យោងតាមការសិក្សាថ្មីមួយបានអះអាងថា ជាងពាក់កណ្តាលនៃជម្ងឺមហារីកទាំងអស់អាចបង្ការបាន ហើយនៅសង្គមមនុស្សដែលបានដឹងអាចធ្វើការចាត់វិធានការលើបញ្ហានេះ។ ការសិក្សាថ្មីដឹកនាំដោយអ្នកស្រាវជ្រាវសុខភាពសាធារណៈនៃសកលវិទ្យាល័យវ៉ាស៊ីនតោន នៅមជ្ឈមណ្ឌល Citeman Cancer បានរាយការណ៍ថា ការចាប់ផ្តើមរិះរកមធ្យោបាយគ្រប់បែបយ៉ាងត្រូវបានធ្វើឡើង ដើម្បីធ្វើឲ្យចំនួនដ៏សម្បើមនៃរោគមហារីកនៅក្នុងសហរដ្ឋអាមេរិក និងនៅជុំវិញពិភពលោកឲ្យមានការថយចុះ។
លោក Graham A. Colditzដែលជានាយកសមាគមបង្ការនិងត្រួតពិនិត្យរោគមហារីក នៅមជ្ឈមណ្ឌល Citeman Cancer បានថ្លែងថា«ជាការពិតណាស់ពួកយើងបានរកឃើញទិន្នន័យនៃចំនួនដ៏ធំសម្បើមអំពីមូលហេតុ និងវីធីបង្ការការពាររោគមហារីកបាននាពេលបច្ចុប្បន្ននេះ។
នៅក្នុងពិភពលោកការស្លាប់ដោយសារជម្ងឺមហារីក ឬ ជាភាសាអង់គ្លេសហៅថា Cancer គឺជាមូលហេតុទី១នៃមរណភាពមុនអាយុរបស់មនុស្ស កាលបើគ្មានវិធានការក្នុងការទប់ស្កាត់ទេនោះ។ អង្គការសុភាពពិភពលោកបានប៉ាន់ប្រមាណថា នៅឆ្នាំ២០១៥ខាងមុខជម្ងឺមហារីកអាចមានការកើនឡើងដែលអាចបណ្តាលឲ្យមានមនុស្សស្លាប់រហូតដល់ចំនួន៤៨លាននាក់។ បើតាមទិន្នន័យរបស់ក្រុមអ្នកស្រាវជ្រាវជាច្រើនរូបបានលើកឡើងថា ការជក់បារី ការផឹកសុរា ការឡើងទម្ងន់ និងការធាត់ជ្រុលគឺជាមូលចម្បងនៃការកកើតជម្ងឺមហារីក។
មិនមែនមានតែបារី និងសុរាប៉ុណ្ណោះទេដែលបណ្តាលឲ្យកើតជម្ងឺមហារីក។ វិទ្យាស្ថានជាតិនៃជម្ងឺមហារីកបានចុះផ្សាយកាលពីឆ្នាំ២០០៩កន្លងទៅបានបញ្ជាក់ឲ្យដឹងថា សាច់ក្រហម ដូចជាសាច់គោ សាច់ក្របី សាច់សេះ សាច់ក្រក ហ្សំបុង (Jambon)និងប៉ាតេ ដែលជាប្រភេទសាច់ក្រកម្យ៉ាងធ្វើពីឈាម រួមទាំងសាច់ជ្រូកបីជាន់ប្រលាក់ប្រៃ សាច់ក្រកក្រៀមសុទ្ធសឹងតែជាអាហារឆ្ងាញ់ អាចបណ្តាលឲ្យកើតមានជម្ងឺមហារីកចុងពោះវៀនធំ។ ដើម្បីចៀសវាងផុតពីគ្រោះថ្នាក់នៃជម្ងឺមហារីកដ៏គួរឲ្យកំណាចនេះលោកអ្នកត្រូវកំណត់ត្រឹមតែ៥០០ក្រាមប៉ុណ្ណោះក្នុងការបរិភោគក្នុងមួយសប្តាហ៍។
យោងតាម សមាគមជម្ងឺមហារីកអាមេរិកាំងបានប៉ាន់ប្រម៉ាណថាចំនួន ១,៦៣៨,៩១០ នៃមូលហេតុរោគមហារីកថ្មីៗ នឹងត្រូវបានធ្វើរោគវិនិច្ឆ័យនៅក្នុងឆ្នាំនេះនៅសហរដ្ឋអាមេរិក។ ដោយឡែកនៅក្នុងឆ្នាំនេះចំនួនប្រជាពលរដ្ឋអាមេរិក៥៧៧,១៩០នាក់ គឺត្រូវបានរំពឹងថានឹងអាចស្លាប់ដោយសារជម្ងឺមហារីកនេះ។
អត្តបទដោយ ៖ សៀង វិរៈ
ចេញផ្សាយ ៖ ថ្ងៃទី០១ ឧសភា ឆ្នាំ ២០១២
Leave a Reply