ហូរឈាមតាមត្រចៀកជាអាការមួយដែលកើតឡើងចំពោះលោកអ្នកគ្រប់វ័យ។ គ្រោះថ្នាក់ប៉ះទង្គិចក្បាលខ្លាំងអាចបង្កជា បញ្ហាឈាមតាមត្រចៀក គ្រាន់តែតិច ឬច្រើន ដោយអាស្រ័យទៅលើហេតុការណ៍ជាក់ស្ដែង។ ទោះជាយ៉ាងណាក៏ដោយហូរឈាម តាមត្រចៀកមិនមែនចោទជាបញ្ហាដល់ជីវិតនោះឡើយ វាគ្រាន់តែជាអាការតែប៉ុណ្ណោះ។
លោកវេជ្ជបណ្ឌិត អ៊ឹម សុផាន អ្នកជំនាញផ្នែកត្រចៀកច្រមុះបំពង់ក នៅមន្ទីរពេទ្យព្រះកុសុមៈបានបកស្រាយជូនមិត្ដអ្នកអានឱ្យយល់ពីអាការឈាមត្រចៀក តាមរយៈទស្សនាវដ្ដី សុខភាពយើង។
ហូរឈាមតាមត្រចៀក ហូរឈាមតាមត្រចៀកជារោគសញ្ញាមួយដែលអាចបញ្ជាក់ថាអ្នករងគ្រោះមានការប៉ះទង្គិចត្រង់ក្បាល ទាំងផ្នែកខាងក្រៅ និងខាងក្នុង។ ឈាមត្រចៀកគ្រាន់តែជាអាការមួយសម្គាល់បានថាខួរក្បាលមានបញ្ហាតិចឬច្រើនតែប៉ុណ្ណោះ។ ឈាមត្រចៀកមិន អាចប៉ះពាល់ដល់អាយុជីវិតឡើយព្រោះសព្វថ្ងៃមានឧបករណ៍គ្រប់គ្រាន់សម្រាប់ព្យាបាល។ ការប៉ះទង្គិចរហូតដល់មានអាការហូរ ឈាមតាមត្រចៀកនេះនៅបរទេសមានរហូតដល់៤៣ភាគរយ។ ដោយឡែកក្នុងប្រទេសយើងមានប្រមាណជា១០ភាគរយ នេះបើ តាមរយៈការស្រង់ស្ថិតិជារៀងរាល់ឆ្នាំប៉ុន្ដែឆ្នាំខ្លះមានតិចតួចបំផុត។
មូលហេតុបង្កការហូរឈាមតាមត្រចៀក
ក្បាលផ្នែកខាងមុខជាចំណុចសំខាន់នាំឱ្យឈាមត្រចៀក ដែលអាចបណ្ដាលមកពីគ្រោះថ្នាក់ចរាចរណ៍ស្ថិតក្នុងកន្លែងដែល មានសម្លេងខ្លាំង មុជទឹកចុះទៅខាងក្រោមដែលមានសម្ពាធខ្លាំង ឬដោយប្រការផ្សេងៗទៀត។ កាលណាមានការប៉ះទង្គិចពីខាងមុខ អាចធ្វើឱ្យខួរក្បាលក្រឡាប់ចុះឡើង ដូចជាបាល់ដែលកំពុងទាត់ជាដើម។ លើសពីនេះទៅទៀតអាចធ្វើឱ្យបែកបាក់ប្រព័ន្ធការពារខាង ក្រោយ ទើបបណ្ដាលឱ្យហូរឈាមតាមត្រចៀក។ ការប៉ះទង្គិចទាំងនេះទៅប៉ោងនៅត្រង់កណ្ដាស់ត្រចៀក របួសកណ្ដាស់ត្រចៀក ឬដាច់កណ្ដាស់ត្រចៀកជាដើម ទើបមានឈាមហូរតាមត្រចៀក។
រោគសញ្ញាហូរឈាមតាមត្រចៀក
ហូរឈាមតាមត្រចៀកចាប់ផ្ដើមហូរបន្ដិចម្ដងៗ ហើយបើគ្មានវិធីទប់ស្កាត់ទេនោះនឹងហូរកាន់តែខ្លាំង។ បើលោកអ្នកមានអាជីពដែលឧស្សាហ៍ចុះទៅមុជទឹកមានជម្រៅជ្រៅ នោះលោកអ្នកអាចមានឱកាសហូរឈាមតាមត្រចៀកបាន។ ប៉ុន្ដែចំពោះករណីស្ដាប់កាសក្នុងត្រចៀកមិនអាចប៉ះពាល់ដល់កណ្ដាស់ត្រចៀក ធ្វើឱ្យហូរឈាម និងធ្វើឱ្យថ្លង់នោះទេ។
វិធីព្យាបាលឈាមហូរតាមត្រចៀក
