ដោយសារតែមានការហូរចូលនូវអរិយធម៌ និងរបស់ប្រើប្រាស់ជាច្រើនពីបរទេស បានធ្វើឱ្យយុវវ័យ ជាពិសេសកុមារតូចៗ ដែលមិនទាន់គ្រប់អាយុពេញវ័យនោះចង់ប្រឡូកសាកល្បងអនុវត្ដន៍ដូចមនុស្សចាស់ ដោយមិនដឹងខ្លួន។ កុមារភាគច្រើនភ្លើតភ្លើនទៅ តាមសង្គមលឿនពេក មិនបានយល់ដឹងឱ្យច្បាស់លាស់ ទើបប្រែក្លាយទង្វើទាំងនេះ នាំឱ្យបាត់បង់នូវសីលធម៌ក្នុងខ្លួន ហើយក្លាយទៅ ជាគុណវិបត្ដិមួយដ៏ធ្ងន់ធ្ងរសម្រាប់ក្រុមគ្រួសារ សង្គម និងសាមីខ្លួនទៅវិញ។
នៅក្នុងទំព័រនេះ ទស្សនាវដ្ដី សុខភាពយើង នឹងលើកយកផលប៉ះពាល់របស់កុមារីក្នុងការតុបតែងខ្លួនមិនសក្ដិសមទៅនឹង អាយុជូនប្រិយមិត្ដអ្នកអានជ្រាប តាមរយៈការបកស្រាយរបស់លោកស្រីវេជ្ជបណ្ឌិត ចក ធីតា ឯកទេសវិកលវិទ្យានិងជាអនុប្រធាន កម្មវិធីជាតិសម្រាប់សុខភាពផ្លូវចិត្ដនៃក្រសួងសុខាភិបាល។
កត្ដាដែលធ្វើឱ្យកុមារីឆាប់តែងខ្លួន
ការលូតលាស់ទាំងផ្លូវកាយ និងផ្លូវចិត្ដរបស់កុមារី ត្រូវស្ដែងឡើងទៅតាមដំណាក់កាលនៃអាយុ។ នៅពេលកុមារីមាន អាយុចាប់ពី១០ទៅ១២ឆ្នាំ តែងតែចង់បាននូវឯករាជ្យភាពមួយដែលជារបស់ខ្លួនឯងដោយចង់ធ្វើអ្វីទៅតាមចិត្ដដែលខ្លួនធ្លាប់ឃើញ ធ្លាប់់ឮតាមរយៈទូរទស្សន៍ និងមជ្ឈដ្ឋានខាងក្រៅ។ តម្រូវការទាំងនេះបានជំរុញឱ្យកុមារីមានការវិវត្ដទៅតាមសង្គមយ៉ាងរហ័ស។
1 . កត្ដាសង្គមសាស្ដ្រ ៖ កុមារីដែលមិនសូវមានការគ្រប់គ្រងពីឪពុកម្ដាយបានដិតដល់ ដូចជាពេលមកសាលារៀន ពួកគេ បានសេពគប់មិត្ដភក្ដិអាយុដំណាលៗគ្នា ដែលសុទ្ធតែជាអ្នកតែងខ្លួន ឃើញការបង្ហាញម៉ូត ការតុបតែងខ្លួនតាមរយៈទូរទស្សន៍ ឬតាម រយៈសាច់ញាតិជាដើម។ កត្ដានេះអាចធ្វើឱ្យចំណង់ចំណូលចិត្ដរបស់កុមារីមានការប្រែប្រួលដោយចង់ដឹងចង់់ឮចង់ធ្វើតាមពួកគេទាំង នោះ ដោយមិនខ្វល់ពីផលប៉ះពាល់អ្វីណាមួយនោះឡើយ។ ភាពសម្បូរបែបនៃគ្រឿងសម្អាង សម្លៀកបំពាក់ ឬគ្រឿងអលង្ការ និង កាឡៃនានាដែលបង្កភាពងាយស្រួលសម្រាប់កុមារីមានឱកាសស្វែងរក ដើម្បីមកលម្អខ្លួនទៅតាមភាពទាន់សម័យរបស់យុវវ័យ។
