហេតុធ្វើឱ្យយើងធាត់ ឬឡើងគីឡូបន្ដិចម្ដងៗ។
ដើម្បីទប់ស្កាត់និន្នាការឆ្ពោះទៅរកការឡើងគីឡូ គឺយើងចាំបាច់បន្ថយការហូបចុកមកនៅត្រឹមតម្រូវការថាមពលប្រចាំថ្ងៃ របស់រាងកាយដែលមានតម្លៃប្រហាក់ប្រហែលនឹង២០០០កាឡូរី។ ខាងក្រោមនេះគឺជាការណែនាំពីរបបអាហារសមស្របមួយ សម្រាប់លោកអ្នក ៖
1 . អាហារពេលព្រឹក ៖ ជាអាហារសំខាន់មួយក្នុងចំណោមអាហារទាំងបីពេល លោកអ្នកអាចជ្រើសរើសយករបបអាហារ មួយខាងក្រោម ៖
- បាយ ឬបបរសជាមួយសាច់មួយដុំគ្មានខ្លាញ់
- នំប៉័ងសាំងវ៉ិចមួយដុំ ឬស៊ុតឆ្អិនយកតែផ្នែកស១-២ ឬនំប៉័ងសាបមួយកំណាត់ជាមួយសាច់មួយដុំគ្មានខ្លាញ់ ឬអាហារបួស គ្មានខ្លាញ់។
ចំពោះភេសជ្ជៈគួរជ្រើសរើសយកមួយប្រភេទក្នុងចំណោមភេសជ្ជៈដូចតទៅ ៖ ទឹកក្រូចពោធិ៍សាត់មួយកែវ ឬទឹកម្នាស់មួយ កែវ ឬទឹកក្រូចថ្លុងច្របាច់មួយកែវ ឬកាហ្វេខ្មៅមួយពែង ឬតែបៃតង តែខ្មៅមួយកែវ ឬទឹកដោះគោគ្មានជាតិក្រែមមួយកែវ ឬទឹក សុទ្ធនានាមួយកែវ។ ភេសជ្ជៈទាំងឡាយមិនត្រូវប្រើស្ករឡើយ តែអាចជំនួសដោយស្ករកាឡូរីទាប។ ចំណែកបង្អែមអាចជាក្រូចថ្លុង មួយជ្រុង ឬក្រូចពោធិ៍សាត់មួយចំហៀង ឬប៉ោមមួយផ្លែ។
2 . អាហារថ្ងៃត្រង់ ៖ បាយសអមដោយម្ហូបគោក២មុខ អាចជាសាច់ឆ្អិន សាច់គោ ឬត្រីឯម្ហូបទឹកមានស៊ុប ឬស្ងោរប្រើបន្លែ ច្រើនអមដោយបង្អែមផ្លែឈើជាដើម។ ដើម្បីធានាសមត្ថភាពកម្លាំងកាយ និងប្រាជ្ញាស្មារតី អាហារថ្ងៃត្រង់អាចទទួលទានឆ្អែត ធម្មតាបាន។
3 . អាហារល្ងាច ៖ បាយស ឬបបរអមដោយម្ហូបមួយឬពីរមុខដោយមានបន្លែច្រើន និងសាច់តិច(សាច់ត្រីប្រសើរជាងសាច់ ផ្សេងៗ)។ អាហារល្ងាចត្រូវស្រាលជាងអាហារថ្ងៃត្រង់ មានន័យថាមិនត្រូវទទួលទានឆ្អែតពេកឡើយ។
ប្រការគួរប្រតិបត្ដិដើម្បីគ្រប់គ្រងទម្ងន់
- ទទួលទានទឹកឱ្យបានមួយថ្ងៃ១,៥ទៅ២លីត្រ
- ពេលបាយត្រូវទៀងទាត់ ហើយចន្លោះពីពេលបាយមួយទៅពេលបាយមួយត្រូវលៃកុំឱ្យតិចជាង៤ម៉ោង
- ទទួលទានយឺតៗតាមសម្រួលក្នុងបរិយាកាសមនោរម្យ និងឥរិយាបថអង្គុយស៊ប់លើកៅអីមានបង្អែក
- ទទួនទានបន្លែ ឬអាហារសរសៃឱ្យបានច្រើន ដើម្បីកាត់បន្ថយការឃ្លានចន្លោះពេលបាយ។
ប្រការគួរចៀសវាង ដើម្បីគ្រប់គ្រងទម្ងន់
- ចៀសវាងភេសជ្ជៈស្រវឹង ទឹកសូដា ទឹកក្រូច ឬទឹកផ្លែឈើកំប៉ុង
- ចៀសវាងអាហារខ្លាញ់ ឬអាហារចម្អិនដោយខ្លាញ់
- ចៀសវាងស្ករ ឬនំផ្អែម
- ចៀសវាងការទទួលទានកំដរមាត់ចន្លោះពេលបាយ
- ចៀសវាងការរំលងពេលបាយណាមួយ ពោលគឺត្រូវទទួលទានទាំង៣ពេលដូចទម្លាប់ធម្មតា។
ថ្វីត្បិតថាយើងបានរៀបចំរបបអាហារថ្មីដូចខាងលើនេះមកហើយក្ដី ប៉ុន្ដែយើងពិបាកនឹងដឹងឱ្យប្រាកដពីបរិមាណកាឡូរីនៃ អាហារដែលយើងបានទទួលទានទាំងនោះណាស់។ ដើម្បីធានាថាអាហារទាំងនោះពុំបានសល់ និងយកទៅស្ដុកជាខ្លាញ់ទេ សាមីខ្លួន គួររៀបចំឱ្យមានការហាត់ប្រាណឱ្យបានយ៉ាងតិចមួយដងក្នុងរយៈពេលជាមធ្យម៣៥នាទីរៀងរាល់ថ្ងៃ។ ពេលវេលាដែលល្អសម្រាប់ ការហាត់ប្រាណបំបាត់ស្ដុកខ្លាញ់នេះ គឺម៉ោង៨ព្រឹកនៃថ្ងៃបន្ទាប់។
