ក្នុងឆ្នាំ២០០៧ នៅទូទាំងប្រទេសមានគ្រោះថ្នាក់ចរាចរកើតឡើងចំនួន៦.០៥៣ករណីបណ្ដាលឱ្យមានមនុស្សស្លាប់ចំនួន១.៥១១នាក់ របួសធ្ងន់ចំនួន៥.៣៥១នាក់ និងរបួសស្រាលចំនួន៥.៣៦៨នាក់។ បើគិតជាមធ្យមភាគក្នុងមួយថ្ងៃមានមនុស្សស្លាប់ លើសពី៤នាក់ និងរងរបួសប្រមាណជា៣០នាក់។ បើប្រៀបធៀបទៅនឹងឆ្នាំ២០០៦មានការកើនឡើងគួរឱ្យព្រួយបារម្ភដោយនៅឆ្នាំ ២០០៦ មានអ្នកស្លាប់ដោយសារគ្រោះថ្នាក់ចរាចរចំនួនតែ១.២៩២នាក់ប៉ុណ្ណោះ។
គ្រោះថ្នាក់ចរាចរណ៍កើនឡើង
តាមការកត់ត្រារបស់ក្រសួងសាធារណការបានបង្ហាញឱ្យឃើញថា គ្រោះថ្នាក់ចរាចរនៅប្រទេសកម្ពុជាមានការកើនឡើង ចាប់តាំងពីឆ្នាំ២០០០មកម្ល៉េះ។
- ឆ្នាំ២០០០ មានគ្រោះថ្នាក់ចរាចរកើតឡើងចំនួន២.៩៥១លើក បណ្ដាលឱ្យមានមនុស្សស្លាប់ចំនួន៤០១នាក់
- នៅឆ្នាំ២០០១ មានគ្រោះថ្នាក់ចរាចរកើតឡើងចំនួន២.៦៩៩លើក បណ្ដាលឱ្យមានមនុស្សស្លាប់ចំនួន៤៥៩នាក់
- នៅឆ្នាំ២០០២ មានគ្រោះថ្នាក់ចរាចរកើតឡើងចំនួន៣.៣៣៥លើក បណ្ដាលឱ្យមនុស្សស្លាប់ចំនួន៥៣៥នាក់
- នៅឆ្នាំ២០០៣ មានគ្រោះថ្នាក់ចរាចរកើតឡើងចំនួន៣.៧៦០លើកបណ្ដាលឱ្យមានមនុស្សស្លាប់ចំនួន៨២៤នាក់
- នៅឆ្នាំ២០០៤ មានគ្រោះថ្នាក់ចរាចរកើតឡើងចំនួន៤.២៥៥លើក បណ្ដាលឱ្យមនុស្សស្លាប់១.០៤២នាក់
- នៅឆ្នាំ២០០៥ មានគ្រោះថ្នាក់ចរាចរកើតឡើងចំនួន៣.៩៥៧លើក បណ្ដាលឱ្យមនុស្សស្លាប់ចំនួន៩០៤នាក់
- នៅឆ្នាំ២០០៦ មានគ្រោះថ្នាក់ចរាចរចំនួន៤.៩២៧លើក បណ្ដាលឱ្យមានមនុស្សស្លាប់ចំនួន១.១៥៧នាក់
- នៅឆ្នាំ២០០៧ មានគ្រោះថ្នាក់ចរាចរចំនួន៦.០៥៣ករណី បណ្ដាលឱ្យមានមនុស្សស្លាប់ចំនួន១.៥១១នាក់។
ស្របពេលដែលមានការកើនឡើងនូវចំនួនគ្រោះថ្នាក់ចរាចរ ចំនួនយានយន្ដដែលកំពុងធ្វើចរាចរក៏មានការកើនឡើងយ៉ាង ខ្លាំងដែរ។ នៅក្នុងឆ្នាំ២០០៧កន្លងទៅនេះ យានយន្ដកើនថ្មីហើយបានចុះបញ្ជីត្រឹមត្រូវមានចំនួនជាង១សែនគ្រឿងហើយយានយន្ដ សរុបដែលបានចុះបញ្ជីត្រឹមត្រូវមានចំនួន៨៦៨.៨៥២គ្រឿងដែលនៅក្នុងឆ្នាំ២០០៦មានត្រឹមតែ៧សែនគ្រឿងតែប៉ុណ្ណោះ។ ចំណែក ឯម៉ូតូមានដល់ទៅចំនួនជាង៦សែនគ្រឿង។ អ្នកបើកបរនៅក្នុងប្រទេសយើងសព្វថ្ងៃមានប័ណ្ណបើកបរត្រឹមត្រូវចំនួនប្រមាណជា ៤៦.១៤៥ប័ណ្ណ។ សម្រាប់អ្នកប្រើប្រាស់ម៉ូតូដែលមានប័ណ្ណបើកបរត្រឹមតែ១១.៤៤២ប័ណ្ណ។
មូលហេតុបង្កគ្រោះថ្នាក់ចរាចរណ៍