2 . កត្ដាចិត្ដសាស្ដ្រ ៖ គឺសំដៅទៅលើទំនោរចិត្ដរបស់កុមារី ដែលមានតាំងពីកំណើតងាយរងនូវបរិយាកាសខាងក្រៅ ឬ ឆាប់ទទួលយកអ្វីៗដែលខ្លួនជួបប្រទះទៅតាមចរិតធម្មជាតិ។ ដូច្នេះទំនោរចិត្ដនេះអាចកែប្រែចរិតរបស់កុមារីមួយចំនួនក្លាយទៅជា ចេះតុបតែងខ្លួនខុសទំនង មុនអាយុឬខុសវ័យ។
3 . កត្ដាជីវសាស្ដ្រ ៖ ការប្រែប្រួលលូតលាស់នៃសារធាតុក្នុងរាងកាយពីកំណើតរបស់កុមារី ដូចជាប្រព័ន្ធអ័រម៉ូនទទួលពី ឪពុកម្ដាយ ដែលចូលចិត្ដការតុបតែងខ្លួន រួមផ្សំជាមួយបរិយាកាសខាងក្រៅ ក៏អាចធ្វើឱ្យកុមារីមានចរិតតុបតែងខ្លួនពីកំណើតផង ដែរ។
គុណសម្បត្ដិ និងគុណវិបត្ដិនៃការតុបតែងខ្លួនរបស់កុមារី
ប្រសិនបើកុមារីមានការតុបតែងខ្លួនបានសក្ដិសម មិនភ្លើតភ្លើនទៅតាមសង្គមលឿនពេកក៏ជាការល្អម្យ៉ាងដែរ ព្រោះអាច ធ្វើឱ្យកុមារីចេះធ្វើអនាម័យខ្លួនប្រាណបានល្អ និងមើលទៅសមរម្យស្រស់ស្អាត។ ក៏ប៉ុន្ដែបើក្មេងនោះស៊ីវីល័យពេកដល់ថ្នាក់លាបម្សៅ ក្រែម គ្រឿងអលង្ការ សម្លៀកបំពាក់លេចលើលេចក្រោមជាដើម នោះអាចធ្វើឱ្យប៉ះពាល់យ៉ាងធ្ងន់ធ្ងរទៅដល់គ្រួសារ និងសង្គម ជាតិ។
1 . សង្គមគ្រួសារ ៖ ការឆាប់តុបតែងខ្លួនពេកនេះអាចមានវិបត្ដិច្រើននៅក្នុងរង្វង់គ្រួសារ ព្រោះកុមារីដែលតុបតែងខ្លួន ច្រើនភ្លើតភ្លើនទៅតាមសម្រស់ និងទៅតាមអ្វីដែលខ្លួនកំពុងតែប្រព្រឹត្ដជាមួយក្រុមក្មេងៗដទៃទៀត។ ប្រសិនបើក្រុមក្មេងទាំងនោះ ល្អ គ្មានបញ្ហាអ្វីនោះទេ។ ផ្ទុយមកវិញបើក្មេងទាំងនោះមិនល្អ ដើរលេងតាមក្លឹបកម្សាន្ដ សេពគ្រឿងស្រវឹងឬគ្រឿងញៀនជាដើម អាចធ្វើឱ្យគ្រួសារប្រឈមនឹងបញ្ហាជាច្រើន ទាំងថវិកា និងពេលវេលា។
2 . សង្គមជាតិ ៖ កុមារគឺជាទំញំងស្នងឫស្សី ដូច្នេះបើទង្វើរបស់ពួកគេប្រព្រឹត្ដបានប្រសើរ ចេះគោរពសីលធម៌សង្គម មិន ធ្វើខុសពីច្បាប់សង្គម អាចធ្វើឱ្យសង្គមមានការអភិវឌ្ឍ និងរីកចម្រើនជាលំដាប់។ ផ្ទុយទៅវិញប្រសិនបើកុមារធ្វើអ្វីដែលសង្គមហាម ឃាត់ឬខុសគន្លងច្បាប់មិនខុសពីការបំផ្លាញប្រទេសជាតិនោះឡើយ។ លើសពីនេះចំពោះប្រពៃណី និងទំនៀមទម្លាប់របស់ខ្មែរយើង រឹតតែមិនអាចទទួលយកបាននូវការតុបតែងខ្លួន ដែលលេចលើលេចក្រោមដូចប្រទេសដទៃបាននោះទេ។
