សម័យកាលចេះតែវិវត្ដន៍ទៅមុខ ទម្លាប់នៃការប្រព្រឹត្ដក៏មានការផ្លាស់ប្ដូរដែរ។ យុវវ័យដែលជាវ័យដ៏ស្រស់ស្អាតនៅបច្ចុប្បន្ននេះកំពុងត្រូវក្លាយជាប្រធានបទមួយ ដែលត្រូវមាតាបិតាទាំងឡាយលើកយកមកពិភាក្សាពោរពេញដោយការខ្វល់ខ្វាយ យ៉ាងខ្លាំង ជាពិសេសចំពោះការវិវឌ្ឍន៍យ៉ាងគំហុករបស់ពួកគេ។ ភាពរីកចម្រើននៃសង្គមជឿនលឿនបានធ្វើឱ្យយុវវ័យមួយចំនួនរត់ តាមយ៉ាងគគ្រឹករហូតដល់ងប់ងល់ ភ្លេចគិតពីផលវិបាកទាំងឡាយដែលនឹងត្រូវប្រឈមមុខ។ តើយុវវ័យដែលទាន់សម័យនិយមគួរធ្វើ យ៉ាងណា ដើម្បីឱ្យសមស្របនឹងសម័យកាលដ៏ទំនើបនេះ?
ដើម្បីកសាងប្រទេសឱ្យមានភាពរីកចម្រើន ជាដៃគូសេដ្ឋកិច្ចជាមួយប្រទេសផ្សេងៗរដ្ឋាភិបាលកម្ពុជាចាំបាច់ត្រូវមានទំនាក់ ទំនងកិច្ចការបរទេសបើកចំហទីផ្សារឱ្យមានការហូរចូលនៃអ្នកវិយោគទុន និងភ្ញៀវទេសចរជាដើម។ មានបញ្ហាមួយចំនួនដែលជាចំ ណុចគួរឱ្យព្រួយបារម្ភ ដែលយុវវ័យទាំងឡាយកំពុងត្រូវបានបំពុលដោយសង្គមដែលជឿនលឿននេះបន្ដិចម្ដងៗ ដោយមិនដឹងខ្លួន។ ការបើកចំហទំនាក់ទំនងជាមួយបរទេសបានជួយឱ្យប្រជាពលរដ្ឋយើង ពិសេសយុវវ័យពើបប្រទះនឹងបញ្ហាមួយចំនួនដែលចាត់ទុកថា ជាជម្ងឺមហារីករបស់សង្គម។
យុវវ័យងាយប្រឈមមុខ
នៅពេលដែលសង្គមមានការជឿនលឿន ការហូរចូលនៃវប្បធម៌បរទេសបានកើតឡើងដោយចៀសមិនរួច។ យុវវ័យដែល ទើបនឹងចាប់ផ្ដើមចង់ចេះដឹងចង់ធ្វើតាម ងាយទទួលនូវអ្វីដែលប្រាសចាកសីលធម៌។ ព្រោះវ័យនេះពួកគេធ្វើតាមតែអ្វីដែលពួកគេយល់ ថាត្រឹមត្រូវតែប៉ុណ្ណោះ អ្វីដែលថ្មីៗពួកគេតែងតែចង់សាកល្បងចង់ដឹង ហេតុនេះហើយទើបក្លាយទៅជាចំណុចត្រូវគេវាយលុក។ ឧទាហរណ៍ជាក់ស្ដែងដូចកាលសម័យខ្មែរក្រហម គេតែងតែប្រើមនោគមវិជ្ជារបស់គេទៅលើក្មេងជំទង់ យុវវ័យ ព្រោះគេយល់ថាវ័យ នេះងាយស្រួលលួងលោមបោកប្រាស់។ ទីបំផុតពួកគេក៏បានសម្រេចបំណងមែន ព្រោះនៅជំនាន់ខ្មែរក្រហមឃាតករដៃដល់ដែលហ៊ាន សម្លាប់មនុស្សដោយឥតញញើតនោះ គឺយុវវ័យនេះឯង។
សង្គមបំពុលយុវវ័យ
ការហូរចូលវប្បធម៌បរទេសតាមរយៈខ្សែភាពយន្ដ កាសែតវីដេអូ សារព័ត៌មាន ទស្សនាវដ្ដីជាដើមនិងការបើកទូលាយ ផ្នែកប្រព័ន្ធផ្សព្វផ្សាយ ធ្វើឱ្យជនខិលខូចឆ្លៀតឱកាសកេងយកផលចំណេញតាមរយៈការវាយលុកនូវរូបភាពអាសអាភាស បងតូចបង ធំ ធ្វើឱ្យមនុស្សមើលឃើញចង់ធ្វើតាម ចងអាឃាតគ្នា ជះទឹកអាស៊ីត ការចាប់រំលោភសេពសន្ថវៈជាដើម។ ការហូរចូលនៃវប្បធម៌ បរទេសបានអង្រួនយុវវ័យយើងមួយចំនួនឱ្យចង់ប្រព្រឹត្ដតាម។ វប្បធម៌ទាំងនោះសម្រាប់ប្រទេសជឿនលឿនបានទទួលយកជាទំនៀម ទម្លាប់ របៀបរៀបរយរស់នៅ និងបរិយាកាសសង្គមរបស់គេទៅហើយ។ ដោយឡែកសម្រាប់ប្រទេសយើងពិបាកទទួលយកខ្លាំង ណាស់ តួយ៉ាងដូចជាសម្លៀកបំពាក់យុវវ័យមួយចំនួនកំពុងចម្លងបែបបស្ចិមប្រទេស លេចលើ ខើចក្រោម ចោះរន្ធត្រចៀក ពាក់ក្រវិល ច្រើនពេញត្រចៀកទាំងប្រុសទាំងស្រី មានទាំងចោះច្រមុះបបូរមាត់ ចោះទងផ្ចិត និងសាក់រូបភាពតាមកន្លែងផ្សេងៗជាច្រើនទៀត។