មានមូលហេតុជាច្រើនដែលបណ្ដាលឱ្យមានគ្រោះថ្នាក់ចរាចរកើតឡើង។ មុខសញ្ញាសំខាន់បំផុតក្នុងការងាយនឹងបង្កឱ្យ មានគ្រោះថ្នាក់ចរាចរនោះ គឺបណ្ដាលមកពីអ្នកប្រើប្រាស់ផ្លូវ ឬអ្នកបើកបរដែលមិនគោរពច្បាប់បើកបរ។ ការបំពានច្បាប់របស់អ្នក ប្រើប្រាស់ផ្លូវនេះ មានរហូតដល់ទៅ៩០,៧៥% និងស្ថិតក្រោមរូបភាពល្មើសដូចជាការមិនគោរពសិទ្ធិអាទិភាពមិនគោរពស្លាកសញ្ញា ភ្លើងសញ្ញា ការបើកបរលើសល្បឿនកំណត់ បើកបរក្នុងស្ថានភាពស្រវឹង(ការសេពគ្រឿងស្រវឹង)ការមិនប្រកាន់ស្ដាំ ការឆ្លងកាត់ផ្លូវ ខ្វះការប្រុងប្រយ័ត្ន ការអូសរុញរទេះដឹកសត្វនិងការដង្ហែក្បួនផ្សេងៗដោយគ្មានច្បាប់ទម្លាប់។ល។ ទន្ទឹមនឹងនេះដែរ គ្រោះថ្នាក់ចរាចរ ក៏បណ្ដាលមកពីអាកប្បកិរិយាបើកបរខ្វះសីលធម៌ ខ្វះភាពយោគយល់ការប្រណាំងប្រជែងយានយន្ដខុសច្បាប់ និងសភាពភ្លើតភ្លើន ក៏បានបង្កឱ្យមានគ្រោះថ្នាក់ចរាចរដល់ជនស្លូតត្រង់ដទៃទៀតដែរ។
មូលហេតុដែលបង្កឱ្យមានគ្រោះថ្នាក់ចរាចរកើតឡើងគឺបណ្ដាលមកពីកត្ដាមនុស្ស៩០% មកពីល្បឿនលឿនពេកជាង៤០%. មកពីការប្រើប្រាស់គ្រឿងស្រវឹងជាង១៥%. មិនគោរពសិទ្ធិអាទិភាពជាង១០%. ឆ្លងគំនូសមិនប្រុងប្រយ័ត្ន៥%.មកពីការជែងមិន គោរពច្បាប់១២%. មកពីការបើកបញ្ច្រាសទិស៣%. ចំណែកនៅក្នុងទីប្រជុំជន គេបានយកចិញ្ចើមផ្លូវថ្មើរជើងសាធារណៈមកធ្វើជាកម្មសិទ្ធិ(រំលោភលើដីចំណីផ្លូវ)សម្រាប់ធ្វើ ការលក់ដូរ ចតរថយន្ដ និងដាក់សម្ភារៈផ្ទាល់ខ្លួនផ្សេងៗ។ កង្វះខាតចំណតយានយន្ដក៏ជាបញ្ហាចោទឡើងមួយផ្នែកដែរ។ ព្រោះថានៅ តាមទីតាំងប្រមូលផ្ដុំមួយចំនួន ដូចជាផ្សារ ភោជនីយដ្ឋាន សណ្ឋាគារ សាលារៀន រោងចក្រសហគ្រាសជាដើម កន្លែងទាំងនេះបាន យកដីចំណីផ្លូវមកធ្វើជាចំណតយានយន្ដដែលងាយនឹងបង្កឱ្យមានការកកស្ទះ និងបង្កគ្រោះថ្នាក់ចរាចរមិនអាចនឹងចៀសវាងបាន។ ជាក់ស្ដែងឆ្លងតាមការត្រួតពិនិត្យលើទីតាំងចំនួន៨៨កន្លែងនៅរាជធានីភ្នំពេញ មានទីតាំងចំនួន៦៣កន្លែងដែលគ្មានចំណតហើយ គ្រោះថ្នាក់ចរាចរកើតឡើងលើចំណុចទាំងនេះមានរហូតដល់ទៅ៤៨%។
ដើម្បីសុវត្ថិភាពនៅពេលបើកបរ
ដើម្បីចៀសវាងពីគ្រោះថ្នាក់ចរាចរ និងការពារសុវត្ថិភាពខ្លួនឯងក៏ដូចជាអ្នកដទៃដែលធ្វើចរាចរណ៍ សូមលោកអ្នកមេត្ដា បើកបរដោយគោរពច្បាប់ចរាចរណ៍និងស្លាកសញ្ញាចរាចរណ៍នានាដែលបានកំណត់។ សូមប្រជាពលរដ្ឋក៏ដូចជាអ្នកបើកបរ អ្នកធ្វើចរាចរណ៍នៅលើដងវិថីយកចិត្ដទុកដាក់ឱ្យបានខ្ពស់ និងបើកបរដោយមានការប្រុងប្រយ័ត្ន។ ពិសេសគឺត្រូវគោរពច្បាប់ចរាចរណ៍ឱ្យបាន ត្រឹមត្រូវ ដើម្បីធានាបាននូវសុវត្ថិភាពក្នុងការធ្វើដំណើរក៏ដូចជាការចូលរួមចំណែកកាត់បន្ថយគ្រោះថ្នាក់ចរាចរណ៍ដែលអាចបណ្ដាលឱ្យ មានផលប៉ះពាល់ដល់អាយុជីវិតនិងទ្រព្យសម្បត្ដិទាំងសាធារណៈទាំងឯកជន និងកត្ដាជាច្រើនទៀតក៏អាចនឹងកើតមានឡើងផងដែរ។
ប្រភព ៖ ទស្សនាវដ្តី សុខភាពយើង លេខ០២៦ ខែមីនា ឆ្នាំ២០០៨
Leave a Reply