វិធីសាស្ដ្រដោះស្រាយ
ការអប់រំ និងការតាំងចិត្ដរបស់កុមារ មានសារប្រយោជន៍ខ្លាំងណាស់សម្រាប់ទប់ស្កាត់ អំពើប្រាសចាកពីអសីលធម៌ទាំង ឡាយ។ ដើម្បីដោះស្រាយនូវបញ្ហាទាំងនេះ លុះត្រាតែមានការសហការគ្នាពីក្រុមគ្រួសារ និងមជ្ឈដ្ឋានខាងក្រៅ។
1 . ការអប់រំតាមផ្ទះ ៖ ក្រុមគ្រួសារ និងអាណាព្យាបាលមានតួនាទីសំខាន់ក្នុងការអប់រំ ណែនាំ ជាពិសេសពិនិត្យសកម្មភាព គ្រប់បែបយ៉ាងរបស់កុមារ ដើម្បីការពារ និងទប់ស្កាត់ឱ្យបានទាន់ពេលវេលា ប្រសិនបើឃើញមានអ្វីខុសប្លែកពីធម្មតា។
2 . ការអប់រំតាមសាលា ៖ គឺសំដៅទៅលើការគោរពបទបញ្ជាផ្ទៃក្នុងរបស់សាលាបានតឹងរ៉ឹង ដោយការហាមឃាត់មិនឱ្យ មានការតុបតែងខ្លួន ការប្រើប្រាស់គ្រឿងអលង្ការគ្រប់ប្រភេទ និងការស្លៀកពាក់ទៅតាមឯកសណ្ឋាន ដែលបានកំណត់ឱ្យបានត្រឹម ត្រូវ។
3 . ការអប់រំរបស់សង្គម ៖ គួរតែកាត់បន្ថយការផ្សព្វផ្សាយនូវពាណិជ្ជកម្ម ឬសាច់រឿងតាមទូរទស្សន៍ណាដែលធ្វើ ឱ្យកុមារមានអារម្មណ៍ភ្លើតភ្លើនចង់ត្រាប់តាម។ ដោយសារប្រទេសយើងមានការអនុវត្ដច្បាប់នៅមានកម្រិតនោះ រាល់ការនាំចូលនូវ ផលិតផលពីបរទេសមិនមានការត្រួតពិនិត្យឱ្យបានប្រសើរនោះទេ ជាហេតុធ្វើឱ្យមានផលិតផលមួយចំនួនដែលមិនគួរនាំចូល បែរជា មានការហូរចូលទាំងគំហុកទៅវិញ។
ដំបូន្មានអ្នកប្រឹក្សា
ចំពោះកុមារទូទៅ គួរធ្វើការតុបតែងខ្លួនដោយការសម្អាតខ្លួនប្រាណ និងការស្លៀកពាក់ឱ្យបានសមរម្យ ទើបជាការប្រសើរ។ គួរកុំឆាប់យកនូវអរិយធម៌បរទេសច្រើនពេក ព្រោះអាចធ្វើឱ្យវិវត្ដន៍ដោយមិនដឹងខ្លួនទៅរកភាពភ្លើតភ្លើន។ ជាពិសេសកុមារ គួរតែយកការសិក្សាជាធំ ដើម្បីអនាគតរុងរឿងរបស់ខ្លួន។
ប្រភព ៖ ទស្សនាវដ្តី សុខភាពយើង លេខ៣០ ខែកក្កដា ឆ្នាំ២០០៨
Leave a Reply