សុខភាពល្អក៏អាស្រ័យជាមួយនឹងការរៀបចំតុបតែងប្រើប្រាស់សម្ភារៈផ្សេងៗដែលប្រកបដោយអនាម័យ និងមានផាសុកភាពផងដែរ។ ក្នុងនោះការជ្រើសរើសសម្ភារៈក្នុងបន្ទប់គេង គឺពិតជាចាំបាច់ណាស់សម្រាប់ការទទួលទានដំណេកដូចជាការជ្រើសរើសឈុតគ្រែគេង ដែលរួមមានពូក កម្រាលពូក ស្រោមខ្នើយ និងភួយជាដើម ។ សម្ភារៈទាំងនេះសុទ្ធសឹងតែអាចផ្តល់ជាបញ្ហាចោទចំពោះបញ្ហាសុខភាព ប្រសិនបើមានការជ្រើសរើសមិនបានត្រឹមត្រូវ។
សូមម្រិយមិត្តទាំងអស់ធ្វើការស្វែងយល់ជាមួយទស្សនាវដ្តី សុខភាពយើង និងគេហទំព័រសុខភាពកម្ពុជា តាមរយៈបទសម្ភាសន៌ ជាមួយកញ្ញា បូ បុគ្គលិកនៅមជ្ឈមណ្ឌលគ្រឿងសង្ហារឹម ឌីហ្វើនីឈ័រ ដែលជាមជ្ឈមណ្ឌល ផ្គត់ផ្គង់គ្រឿងសង្ហារឹមក្នុងបន្ទប់គេង ដែលមានទីតាំងផ្ទះលេខ៣៦-៣៨ ផ្លូវម៉ៅសេទុង ខណ្ឌ័ចំការមន ក្រុង ភ្នំពេញ ។
ជ្រើសរើសគ្រែគេងឲ្យស័ក្តសមនឺងបន្ទប់
ជាចាំបាច់ណាស់ដែលលោកអ្នកគួរព្យាយាមក្នុងការជ្រើសរើសជាមួយគ្រែគេង ពីព្រោះគ្រែគេង គឺជា សម្ភារៈសំខាន់បំផុតសម្រាប់ទ្រទម្ងន់រូបរាងកាយរបស់លោកអ្នកជារៀងរាល់ថ្ងៃ បន្ទាប់ពីបំពេញកិច្ចការងារផ្សេងៗរួចរាល់។ ការជ្រើសរើសគ្រែគេង គឺត្រូវតែតម្រូវជ្រើសរើសទៅតាមទំហំរបស់បន្ទាប់គេង។
បន្ទប់គេងជាន់ក្រោមដែលមានទំហំធំ
បន្ទប់គេងជាន់ក្រោមដែលមានទំហំធំគឺអាចជ្រើសរើសនឹងគ្រែគេងដែលមានទំហំធំល្មមសមរម្យទៅតាមទម្រង់របស់ មនុស្សគ្រប់រូបតាមរយៈកម្ពស់ ឬតាមលក្ខណៈបន្ទប់បែបនៅម្នាក់ឯង និងនៅជាគូជាប្តីប្រពន្ធជាដើម។ ប្រសិនបើបន្ទប់ដែលសម្រាប់គូស្វាមីភរិយា គួរជ្រើសរើសយ៉ាងណាឲ្យធំទូលាយបន្តិច បើសិនជាលោកអ្នកជ្រើសរើសគ្រែគេង ដែលមានទំហំតូច គឺវាពិបាកក្នុងការទទួលទានដំណេក ហើយធ្វើឲ្យរំខានដល់អារម្មណ៌ តានតឹងថែមទៀតផង ។ ដូចនេះហើយ ដើម្បីជ្រើសរើសគ្រែគេងឲ្យបានសមរម្យ គឺត្រូវជួប ជាមួយអ្នកដែលជំនាញច្បាស់លាស់ក្នុងការរៀបចំគ្រែគេងដែលពួក គាត់អាចដឹងពីទំហំបន្ទប់ដែលអាចដាក់គ្រែបែបណាទើបស័ក្តិសម និងការរៀបចំជាមួយពូកឲ្យស្របនឹងគ្រែគេងដើម្បី ងាយស្រួល ក្នុងការសម្រាន្ត។
ហើយការផ្តល់ សម្ភារៈទាំងនេះអាចធ្វើឲ្យមានសោភ័ណភាពសក្តិសមទាំងបន្ទប់គេង ទាំងសម្ភារៈផ្សេងៗដែលដាក់តាំងទៅតាមចំណង់ចំណូលចិត្តនិងផ្តល់នូវផាសុកភាពដូចជាជួយឲ្យការសម្រាន្តលក់ស្កប់ស្កល់មិនមានសំឡេងរំខានតាមរយៈការប្រែខ្លួនចុះឡើងបានយ៉ាងងាយ។
បន្ទប់គេងជាន់ខាងឡៅតឿ
