ភ្នែកជាសរីរាង្គមួយក្នុងចំណោមសរីរាង្គសំខាន់ៗផ្សេងទៀតនៃខ្លួនប្រាណមនុស្សយើង។ ៨០%នៃព័ត៌មាននៅខាងក្រៅ គឺបានមកពីភ្នែកទាំងគូរបស់យើង។ ការអាននិងការទស្សនាមានផលប្រយោជន៍ណាស់សម្រាប់មនុស្សគ្រប់រូប។ ទន្ទឹមនឹងនេះដើម្បី រក្សាគំហើញរបស់ភ្នែកឱ្យមាននិរន្ដរភាពយូរអង្វែង លោកអ្នកត្រូវមានអនាម័យភ្នែក ផ្ទៃមុខនិងគម្លាតនៃការមើលឱ្យបានត្រឹមត្រូវផងដែរ។បើយើងមិនបានយកចិត្ដទុកដាក់ពីរបៀបអានមិនបានត្រឹមត្រូវជាមូលហេតុមួយដែលនឹងបណ្ដាលឱ្យមានបញ្ហាចោទចំពោះភ្នែក។
ដើម្បីបើកកកាយបង្ហាញនូវវិធានផ្សេងៗក្នុងការប្រតិបត្ដិទាក់ទិនរវាងគំហើញនិងការអានបានត្រឹមត្រូវ ទស្សនាវដ្ដីសុខភាពយើង ទទួលបានការស្រាយបំភ្លឺពីលោកវេជ្ជបណ្ឌិត ម៉ារ អមរិន្ទ ម្ចាស់គ្លីនិកភ្នែកអមរិន្ទ។
គំហើញ និងការអានសមស្រប
ការអាន និងការទស្សនាទាំងឡាយណាដែលនាំឱ្យភ្នែកមានបញ្ហាចោទទោះតិចតួចក្ដីយើងគួរចៀសវាងឱ្យអស់ពីលទ្ធ ភាព។
1. គំហើញសមស្រប ៖ គំហើញពាក់ព័ន្ធនឹងការទស្សនា តាមការឱ្យដឹងពីអ្នកចក្ខុសាស្ដ្រពេលទស្សនាទូរទស្សន៍លោកអ្នកត្រូវស្ថិតនៅចម្ងាយយ៉ាងតិច៦ដងនៃទំហំអង្កត់ផ្ចិតរបស់កញ្ចក់ទូរទស្សន៍។ អាណាព្យាបាលក៏ត្រូវយកចិត្ដទុកដាក់ផងដែរទៅលើវ័យ និងការទស្សនារបស់កូន។មានន័យថាមិនគួរបណ្ដោយឱ្យកុមារតូចស្ថិតនៅជិតមុខកញ្ចក់ទូរទស្សន៍ញឹកញាប់នោះពេកទេ។ ចំពោះ លោកអ្នកធ្វើការនៅមុខកញ្ចក់កុំព្យូទ័រជាប្រចាំ តែងប្រឈមនឹងបញ្ហាមីញ៉ូបភ្នែក។ ដូច្នេះលោកអ្នកគួរឧស្សាហ៍សម្រាកភ្នែកខ្លះ ដោយសម្លឹងទៅទីផ្សេងក្រៅពីកញ្ចក់កុំព្យូទ័រ។ លើសពីនេះក៏គួរឧស្សាហ៍ព្រិចធ្វើចលនាភ្នែកដើម្បីកុំឱ្យភ្នែកស្ងួតហើយមិនគប្បីព្យាយាម មើលទៅកញ្ចក់ទូរទស្សន៍ ឬកុំព្យូទ័រ ដែលមានពន្លឺជះចាំងខ្លាំងពេក ឬឃើញជាស្រមោលនៅក្នុងកញ្ចក់នោះទេដូចជាពន្លឺអំពូលម៉ែត្រ ចំណាំងដោយការដាក់បែរកញ្ចក់ទៅទ្វារបង្អួចជាដើម។
