លោកអ្នកប្រាកដជាជ្រាបហើយថា ពោះវៀនគឺជាសរីរៈខាងក្នុងមួយដែលមានសារៈសំខាន់ណាស់សម្រាប់មនុស្សនិងសត្វ ។ ចុះបើសិនពោះវៀនមានបញ្ហា ដូចជាធ្លាយ ពោះវៀនវិញ តើនាំឱ្យមានផលវិបាកយ៉ាងណាសម្រាប់មនុស្ស? ការធ្លាយពោះវៀន កើតឡើងនៅលើមនុស្សមិនរើសវ័យឡើយ ហើយវាបង្កឡើងដោយមូលហេតុផ្សេងៗគ្នា។ ធ្លាយពោះវៀនបើសិនមិនបានប្រញាប់ មកធ្វើការព្យាបាលទេ នោះវាអាចបង្កឱ្យបាត់បង់អាយុជីវិត។
ដើម្បីយល់ដឹងឱ្យកាន់តែច្បាស់ និងស៊ីជម្រៅ ទស្សនាវដ្ដី សុខភាពយើងបានធ្វើកិច្ចសម្ភាសន៍ជាមួយលោកវេជ្ជបណ្ឌិត លាង ហ៊ត់ អ្នកឯកទេសផ្នែកវះកាត់ជម្ងឺពោះវៀននៃមន្ទីរពេទ្យព្រះកេតុមាលាធ្វើការបកស្រាយអំពីធ្លាយពោះវៀនជូនប្រិយមិត្ដឱ្យបាន ជ្រាប។ ធ្លាយពោះវៀន គឺជាការបែក ឬធ្លុះពោះវៀនតូច ឬពោះវៀនធំ ដែលមានលាមកឬទឹកហូរចេញមកខាងក្រៅពោះវៀន។
មូលហេតុធ្លាយពោះវៀន
ការធ្លាយពោះវៀនកើតឡើងដោយសារមូលហេតុផ្សេងៗគ្នាជាច្រើន។
1 . គ្រោះថ្នាក់ទៅតាមមុខរបរ ៖ ការមានឧបទ្ទវហេតុនៅកន្លែងធ្វើការ ដែលយើងមិនអាចដឹងមុនបានឡើយ។ ឧទាហរណ៍ កម្មករសំណង់បានវិលមុខ ហើយធ្លាក់ពីលើអគារចុះមកក្រោម បណ្ដាលឱ្យពោះត្រូវប៉ះទង្គិចនឹងវត្ថុរឹងខាងក្រោមអាច បណ្ដាលឱ្យធ្លាយពោះវៀនបាន។ ចំណែកឯកីឡាករដែលមានមុខរបរជាអ្នកប្រដាល់ ពេលប្រយុទ្ធគ្នាដោយឡើងជង្គង់ជើង ឬប្រើ កណ្ដាប់ដៃដាល់ចំពោះ ក៏អាចធ្វើឱ្យមានការប៉ះទង្គិចទៅដល់ពោះវៀនធ្វើឱ្យធ្លាយ។ ក្រៅពីនេះក៏អាចប៉ះពាល់ទៅដល់តម្រងនោម ថ្លើម លំពែងដែរ។ ធម្មតាសរីរាង្គដែលមានប្រហោងខាងក្នុង ហើយមានអ្វីដែលរឹងមកប៉ះទង្គិចជាហេតុធ្វើសរីរាង្គនោះមានការបែក ធ្លាយ ឬមានការដាច់ជាដើម។
2 . គ្រោះថ្នាក់ដោយសារជម្លោះ ៖ កើតឡើងនៅលើយុវវ័យឈាមរាវភាគច្រើនដែលតែងតែមានបញ្ហាទំនាស់គ្នារវាងការ មិនពេញចិត្ដអ្វីមួយ ធ្វើឱ្យមានការចងអាឃាតគ្នា ដោយប្រើដាវ ឬកាំបិតចាក់សម្លាប់គ្នាអាចបណ្ដាលឱ្យមានអ្នករងរបួស ដូចជាធ្លាយ ពោះវៀនជាដើម។
