របបអាហារចាំបាច់ណាស់សម្រាប់ទ្រទ្រង់ជីវិតមនុស្សនិងសត្វ។របបអាហារគ្រប់គ្រាន់មិនត្រឹមតែជួយឱ្យមនុស្សរីកលូត លាស់ធំធាត់ផ្នែកសរីរាង្គប៉ុណ្ណោះទេប៉ុន្ដែថែមទាំងពាក់ព័ន្ធសំខាន់ដល់ការលូតលាស់ផ្នែកបញ្ញាស្មារតីមួយចំណែកទៀតពិសេសស្ថិត នៅក្នុងវ័យកុមារភាព។ កុមារត្រូវការនូវអាហារចម្រុះដើម្បីទ្រទ្រង់សុខភាព និងការរីកចម្រើនផ្នែកខួរក្បាល។ បើកុមារទទួលបាន អាហារូបត្ថម្ភមិនគ្រប់គ្រាន់ នោះកុមារអាចនឹងបាត់បង់ថាមពលផ្លូវកាយនិងមានកម្សោយផ្នែកបញ្ញាស្មារតី។
សម្រាប់លេខនេះ ទស្សនាវដ្ដី សុខភាពយើង បានលើកយកនូវអត្ថបទថ្មីមួយស្ដីអំពីរបបអាហារសម្រាប់កុមារតាមរយៈ ការប្រឹក្សាពីលោកស្រីវេជ្ជបណ្ឌិត ជី កាំហូយ អ្នកជំនាញផ្នែកជម្ងឺកុមារប្រចាំមន្ទីរពេទ្យកុមារជាតិ។
កម្សោយបញ្ញារបស់កុមារ
កុមារដែលរៀនមិនសូវចងចាំបានល្អ មិនពូកែ គិតយឺតយូរ មិនរហ័សរហួន មិនវៃឆ្លាត កុមារក្រចេះ ក្រយល់ក្រចាប់បាន នូវអ្វីដែលគេព្យាយាមពន្យល់និងចង់ឱ្យចេះដឹង ហៅថាអាប់បញ្ញា ឬល្ងង់។ មានមូលហេតុជាច្រើនយ៉ាងដែលធ្វើឱ្យបញ្ញារបស់កុមារ មានការលូតលាស់យឺតយ៉ាវ ខ្សោយដោយពាក់ព័ន្ធទៅនឹងការមិនបានយកចិត្ដទុកដាក់ចំពោះសុខភាពផ្លូវចិត្ដ និងផ្លូវកាយរបស់ទារក តាំងពីក្នុងផ្ទៃម្ដាយ។ ព្រមទាំងកត្ដាសុខភាពម្ដាយទ្រុឌទ្រោមដោយខ្វះអាហារពេលកំពុងពពោះកុមារមានជម្ងឺច្រើនតាំងពីតូច កុមារ ជួបនូវភាពតក់ស្លុត ភ័យរន្ធត់ ប៉ះទង្គិចក្បាលជាដើម។ កត្ដាសំខាន់មួយផ្សេងទៀតគឺការបំបៅដោះ និងរបបអាហារមិនគ្រប់គ្រាន់ ខ្វះជាតិវីតាមីនជាដើម។ ដូច្នេះការបំបៅ និងរបបអាហារជាកត្ដាចម្បងមួយដែលពាក់ព័ន្ធនឹងការលូតលាស់នៃប្រាជ្ញាស្មារតីរបស់ កុមារ។
ប្រភេទអាហារជំនួយការលូតលាស់បញ្ញា
កង្វះអាហារធ្វើឱ្យកុមារមានការលូតលាស់ផ្នែកបញ្ញាយឺតខុសប្រក្រតី។ អាហារប្រភេទណាខ្លះដែលជួយឱ្យបញ្ញាកុមារលូត លាស់ល្អ?