2. ការអានសមស្រប ៖ ការអានអក្សរដែលមានខ្នាតតូចម្ដងម្កាលមិនជាបញ្ហាចោទទេលើកលែងតែអានជាប្រចាំ។ ការមានទម្លាប់ល្អ និងការណែនាំត្រឹមត្រូវអាចជួយឱ្យកុមារមានសុខភាពភ្នែកល្អ និងគំហើញបានល្អយូរអង្វែង។ ដូច្នេះលោកអ្នកគួរទម្លាប់ អាននិងណែនាំកូនឱ្យអានដោយដាក់ក្រដាសដែលត្រូវអាននៅចម្ងាយពីភ្នែកប្រមាណ៣៥សង់ទីម៉ែត្រ។ លោកអ្នកគួរអាននៅទីកន្លែង ដែលមានពន្លឺគ្រប់គ្រាន់មិនភ្លឺចាំងភ្នែកពេកដូចជាពន្លឺព្រះអាទិត្យ ពន្លឺអំពូលជាដើម។ បើពន្លឺតិចពេកធ្វើឱ្យភ្នែកប្រឹង ជាហេតុនាំឱ្យ ភ្នែកឆាប់ចុះខ្សោយ។
គំហើញ និងការអានដែលមានផលមិនល្អដល់ភ្នែក
គំហើញ និងការអានរបស់មនុស្សម្នាក់ៗប្រែប្រួលទៅតាមវ័យ។ ប៉ុន្ដែលោកអ្នកក៏អាចខូចភ្នែកមុនវ័យដែរបើសិនជាមើលឬអានមិនបានសមស្របជារឿយៗនោះ។ ការមើលឬការអានដែលអាចឱ្យមានបញ្ហាចោទគឺ ៖
1. គំហើញផ្សេងៗ
- កុមារតូចដែលចូលចិត្ដមើលទូរទស្សន៍ជាប្រចាំច្រើនម៉ោង
- ការមើលទូរទស្សន៍ជិតពេក
- ការមើល និងនៅមុខកុំព្យូទ័រជាប្រចាំ
- ការមើលទៅកាន់ពន្លឺខ្លាំងពេក ឧទាហរណ៍ពន្លឺព្រះអាទិត្យ ឧបករណ៍ផ្សារដែក ឬកន្លែងងងឹតពេក
2. អំណានផ្សេងៗ
- ការព្យាយាមអានអក្សរតូចៗពេក
- ការអានដែលពុំមានពន្លឺគ្រប់គ្រាន់
- ការអាន និងការសរសេរដែលមានគម្លាតកៀកពេករវាងពីភ្នែកទៅតួអក្សរ។ ឧទាហរណ៍តុអង្គុយសម្រាប់ មនុស្សធំ តែបែរជាកុមារតូចអង្គុយអាន ឬសរសេរ។
ការមើលទាំងនេះអាចបណ្ដាលឱ្យភ្នែកងាយចុករោយ ផ្សាភ្នែក ហៀរទឹកភ្នែកជាពិសេសភ្នែកត្រូវប្រឹងជានិច្ចទាំងកែវភ្នែក និងសាច់ដុំភ្នែក។ ដូច្នេះភ្នែកឆាប់ចុះខ្សោយផ្នែកគំហើញ នឹងអាចធ្វើឱ្យមីញ៉ូបទៀតផង។
ករណីភ្នែកមានបញ្ហាដោយគំហើញ និងការអាន
បើសិនជាភ្នែកមានបញ្ហាចោទឡើងដោយសារគំហើញ និងការអានមិនសមស្របគ្រោះថ្នាក់បឋមគឺមិនមានលក្ខណៈធ្ងន់-ធ្ងរទេ។ ជាដំបូងអ្នកជម្ងឺអាចចុករោយគ្រាប់ភ្នែក រោយថ្ងាស ឈឺក្បាល និងស្រវាំងភ្នែកទោះមើលជិតឬឆ្ងាយ។ បន្ទាប់មកអ្នកជម្ងឺ អាចមើលឃើញជាស្រមោល ឬរូបភាពបែកជាពីរ។ បើមានអាការទាំងនេះហើយត្រូវប្រញាប់រកសេវាពិនិត្យព្យាបាលព្រោះអ្នកជម្ងឺ អាចឈានដល់កើតជម្ងឺមីញ៉ូបភ្នែកបាន។