3 . គ្រោះថ្នាក់ចរាចរណ៍ ៖ ការបើកបរឡាន ឬម៉ូតូនៅលើដងវិថីសាធារណៈ ដោយបើកបរប្រើល្បឿនលឿនហើយមាន ការប៉ះទង្គិចគ្នាយ៉ាងធ្ងន់ធ្ងរក៏អាចឱ្យអ្នករងគ្រោះថ្នាក់ប៉ះទង្គិចដល់ពោះនាំឱ្យធ្លាយពោះវៀនបានដែរ។
4 . ផលវិបាកនៃជម្ងឺមួយចំនួន ៖ ផលវិបាកនៃការរលាកពោះវៀនខ្នែង រលាកពោះវៀន គ្រុនពោះវៀននិងរបេងពោះវៀន ដែលមិនបានធ្វើការព្យាបាលឱ្យបានត្រឹមត្រូវ បណ្ដោយឱ្យពោះវៀនចេះតែវិវត្ដទៅរលាករ៉ាំរ៉ៃធ្វើឱ្យស្រទាប់ពោះវៀនខាងក្នុងរលួយ ដាច់ម្ដងមួយស្រទាប់ៗ រហូតដល់ដាច់ស្រទាប់ខាងក្រៅត្រូវធ្លាយ។ កាលណាមានមេរោគជ្រៀតចូលទៅទន្ទ្រានពោះវៀន វាក៏បណ្ដាល ឱ្យពោះវៀនត្រូវស្ដើងបន្ដិចម្ដងៗ រហូតធ្វើឱ្យធ្លាយដែរ។
រោគសញ្ញាធ្លាយពោះវៀន
មានអាការមួយចំនួនដែលស្ដែងចេញមកអាចឱ្យលោកអ្នកដឹងមុនបាន។
- អ្នកជម្ងឺមានអាការក្ដៅខ្លួនខ្លាំង គ្រុនញាក់
- តឹងពោះ ឬពោះឡើងរឹង(ហើមពោះ)
- ទល់លាមក
- មិនដើរខ្យល់
- មានរោគសញ្ញាបន្ទាប់បន្សំទៀត ដូចជាវិលមុខ ស្លេកស្លាំង អស់កម្លាំងល្ហិតល្ហៃជាដើម។
ការពិនិត្យរកសញ្ញាអមគ្លីនិក
ដើម្បីឱ្យពិតថាមានធ្លាយពោះវៀន ឬមិនធ្លាយ លោកអ្នកអាចទៅឆ្លុះអេកូសាស្ដ្រ ដើម្បីឱ្យដឹងថាតើពោះវៀនធ្លាយនៅ ត្រង់កន្លែងណា ហើយការធ្លាយនោះធំឬតូច។ បើសិនឆ្លុះអេកូមើលមិនដឹងច្បាស់ពីលទ្ធផលទេនោះលោកអ្នកអាចទៅពិនិត្យពោះវៀន ដោយកាំរស្មីអ៊ិច ឬអាចធ្វើស្កាណែ ឬឆ្លុះពោះវៀនបន្ថែមទៀត។ បច្ចុប្បន្ននេះវិទ្យាសាស្ដ្រកាន់តែវិវត្ដទៅមុខគេអាចឆ្លុះពោះវៀន ដោយប្រើឧបករណ៍ស៊កចូលតាមផ្លូវលាមករហូតដល់ពោះវៀនធំ ដើម្បីពិនិត្យមើល ដែលគេឱ្យឈ្មោះថាកូឡូស្កូបពី។
វិធីព្យាបាលធ្លាយពោះវៀន
នៅពេលដែលដឹងថា មានធ្លាយពោះវៀន គ្រូពេទ្យត្រូវធ្វើការវះកាត់ជាបន្ទាន់។ ការវះកាត់ត្រូវធ្វើទៅតាមការជាក់ស្ដែង បើសិនបើកពោះទៅឃើញមានការធ្លាយពោះវៀន គ្រូពេទ្យដេរបិទវិញ។ ផ្ទុយទៅវិញបើមានផលប៉ះពាល់ទៅដល់សរីរាង្គផ្សេងៗ ទៀត គ្រូពេទ្យត្រូវគិតទៅតាមសភាពជាក់ស្ដែង។
