ដោយសារតែមានការបាត់បង់អាយុជីវិតរបស់ប្រជាពលរដ្ឋកម្ពុជាជាញឹកញាប់ដោយសារជម្ងឺផ្តាសាយបក្សី ហេតុនេះហើយគណៈកម្មាធិការជាតិគ្រប់គ្រងគ្រោះមហន្ដរាយ បានរៀបចំសិក្ខាសិលាមួយ ស្ដីពីការបណ្ដុះបណ្ដាល និងផ្សព្វផ្សាយបុគ្គលិកសារព័ត៌មានរដ្ឋ ឯកជនពីផលប៉ះពាល់ ដោយសារជម្ងឺផ្ដាសាយបក្សីរាតត្បាតជាសាកល នៅថ្ងៃទី៧ ខែមិថុនា ឆ្នាំ២០១២ ក្នុងសណ្ឋាគារមណ្ឌលគិរី រាជធានីភ្នំពេញ។
ក្នុងសិក្ខាសាលានេះ មន្រ្ដីគណៈកម្មាធិការជាតិគ្រប់គ្រងគ្រោះមហន្ដរាយ (គ.ជ.គ.ម.)បានអំពាវនាវឲ្យប្រព័ន្ធផ្សព្វ-ផ្សាយព័ត៌មានទាំងអស់ចូលរួមផ្សព្វផ្សាយព័ត៌មាន ដែលទាក់ទងគ្រោះមហន្តរាយនិងសារអប់រំសុខភាពទៅដល់ប្រជាជននៅមូលដ្ឋាន ពិសេសតំបន់ដាច់ស្រយាល។ នេះបើយោងតាមការចេញផ្សាយរបស់គេហទំព័រដើមអំពិល។
លោក ផ្លង ពន្លឺរត័ន៍ អនុប្រធាននាយកដ្ឋានព័ត៌មាន នៃគណៈកម្មាធិការជាតិគ្រប់គ្រង គ្រោះមហន្ដរាយមានប្រសាសន៍ក្នុងពិធីនោះថា «មានតែបណ្ដាញសារព័ត៌មានទេទើបអាចពន្យល់ណែនាំប្រជាពលរដ្ឋនៅតំបន់ដាច់ស្រយាល ឲ្យមានការយល់ដឹងអំពីជម្ងឺផ្ដាសាយបក្សី និងផលប៉ះពាល់នានាដែលអាចកើតមានឡើង»។ លោកបន្តថា ការគ្រប់គ្រង និងទប់ស្តាត់បន្ទាន់នូវជម្ងឺផ្តាសាយបក្សី ដែលឆ្លងរាតត្បាតជាសាកល គឺជាមុខសញ្ញាគ្រោះថ្នាក់មួយបន្ថែមទៀត ដែលទាមទារឲ្យមានការគិតគូរពីបណ្ដាភាគីពាក់ព័ន្ធ រួមទាំងវិស័យឯកជនផងដែរ ដើម្បីលើកស្ទួយសុខុមាលភាពរបស់ប្រជាជនកម្ពុជា។
លោកស្រី កាន ដាហ្សី ទីប្រឹក្សាបច្ចេកទេសថ្នាក់ជាតិ នៃគម្រោងគ្រប់គ្រង និងទប់ស្កាត់បន្ទាន់ជម្ងឺផ្ដាសាយបក្សី និងផ្ដាសាយមនុស្ស បានថ្លែងក្នុងឱកាសនោះដែរថា មេរោគជម្ងឺផ្ដាសាយបក្សីបង្កឡើងដោយវីរុស។ ជម្ងឺនេះ បង្កជម្ងឺលើសត្វមាន់ ទា ក្ងាន មាន់បារាំង មាន់អាហ្រ្វិក ក្រួច ក្ងោក និងបក្សីព្រៃផ្សេងទៀត នៅពេលដែលមនុស្សប៉ះពាល់សត្វទាំងនោះមិនប្រុងប្រយ័ត្ននឹងឆ្លង ហើយប្រសិនបើមិនព្យាបាលឲ្យទាន់ពេលវេលានោះទេ អ្នកជម្ងឺនឹងអាចស្លាប់។ លោកស្រីបន្ថែមថា «ជម្ងឺផ្ដាសាយបក្សីបានធ្វើឲ្យប៉ះពាល់សេដ្ឋកិច្ចជាតិយ៉ាងធ្ងន់ធ្ងរ ដោយសារតែអត្រាឆ្លងរាលដាលមានកម្រិតខ្ពស់ សត្វឈឺ ងាប់ និងមានការសម្លាប់សត្វ ការចំណាយលើវិធានការណ៍ការពារច្រើន។ បន្ថែមពីលើនេះទៀត ជម្ងឺផ្ដាសាយបក្សីក៏បានធ្វើឲ្យប៉ះពាល់ដល់សុខភាពសាធារណៈ ការធ្វើពាណិជ្ជកម្ម និងទេសចរណ៍ផងដែរ»។
នៅប្រទេសកម្ពុជា ចាប់ពីឆ្នាំ២០០៤ រហូតមកដល់ពេលបច្ចុប្បន្ន មានអ្នកឆ្លងជម្ងឺផ្ដាសាយបក្សី ចំនួន២១ករណី ក្នុងនោះមានអ្នកស្លាប់ ១៩នាក់ ដែលករណីស្លាប់ ចុងក្រោយគឺនៅថ្ងៃទី២០ ខែឧសភា ឆ្នាំ២០១២ កន្លងទៅក្នុងខេត្តកំពង់ស្ពឺ លើក្មេងស្រីអាយុ១០ឆ្នាំ។ ចំណែកនៅលើពិភពលោកវិញចាប់ពីឆ្នាំ២០០៣មក ជម្ងឺផ្ដាសាយបក្សី បានកើតមាននៅប្រទេសចំនួន១៥ ហើយមានអ្នកឆ្លងជម្ងឺផ្ដាសាយបក្សីចំនួន ៥៩៧ករណី និងស្លាប់ចំនួន ៣៥២នាក់៕
អត្ថបទដោយ ៖ សៀង វិរៈ
ចេញផ្សាយ ៖ ថ្ងៃទី០៩ ខែមិថុនា ឆ្នាំ២០១២
Leave a Reply