ដីហុយមិនមែនកើតឡើងតែនៅតាមជនបទនោះទេ សូម្បីតែនៅតាមបណ្ដាទីរួមខេត្ដ-ក្រុងនានាជាពិសេសនៅទីក្រុងភ្នំពេញដែលសម្បូរទៅដោយផ្លូវថ្នល់់កៅស៊ូខ្វាត់ខ្វែងក៏ដោយក៏កំពុងតែប្រឈមមុខនឹងបញ្ហាដីហុយនោះផងដែរ។ ការដកដង្ហើមរបស់មនុស្ស ដែលស្រូបយកសារធាតុមិនល្អឬកម្ទេចកម្ទីធូលីពីមួយថ្ងៃទៅមួយថ្ងៃអាចបង្កទៅជាជម្ងឺដែលធ្វើឱ្យប៉ះពាល់ដល់សុខភាពរាង កាយដោយមិនដឹងខ្លួន។ តើអ្វីខ្លះជាផលប៉ះពាល់នៃដីហុយ?
សូមស្វែងយល់ជាមួយទស្សនាវដ្ដី សុខភាពយើង តាមរយៈការបកស្រាយរបស់លោក ធីវ សុភារិទ្ធប្រធានការិយាល័យគ្រប់គ្រងគុណភាពខ្យល់សម្លេងនិងរំញ័រ នៃក្រសួងបរិស្ថាន និងលោកវេជ្ជបណ្ឌិត សុក សំអាតប្រធានផ្នែកត្រចៀកច្រមុះបំពង់ក នៃ មន្ទីរពេទ្យព្រះអង្គឌួង បានរួមគំនិតគ្នាក្នុងការបកស្រាយនូវផលប៉ះពាល់នៃដីហុយទាំងនោះ។
មូលហេតុដែលបង្កឱ្យមានដីហុយ
ទោះបីជាបញ្ហាដីហុយស្ទើរតែក្លាយទៅជារឿងធម្មតារបស់អ្នកផងទាំងពួងក៏ដោយក៏យើងម្នាក់ៗមិនដែលបំភ្លេចបញ្ហាដីហុយនេះដែរ។ មានមូលហេតុជាច្រើនបង្កឱ្យមានដីហុយដែលធ្វើឱ្យប៉ះពាល់ដល់ការធ្វើដំណើរ និងការរស់នៅប្រចាំថ្ងៃជាពិសេសគឺការ ប៉ះពាល់ដល់ប្រពន្ធ័ដង្ហើមរបស់មនុស្សយើង។
- កត្ដាធម្មជាតិ ៖ មិនថានៅប្រទេសកំពុងអភិវឌ្ឍន៍ ឬជឿនលឿននោះទេ គឺគ្មានអ្នកវិទ្យាសាស្ដ្រណាម្នាក់អាចធ្វើការប៉ាន់ស្មានពីសកម្មភាពរបស់ធម្មជាតិបានច្បាស់លាស់ ឬមានវិធីទប់ស្កាត់បានមួយរយភាគរយនោះដែរ។ ខ្យល់ព្យុះនិងកម្លាំងខ្យល់បក់ខ្លាំងបានធ្វើឱ្យកម្ទិចកម្ទីដីអណ្ដែតទៅតាមកម្លាំងនៃខ្យល់។ បើទោះបីជាប្រទេសកម្ពុជាយើងមិនមានការបន្ទុះភ្នំភ្លើង ដែលជាមូល ហេតុបង្កឱ្យមានដីហុយក៏ដោយក៏កម្ពុជាតែងតែទទួលនូវឥទ្ធិពល ឬផលប៉ះពាល់ពីការបន្ទុះនោះដែរគ្រាន់តែតិចឬច្រើនតែប៉ុណ្ណោះ។
- កត្ដាមនុស្ស ៖ ពីមួយថ្ងៃទៅមួយថ្ងៃកំណើននៃប្រជាពលរដ្ឋកើនឡើងជាលំដាប់។ ទន្ទឹមនឹងនេះមធ្យោបាយធ្វើដំណើរក៏កើនឡើងផងដែរ។ រាល់ការធ្វើដំណើរនៃយានយន្ដទាំងអស់គឺសុទ្ធតែបានញំនាំយកធូលីដីទៅជាមួយដែលបង្កឱ្យធូលីដីទាំងអស់នោះអណ្ដែតលាយឡំជាមួយខ្យល់ឬបរិយាកាស។
