មហារីកក្រពះជាជម្ងឺមួយប្រភេទដែលកើតមានលើមនុស្សគ្រប់វ័យហើយប្រជាពលរដ្ឋគ្រប់រូបមានការភ័យខ្លាចជាខ្លាំង។ ជម្ងឺនេះអាចបង្កឱ្យបាត់បង់ជីវិតបាន ប្រសិនបើព្យាបាលមិនទាន់ពេលវេលា។ អ្នកដែលបានកើតជម្ងឺនេះដោយសារតែបុគ្គលនោះរស់ នៅដោយគ្មានអនាម័យ។ ដូចនេះលោកអ្នកត្រូវយកចិត្ដទុកដាក់ក្នុងការរស់នៅឱ្យមានអនាម័យក៏ដូចជាបង្ការដើម្បីចៀសវាងពី ជម្ងឺមហារីកក្រពះផងដែរ។ ការពឹងផ្អែកទៅលើការការពារជាមុនគឺធ្វើឱ្យទទួលបានប្រសិទ្ធភាពខ្ពស់ក្នុងការព្យាបាល។
លោកវេជ្ជបណ្ឌិត អ៊ុង ចក្រាវុធ ប្រធានផ្នែកថ្លើម ក្រពះ និងពោះវៀននៅមន្ទីរពេទ្យកាល់ម៉ែតមានវត្ដមានមកបកស្រាយ បំភ្លឺអំពីជម្ងឺមហារីកក្រពះជូនប្រិយមិត្ដអ្នកអានឱ្យបានជ្រាប តាមរយៈទស្សនាវដ្ដី សុខភាពយើង។
មហារីកក្រពះ ជាអ្វី?
មហារីកក្រពះជាជម្ងឺមួយប្រភេទដែលមានដំបៅមហារីកដុះនៅក្នុងក្រពះ។ នៅពេលដែលដំបៅនៅក្នុងក្រពះកាន់តែរីកធំ បន្ដិចម្ដងៗ ហើយចេះតែរីករាលដាលធ្វើឱ្យមានដំបៅក្រពះរ៉ាំរ៉ៃ រួចក្លាយទៅជាជម្ងឺមហារីកក្រពះ។
មូលហេតុបង្កមហារីកក្រពះ
មូលហេតុដែលធ្វើឱ្យលោកអ្នកមានកើតជម្ងឺមហារីកក្រពះ គឺដោយសារតែដំបៅរ៉ាំរ៉ៃនៅក្នុងក្រពះដែលដំបៅនេះចេះតែ វិវត្ដន៍បន្ដិចម្ដងៗក្លាយទៅជាដំបៅមហារីក។ ដំបៅនេះបណ្ដាលមកពីកត្ដាជាច្រើនក្នុងនោះមានមូលហេតុមួយគឺមេរោគម្យ៉ាងនៅក្នុង ក្រពះ ដែលមេរោគនោះមានឈ្មោះថា អេលីកូប៉ាក់ទែពីឡូរី។ មេរោគនេះនៅក្នុងក្រពះយូរៗទៅធ្វើឱ្យក្រពះទៅជារលាក ដែលការ រលាកក្រពះដំបូងគឺជាការរលាកតូចឈានទៅរកការរលាករ៉ាំរ៉ៃហើយបណ្ដាលឱ្យក្រពះក្លាយជាមហារីក។ មានមូលហេតុមួយទៀត ដែលស្ថិតក្នុងការស្រាវជ្រាវនៅឡើយ ដោយសង្ស័យទៅលើចំណីអាហារដែលមិនស្អាតឬអាហារដែលមានជាតិគីមីក៏អាចបង្កឱ្យកើត ជម្ងឺមហារីកក្រពះនេះបានដែរ។
រោគសញ្ញាមហារីកក្រពះ
មហារីកក្រពះស្ដែងចេញជារូបភាពយ៉ាងច្រើនដែលអាចឱ្យយើងដឹងបាន។