ក្នុងការជ្រើសរើសគ្រែគេងជាមួយបន្ទប់ជាន់ឡៅតឿ ការជ្រើសរើសគ្រែគេងក៏ត្រូវតែស័ក្តសមផងដែរ។ ដូច្នេះការជ្រើសរើសក៏ ត្រូវជួបជាមួយអ្នកជំនាញដែលគ្រប់គ្រងសម្ភារៈក្នុងបន្ទប់គេង ថាតើគួរជ្រើសរើសគ្រែគេងទំហំបែបណា ដើម្បីឲ្យសមស្របជាមួយទំហំរបស់បន្ទប់។ ព្រោះភាគច្រើនបន្ទប់នីមួយៗគឺមានទំហំបន្ទប់ខុសប្លែកពីគ្នា។ ដូច្នេះដើម្បីជ្រើសរើសគ្រែគេងឲ្យសក្តិសមនឹងបន្ទប់គេងជាន់ឡៅតឿបែបណា នោះគឺត្រូវតែទទួលការផ្តល់ប្រឹក្សាយោបល់បន្ថែមពីអ្នកជំនាញឲ្យបានច្បាស់លាស់ ដើម្បីបង្កើនសោភ័ណភាពក្នុងបន្ទប់ក៏ដូចជាការរៀបចំឲ្យមានរបៀបត្រឹមត្រូវផងដែរ។
ការបង្កើនផាសុកភាពក្នុងបន្ទប់គេង
ការទទួលទានដំណេកសុខស្រួលក៏អាស្រ័យលើការបរិយាកាសក្នុងបន្ទប់គេងផងដែរ។ បើក្នុងបន្ទប់គេង ពោរពេញទៅដោយបាក់តេរី និងមានក្លិនមិនល្អនោះ ការទទួលទានដំណេករបស់លោកអ្នកមិនអាចស្កប់ស្កល់ឡើយ។ ដូច្នេះការរៀបចំ និងការថែរក្សាសម្ភារៈបន្ទប់គេងមិនត្រឹមត្រូវមិនត្រឹមតែមិនបានផ្តល់សោភ័ណភាពដល់បន្ទប់គេងប៉ុណ្ណោះទេ ថែមទាំងផ្តល់នូវគុណវិបត្តិចំពោះបញ្ហា សុខភាពផងដែរ។ បន្ទប់គេងដែលពោរពេញទៅដោយផាសុកភាព កាន់តែបង្កើតនូវអារម្មណ៌ស្រស់ស្រាយ និងភាពរីករាយ គ្រប់ពេលវេលានៅក្នុងការទទួលទានដំណេករបស់លោកអ្នក ។
ការថែរក្សាបន្ទប់គេង
ក្នុងបន្ទប់គេងដើម្បីឲ្យមានបរិយាកាសល្អប្រសើរ ដែលអាចផ្តល់ផាសុកភាពប្រពៃ ក៏អាស្រ័យទៅលើការតុបតែងជាមួយនឹង សំភារៈផ្សេងៗដែលជាគ្រឿងសង្ហារឹមមានដូចជាគ្រែគេង ពូក កម្រាលពូក ទូសំអាង ។ល។ អ្វីទាំងនេះសុទ្ធសឹងជាសម្ភារៈ ដែលត្រូវព្យាយាមសម្អាតជារៀងរាល់សប្តាហ៌។ ដូចនេះ ចាំបាច់បំផុតនោះគឺធ្វើយ៉ាងណាឲ្យសម្ភារៈទាំងនោះនៅថ្មី និងស្អាតជានិច្ច ជាពិសេសនោះគឺ គ្រែគេង តុ ទូ រឺផ្ទាំង គំនូរដែលតាំងនៅលើជញ្ចាំងជាដើម គឺអាចសម្អាតជាមួយនិងក្រណាត់ស្អាត ដោយបោសជូតធូលី ដែលរុំជាប់ ជាមួយ ជើងគ្រែ និងតាមតុទូផ្សេងៗ ដើម្បីជៀសវាងនូវការទទួលមេរោគតាមរយៈធូលីដីដែលបានតោងជាប់ ជាមួយ សម្ភារៈនៅក្នុងបន្ទប់ទាំងនោះ ដែលអាចធ្វើឲ្យលោកអ្នកកាន់តែមានអារម្មណ៌ស្មុគស្មាញ ។
បណ្តាំផ្ញើ
បើសិនជាលោកអ្នកមិនគិតគូរអំពីបញ្ហាក្នុងការជ្រើសរើសជាមួយសម្ភារៈបន្ទប់គេងនោះទេ សូមលោកអ្នកពិចារណាឡើងវិញ ក្នុងការព្យាយាមយកចិត្តទុកដាក់ជាមួយសម្ភារៈផ្សេងៗក្នុងបន្ទប់គេង។ ការថែរក្សាសម្ភារៈក្នុងបន្ទប់គេងក៏ជាផ្នែកមួយក្នុងការផ្តល់នូវអារម្មណ៌ល្អ ជាមួយនឹងផាសុកភាពផងដែរ ។ បើសិនជាមិនគិតគូរ ដូចជាការសម្អាត និងការតុបតែងនោះទេ អាចធ្វើឲ្យអារម្មណ៌តានតឹង ធុញថប់ និងអាចឆ្លងនូវជម្ងឺផ្សេងៗទៀតផង។
អត្តបទដោយ ៖ សៀង វិរៈ
ចេញផ្សាយ ៖ ថ្ងៃទី ២៥ មេសា ឆ្នាំ ២០១២
Leave a Reply