ផលវិបាកនៃការធ្លាយពោះវៀន
លោកអ្នកជ្រាបហើយថា ធម្មតាពោះស្ថិតនៅក្នុងស្រោមពោះ។ កាលណាពោះវៀនមានជម្ងឺ ឬក៏ធ្លាយវាបណ្ដាលឱ្យលាមក ហៀរចេញមកប៉ះស្រោមពោះ ឬសរីរាង្គផ្សេងៗ ជាហេតុធ្វើឱ្យរលាកនៅកន្លែងនោះ ដូចជាមកប៉ះស្រោមពោះវាធ្វើឱ្យរលាកស្រោម ពោះ។ មិនតែប៉ុណ្ណោះ វាធ្វើឱ្យអ្នកជម្ងឺមានការឈឺចុកចាប់ខ្លាំងនៅត្រង់ពោះទទួលទានចំណីអាហារដែលរឹងមិនបាន។ រំខានពេល វេលាធ្វើការងារ ឬការសិក្សា រកស៊ីចិញ្ចឹមជីវិតប្រចាំថ្ងៃ ប្រាក់ចំណូលត្រូវថយចុះនិងអាចធ្វើឱ្យសេដ្ឋកិច្ចគ្រួសារមានការលំបាក ទៀតផង។
វិធីបង្ការធ្លាយពោះវៀន
លោកអ្នកគួរចៀសវាង ឬប្រុងប្រយ័ត្នឱ្យបានខ្ពស់បំផុតជាពិសេសរាល់ទង្វើទាំងឡាយណាដែលលោកអ្នកបានប្រព្រឹត្ដ ព្រោះអាចនាំឱ្យមានគ្រោះថ្នាក់ដល់ខ្លួន។ គួរគប្បីចៀសវាងឱ្យផុតពីមូលហេតុធ្លាយពោះនិងពោះវៀនដូចដែលបានរៀបរាប់ជូនខាង លើ។ គ្រោះថ្នាក់ដល់ពោះវៀនសុទ្ធតែមើលមិនឃើញសូម្បីតែពោះប៉ះជ្រុងតុក៏អាចបណ្ដាលឱ្យធ្លាយពោះវៀនដែរ។ ដោយឡែក បច្ចុប្បន្ននេះក៏មានថ្នាំវ៉ាក់សាំងការពារជម្ងឺគ្រុនពោះវៀនដែរ ដោយចាក់១ដង ការពារបាន១ឆ្នាំតែមិនអាចការពារបានមួយជីវិតទេ។
ដំបូន្មានអ្នកឯកទេស
ការរងគ្រោះថ្នាក់ដល់អាយុជីវិត យើងមិនអាចដឹងមុនបានទេ។ ដូចនេះលោកអ្នកត្រូវមានការប្រុងប្រយ័ត្នចំពោះសុខភាព ខ្លួនឯង។ ម្យ៉ាងទៀតបើលោកអ្នកសង្ស័យថា សុខភាពលោកអ្នកមានបញ្ហា ដូចជាមានជម្ងឺអ្វីមួយលោកអ្នកត្រូវប្រញាប់ទៅកាន់ មន្ទីរពេទ្យជាបន្ទាន់ ដើម្បីពិនិត្យ និងធ្វើការវិនិច្ឆ័យរោគ។ ជាពិសេសការប៉ះទង្គិចចំពោះលោកអ្នកត្រូវប្រញាប់ប្រញាល់មកមន្ទីរពេទ្យ ជាបន្ទាន់ ដើម្បីឱ្យគ្រូពេទ្យធ្វើការពិនិត្យ និងធ្វើការព្យាបាល។
ប្រភព ៖ ទស្សនាវដ្តី សុខភាពយើង លេខ០២៨ ខែឩសភា ឆ្នាំ២០០៨
Leave a Reply