មុនគឺជាជម្ងឺមួយដែលជារឿយៗកើតនៅលើផ្ទៃមុខ ក៏ប៉ុន្ដែមុនដែលពិបាកនឹងព្យាបាលនេះក៏អាចកើតនៅលើខ្លួនប្រាណ ជា ពិសេសកើតនៅលើខ្នងរបស់លោកអ្នកតែម្ដង។ ប្រសិនបើលោកអ្នកកើតមុនខ្នងនោះវាមានការពិបាកក្នុងការថែទាំ និងព្យាបាល ព្រោះមើលមិនឃើញ។ បើចង់បំបាត់នោះគឺពឹងផ្អែកទាំងស្រុងទៅលើអ្នកដទៃ ឬអ្នកជំនាញដើម្បីជាជំនួយ។
លោកអ្នកនឹងអាចស្វែងយល់ពីវិធីទាំងអស់នេះតាមរយៈការបកស្រាយរបស់លោកស្រីវេជ្ជបណ្ឌិត អ៊ូ សុភាពអ្នកឯកទេស ជម្ងឺសើស្បែកនៃគ្លីនិកសើស្បែកវត្ដភ្នំ ជាមួយទស្សនាវដ្ដី សុខភាពយើង។
មុនខ្នងជាអ្វី?
មុនខ្នងមិនខុសពីមុនលើស្បែកមុខនោះទេ គ្រាន់តែនៅទីតាំងខុសគ្នាតែប៉ុណ្ណោះ។ ជម្ងឺមុនអាចបណ្ដាលមកពីការរលាកនៃ រន្ធរោម ឬរន្ធញើស គួបផ្សំជាមួយនឹងការស្ទះនៃសារធាតុខ្លាញ់នៅក្នុងរន្ធរោមជាដើម។ ជម្ងឺមុននេះអាចព្យាបាលបាន បើសិនកើត ឡើងដោយសារប្រតិកម្មថ្នាំ ឬគ្រឿងសម្អាងផ្សេងៗ ពិបាកព្យាបាលបន្ដិច។
មូលហេតុកើតមុនខ្នង
ជម្ងឺមុននៅលើខ្នងអាចកើតឡើងបានដោយសារតែកត្ដាជាច្រើនរួមផ្សំ ជាមួយនឹងការខ្វះអនាម័យខ្លួនប្រាណ។ ជម្ងឺនេះមិន ត្រឹមតែកើតនៅលើខ្នងរបស់លោកអ្នកនោះទេ បើក្នុងករណីធ្ងន់ធ្ងរវាក៏អាចកើតនៅលើដើមទ្រូង ក្បាលពោះនិងដើមដៃផងដែរ។
1. ជម្ងឺមុនបង្កដោយមេរោគផ្សិត ៖ ដោយសារការរលាកកោសិកានៅបរិវេណគល់រោមនិងការរួមផ្សំជាមួយមេរោគផ្សិត ដែលអាចបង្កទៅជាពងខ្ទុះ កន្ទួលតូចៗ និងមានការរមាស់ខុសពីមុនដទៃៗទៀត នៅពេលលោកអ្នកបែកញើសឬអាកាសធាតុក្ដៅ។
2. ជម្ងឺមុនបង្កដោយសារថ្នាំ ៖ ការប្រើប្រាស់ថ្នាំគ្រាប់ ឬថ្នាំចាក់សម្រាប់ព្យាបាលជម្ងឺតម្កាត់ផ្សេងៗដែលមានសារធាតុ បំបាត់ការរលាកច្រើនពេកនោះ អាចធ្វើឱ្យលោកអ្នកមានជម្ងឺមុនខ្នង ដោយមានកន្ទួលក្រហមតូច ឬធំលាយគ្នា។ លោកអ្នកមួយចំនួន ប្រើថ្នាំប្រភេទនេះជាប្រចាំសម្រាប់ព្យាបាលជម្ងឺ ដូច្នេះជាការប្រឈមមុខក្នុងការបង្កឱ្យមានមុនខ្នងចៀសមិនរួចឡើយ។
3. ជម្ងឺមុនបង្កដោយគ្រឿងសម្អាង ៖ ការតុបតែងខ្លួនដោយការប្រើប្រាស់ផលិតផលច្រើនប្រភេទលាយបញ្ចូលគ្នាដូចជា ឡេលាបខ្លួន ម្សៅលាបមុខជាដើមជាបញ្ហាចោទមួយដ៏សំខាន់ដែលធ្វើឱ្យស្បែកងាយរងប្រតិកម្មពីផលិតផលទាំងនោះ។
វិធីព្យាបាលមុនខ្នង
