ដាច់សរសៃឈាមខួរក្បាលជាជម្ងឺមួយដ៏មានគ្រោះថ្នាក់បំផុត ដែលបច្ចុប្បន្នកំពុងក្លាយជាក្ដីបារម្ភរបស់មនុស្សទូទាំងពិភព លោក ពិសេសចំពោះមនុស្សវ័យចំណាស់។ ដាច់សរសៃឈាមខួរក្បាលជាប់ក្នុងចំណាត់ថ្នាក់លេខ១ផ្នែកពិការភាព និងលេខ២សម្រាប់ ការស្លាប់បាត់បង់ជីវិតទាំងនៅទ្វីបអឺរ៉ុប និងអាស៊ី។
លោកវេជ្ជបណ្ឌិត ជុំ ណាវុធ ឯកទេសជម្ងឺប្រព័ន្ធប្រសាទ នៅមន្ទីរពេទ្យមិត្ដភាពខ្មែរសូវៀត ចូលរួមបកស្រាយជម្រាបជូន ពីមូលហេតុនិងផលវិបាកទាំងនេះជូនមិត្ដអ្នកអានតាមរយៈទស្សនាវដ្ដី សុខភាពយើង។
មូលហេតុដាច់សរសៃឈាមខួរក្បាល
ដាច់សរសៃឈាមខួរក្បាលបណ្ដាលមកពីមូលហេតុសំខាន់ពីរយ៉ាង គឺការស្ទះសរសៃឈាមខួរក្បាលដែលមានពី៨០ទៅ៨៥ ភាគរយ និងការដាច់សរសៃឈាមផ្ទាល់តែម្ដងដែលមានត្រឹមតែ១៥ទៅ២០ភាគរយតែប៉ុណ្ណោះ។ មូលហេតុនេះក៏បណ្ដាលមកពីកត្ដា ផ្សេងៗទៀតដែរ ដូចជាការរួមត្បៀតសរសៃឈាម ការប៉ះទង្គិច ជម្ងឺលើសឈាម ជម្ងឺទឹកនោមផ្អែម ខ្លាញ់រុំសរសៃឈាម និងបណ្ដាល មកពីអ្នកជម្ងឺទទួលទានសុរា បារី និងគ្រឿងញៀនផ្សេងៗទៀតជាដើម។
រោគសញ្ញាដាច់សរសៃឈាមខួរក្បាល
ដាច់សរសៃឈាមខួរក្បាលច្រើនកើតមានចំពោះមនុស្សវ័យចំណាស់ និងតិចតួចចំពោះមនុស្សវ័យកណ្ដាល។ វាបានផ្ដល់ជា រោគសញ្ញាមួយចំនួនគួរឱ្យកត់សម្គាល់ដូចជាភ្នែកមើលឃើញពុំច្បាស់ ឬងងឹតភ្លាមៗ ភាគច្រើនចំពោះភ្នែកតែម្ខាង។ អ្នកជម្ងឺពិបាក ក្នុងការប្រាស្រ័យជាមួយអ្នកដទៃ ព្រោះនិយាយពុំច្បាស់ ឬស្ដាប់ពុំយល់អ្វីដែលយើងនិយាយ។ ជាមួយគ្នានេះផងដែរ អ្នកជម្ងឺឈឺក្បាល ខ្លាំងភ្លាមៗខុសពីធម្មតាដោយពុំមានមូលហេតុច្បាស់លាស់់ ហើយពិបាកដើរ ឬជួនកាលដួលភ្លាមៗតែម្ដង ជាពិសេសអាចរួមផ្សំរោគ សញ្ញាណាមួយក្នុងចំណោមរោគសញ្ញាទាំងអស់ខាងលើ។
តួលេខគួរឱ្យបារម្ភនៃជម្ងឺដាច់សរសៃឈាមខួរក្បាល
ដាច់សរសៃឈាមខួរក្បាលជាវិបត្ដិមួយដ៏ធ្ងន់ធ្ងរ ហើយស្ថិតក្នុងលំដាប់លេខ២ក្នុងចំណោមជម្ងឺទាំងដប់ដែលសម្លាប់ជីវិត មនុស្ស។ ជាងនេះទៅទៀតជម្ងឺនេះបាននាំមុខគេដែលផ្ដល់នូវពិការភាព និងស្លាប់មួយចំហៀងខ្លួនមានចំនួន២០នាក់ក្នុងមួយខែបើ តាមរបាយការណ៍របស់ផ្នែកសង្គ្រោះនៅមន្ទីរពេទ្យមិត្ដភាពខ្មែរសូវៀត។ នៅទូទាំងពិភពលោក មានមនុស្សជិត៥លាននាក់បានស្លាប់ ជារៀងរាល់ឆ្នាំដោយជម្ងឺដាច់សរសៃឈាមខួរក្បាល ក្នុងនោះចំនួន២លានកន្លះជាប្រជាពលរដ្ឋអាស៊ី។ ដោយឡែករបាយការណ៍ចន្លោះ ឆ្នាំ២០០០-២០០៥នៅកម្ពុជាបានឱ្យដឹងថាមានអ្នកជម្ងឺ៩១៥នាក់បានស្លាប់ ហើយបើគិតជាមធ្យមមានប្រជាពលរដ្ឋប្រមាណជា២០០ នាក់បានស្លាប់ក្នុងមួយឆ្នាំ។
ផលវិបាកនៃជម្ងឺដាច់សរសៃឈាមខួរក្បាល
ជម្ងឺដាច់សរសៃឈាមខួរក្បាលផ្ដល់នូវផលវិបាកយ៉ាងច្រើន ដូចជាក្លាយទៅជាមនុស្សពិការមិនមានភាពប្រក្រតីទាំងការនិយាយ ការស្ដាប់ ការដើរ និងស្លាប់មួយចំហៀងខ្លួន រហូតដល់បាត់បង់ជីវិតថែមទៀតផង។ ក្រៅពីនេះវាក៏អាចធ្វើឱ្យអ្នកជម្ងឺកើត មានបញ្ហាផ្លូវចិត្ដ ខូចអារម្មណ៍ វង្វេងវង្វាន់ និងមានរហូតដល់ទៅប្រកាច់ ឬហៅថាជម្ងឺឆ្កួតជ្រូក។
ដំបូន្មានអ្នកជំនាញ
ដាច់សរសៃឈាមខួរក្បាលជាជម្ងឺដែលអាចយាយីជីវិតលោកអ្នកបានគ្រប់ពេលវេលា ដូចនេះសូមលោកអ្នកមានការប្រុង ប្រយ័ត្ន និងស្វែងរកការព្យាបាលជាបន្ទាន់ជាមួយអ្នកជំនាញ។ សូមលោកអ្នកព្យាបាល និងថែរក្សាសុខភាពរបស់លោកអ្នក ដើម្បីចូល រួមកាត់បន្ថយអត្រាកំណើននៃអ្នកស្លាប់ និងពិការភាពដោយសារជម្ងឺដាច់សរសៃឈាមខួរក្បាលនេះ។
ប្រភព ៖ ទស្សនាវដ្តី សុខភាពយើង លេខ០១៩ ខែសីហាឆ្នាំ២០០៧
Leave a Reply