នៅក្នុងស្រទាប់ប្រជាពលរដ្ឋ គេតែងបានឮពាក្យនិយាយចំអកទៅលើលោកអ្នកដែល មានសាច់ជ្រាយពិសេសលោកអ្នក ដែលនៅក្មេងវ័យ និងមិនទាន់បានរៀបអាពាហ៍ពិពាហ៍ ថាជាមនុស្សអស់ហ្ស៊ីន។ ពំនោលបែបនេះលោកអ្នកមួយចំនួនធំគិតថាជា ការពិត លោកអ្នកខ្លះក៏គិតថាមិនពិត។ ពាក្យនិយាយលេងបន្លំមែន“សាច់ជ្រាយអស់ហ្ស៊ីន” នេះត្រូវបានអ្នកជំនាញផ្នែកកីឡាបដិសេធ មិនយល់ស្រប។ តើជាការពិតនោះយ៉ាងណាទៅវិញ?
លោក ទុយ ប៊ុនហឿន ប្រធានការិយាល័យកីឡាទំនើបនៃនាយកដ្ឋានអប់រំកាយ និងកីឡាបានបកស្រាយជូនប្រិយមិត្ដ ជ្រាបពីទស្សនៈនេះតាមរយៈទស្សនាវដ្ដី សុខភាពយើង។
សាច់ជ្រាយអស់ហ្ស៊ីន
សម្រស់របស់មនុស្សគ្រប់រូបពិតជាមិនអាចស្ថិតនៅយូរអង្វែងរហូតឡើយ។ ទ្រឹស្ដីកើតចាស់ ឈឺស្លាប់របស់ព្រះពុទ្ធគឺជាទ្រឹស្ដី សច្ចភាព។ ការចម្រើនឡើងនៃវ័យរបស់មនុស្ស ធ្វើឱ្យសាច់ឈាមក៏កាន់តែជ្រីវជ្រួញ ជ្រាយ ឬយារ។ ប៉ុន្ដែសាច់ដែលនឹងជ្រាយឆាប់ ពេក ឬហៅថាជ្រាយមុនអាយុ គឺជាបញ្ហាមួយដែលប្រជាពលរដ្ឋកម្ពុជាគិតថាជាមនុស្សអស់ភាពបរិសុទ្ធជាមនុស្សដែលឆ្លងកាត់ការរួម ភេទញឹកញយមកហើយ។ ក្រុមយុវវ័យច្រើនហៅថាអស់ហ្ស៊ីនដែលពាក្យ នេះគេហៅកាត់ក្លាយមកពីភាសាបរទេសជាបារាំង ឬ អង់គ្លេស។ នៅអាយុ២៥ឆ្នាំ ប្រជាពលរដ្ឋខ្មែរភាគច្រើនបានរៀបអាពាហ៍ពិពាហ៍រួចហើយហើយក៏ស្របពេលនឹងដំណាក់កាលដែល សាច់ចាប់ផ្ដើមជ្រាយ ធ្វើឱ្យមានទស្សនៈរិះគន់កើតឡើងចំពោះអ្នកនៅលីវដែលមានសាច់ជ្រាយដូចអ្នកឆ្លងកាត់ការរៀបការរួចហើយ ដែរ។
មូលហេតុសាច់ជ្រាយ
សាច់ចាប់ផ្ដើមជ្រាយនេះអាចបណ្ដាលមកពីមូលហេតុមួយចំនួន។
- ជាលក្ខណៈជីវសាស្ដ្រ ឬតាមធម្មជាតិរបស់មនុស្សសាច់នឹងចាប់ផ្ដើមជ្រាយបន្ដិចម្ដងៗនៅពេលវ័យឈានដល់ការថម ថយទៅនៃការលូតលាស់ ឬឈប់លូតលាស់ គឺក្នុងអំឡុងអាយុចាប់ពី២៥ឆ្នាំឡើងទៅ។ ចាប់ពីកុមារភាពដែលមានរបបអាហារគ្រប់ គ្រាន់ សុខភាពល្អ កុមារនោះនឹងមានសាច់ណែនល្អ។ ឯក្មេងជំទង់ដែលស្ថិតក្នុងដំណាក់កាលលូតលាស់ខ្លាំងសាច់របស់គេក៏ណែនល្អ ដែរ។ ដូច្នេះមិនថាសុភាពបុរសឬសុភាពនារីនោះទេ ក្នុងអំឡុងវ័យ២៥ឆ្នាំ សាច់នឹងចាប់ផ្ដើមជ្រាយដោយឯកឯងបើគ្មានវិធីទប់ស្កាត់។
