ខោទ្រនាប់ជាតម្រូវការចាំបាច់សម្រាប់លោកអ្នកគ្រប់រូបមិនអាចខ្វះបានឡើយ។ ប៉ុន្ដែដោយសារការវិវឌ្ឍលើការផលិត ក៏ដូចជាទេពកោសល្យនៃការកែច្នៃម៉ូតនាពេលសព្វថ្ងៃនេះ ខោទ្រនាប់មានម៉ូតច្រើនសម្រាប់ធ្វើការជ្រើសរើសជាពិសេសចំពោះនារី។ នេះជាបញ្ហាមួយរបស់នារី តើត្រូវជ្រើសរើសខោទ្រនាប់បែបណាដើម្បីឱ្យសក្ដិសមនិងជួយបង្កើនសម្រស់របស់ខ្លួន។
ទស្សនាវដ្ដី សុខភាពយើង បានជួបសម្ភាសន៍ជាមួយអ្នកនាង ប៉ែន សារ៉ាអ្នកគ្រប់គ្រងផ្នែកលក់នៅហាងញូវខូលិកសិន មក បកស្រាយពីវិធីជ្រើសរើសខោទ្រនាប់ជូនមិត្ដអ្នកអានបានជ្រាប។
អ្វីជាខោទ្រនាប់?
ខោទ្រនាប់ជាសម្ភារៈសម្រាប់ទ្ររក្សាគូទមិនឱ្យធ្លាក់យារ ឬរយាក ដោយស្ថានភាពនៅពេលឈរនិងធ្វើដំណើរជាដើម។ ខោទ្រនាប់អាចធ្វើឱ្យមានត្រគាកមូលក្លុំ ស្អាតនៅពេលស្លៀកសម្លៀកបំពាក់។ មានពេលខ្លះខោទ្រនាប់ក៏ជួយលើកសម្រស់បានមួយ ចំណែក។ ម្យ៉ាងទៀតខោទ្រនាប់អាចបង្កផលប៉ះពាល់ដល់ស្បែកប្រសិនបើលោកអ្នកមិនជ្រើសរើសឱ្យបានត្រឹមត្រូវ។
របៀបជ្រើសរើសខោទ្រនាប់
ខោទ្រនាប់ស្លៀកខាងក្នុងគ្មានអ្នកណាមើលឃើញក៏ពិតមែន តែលោកអ្នកនៅតែត្រូវការជ្រើសរើសម៉ូតខោដដែល។ អ្នកខ្លះ ពេលត្រូវការទិញខោទ្រនាប់គឺមានការយកចិត្ដទុកដាក់បំផុតចំពោះម៉ូតក៏ដូចជាសាច់ខោ។ ចំណែកឯខ្លះទៀតចូលចិត្ដតាមរបៀប សាមញ្ញធម្មតា ដោយមិនចាំបាច់ជ្រើសរើសម៉ូតអ្វីច្រើនឡើយ។ សំខាន់ឱ្យតែសាច់ទន់និងស្លៀកស្រួលជាការស្រេច។ តែដើម្បីចៀស វាងនូវការសោកស្ដាយ លោកស្រីអ្នកនាងកញ្ញាគួរផ្ដោតលើគុណភាពព្រោះគុណភាពល្អប្រើបានរយៈពេលយូរ គ្រាន់តែតម្លៃថ្លៃ។ ទន្ទឹមនឹងនោះ គួរយល់អំពីសាច់របស់អ្នកស្លៀកពាក់ត្រូវជាមួយសាច់ក្រណាត់បែបណាដើម្បីពាក់ទៅចៀសវាងមិនឱ្យមានផល ប៉ះពាល់ជាមួយស្បែក។ ប្រសិនបើលោកស្រីអ្នកនាងកញ្ញាមិនមានការជ្រើសរើសបានល្អសាច់ខោទ្រនាប់អាចធ្វើឱ្យមានផលវិបាក ជាមួយស្បែក គូទទៅជាខ្មៅជាំ កន្ទួលរមាស់ជាដើម។
ប្រភេទខោទ្រនាប់
ខោទ្រនាប់សម្រាប់បុរស និងនារីមានលក្ខណៈខុសគ្នា តែម៉ូតខោទ្រនាប់របស់បុរសមិនសូវសម្បូរទេ។ ខោទ្រនាប់នារី មានសណ្ឋាន និងម៉ូតច្រើន។ ខោទ្រនាប់ក្នុងស្ដ្រីមានច្រើនប្រភេទមិនអាចរៀបរាប់ក្បោះក្បាយបានឡើយ។ ហេតុដូចនេះហើយសូម លើកយកម៉ូតខោមួយចំនួនដែលមានការពេញនិយមសម្រាប់មិត្ដនារីមកបង្ហាញ ដូចជាខោទ្រនាប់វាលខោទ្រនាប់គូតុង ខោទ្រនាប់ សឺមី ខោទ្រនាប់សាច់ប៉ាក់ជាដើម។
ដំបូន្មានអ្នកប្រឹក្សា
ខោទ្រនាប់មិនត្រឹមតែអាចជួយរក្សាគូទទាំងគូ និងទ្រមិនឱ្យយារប៉ុណ្ណោះទេតែក៏អាចបញ្ចេញភាពស្រស់ស្អាតពេលធ្វើ ដំណើរផងដែរ។ ហេតុដូចនេះហើយនៅពេលជ្រើសរើសទិញខោទ្រនាប់គប្បីផ្ដោតជាសំខាន់ទៅលើគុណភាពដែលមានដូចជាប្រភេទ សាច់ខោទ្រនាប់ និងទំហំខោទ្រនាប់។
ប្រភព ៖ ទស្សនាវដ្តី សុខភាពយើង លេខ០២៨ ខែឩសភា ឆ្នាំ២០០៨
Leave a Reply