អុតស្វាយ លោកអ្នកប្រាកដជាធ្លាប់ដឹងធ្លាប់ឃើញ ហើយអាចធ្លាប់បានជួបប្រទះឆ្លងកាត់ដោយខ្លួនឯងផងព្រោះប្រជា ពលរដ្ឋខ្មែរយើងមានជំនឿថាមួយជីវិតមនុស្សត្រូវតែកើតជម្ងឺអុតស្វាយម្ដង មិនអាចមាននរណាគេចផុតឡើយ។ វាជាជម្ងឺមួយ ធម្មតាៗដែលភាគច្រើនតែងតែកើតមាននៅលើកុមារ ជាករណីកម្របើកើតនៅលើមនុស្សពេញវ័យ។ ឪពុកម្ដាយទាំងឡាយនៅពេល ដែលកូនមានជម្ងឺអុតស្វាយមិនសូវជាចាប់អារម្មណ៍ក្នុងការព្យាបាលប៉ុន្មានទេព្រោះមានជំនឿថាជម្ងឺនេះនឹងអាចសះស្បើយដោយខ្លួន ឯង។
លោកវេជ្ជបណ្ឌិត ថៃ គា អ្នកឯកទេសជម្ងឺស្បែក និងកាមរោគធ្វើការស្រាយបំភ្លឺជូនមិត្ដអ្នកអានអំពីជម្ងឺអុតស្វាយតាម រយៈទស្សនាវដ្ដី សុខភាពយើង។
អុតស្វាយ ជាជម្ងឺអ្វី?
អុតស្វាយជាជម្ងឺឆ្លងដែលកើតនៅលើស្បែកទាំងប្រុសទាំងស្រី ភាគច្រើនកើតនៅលើកុមារអាយុក្រោម១០ឆ្នាំជួនអាច កើតមានចំពោះមនុស្សពេញវ័យដែរ។ អុតស្វាយជាជម្ងឺមួយដែលបង្កឡើងដោយមេរោគឈ្មោះVaricella.Zaste.Virus(Vzv) ហើយមេរោគនេះមិនត្រឹមតែបង្កើតឱ្យក្លាយជាជម្ងឺអុតស្វាយប៉ុណ្ណោះទេនៅដំណាក់បន្ទាប់វានឹងបង្កបានជាជម្ងឺម្យ៉ាងទៀតហៅថារើម ។ ជម្ងឺអុតស្វាយឆ្លងពីមនុស្សម្នាក់ទៅមនុស្សម្នាក់ទៀតតាមផ្លូវដង្ហើម ដូចជក្អកនិងកណ្ដាស់ជាដើម។
រោគសញ្ញាជម្ងឺអុតស្វាយ
នៅពេលទទួលបានការឆ្លងមេរោគជម្ងឺអុតស្វាយ រោគសញ្ញាខ្លះចាប់បង្ហាញក្រោយពេលពី២ទៅ៣សបា្ដហ៍។ ចំពោះជម្ងឺនេះ កុមារមិនសូវជាមានរោគសញ្ញាពិសេសណាមួយនោះទេ ប៉ុន្ដែសម្រាប់មនុស្សធំពេញវ័យចេញជារោគសញ្ញាមួយចំនួនដូចជាគ្រុនក្ដៅ ហៀរសម្បោរ ឬមានអាការប្រហាក់ប្រហែលនឹងជម្ងឺផ្ដាសាយដែរ។ ក្រៅពីនេះមានរោគសញ្ញាមួយចំនួនទៀតដែរ ដូចជាឈឺខ្លួន រួមរឹត ខ្លួនប្រាណ ឈឺក្បាលជាដើម។ លុះ២ ឬ៣ថ្ងៃក្រោយមកទើបមានចេញកន្ទួលក្រហមៗនៅលើស្បែក បន្ទាប់មកចេញជាពងទឹកថ្លាៗ នៅលើកន្ទួលនោះ ហើយវាក៏វិវត្ដន៍ទៅតាមដំណាក់កាលបន្ដបន្ទាប់ដូចជាពងទឹកថ្លាៗទៅជាខាប់ល្អក់ និងក្រៀមទៅជាក្រមររហូត អាចបង្កជាស្លាកស្នាមផងដែរ។ ពេលខ្លះអាចមានអាការរមាស់បន្ដិចបន្ដួចនៅលើស្បែក។
វិធីព្យាបាលជម្ងឺអុតស្វាយ