- ជាធម្មតាសាច់ដុំអាចឡើងរឹងទៅបានលុះត្រាតែបានធ្វើចលនាច្រើន។ ដូច្នេះបើក្នុងដំណាក់កាលដែលការលូតលាស់របស់ សាច់ដុំចាប់ផ្ដើមថយចុះហើយនោះ ហើយការធ្វើចលនារបស់សាច់ដុំមិនគ្រប់គ្រាន់ នោះសាច់ដុំនឹងចាប់ផ្ដើមជ្រាយ ថែមទាំងចាប់ផ្ដើម ស្វិតទៀតផង។ យើងអាចសម្គាល់ដោយខ្លួនឯងបានខ្លះដែរតាមរយៈការធ្វើការងារ ដូចជាបោកខោអាវជាដើម គឺសាច់ដុំដៃនឹងឡើង រឹងណែន។ ម្យ៉ាងទៀតបើដៃខាងណាមួយធ្វើការសកម្មជាងគេ ដៃនោះនឹងធំជាងម្ខាងទៀត។
- កង្វះរបបអាហាររូបត្ថម្ភក៏ជាមូលហេតុមួយដែលធ្វើឱ្យសាច់ជ្រាយបានដែរ ព្រោះការលូតលាស់របស់សព៌ាង្គកាយត្រូវការ អាហារជាចាំបាច់ណាស់។ មិនចាំបាច់ដល់វ័យ២៥ឡើយ បើសិនជាកុមារបរិភោគមិនគ្រប់គ្រាន់ នោះសាច់នឹងជ្រាយស្វិតរកសាច់ដុំ ស្ទើរមិនបានជាប្រាកដ។
- ការរួមភេទញឹកញាប់ជាចំណែកតូចមួយដែលរួមផ្សំធ្វើឱ្យសាច់ចាប់ផ្ដើមជ្រាយបានដែរ បន្ទាប់ពីមូលហេតុសំខាន់ៗខាង លើ ព្រោះការរួមភេទធ្វើឱ្យមនុស្សបាត់បង់ថាមពលច្រើន។ យុវវ័យដែលមិនទាន់រួមភេទសាច់នៅណែនល្អ សាច់ស្អាតជាងយុវវ័យ ដែលឆ្លងកាត់ការរួមភេទញឹកញាប់។
វិធីសាស្ដ្រធ្វើឱ្យសាច់ណែន
ទោះលោកអ្នកឆ្លងកាត់ការរួមភេទហើយក្ដី ឬប្អូនៗដែលមិនទាន់បានឆ្លងកាត់ការរួមភេទក្ដី ដើម្បីទទួលបានសាច់ណែនល្អ គួរអនុវត្ដតាមវិធីមួយចំនួនដូចខាងក្រោម។ ការដែលមិនទាន់បានឆ្លងកាត់ការរួមភេទ នៅហ្ស៊ីន ឬបរិសុទ្ធមិនមែនជាហេតុផលដែល ធ្វើឱ្យសាច់ណែនល្អ នោះទេ ថ្វីត្បិតថាវាមានទំនាក់ទំនងតិចតួចដែរនោះ។