ការព្យាបាលភ្នែកមានបញ្ហាគំហើញ និងការអាន
ការព្យាបាលគឺអាស្រ័យទៅតាមដំណាក់កាលនៃស្ថានភាពអាការរោគជាក់ស្ដែង។ ដំណាក់កាលដំបូងលោកអ្នកគ្រាន់តែអនុវត្ដតាមដំបូន្មានអ្នកជំនាញក៏អាចធ្វើឱ្យភ្នែកត្រឡប់មករកសភាពដើមវិញបានដែរ។ ក្នុងនោះអ្នកជម្ងឺគួរមានឥរិយាបថ ទម្លាប់អាននៅទីកន្លែងដែលមានពន្លឺគ្រប់គ្រាន់ អានខ្នាតអក្សរធំៗសមស្របតាមបទដ្ឋានការសម្រាកភ្នែកពេលអានច្រើនឬពេលប្រើកុំព្យូទ័រ ច្រើនជាដើម។ ជួនកាលលោកអ្នកក៏អាចត្រូវប្រើវ៉ែនតាជំនួយ ប្រសិនបើដល់ដំណាក់កាលត្រូវប្រើ។ ការសម្រេចចិត្ដព្យាបាលតាមវិធី ផ្សេងទៀត អាស្រ័យទៅលើទម្ងន់នៃជម្ងឺ។
វិធីបង្ការគំហើញ និងអំណាន
ចាំបាច់លោកអ្នកត្រូវប្រតិបត្ដិតាំងពីកុមារភាពដោយមានការមើលថែពីអាណាព្យាបាល។ ពោលគឺមាតាបិតាពុំគប្បីបណ្ដោយឱ្យកូនដែលនៅក្មេងវ័យទស្សនាទូរទស្សន៍ញឹកញាប់ច្រើនម៉ោងពេកទេ។ មិនត្រូវសម្លឹងមើលអ្វីដែលមានពន្លឺខ្លាំងពេកឬតិចពេក។ គួរអាននៅកន្លែងដែលមានពន្លឺគ្រប់គ្រាន់។ គួរអានតួអក្សរដែលមានខ្នាតចាប់ពីជី៥ (J5)ឡើងទៅដែលជាទំហំអក្សរទូទៅក្នុង កាសែត ឬទស្សនាវដ្ដី។ គួរកុំមានទម្លាប់ឈ្ងោក ឬផ្អៀងក សរសេរអក្សរជិតនឹងក្រដាសពេក។
ដំបូន្មានអ្នកជំនាញ
ការថែទាំភ្នែកជាកត្ដាមួយដ៏សំខាន់សម្រាប់ឱ្យគំហើញនៃភ្នែករបស់លោកអ្នកនៅបានល្អយូរ។ ក្រៅពីទម្លាប់ល្អក្នុងការអាន ដូចរៀបរាប់ខាងលើ លោកអ្នកត្រូវចេះការពារ និងថែរក្សាភ្នែកពីធូលីដី ខ្យល់បក់ខ្លាំង ពីកាំរស្មីយូវីឬកាំរស្មីពណ៌ខៀវពីព្រះអាទិត្យ ដោយត្រូវប្រើវ៉ែនតាសមស្រប។ គួរពាក់មួកការពារ មិនត្រូវយកដៃកខ្វក់ញីភ្នែក លុបលាងមុខឱ្យស្អាតនិងម្ដងម្កាលគួរប្រើទឹក សម្រាប់លាងភ្នែក។ ពេលភ្នែកមានបញ្ហាមិនប្រក្រតី គួរតែជួបគ្រូពេទ្យជំនាញដើម្បីពិនិត្យនិងព្យាបាលឱ្យបានសមស្រប។
ប្រភព ៖ ទស្សនាវដ្តី សុខភាពយើង លេខ០២៤ ខែមករា ឆ្នាំ២០០៨
Leave a Reply