- កត្ដាសង្គម ៖ ប្រទេសក្រីក្រឬប្រទេសកំពុងអភិវឌ្ឍភាគច្រើនសម្បូរទៅដោយផ្លូវដីនាំឱ្យប្រទេសទាំងនោះជួបប្រទះនឹងបញ្ហាដីហុយច្រើនជាងប្រទេសជឿនលឿន។ ប្រព័ន្ធលូទឹកស្អុយតូចចង្អៀតដូចប្រទេសយើងសព្វថ្ងៃនេះក៏ជាកត្ដាមួយផងដែរ ដែលធ្វើ ឱ្យមានដីក្រាំងជាប់ផ្លូវថ្នល់ ខណៈដែលមានភ្លៀងធ្លាក់លិចផ្លូវម្ដងៗ។
ផលប៉ះពាល់នៃដីហុយ
- ផលប៉ះពាល់ទៅដល់បរិស្ថាន ៖ បើទោះបីជាដីហុយមិនសូវធ្វើឱ្យប៉ះពាល់ដល់បរិស្ថានក៏ដោយប៉ុន្ដែដីហុយបាននឹងកំពុង រួមចំណែកជាមួយឧស្ម័នផ្សេងៗ ដែលមានផ្ទុកសារធាតុគីមីចេញពីបំពង់បង្ហុយផ្សែងរោងចក្រនិងរថយន្ដចូលលាយឡំជាមួយខ្យល់ក្នុង បរិយាកាស។
- ផលប៉ះពាល់ដល់សុខភាព ៖ ស្របពេលដែលមនុស្សគ្រប់រូបត្រូវការខ្យល់សម្រាប់ដកដង្ហើមដើម្បីចិញ្ចឹមជីវិតនោះលម្អងធូលីក៏បានឡូកឡំជាមួយខ្យល់ចូលទៅតាមច្រមុះផងដែរ។ ទោះបីជាច្រមុះមានប្រព័ន្ធការពារសំខាន់ៗដែលសម្លាប់មេរោគនៅមជ្ឈដ្ឋានខាងក្រៅដើម្បីរក្សាតុល្យភាពកម្ដៅ ច្រោះមេរោគ និងផ្ដល់កម្ដៅយ៉ាងណាក៏ដោយក៏ការការពារនោះនៅមានកម្រិតនៅឡើយ ដែលធ្វើឱ្យធូលីដីឆ្លៀតឱកាសអាចបង្កនូវជម្ងឺជាច្រើន ដូចជារលាកបំពង់ដកដង្ហើមប្រតិកម្មនៅលើស្បែក និងការចម្លងជម្ងឺពី មនុស្សម្នាក់ទៅមនុស្សម្នាក់តាមរយៈធូលីដីរួមផ្សំជាមួយសារធាតុផ្សេងៗនៅក្នុងខ្យល់ដែលមានដូចជាសារធាតុសំណស្ពាន់ធ័រ អុកស៊ីតជាដើម។ បើកាលណាធូលីដីកាន់តែតូចចូលទៅក្នុងរាងកាយមនុស្សវាកាន់តែបង្កលក្ខណៈប៉ះពាល់ដល់សុខភាពមនុស្សកាន់តែ ខ្លាំង។
- ផលប៉ះពាល់ដល់ទីសាធារណៈ ៖ រាល់ថ្ងៃស្ទើរតែគ្រប់ផ្លូវនៅទីក្រុងភ្នំពេញទទួលរងការប៉ះពាល់ពីការហុយធូលីជាអាទិរថយន្ដ ផ្ទះ អគារតូចធំ សាលារៀន មន្ទីរពេទ្យ រមណីយដ្ឋាននានា។ល។ មានសភាពកខ្វក់ដោយសារធូលីដី។ លើសពីនេះដីហុយក៏ បានធ្វើឱ្យប៉ះពាល់ដល់ចំណីអាហារផ្សេងៗដែលលក់នៅតាមផ្លូវសាធារណៈផងដែរ។
វិធីការពារផលប៉ះពាល់ដីហុយ