មុនដំបូងសូមយកសំឡីមកជូតសម្អាតបរិវេណខាងក្រៅ បន្ទាប់មកយកសំឡីដាក់ថ្នាំជួយបន្ថយការហូរឈាមទៅញ៉ុកក្នុងត្រចៀក ដើម្បីទប់ឈាមមិនឱ្យឈាមហូរបន្ដទៀត។ ក្រោយពេលពិនិត្យប្រសិនបើមានបញ្ហាប៉ះពាល់ដល់កណ្ដាស់ត្រចៀកខ្លាំង គ្រូពេទ្យជំនាញដាក់ថ្នាំផ្សះ ដើម្បីឱ្យកណ្ដាស់ត្រចៀកឆាប់ជា។ បើអ្នកជម្ងឺគ្រោះថ្នាក់រហូតដល់សន្លប់ដូចជាគ្រោះថ្នាក់ចរាចរណ៍ ហើយ ឈាមហូរច្រើនមិនព្រមឈប់ ទើបចាក់ថ្នាំដើម្បីទប់ស្កាត់ការហូរឈាម។
វិធីការពារ និងទប់ស្កាត់ឈាមហូរតាមត្រចៀក
ឈាមហូរតាមត្រចៀកមិនសូវកើតឡើងពិតមែន តែទោះជាយ៉ាងណាក៏ដោយត្រូវយកចិត្ដទុកដាក់ទៅលើសុវត្ថិភាពជា ប្រចាំថ្ងៃ ដើម្បីការពារ និងទប់ស្កាត់បញ្ហាទាំងនេះ។
- មិនត្រូវឱ្យក្បាលមានការប៉ះទង្គិចជាញឹកញាប់ពេកទេ
- អ្នកមុជទឹកដែលមានជម្រៅជ្រៅត្រូវតែពាក់មួកការពារ ហើយប្រសិនបើត្រចៀកកាន់តែហ៊ឹងខ្លាំងត្រូវប្រញាប់ឡើងមកខាងលើវិញ ដើម្បីចៀសវាងការដាច់កណ្ដាស់ត្រចៀក
- លោកអ្នកដែលធ្វើការនៅកន្លែងមានសម្លេងខ្លាំង គួរតែរកសំឡីញ៉ុកត្រចៀកដើម្បីជួយទប់សម្លេងទាំងនោះមិនឱ្យឮខ្លាំងពេក។
- ពេលធ្វើដំណើរទៅទីជិត ឬទីឆ្ងាយត្រូវពាក់មួកសុវត្ថិភាពដើម្បីចៀសវាងនៅពេលមានគ្រោះថ្នាក់មិនឱ្យមានការប៉ះទង្គិចក្បាលខ្លាំង
- មិនត្រូវលូកលាងត្រចៀកផ្ដេសផ្ដាសឡើយ ព្រោះខ្លាចដាច់កណ្ដាស់ត្រចៀក អាចបណា្ដលឱ្យឈាមហូរ
- មិនគួរប្រើតម្បារត្រចៀកញឹកញាប់ឡើយ ព្រោះអាចបណា្ដលឱ្យរលាកត្រចៀក។ យកល្អ គួរតែប្រើកូនកន្សែងដៃផ្ដិតជូតពីលើផ្ទៃជញ្ជាំងត្រចៀកថ្នមៗ ទើបប្រសើរ
- គួរតែទៅរកអ្នកជំនាញដែលមានបទពិសោធន៍ ដើម្បីសម្អាតត្រចៀកព្រោះខ្លាចប៉ះពាល់ដល់ប្រព័ន្ធខាងក្នុងនៃខួរក្បាល
- កាលណាមានការប៉ះទង្គិចក្បាល និងអាការខុសប្លែកពីធម្មតា ត្រូវប្រញាប់ទៅរកគ្រូពេទ្យដែលមានជំនាញដើម្បីធ្វើការពិនិត្យ និងព្យាបាល។
ដំបូន្មានអ្នកប្រឹក្សា
លោកអ្នកគ្រប់រូបគួរតែប្រយ័ត្នចំពោះក្បាល កុំឱ្យប៉ះទង្គិច។ គ្រោះថ្នាក់តាមផ្លូវចៀសមិនផុតឡើយនូវការប៉ះទង្គិចក្បាល ហេតុដូចនេះនៅពេលធ្វើដំណើរលោកអ្នកគប្បីប្រុងប្រយ័ត្ន ដោយពាក់មួកការពារនិងបញ្ចៀសគ្រោះថ្នាក់ចរាចរណ៍ជាយថាហេតុ។ ម្យ៉ាងទៀតលោកអ្នកដែលធ្វើការនៅកន្លែងមានសម្លេងខ្លាំងក៏គួរតែមានវិធីការពារសម្លេងរំខានទាំងនោះដែរ។
ប្រភព ៖ ទស្សនាវដ្តី សុខភាពយើង លេខ០២៥ ខែកុម្ភះ ឆ្នាំ២០០៨
Leave a Reply