បន្ទាប់ពីមានភ្លៀងធ្លាក់ដើមឆ្នាំកន្លងមក ជម្ងឺគ្រុនឈាមគឺជាជម្ងឺម្យ៉ាងដែលកើតឡើង ដោយសារមូសខ្លាខាំ។ បច្ចុប្បន្នជម្ងឺនេះបាននឹងកំពុងរាតត្បាត នៅតាមបណ្តាលខេត្ត ក្រុងមួយចំនួនគួរឲ្យកត់សម្គាល់ នៅក្នុងប្រទេសកម្ពុជា ដូចជានៅក្នុងខេត្តកោះកុង ឧត្តរមានជ័យ បន្ទាយមានជ័យ កំពង់ស្ពឺ និងខេត្តកណ្តាល តាកែវ និងព្រះវិហារ ជាដើម។ កាលពីពេលថ្មីៗនេះ ប្រជាជននៅខេត្តកំពង់ឆ្នាំងកំពុងមានការព្រួយបារម្ភអំពីជម្ងឺគ្រុនឈាមនេះ ដែលបានរាតត្បាតប្រជាពលរដ្ឋនៅក្នុងខេត្តនោះ។ តើជម្ងឺគ្រុនឈាម បាននឹងកំពុងរាតត្យាតប្រជាពលរដ្ឋខេត្តកំពង់ឆ្នាំងយ៉ាងណាខ្លះ?
បើយោងតាមសេចក្តីណែនាំអនុវត្តន៍ស្តីពីវិធានការបង្ការ និងការទប់ស្កាត់ជម្ងឺគ្រុនឈាម ចុះថ្ងៃទី៣១ ខែឧសភា ឆ្នាំ២០១២ របស់អភិបាលនៃគណៈអភិបាលខេត្តកំពង់ឆ្នាំង លោកទូច ម៉ារីម បានឲ្យដឹងថា ចាប់តាំងពីសប្តាហ៍ទី១៧ ថ្ងៃទី២៤ ខែមេសា ឆ្នាំ២០១២ ជាលើកដំបូងហើយ ដែលមានកុមារកើតជម្ងឺគ្រុនឈាម២ករណីនៅភូមិកណ្តាល សង្កាត់រលាប្អៀរបន្ទាប់មកជម្ងឺនេះបានកើតឡើងជាបន្តបន្ទាប់ មកដល់សប្តាហ៍ទី២២ នាថ្ងៃទី២៣ ដល់ថ្ងៃទី២៩ ខែឧសភាឆ្នាំ២០១២។ នេះបើយោងតាមការចេញផ្សាយរបស់គេហទំព័រសាព័ត៌មានដើមអំពិល។
សារព័ត៌មាននេះបានបន្តថា ជម្ងឺគ្រុនឈាមនៅក្នុងក្រុងកំពង់ឆ្នាំងមានចំនួន១ករណី ស្រុករលប្អៀរ៤ករណី ស្រុកបរិបូណ៍៣ករណី និងនៅស្រុកកំពង់លែង១ករណី។ សរុបជារួមជម្ងឺគ្រុនឈាមគិតត្រឹមថ្ងៃទី២៩ ខែឧសភា ឆ្នាំ២០១២ខេត្តកំពង់ឆ្នាំងមានកុមារកើតជម្ងឺគ្រុនឈាម៣២ករណីហើយ។
ប្រធានកម្មវិធីគ្រុនចាញ់ និងគ្រុនឈាមនៃមន្ទីរសុខាភិបាលខេត្តលោក ពេជ្រ សុន បានឲ្យដឹង ថា ជម្ងឺគ្រុនឈាមបើប្រៀបនឹងឆ្នាំមុន កើតឡើងត្រឹមតែ៥ករណីប៉ុណ្ណោះ។ ដូច្នេះ៥ខែដើមឆ្នាំ២០១២ មានកុមារចូលសម្រាកព្យាបាលជម្ងឺក្នុង មន្ទីរពេទ្យបង្អែកខេត្តមានចំនួន១៥១នាក់ ក្នុងនោះកុមារី កើតជម្ងឺគ្រុនឈាមមាន៣៦នាក់។ នៅថ្ងៃទី៦ ខែឧសភា ឆ្នាំ២០១២នេះ មន្ទីរពេទ្យបង្អែកខេត្តមានកុមារសម្រាកព្យាបាលជម្ងឺ៣១នាក់ ក្នុងនោះកុមារកើតជម្ងឺគ្រុនឈាមមាន១៤នាក់។
លោក ម៉ម ម៉ាឡៃ អនុប្រធានមន្ទីរសុខាភិបាលបានលើកឡើងថា បើទោះបីជាសញ្ញាហានីភ័យនៃការវិវត្តន៍ស្ថិតិករណីជម្ងឺគ្រុនឈាមប្រចាំសប្តាហ៍មានការកើនឡើងក៏ដោយ ក៏កុមារស្លាប់ដោយសាជំងឺគ្រុនឈាម នៅខេត្តកំពង់ឆ្នាំងមិនមានទេ។ នេះដោយសារមានការឧបត្ថម្ភគាំទ្រ ពីក្រសួងសុខាភិបាល មជ្ឈមណ្ឌលជាតិប្រយុទ្ធប្រឆាំងនិងជម្ងឺគ្រុនឈាម អភិបាលខេត្តកំពង់ឆ្នាំង លោកប្រធានមន្ទីរសុខាភិបាលខេត្តកំពង់ឆ្នាំង ព្រមទាំងមានការសហការគ្នាជាមួយបណ្តាអង្គការ ក្រៅរដ្ឋាភិបាលជាតិ-អន្តរជាតិមួយចំនួន បានធ្វើឲ្យការចុះអភិបាលការងារពីថ្នាក់ជាតិមន្ទីរសុខាភិបាលខេត្តស្រុក មានភាពប្រសើរ និងបានស្វាគមន៍ក្នុងការដាក់ថ្នាំអាបេត ព្រមទាំងការចូលរួមធ្វើអនាម័យក្នុងលំនៅដ្ឋានផ្ទាល់របស់ខ្លួនអាណាព្យាបាលបាននាំកូនចៅពួកគាត់មកទទួលការពិគ្រោះ និងព្យាបាលសេវាសុខភាពសាធារណៈទាន់ពេលវេលា នៅពេលដែល ពួកគាត់សង្ស័យថាកូនរបស់ពូកគាត់កើតមានជម្ងឺគ្រុនឈាម។ មន្ទីរសុខាភិបាលមានគោលការណ៍ណែនាំ មន្ទីរពេទ្យខេត្ត មន្ទីរពេទ្យបង្អែក អតីតពេទ្យ ស្រុក និងមណ្ឌលសុខភាព ឲ្យមាន កាលើកលែងនៃការបង់ប្រាក់ថ្លៃពិគ្រោះនិងព្យាបាលជម្ងឺគ្រុនឈាមដល់ប្រជាពលរដ្ឋថែមទៀតផង។
អត្ថបទដោយ ៖ សៀង វិរៈ
ចេញផ្សាយ ៖ ថ្ងៃទី០៧ ខែមិថុនា ឆ្នាំ២០១២
Leave a Reply