សម្ភារសម្បូរបែប ដូចជាកុំព្យូទ័រ អ៊ិនធើណេត ទូរស័ព្ទឌីជីថលទំនើប វីដេអូស៊ីឌីជាដើមធ្វើឱ្យមានការទំនាក់ទំនងគ្នាយ៉ាង ឆាប់រហ័ស បញ្ជូនឱ្យគ្នាទៅវិញទៅមក។ ការបើកទូលាយផ្នែកប្រព័ន្ធផ្សព្វផ្សាយ ទើបបង្កឱ្យមានជនខិលខូចឆ្លៀតឱកាសបញ្ជូនព័ត៌ មានមិនសមរម្យផ្សព្វផ្សាយទូទាំងប្រទេស។ ភាពសម្បូរបែបបានធ្វើឱ្យអ្នកខ្លះរត់ដេញតាមស៊េរីសឹងមិនទាន់ទើបបណ្ដាលឱ្យមានការ លួច និងឆក់ប្លន់គ្នា។ អ្នកខ្លះប្រើប្រាស់វាហួសកម្រិត ដូចជាពេលតែមួយប្រើកុំព្យូទ័រទូរស័ព្ទកាសស្ដាប់ម៉ាញ៉េ ហាក់ដូចជាទំនើប ជ្រុល។ អ្នកខ្លះប្រើវាសម្រាប់កាត់ត ឬបញ្ជូនរូបភាពមិនត្រឹមត្រូវទៅឱ្យគ្នាទៅវិញទៅមក។ សម្ភារមួយចំនួនទៀតដូចជាឡាន មាសប្រាក់ ផ្ទះ និងសម្លៀកបំពាក់ទាន់សម័យក៏បានធ្វើឱ្យអារម្មណ៍ត្រេកត្រអាលចង់មានចង់បានដូចគេ។ ជាហេតុនាំឱ្យមានការលក់ ខ្លួន លក់សម្រស់ លួច ឆក់ប្លន់ សម្លាប់គ្នា ប្រពន្ធចុង ប្រពន្ធដើមបង្កើតជាភាពវឹកវរនៅក្នុងសង្គម។ ម៉ូតូ និងឡានទំនើបបានធ្វើឱ្យ អ្នកខ្លះប្រើប្រាស់វាក្នុងល្បឿនហួសកម្រិតបង្កឱ្យមានគ្រោះថ្នាក់ចរាចរណ៍។ អ្នកខ្លះទៀតប្រើវាដើម្បីការប្រណាំងនៅលើផ្លូវ សាធារណៈ។ អ្នកខ្លះទៀតបើកបរបណ្ដើរចាក់ម៉ាញ៉េស៊ីឌីបណ្ដើរដោយសម្លេងទ្រហឹងរំខានដល់អ្នកដទៃ។ រូបភាពមួយចំនួនទៀត ដូចជាការប្ដូរសម្លេងស៊ីផ្លេ ភ្លើងពណ៌បំភ្លឺនិងគូសវាសរូបភាពផ្សេងៗ។
ចំណែកគ្រឿងញៀន ដូចជាយ៉ាម៉ា អំហ្វេតាមីនជាដើម ក៏បានរួមចំណែកបង្កភាពវឹកវរនៅកម្ពុជាផងដែរ។ ការញៀនបាន បង្កជាអំពើពាលាអាវាសែ អនាចារ និងលួចប្លន់ដើម្បីបំពេញតម្រូវការញៀន។ បើតាមប្រសាសន៍របស់លោកវេជ្ជបណ្ឌិត មាស វីរិទ្ធ ប្រធានមន្ទីរពិសោធន៍នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនបានពន្យល់ថា គ្រឿងញៀនកាលណាចូលដល់ ខ្លួនមនុស្ស វាធ្វើឱ្យមានអារម្មណ៍ប្រែប្រួល ហើយអារម្មណ៍របស់មនុស្សទាំងនោះមិនត្រូវបានបញ្ជាដោយមនសិការបុគ្គលទៀតទេ ពេលនោះគឺលង់ទៅតាមបញ្ជានៃសារធាតុញៀនដែលមានឥទ្ធិពលលើផ្លូវចិត្ដ។ ហេតុនេះហើយទើបអ្នកញៀនថ្នាំហ៊ានធ្វើអ្វីសព្វបែប យ៉ាង ដើម្បីបំពេញសេចក្ដីញៀនរបស់ពួកគេ។
សូមរួមគ្នាជួយលើកតម្កើងវប្បធម៌ខ្មែរ
អ្វីលើកមកជម្រាបជូនខាងលើនេះ មិនមែនក្នុងន័យរិះគន់បន្ទាបបន្ថោកនោះទេ ប៉ុន្ដែវាជាចំណុចដែលយើងទាំងអស់គ្នាចាំ បាច់ត្រូវជួយ និងចូលរួមលុបបំបាត់។ ជាការពិតដែលយើងមិនអាចបញ្ឈប់ទាំងស្រុងនូវការហូរចូលនៃវប្បធម៌បរទេសតែយើងអាច មិនចម្លងតាមគេ ហើយងាកមកលើកតម្កើងវប្បធម៌ប្រពៃណីរបស់ខ្លួនយើងវិញ ទើបជាការប្រសើរ។
ប្រភព ៖ ទស្សនាវដ្តី សុខភាពយើង លេខ០២៩ ខែមិថុនា ឆ្នាំ២០០៨
Leave a Reply