ការបរិភោគគ្រប់គ្រាន់ ពិតជាមានសារៈសំខាន់ខ្លាំងណាស់សម្រាប់សុខភាពមនុស្សទូទៅ។ ការផ្តល់អាហាររូបត្ថម្ភគ្រប់គ្រាន់ទៅដល់កុមារក៏ជាបញ្ហាមួយដែលអាណាព្យាបាលត្រូវតែយកចិត្តដោយមិនអាចខានបានក្នុងន័យជួយទ្រទ្រង់សុខភាពរបស់កុមារទាំងរាងកាយ ប្រាជ្ញា និងស្មារតីឲ្យកាន់តែប្រសើរឡើង។ ការទទួលបានអាហារូបត្ថម្ភមិនគ្រប់គ្រាន់នៅវ័យកុមារមានផលប៉ះពាល់ ជាអវិជ្ជមានរយៈពេលយូរដល់ជីវិតទាំងមូលរបស់មនុស្ស ហើយបណ្តាលអោយប្រជាជាតិជាច្រើនខាតបង់កម្លាំងផលិតកម្ម។
ពិធីសម្ភោធយុទ្ធនាការផ្តល់អាហារបន្ថែមដល់កុមារ អាយុ៦ខែ ដល់២៤នៅកម្ពុជា
កង្វះអាហារូបត្ថម្ភគឺជាមូលហេតុធំបំផុតតែមួយគត់ដែលបណ្តាលអោយមានកុមារជាច្រើននាក់ ត្រូវបានស្លាប់លើពិភពលោក។ កាលពីព្រឹកថ្ងៃសុក្រ ទី២៧ ខែមេសា ឆ្នាំ២០១២ នាពេលថ្មីនេះ ក្រសួងសុខាភិបាល សហការជាមួយមជ្ឈមណ្ឌលជាតិ គាំពារមាតា និងទារក ព្រមទាំងដៃគូអភិវឌ្ឃនានា បានសម្ភោធឲ្យដំណើរការជាផ្លូវការនូវយុទ្ធនាការផ្តល់អាហារដល់កុមារកម្ពុជា នៅសណ្ឋាគារភ្នំពេញ។ ការដំណើរការនូវយុទ្ធនាការនេះនឹងរួមចំណែកធ្វើឲ្យប្រសើរឡើង ចំពោះស្ថានភាពអាហាររូបត្ថម្ភដល់កុមារនៅក្នុងប្រទេសកម្ពុជា។
មតិជុំវិញការសម្ភោធយុទ្ធនាការផ្តល់អាហារបន្ថែមដល់កុមារ
រដ្ឋលេខាធិការក្រសួងសុខាភិបាល លោក អេង ហួត បានថ្លែងក្នុងពិធីសម្ពោធថ្នាក់ជាតិ និងប្រកាសបើកជា ផ្លូវការយុទ្ធនាការផ្តល់អាហារបន្ថែមដល់កុមារអាយុពី៦ខែ ដល់២៤ខែថា ម្តាយ និងអ្នកថែទាំកុមារមានតួនាទីសំខាន់ណាស់ដើម្បីធ្វើឱ្យកុមារ ទទួលបាននូវអាហាររូបត្ថម្ភបន្ថែមសមស្រប និងមានគុណភាព។ លោកបានបន្តថាថ្វីបើឆ្នាំ២០១២នេះ ការលើកកម្ពស់ការបំបៅកូនដោយទឹកដោះម្តាយ បានទទួលជោគជ័យក៏ដោយ ក៏ការអនុវត្តន៏ការផ្តល់អាហារបន្ថែម មិនបានត្រឹមត្រូវនៅតែជាកត្តាចម្បងមួយក្នុងការចូលរួមចំណែកធ្វើឱ្យអត្រាកង្វះអាហារូបត្ថម្ភមានចំនួនខ្ពស់នៅក្នុងប្រទេសកម្ពុជា។
កញ្ញា សុណា គីម (Sunah Kim) អនុប្រធានអង្គការយូនីសេហ្វប្រចាំនៅកម្ពុជា បានមានប្រសាសន៍នៅក្នុងឱកាសនោះផងដែរ ថា កាលពីមុន គេតែងតែមានជំនឿថាម្តាយ មិនមានទឹកដោះភ្លាមៗក្រោយពេលសម្រាលកូនរួចហើយ។ នេះមានន័យថា មានការពន្យារពេលក្នុងការបំបៅកូនដោយទឹកដោះម្តាយ ហើយពួកគេក៏តែងតែមានជំនឿ និងការអនុវត្តផងដែរថា កុមារតូចចំាបាច់ត្រូវផឹកទឹក ហើយទឹកដោះម្តាយមិនត្រូវបានគេយល់ថា មានសារធាតុទឹកគ្រប់គ្រាន់នោះឡើយ។