ការគ្រប់គ្រងទម្ងន់សម្រាប់អ្នកធាត់
ក្នុងកម្មវិធីបញ្ចុះទម្ងន់ ចាំបាច់ត្រូវយកចិត្ដទុកដាក់ទប់ស្កាត់មូលហេតុខាងលើ ដោយសាកល្បងកាត់បន្ថយការនឿយហត់របស់ ខួរក្បាល ដូចខាងក្រោម ៖
1 . រៀបចំការសម្រាកឱ្យបានគ្រប់គ្រាន់ទាំងបរិមាណ និងគុណភាព។ មនុស្សពេញវ័យត្រូវការគេង៨ម៉ោងក្នុងមួយថ្ងៃ។ ដើម្បីឱ្យការគេងមានគុណភាពល្អ ឬបានស្កប់ស្កល់នោះ គួរអនុវត្ដដូចខាងក្រោម ៖
- ចៀសវាងយករឿងស្មុគស្មាញក្ដៅក្រហាយ ឬលំបាកចិត្ដមកគិតនៅពេលចូលគេង។
- ពេលវេលាចូលគេងត្រូវទៀងទាត់ និងឃ្លាតពីពេលបាយល្ងាចមួយម៉ោងកន្លះ។ មិនត្រូវចូលគេងយប់ពេកឡើយ។
- គេងលើគ្រែ ឬទីកន្លែងផ្ដល់ផាសុកភាពគ្រប់គ្រាន់ ចៀសវាងស្កៀបរមាស់ ឬស្អុះស្អាប់ ពោលគឺត្រូវមានខ្យល់អាកាស បរិបូរណ៍។
2 . កាត់បន្ថយស្ដ្រេស ឬអារម្មណ៍តានតឹងនានាដោយប្រើវិធីអប់រំផ្លូវចិត្ដឬការធ្វើសមាធិព្រមទាំងការដើរកម្សាន្ដឱ្យបានញឹកញាប់។
3 . ចៀសវាងការអង្គុយស្ងៀមមួយកន្លែងរយៈពេលយូរៗ ត្រូវក្រោកដើរ និងពត់ខ្លួនឱ្យបានញឹកញាប់។
4 . ឧស្សាហ៍ពង្រឹងសាច់ដុំក្បាលពោះឱ្យបាន២០ដងក្នុង១ថ្ងៃ ម្ដងៗប្រើពេល១០វិនាទី។ ការពង្រឹងសាច់ដុំក្បាលពោះអាចធ្វើបានគ្រប់ពេលពេល កំពុងអង្គុយធ្វើការ ពេលមើលទូរទស្សន៍ ឬពេលជិះរថយន្ដ។ល។
5 . ដកដង្ហើមចូលឱ្យខ្លាំង និងបន្ធូរមកវិញបន្ដិចម្ដងៗ ធ្វើឱ្យបានញឹកញាប់ដើម្បីបណ្ដេញជាតិពុល និងរក្សាសាច់ដុំពោះឱ្យហាប់ ណែន។
6 . មិនត្រូវប្រើខោដែលមានលេខតូចចង្អៀតពេកទេ នាំឱ្យមានឧបសគ្គដល់ចលនាឈាមរត់នៅត្រគាក។
7 . ក្នុងស្ថានភាពអង្គុយយូរ ទម្ងន់ខ្លួនទាំងអស់ត្រូវធ្លាក់មកលើកំប៉េះគូទដែលជាហេតុធ្វើឱ្យប៉ះពាល់ដល់ចលនាឈាមរត់ និង សាច់ដុំគូទ។ ដើម្បី ចៀសវាងបញ្ហានេះ ត្រូវឧស្សាហ៍ធ្វើការម៉ាស្សាកំប៉េះគូទឱ្យបានញឹកញាប់ក្នុងពេលងូតទឹកម្ដងៗ។ គេអាចប្រើ ស្រោមដៃដែលមានកន្ទួល ម៉ាស្សាថ្នមៗលើកំប៉េះគូទដោយខ្លួនឯង។
8 . ស្ថានភាពគេងគួរកល់ចុងជើងឱ្យខ្ពស់ជាងដងខ្លួនបន្ដិច ដើម្បីសម្រួលចលនាឈាមរត់មកបេះដូងវិញ។
9 . ប្រើក្រែម ឬឡេជាជំនួយ ដើម្បីរក្សាស្បែកឱ្យមានសំណើមជាប្រចាំ។
ដំបូន្មានអ្នកជំនាញ
ថ្វីត្បិតតែការរៀបរាប់ខាងលើអាចឱ្យលោកអ្នកអនុវត្ដបានដោយខ្លួនឯងក៏ដោយ ក៏លោកអ្នកចាំបាច់ត្រូវទៅរកអ្នកជំនាញ ឱ្យបានត្រឹមត្រូវ មុននឹងអនុវត្ដ។ ការប្រតិបត្ដិមិនបានត្រឹមត្រូវអាចឱ្យលោកអ្នកជួបបញ្ហាសុខភាព។
ប្រភព ៖ ទស្សនាវដ្តី សុខភាពយើង លេខ៣៨ ខែមិនា ឆ្នាំ២០០៩
Leave a Reply