ជម្ងឺអុតស្វាយមិនមែនជាជម្ងឺដែលតម្រូវឱ្យលោកអ្នកស្វះស្វែងរកការព្យាបាលបន្ទាន់នោះទេហើយក៏មិនចាំបាច់ដល់ទៅប្រើ ប្រាស់ឱសថនោះដែរ ព្រោះវាអាចជាសះបាត់ទៅវិញដោយខ្លួនឯង។ ប៉ុន្ដែប្រសិនបើអ្នកជម្ងឺមានអាការក្ដៅខ្លាំងលោកអ្នកអាចប្រើ ប្រាស់ឱសថបន្ថយកម្ដៅ ដូចជាប៉ារ៉ាសេតាម៉ុលជាដើម។ បច្ចុប្បន្នមានវ៉ាក់សាំងសម្រាប់ចាក់ដើម្បីការពារនិងទប់ស្កាត់មិនឱ្យកើតជម្ងឺ អុតស្វាយ។ មិនត្រូវឱ្យក្មេងដទៃនៅក្បែរអ្នកជម្ងឺទេព្រោះវាអាចឆ្លងតាមរយៈខ្យល់ដកដង្ហើមបាន។
ផលវិបាករបស់ជម្ងឺអុតស្វាយ
តាមពិតទៅស្ទើរតែពុំអាចផ្ដល់ជាផលវិបាក ឬគ្រោះថ្នាក់អ្វីនោះឡើយ ប្រសិនបើអ្នកជម្ងឺមានការថែទាំត្រឹមត្រូវនិងអ្នក ជម្ងឺផ្ទាល់មានសុខភាពល្អ ហូបចុកគ្រប់គ្រាន់ និងមានអនាម័យក្នុងការរស់នៅ។ ប៉ុន្ដែវាអាចធ្វើឱ្យអ្នកជម្ងឺចុះទ្រុឌទ្រោមខាងរូបរាង កាយ ហេវហត់ និងអស់កម្លាំងប្រសិនបើអ្នកជម្ងឺគ្មានការហូបចុកគ្រប់គ្រាន់និងកង្វះអនាម័យក្នុងការរស់នៅ។ ម្យ៉ាងទៀតកាលណា ប្រព័ន្ធសារពាង្គកាយខ្សោយពុំមានលទ្ធភាពទប់ទល់នឹងជម្ងឺវាអាចធ្វើឱ្យអ្នកជម្ងឺឈានដល់ដំណាក់កាលធ្ងន់ធ្ងរមួយដែលត្រូវការការ ព្យាបាល។
វិធីថែទាំខ្លួន ពេលកើតអុតស្វាយ
ថ្វីត្បិតតែវាមិនទាមទារឱ្យមានការព្យាបាល ប៉ុន្ដែអ្នកជម្ងឺក៏ត្រូវមានការថែទាំដ៏សមស្របដែរដូចជាត្រូវឱ្យអ្នកជម្ងឺរស់នៅ ក្នុងបរិស្ថានស្អាតល្អ សមរម្យ មានអនាម័យ និងហូបចុកគ្រប់គ្រាន់ដោយពុំមានការតមអ្វីនោះឡើយ។ ជាទម្លាប់ចាស់ៗតែងមាន ជំនឿថាពេលកើតអុតស្វាយ ត្រូវងូតទឹកឱ្យបានច្រើនដង មិនត្រឹមត្រូវទាំងស្រុងទេគ្រាន់តែសម្អាតខ្លួនប្រាណបានស្អាត ជាការស្រេច ទៅហើយ។
ដំបូន្មានអ្នកប្រឹក្សា
សូមលោកអ្នកចងចាំថាថ្វីត្បិតតែជម្ងឺអុតស្វាយអាចជាសះស្បើយដោយខ្លួនឯង ប៉ុន្ដែក៏ទាមទារលោកអ្នកចេះថែរក្សានិង អនាម័យខ្លួនប្រាណឱ្យបានល្អសមរម្យដែរ។ សូមមាតាបិតាស្វែងយល់អំពីថ្នាំបង្ការនិងនាំកូនទៅទទួលឱ្យបានគ្រប់ប្រភេទដើម្បីការ ពារកូនលោកអ្នកពីជម្ងឺផ្សេងៗដែលអាចការពារបាន។
ប្រភព ៖ ទស្សនាវដ្តី សុខភាពយើង លេខ០២៣ ខែធ្នូ ឆ្នាំ២០០៧
Leave a Reply