វាមិនមែនជារឿងលំបាកនោះទេក្នុងការទប់ស្កាត់ការប៉ះពាល់នៃដីហុយដើម្បីការពារដល់សុខភាពរបស់យើងនោះ។ ប្រការដែលយើងម្នាក់ៗគួរតែធ្វើនៅរាល់ពេលយើងធ្វើដំណើរតាមផ្លូវ មិនថាជិះយានជំនិះ អ្នកថ្មើរជើងឬក៏លោកអ្នកដែលកំពុងបំពេញ ភារកិច្ចនៅតាមផ្លូវនោះទេ គួរតែពាក់ម៉ាស់ការពារច្រមុះ។ បើមានផ្លូវណាមានដីហុយច្រើននោះយើងមិនគួរធ្វើដំណើរទៅមុខឡើយ ។ មានន័យថាយើងគួរតែជ្រើសរើសផ្លូវណាផ្សេងទៀតដែលមិនសូវមានដីហុយប្រសិនបើអាចធ្វើឬចៀសវាងបាន។ វិធីនេះបើទោះបី ជាមិនអាចកាត់បន្ថយនូវផលប៉ះពាល់ដីហុយដល់សុខភាពបាន១០០%ក៏ពិតមែនតែវាពិតជាអាចកាត់បន្ថយបានមួយកម្រិតផងដែរ។
រួមគ្នាក្នុងការកាត់បន្ថយដីហុយ
ដើម្បីកាត់បន្ថយផលប៉ះពាល់ចំពោះសុខភាពដែលបណ្ដាលមកពីបញ្ហាដីហុយ មិនមែននរណាអាចធ្វើតែម្នាក់ឯងនោះទេគឺចាំបាច់ត្រួវតែមានការសហការគ្នា ដើម្បីទទួលបានប្រសិទ្ធភាពខ្ពស់។
- បើទោះបីជាការអភិវឌ្ឍន៍ហេដ្ឋារចនាសម្ព័ន្ធនៅប្រទេសកម្ពុជានៅមានកម្រិតក៏ដោយ ក៏ការអភិវឌ្ឍនេះអាចនឹងឈានបន្ដិចម្ដងៗដើម្បីលុបបំបាត់ផ្លូវដីទាំងស្រុង។ ការលុបបំបាត់ផ្លូវដីនៅកម្ពុជានាពេលអនាគតគឺជាចំណុចមួយសំខាន់បំផុតក្នុងការបំបាត់ ប្រភពដីហុយ ដែលអាចឈានទៅរកការកាត់បន្ថយដីហុយបានមួយកម្រិតធំ។
- ធូលីហុយមិនមែនសំដៅតែដីហុយមួយមុខនោះទេ វាមានធូលីផ្សេងៗដែលចេញពីយានយន្ដផងដែរ។ ដូច្នេះយើងទាំងអស់គ្នាគួរតែគោរពច្បាប់ក្នុងការគ្រប់គ្រងល្បឿនយានយន្ដនិងការត្រួតពិនិត្យរថយន្ដឱ្យបានត្រឹមត្រូវ ជាអាទិការពិនិត្យគ្រឿងម៉ាស៊ីន ឬគ្រឿងបន្លាស់រថយន្ដជារៀងរាល់ឆ្នាំ។
ដំបូន្មានអ្នកប្រឹក្សា
ការប្រើប្រាស់ម៉ាស់បិទច្រមុះឱ្យបានត្រឹមត្រូវ ពិតជាអាចជួយកាត់បន្ថយផលប៉ះពាល់ពីដីហុយបានមួយកម្រិត។ នៅពេលដែលមានបញ្ហាសុខភាពដោយសារដីហុយលោកអ្នកគួរតែប្រញាប់ទៅពិគ្រោះជាមួយគ្រូពេទ្យជំនាញ ដើម្បីធ្វើការព្យាបាលជម្ងឺឱ្យបាន ទាន់ពេលវេលា។ សូមចៀសវាងការបណ្ដែតបណ្ដោយឱ្យជម្ងឺផ្លូវដង្ហើមតិចតួចបង្កទៅជាជម្ងឺធ្ងន់ធ្ងរ។ យើងទាំងអស់គ្នាគួរតែរួមគ្នា ការពារបរិស្ថានដើម្បីសុវត្ថិភាពសុខភាពយើង។
ប្រភព ៖ ទស្សនាវដ្តី សុខភាពយើង លេខ០២៥ ខែកុម្ភះ ឆ្នាំ២០០៨
Leave a Reply