អនុប្រធានអង្គការយូនីសេហ្វរូបនេះ បានបន្តទៀតថា បន្ទាប់ពីមាន ការផ្សព្វផ្សាយយ៉ាងទូលំទូលាយ តាមរយៈប្រព័ន្ធផ្សព្វផ្សាយ និងការអប់រំផ្សព្វផ្សាយនៅនឹងមូលដ្ឋានជាក់ស្តែងរួចមក បច្ចុប្បន្ននេះ ម្តាយភាគច្រើន ចាប់ផ្តើមបំបៅកូនដោយកដោះភ្លាម ក្រោយពេលសម្រាលកូន ហើយបន្តបំបៅកូនដោយទឹកដោះម្តាយតែមួយមុខគត់ ក្នុងរយៈពេល៦ខែដំបូង។ ជាពិសេសកុមារដែលកើតមិនគ្រប់ទម្ងន់ មិនបានបង្ហាញថា មានការរីកចម្រើន អ្វីសោះឡើយ នៅក្នុងរយៈពេល១០ឆ្នាំចុងក្រោយនេះ។ យើងអាច សន្មតបានថា បញ្ហានេះមានទំនាក់ទំនងជាមួយនឹងការមិនមានភាពរីកចម្រើនអ្វីសោះ ចំពោះទម្ងន់របស់មាតា។ ការកើនឡើងខ្ពស់ នៃការពិនិត្យផ្ទៃពោះ កាលពីពេលថ្មីៗនេះ គឺជាឱកាសដ៏ល្អបំផុតមួយ សម្រាប់លើកកម្ពស់ឥរិយាបថ ដែលនឹងបង្កើនទម្ងន់របស់ទារកទើបកើត”។
បញ្ហាកង្វះអាហារូបត្ថម្ភដល់កុមារកម្ពុជា
បើយោងតាមការអង្កេតប្រជាសាស្រ្ត និងសុខភាពនៅកម្ពុជា ឆ្នាំ២០១០ បាន បង្ហាញថា ៤០ភាគរយនៃកុមារអាយុក្រោម៥ឆ្នាំមានបញ្ហាកង្វះអាហារូបត្ថម្ភរុំារ៉ៃ (ក្រេះក្រិន) ១១ភាគរយ មានភាពស្គមស្គាំង និង២៨ភាគរយមានទម្ងន់ទាបដែលមានបញ្ហាកង្វះអាហារូបត្ថម្ភស្រួចស្រាវជាដើម។
របាយការណ៍មួយពីវិទ្យាស្ថានស្ថិតិ បានរកឃើញថាលទ្ធផលនៃការស្ទាបស្ទង់ថ្នាក់ជាតិដើម្បីកំណត់ឥទ្ធិពលនៃតម្លៃ ស្បៀងអាហារខ្ពស់ បានរកឃើញសុខភាពកុមារមិនមានភាពប្រសើរឡើងទេ ដោយកុមារខ្វះអាហារូបត្ថម្ភធ្ងន់ធ្ងរបានកើនពី ៨,៤ភាគរយ កាលពីឆ្នាំ ២០០៥ ដល់ ៨,៩ភាគរយ ក្នុងឆ្នាំ ២០០៨ ដែលជាការចង្អុលបង្ហាញដ៏សំខាន់មួយផ្នែកតាមសមាមាត្រទម្ងន់ និង កម្ពស់ ។ ការសិក្សានេះ ក៏បានរកឃើញផងដែរថាការរាលដាលជម្ងឺគ្រុនក្ដៅ ក្នុងចំណោមកុមារដែលមានអាយុតិចជាង៤ឆ្នាំ បានកើនដល់ ៥៨,៩ភាគរយ ក្នុងឆ្នាំ ២០០៨ ធៀបនឹង ៣៩,៦ភាគរយ កាលពីឆ្នាំ ២០០៥ ។
គួររំឮកបន្ថែមផងដែរថា បើតាមរបាយការណ៍សុខភាព និងប្រជាសាស្ត្រកម្ពុជា (CDHS) កាលពីខែមីនា ឆ្នាំ២០១០កន្លងទៅ បានចេញផ្សាយនូវលទ្ធផលរកឃើញគួរអោយភ្ញាក់ផ្អើលបំផុតមួយ ដែលបានបង្ហាញថា កុមារជាច្រើនមានរាងកាយស្គមស្គាំងខ្លាំងនៅចន្លោះអាយុចាប់ពីកើតរហូតដល់អាយុជិត ៥ឆ្នាំ (៥៩ខែ) ច្រើនជាងលទ្ធផលនៅក្នុងការអង្កេតកាលពីឆ្នាំ២០០៥ទៅទៀត។ ការលូតលាស់មិនប្រក្រតីរបស់កុមារ មានកម្ពស់ទាបជាងអាយុរបស់ពួកគេ បណ្តាលមកពីពួកគេមិនបានទទួលអាហារូបត្ថម្ភគ្រប់គ្រាន់ក្នុងរយៈយូរ ហើយការដែលកាន់តែអាក្រក់ជាងនេះទៅទៀតនោះ គឺដោយសារពួកគេកើតជម្ងឺជាញឹកញាប់ដែលរួមមានរាករូស ជាដើម។ យោងតាមការអង្កេតនោះ កុមារកម្ពុជាអាយុក្រោម ៥ ឆ្នាំចំនួន ៤០ ភាគរយ មានកម្ពស់ទាបជាងអាយុរបស់ពួកគេ ហើយពួកគេមួយភាគបីមានការលូតលាស់ខុសប្រក្រតីខ្លាំង។ កុមារ ១៤ ភាគរយក្នុងចំណោមកុមារកម្ពុជាទាំងអស់មានការលូតលាស់ខុសប្រក្រតីខ្លាំង។
អត្តបទដោយ ៖ សៀង វិរៈ
ចេញផ្សាយ ៖ ថ្ងៃទី៣០ មេសា ឆ្នាំ ២០១២
Leave a Reply