- ហាត់ប្រាណឱ្យបានជាប្រចាំ យ៉ាងហោចណាស់បីថ្ងៃក្នុងមួយសបា្ដហ៍ ហើយហាត់ម្ដងឱ្យបាន៣០នាទី។ ការហាត់ប្រាណ ទាំងនោះអាចជាការរាំតាមចង្វាក់ភ្លេង និងហាត់ប្រាណតាមវិធីផ្សេងៗទៀត
- ទម្លាប់លេងកីឡាផ្សេងៗ ដូចជាវាយសី ទាត់សី លេងបាល់បោះ បាល់ទាត់ បាល់ទះ រត់ត្រឹកៗជាដើម
- ធ្វើចលនានានាឱ្យបានច្រើន ដូចជាការងារនៅផ្ទះ កាប់គាស់ដីដាំដំណាំផ្សេងៗ ការយួរទឹកស្រោចដំណាំ លើកដាក់របស់ របរផ្សេងៗ ធ្វើយ៉ាងណាឱ្យសាច់ដុំគ្រប់កន្លែងមានចលនា
- បរិភោគអាហារមានជីវជាតិ និងមានវីតាមីនឱ្យបានគ្រប់គ្រាន់តាមតម្រូវការរបស់សព៌ាង្គកាយ។
ផលប៉ះពាល់ពីសាច់ជ្រាយ
ការពិតទៅសាច់ជ្រាយមិនមានផលប៉ះពាល់ធ្ងន់ធ្ងរណាមួយដល់សុខភាពទេ។ ផ្ទុយទៅវិញ
សុខភាពមិនល្អទៅវិញទេដែល បង្ហាញឱ្យយើងឃើញតាមរយៈសាច់ជ្រាយ។ លោកអ្នកដែលមានសាច់ជ្រាយ អាចបញ្ជាក់ថាមានសុខភាពមិនសូវល្អ ព្រោះយើងដឹង ហើយថា លោកអ្នកដែលមានសាច់ណែនលុះត្រាតែបរិភោគបានគ្រប់គ្រាន់ បានហាត់ប្រាណជាប្រចាំ លេងកីឡាបានញឹកញាប់ជាដើម។ ចំពោះផលប៉ះពាល់ផ្សេងទៀតគឺពាក់ព័ន្ធនឹងសម្រស់ឬសោភ័ណភាព។ សុភាពនារីអាចស្លៀកពាក់សម្លៀកបំពាក់មិនសូវសម មិនហ៊ាន ស្លៀកពាក់ខើចខ្លីជាដើម។ កាលណាស្បែកជ្រាយមុនអាយុ ក៏អាចធ្វើឱ្យពណ៌សម្បុរស្បែកមិនសូវស្រស់ថ្លាបានដែរ។
ដំបូន្មានអ្នកប្រឹក្សា
ចំពោះពាក្យលើកឡើងថា សាច់ជ្រាយអស់ហ្ស៊ីននេះមិនខុស១០០%នោះទេ គ្រាន់តែថាមានចំណែកត្រូវតិចតួច ហើយក៏ មិនអាចប្រើជាទូទៅបានដែរ។ ថ្វីត្បិតថាការរីកចម្រើននៃការកែច្នៃបង្កើនសោភ័ណមានការលូតលាត់ក៏ពិតមែន ប៉ុន្ដែអ្វីដែលយើង អាចទទួលបានពីធម្មជាតិពិតជាប្រសើរជាង។ ដូច្នេះដើម្បីទទួលបានសាច់ណែនល្អ និងសាច់ភ្លឺថ្លា លោកអ្នកគួរតែហាត់ប្រាណឱ្យបាន ទៀងទាត់ លេងកីឡាឱ្យបានច្រើន។ ព្រោះថាកីឡានាំមកនូវសុខភាពល្អ និងសម្រស់ស្រស់សោភាផងដែរ។
ប្រភព ៖ ទស្សនាវដ្តី សុខភាពយើង លេខ០២៩ ខែមិថុនា ឆ្នាំ២០០៨
Leave a Reply