- ជាតិគ្លុយកូស ៖ ជាជាតិស្ករដែលខួរក្បាលត្រូវការបំផុត។ បើខ្វះជាតិគ្លុយកូសក្នុងឈាមនោះខួរក្បាលនឹងថមថយការចង ចាំ។ ជាតិគ្លុយកូសមាននៅក្នុងអង្ករ បាយ សណ្ដែកបាយ សណ្ដែកបារាំង ផ្លែឈើស្រស់ បន្លែមានជាតិម្សៅនិងបន្លែបៃតងផ្សេងៗ។ ប៉ុន្ដែការទទួលទានជាតិផ្អែមដែលកែច្នៃច្រើន មិនមែនជាការល្អសម្រាប់សុខភាពនោះទេដូចជាស្ករត្នោត ស្ករគ្រាប់ ស្ករស ទឹកឃ្មុំ ជាដើម។
- ជាតិដែក ៖ ខ្វះជាតិដែកគឺនាំឱ្យប្រព័ន្ធប្រសាទណឺរ៉ូននៃខួរក្បាលខ្វះអុកស៊ីហ្សែនព្រោះជាតិដែកមានតួនាទីនាំយកអុកស៊ី ហ្សែនទៅប្រព័ន្ធប្រសាទណឺរ៉ូន។ ជាតិដែកអាចមាននៅក្នុងស្ពៃខៀវ ត្រកួននិងមានច្រើននៅក្នុងសាច់ពណ៌ក្រហម។
- ជាតិវីតាមីន ៖ វីតាមីនដែលជំនួយដល់ខួរក្បាល ដូចជាវីតាមីនបេ១ និងបេ២។
- ជាតិសាច់ ៖ ជាតិសាច់ ដូចជាត្រី សាច់សត្វផ្សេងៗជាដើមមានផ្ទុកសារធាតុរ៉ែច្រើនប្រភេទ ដូចជាផូស្វ័រស័ង្កសីឬសេឡេនីញ៉ូម ដែលមានឥទ្ធិពលលើការចងចាំនៃខួរក្បាល។
- ជាតិខ្លាញ់ ៖ ជាតិខ្លាញ់ដែលបានមកពីសត្វហៅថាលីពីដ និងខ្លាញ់ដែលបានមកពីរុក្ខជាតិដូចជាសណ្ដែកសៀងល្ង ដូង ប្រេងកុលហ្សា ប្រេងពន្លកស្រូវសាឡីជាដើម ហៅថាប្រេងធញ្ញជាតិ។
រូបភាពទស្សនាវដ្ដីសុខភាពយើង
អត្ថប្រយោជន៍នៃការផ្ដល់អាហារគ្រប់គ្រាន់
ការទទួលទានអាហារគ្រប់គ្រាន់របស់កុមារ នាំឱ្យការស្រូបយកជីវជាតិទៅចិញ្ចឹមតាមផ្នែកនីមួយៗនៃរាងកាយបានសម ស្របតាមតម្រូវការ។ អាហារជាច្រើនប្រភេទដែលមានរសជាតិ វីតាមីន និងសារធាតុបំប៉នផ្សេងពីគ្នាគឺទាក់ទិនសំខាន់ណាស់ ទៅនឹងការចងចាំនៃខួរក្បាល។ ពពួកអាហារទាំងនេះមានសារៈប្រយោជន៍ណាស់សម្រាប់ខួរក្បាលរបស់កុមារ។ វាជួយឱ្យកុមារមាន ភាពវាងវៃ ចងចាំបានល្អ ឆាប់ទទួលបាននូវការបណ្ដុះបណ្ដាលជាទូទៅ។ ប៉ុន្ដែប្រភេទអាហារផ្សេងទៀតដែលមានតួនាទីទ្រទ្រង់ សព៌ាង្គកាយ ក៏មានចំណែកមិនអាចខ្វះដែរ។ ការផ្ដល់នូវអាហារគ្រប់ប្រភេទគ្រប់គ្រាន់សម្រាប់ការរីកលូតលាស់នៃសរីរៈរបស់កុមារ គឺធ្វើឱ្យកុមារមានសុខភាពល្អ។ ការទទួលបានសុខភាពល្អនេះហើយដែលរួមចំណែកធ្វើឱ្យខួរក្បាលកាន់តែមានប្រសិទ្ធភាពក្នុងការ ចងចាំ និងជំរុញឱ្យមានភាពឆ្លាតវៃ។