- មានអាការឈឺពោះ ឬឆ្អល់ពោះនៅចុងដង្ហើម
- ទទួលទានអាហារមិនសូវបាន ដោយសារក្រពះកិនរំលាយអាហារមិនបានល្អ
- ចេះតែក្អួតញឹកញាប់
- ធុំអាហារ ដូចជាធុំជាតិសាច់ជាដើម
- មានការស្រកទម្ងន់
- ជួនកាលមានការក្អួតឈាមតាមមាត់ជាដើម
- អ្នកជម្ងឺខ្លះពុំមានរោគសញ្ញាដូចខាងលើនេះទេ តែគេអាចដឹងបានដោយការឆ្លុះក្រពះ។
វិធីព្យាបាលមហារីកក្រពះ
លោកអ្នកបានជ្រាបមកហើយថា ជម្ងឺមហារីកក្រពះវាលេចចេញជារូបភាពច្រើនយ៉ាងដែលអាចឱ្យលោកអ្នកសម្គាល់បាន ថាជាជម្ងឺមហារីកក្រពះ។ អ្នកដែលមានរោគសញ្ញានេះ ហើយដឹងថាខ្លួនឯងកើតសូមរួសរាន់រហ័សមកកាន់មន្ទីរពេទ្យដើម្បីធ្វើការ ព្យាបាលត្រឹមត្រូវនិងឱ្យបានទាន់ពេលវេលានោះការព្យាបាលគឺមានប្រសិទ្ធភាពខ្ពស់ឱ្យជាសះស្បើយដោយគ្រូពេទ្យជំនាញច្បាស់ លាស់តាមរយៈការធ្វើការព្យាបាលវះកាត់ និងដោយចាក់ថ្នាំគីមីឬព្យាបាលដោយប្រើវិធីសាស្ដ្រឬបច្ចេកទេសផ្សេងទៀត។ ដោយ ឡែកប្រសិនបើលោកអ្នកកើតជម្ងឺមហារីកក្រពះហើយមិនបានមកធ្វើការព្យាបាលឱ្យទាន់ពេលវេលាទេនោះ ជម្ងឺនេះអាចបង្កឱ្យ លោកអ្នកបាត់បង់ជីវិតបាន។ បើដំបៅនៅក្នុងក្រពះកាន់តែធំការព្យាបាលមានតែការវះកាត់តែប៉ុណ្ណោះ ប្រសិនបើអាចធ្វើទៅបាន។ ជួនកាលមិនអាចធ្វើការវះកាត់បានឡើយដោយសារតែមហារីកក្រពះកាន់តែរីករាលដាលទៅសរីរាង្គផ្សេងៗទៀតនៅក្នុងខ្លួន។ ដូច នេះវិធីព្យាបាលជម្ងឺមហារីកក្រពះដែលមានលក្ខណៈល្អប្រសើរបំផុតគឺពឹងផ្អែកទៅលើការការពារជាមុន ជាវិធីដែលមានប្រសិទ្ធភាព ខ្ពស់។
វិធីបង្ការជម្ងឺមហារីកក្រពះ
មហារីកក្រពះអាចធ្វើការទប់ស្កាត់ជាមុនបាន ដោយគ្រាន់តែលោកអ្នកមិនត្រូវជក់បារី មិនត្រូវទទួលទានស្រាឬថ្នាំពេទ្យ ដែលគ្មានវេជ្ជបញ្ជាត្រឹមត្រូវ ដែលជាភ្នាក់ងារបង្កឱ្យមានដំបៅក្រពះ។ ម្យ៉ាងទៀតលោកអ្នកត្រូវរស់នៅឱ្យមានអនាម័យមិនត្រូវ ទទួលទានអាហារបន្លែដែលលាងមិនស្អាត ឬអាហារផ្អូមឡើយ។ ការចៀសវាងទទួលទានអាហារខាងលើនេះក៏ដូចជាចៀសវាងកុំឱ្យ មានមេរោគអេលីកូប៉ាក់ទែពីឡូរីនៅក្នុងខ្លួនដែរ ព្រោះមេរោគនេះឆ្លងតាមរយៈចំណីអាហារមិនស្អាតទឹកឆៅមិនបានដាំឱ្យពុះជាដើម។ លោកអ្នកត្រូវប្រញាប់ទៅកាន់មន្ទីរពេទ្យដើម្បីជួបគ្រូពេទ្យធ្វើការឆ្លុះក្រពះប្រសិនបើលោកអ្នកសង្ស័យថាមានជម្ងឺមហារីកក្រពះ ព្រោះជម្ងឺនេះជួនកាលមិនមានរោគសញ្ញាពិសេសណាមួយឡើយ។
ផលប៉ះពាល់របស់ជម្ងឺមហារីកក្រពះ
ជម្ងឺមហារីកក្រពះបង្កឱ្យលោកអ្នកមានផលពិបាកយ៉ាងធ្ងន់ធ្ងរទៅលើសេដ្ឋកិច្ចគ្រួសារ ព្រោះនៅក្នុងគ្រួសារដែលមានសមាជិកមានជម្ងឺ ពិតជាធ្វើឱ្យអស់ថវិកាច្រើនក្នុងការចំណាយព្យាបាល។ ជាពិសេសបើអ្នកជម្ងឺដែលត្រូវជាមេគ្រួសារទទួលបន្ទុក ទៀតនោះ សង្គមគ្រួសារពិតជាមានការលំបាក ហើយបាត់បង់នូវការងាររកស៊ីចិញ្ចឹមជីវិតប្រចាំថ្ងៃរួចហើយធ្វើឱ្យបាត់បង់ចំណូល គ្រួសារ។ ជាពិសេសអាចជះឥទ្ធិពលទៅដល់កូន ដូចជាធ្វើឱ្យរំខានដល់ការសិក្សារៀនសូត្ររបស់កូនដោយសារទទួលរងបន្ទុកជំនួស អាណាព្យាបាលដែលមានជម្ងឺ។
ដំបូន្មានអ្នកឯកទេស
លោកអ្នកត្រូវរស់នៅឱ្យមានអនាម័យ ដើម្បីចៀសវាងមានមេរោគអេលីកូប៉ាក់ទែពីឡូរីនៅក្នុងក្រពះបង្កឱ្យមានជម្ងឺមហា រីកក្រពះក៏ដូចជាចៀសវាងមិនឱ្យមានជម្ងឺផ្សេងទៀតដែរ ដូចជារាករូស ឬជម្ងឺផ្សេងៗទៀត។ ព្រោះជម្ងឺនេះឆ្លងតាមរយៈការរស់នៅ គ្មានអនាម័យ និងចំណីអាហារមិនស្អាត។ លោកអ្នកត្រូវប្រញាប់មកកាន់មន្ទីរពេទ្យដើម្បីជួបគ្រួពេទ្យដែលមានឯកទេសពិតប្រាកដ ធ្វើការវិភាគឱ្យបានច្បាស់លាស់ គួរព្យាបាលតាមរបៀបណាដើម្បីឱ្យមានប្រសិទ្ធភាព។
បណ្ដាំផ្ញើ ៖ នៅលេខក្រោយៗទៀត ទស្សនាវដ្ដី សុខភាពយើង នឹងបន្ដលើកយកជម្ងឺមហារីកផ្លូវរំលាយអាហារដទៃទៀតមកជម្រាបជូនជាបន្ដបន្ទាប់ទៅទៀត ដូចជាមហារីកបំពង់អាហារ មហារីកពោះវៀនធំជាដើម។ សូមរង់ចាំអានដោយអនុគ្រោះ។
ប្រភព ៖ ទស្សនាវដ្តី សុខភាពយើង លេខ៣៣ ខែតុលា ឆ្នាំ២០០៨
Leave a Reply