ដើម្បីព្យាបាលជម្ងឺមុនខ្នងនេះឱ្យបានជាសះស្បើយ លុះត្រាតែលោកអ្នកបំបាត់មូលហេតុដែលបង្កជម្ងឺជាមុនសិនព្រោះការព្យាបាលត្រូវធ្វើទៅតាមប្រភេទនៃមូលហេតុនីមួយៗដែលបង្កឡើង។
- ប្រសិនបើមុនខ្នងដែលបង្កដោយសារជម្ងឺផ្សិត ត្រូវព្យាបាលជម្ងឺផ្សិតជាមុនសិនដោយប្រើរយៈពេលប្រមាណជាកន្លះខែ ទើបជា។ បន្ទាប់ពីជាសះស្បើយជម្ងឺផ្សិតហើយ ទើបចាប់ផ្ដើមធ្វើការព្យាបាលជម្ងឺមុនខ្នងដែលប្រើរយៈពេលប្រហែលជា២ទៅ៣ខែ បន្ថែមទៀត។
- ប្រសិនបើជម្ងឺមុនបង្កដោយការប្រើប្រាស់ថ្នាំ ឬគ្រឿងសម្អាងផ្សេងៗត្រូវតែបញ្ឈប់ការប្រើប្រាស់ផលិតផលទាំងនោះជា បន្ទាន់។ បន្ទាប់មកទើបព្យាបាលដោយថ្នាំលេប ឬលាបនៅលើស្បែកខ្លួនហើយចៀសវាងការព្យាបាលដោយការប្រើថ្នាំចាក់។ ក្នុង ករណីចាំបាច់ត្រូវប្រើវិធីចាក់ថ្នាំនោះ គប្បីចាក់នៅកន្លែងដែលមានមុនធំៗតែប៉ុណ្ណោះ។
រូបភាពទស្សនាវដ្ដីសុខភាពយើង
ផលប៉ះពាល់នៃការកើតមុនខ្នង
មុនខ្នងគ្រាន់តែជាជម្ងឺសើស្បែកតែប៉ុណ្ណោះ មិនអាចធ្វើឱ្យលោកអ្នកបាត់បង់ជីវិតឡើយប៉ុន្ដែក៏មិនគួរបណ្ដោយឱ្យកើត ហួសហេតុពេកទេ។ សុភាពនារីភាគច្រើនតែងតែចូលចិត្ដជ្រើសរើសសម្លៀកបំពាក់ដែលបញ្ចេញសាច់ខ្នងឬសាច់ដើមទ្រូង ដើម្បី បង្កើនភាពសិចស៊ីរបស់ខ្លួន។ ហេតុនេះការមានមុនខ្នងឬមានស្នាមខ្មៅៗដោយសារមុនខ្នងអាចធ្វើឱ្យបាត់បង់សម្រស់ និងជំនឿចិត្ដ។
វិធីបង្ការមុនខ្នង
ដើម្បីការពារកុំឱ្យកើតជម្ងឺមុននៅលើខ្នង លោកអ្នកគួរកុំប្រើប្រាស់នូវគ្រឿងសម្អាងអ្វីផ្ដេសផ្ដាសដែលធ្វើឱ្យប៉ះពាល់ដល់ ស្បែក។ ជាពិសេសលោកអ្នកគួរសម្អាតខ្លួនឱ្យបានស្អាតជាប្រចាំ ដើម្បីកម្ចាត់ពពួកមេរោគទាំងឡាយលើសពីនេះគួរកុំប្រើថ្នាំគ្រាប់ ឬថ្នាំចាក់ណាដែលមានសារធាតុបំបាត់ការរលាក ដោយមិនមានវេជ្ជបញ្ជាពីគ្រូពេទ្យជំនាញត្រឹមត្រូវ។
ដំបូន្មានអ្នកប្រឹក្សា
លោកអ្នកគួរតែមានការសម្អាតខ្លួនឱ្យបានញឹកញាប់ និងមិនគួរប្រើប្រាស់ផលិតផលសម្អាងលាយគ្នាច្រើនមុខសម្រាប់លាប លើស្បែកឡើយ។ ជាពិសេស ប្រសិនបើដឹងថាខ្លួនមានមុននៅលើខ្នង ឬដើមទ្រូងហើយនោះគួរប្រញាប់មកជួបពិភាក្សាជាមួយគ្រូពេទ្យជំនាញ ដើម្បីរកមូលហេតុជម្ងឺ និងធ្វើការព្យាបាលឱ្យបានទាន់ពេលវេលា។ ចៀសវាងការកេះឬញិចមុនដែលធ្វើឱ្យក្លាយពិបាក នឹងព្យាបាល។
ប្រភព ៖ ទស្សនាវដ្តី សុខភាពយើង លេខ០២២ ខែវិច្ឆិកា ឆ្នាំ២០០៧
Leave a Reply