ផលវិបាកនៃការផ្ដល់អាហារមិនគ្រប់គ្រាន់
ទោះជាដោយមូលហេតុណាក៏ដោយ កម្សោយបញ្ញារបស់កុមារមានផលវិបាកដូចគ្នាទាំងអស់។ ប៉ុន្ដែវាអាចធ្ងន់ធ្ងរនៅពេល ដែលទារកបៅមិនគ្រប់គ្រាន់ ខ្វះនូវចំណីអាហារបំប៉នក្នុងខណៈដែលកាយសម្បទារបស់គេត្រូវការលូតលាស់។ កុមារតូចបាត់បង់ សមត្ថភាពផ្សេងៗ ដែលពាក់ព័ន្ធនឹងការបញ្ជានៃខួរក្បាល ដូចជាក្រចេះក្រឡាប់ឬអង្គុយដៃក្រចេះចាប់កាន់ឬប្រតោងឈរ ក្រចេះ ស្ដាប់ ឬនិយាយ មិនងាយយល់ពីអ្វីដែលអ្នកជុំវិញព្យាយាមបង្ហាត់។ នៅពេលដែលកុមារចូលរៀនគេអាចនឹងរៀនមិនពូកែ។ វិធីបង្ការកម្សោយបញ្ញា
អាណាព្យាបាលត្រូវយកចិត្ដទុកដាក់លើសុខភាពកូនតាំងពីនៅក្នុងផ្ទៃមកម្ល៉េះ។ ក្រៅពីការយកចិត្ដទុកដាក់លើសុខភាពផ្លូវ ចិត្ដម្ដាយត្រូវបរិភោគអាហារដែលមានសារធាតុបំប៉នឱ្យបានគ្រប់គ្រាន់ដើម្បីការលូតលាស់របស់ទារកទាំងផ្នែកសរីរៈ និងខួរក្បាល។ នៅពេលដែលទារកកើតមក ម្ដាយត្រូវបំបៅកូនដោយទឹកដោះយ៉ាងតិច៦ខែ។ ចាប់ពីអាយុ៦ខែម្ដាយត្រូវផ្ដល់បបរដែលមានជាតិ សាច់បន្លែឱ្យគ្រប់គ្រាន់ក្នុងបរិមាណ២៥០មីលីលីត្រក្នុងមួយថ្ងៃ។ ការបញ្ចុកអាហារបន្ថែមដល់កូនត្រូវធ្វើតាមដំណាក់កាលនៃអាយុឱ្យ បានសមស្រប។ ប៉ុន្ដែសំខាន់គឺអាហារទាំងនោះត្រូវមានសារធាតុបំប៉នគ្រប់គ្រាន់ដើម្បីជំនួយខួរក្បាល។ នៅក្នុងផ្នែកវេជ្ជសាស្ដ្រមានថ្នាំ ខ្លះជាជំនួយបញ្ញា ប៉ុន្ដែការប្រើថ្នាំនេះគប្បីឆ្លងកាត់ការប្រឹក្សានិងការពិនិត្យសុខភាពពីគ្រូពេទ្យជំនាញជាមុនសិន។
ដំបូន្មានអ្នកជំនាញ
ការបំបៅកូនដោយទឹកដោះម្ដាយល្អប្រសើរណាស់សម្រាប់សុខភាពកូន។ ការបរិភោគទៀតសោតគឺត្រូវមានតុល្យភាពនឹង តម្រូវការរបស់សព៌ាង្គកាយ បើមិនដូច្នោះទេកុមារប្រឈមនឹងការកើតជម្ងឺធាត់ និងជម្ងឺផ្សេងៗទៀត។
ប្រភព ៖ ទស្សនាវដ្តី សុខភាពយើង លេខ០២៩ ខែមិថុនា ឆ្នាំ២០០៨
Leave a Reply