បុត្រធីតាឆ្លាតវៃ រៀនពូកែ ជាវត្ថុបំណងតែមួយគត់របស់មាតាបិតា។ កុមារឆ្លាតវ័យជាមោទនភាពសម្រាប់ក្រុមគ្រួសារញាតិសន្ដាន ព្រមទាំងប្រទេសជាតិផងដែរ។ ហេតុនេះហើយទើបលោកអ្នកជាមាតាបិតាខិតខំរិះរកវិធីជាច្រើនយ៉ាងដើម្បីឱ្យបុត្រធីតាមានភាពឆ្លាតវាងវៃ។ លោកអ្នកចង់ជ្រាបឬទេ អំពីអាថ៌កំបាំងដែលធ្វើឱ្យកុមារឆ្លាតរៀនពូកែ?
កាលពីលេខ០០៧ ខែសីហា ឆ្នាំ២០០៦លោកអ្នកបានទទួលជ្រាបហើយជាមួយអត្ថបទ“កូនខ្ញុំអាប់បញ្ញា”នៅលើទំព័រ ទស្សនាវដ្ដី សុខភាពយើង។ លោកវេជ្ជបណ្ឌិត យឹម សុបុត្រា ឯកទេសវិកលវិទ្យាបង្ហាញនូវអាថ៌កំបាំងដែលជាកត្ដាចូលរួមឱ្យកូនមាន ភាពវ័យឆ្លាត តាមរយៈទស្សនាវដ្ដី សុខភាពយើង ដើម្បីជាគុណប្រយោជន៍ដល់ប្រិយមិត្ដអ្នកអានជាពិសេសមាតាបិតាទាំងឡាយក្នុង ការចិញ្ចឹមបុត្រធីតា។
ដូចម្ដេចហៅថាកុមារឆ្លាត?
យោងតាមរង្វាស់កម្រិតបញ្ញាស្មារតីកុមារនៃប្រព័ន្ធអាយឃ្យូ កុមារឆ្លាតលុះត្រាតែមានរង្វាស់កម្រិតអាយឃ្យូចាប់ពី១០០ ឡើងទៅ។ កុមារដែលមានកម្រិតអាយឃ្យូលើសពី១២០ ជាប្រភេទកុមារដែលឆ្លាតវាងវៃជាខ្លាំង។ គេអាចដឹងពីកម្រិតបញ្ញាស្មារតី កុមារដោយសារធ្វើរង្វាស់នេះ។
កត្ដាចូលរួមឱ្យកុមារឆ្លាត
ខាងក្រោមនេះជាកត្ដាដែលជម្រុញឱ្យកុមារមានភាពឆ្លាតវាងវៃ ជាប្រការសំខាន់ណាស់សម្រាប់លោកអ្នកជាមាតាបិតា ត្រូវប្រតិបត្ដិ។
1. មុនពេលផ្ដល់កំណើត
តាមការសិក្សាស្រាវជ្រាវ គេសង្កេតឃើញថាឪពុកម្ដាយដែលមានប្រភេទឈាមអាឬអាបេច្រើនតែមានបុត្រធីតាឆ្លាត វៃខ្លាំងរហូតក្លាយជាអ្នកប្រាជ្ញទៀតផង។ ឪពុកម្ដាយដែលត្រៀមផ្ដល់កំណើតឱ្យកូនត្រូវមានសុខភាពល្អទាំងផ្លូវកាយនិងផ្លូវចិត្ដ។ ផ្ទុយទៅវិញ ប្រសិនបើឪពុកម្ដាយមានសុខភាពផ្លូវកាយ និងផ្លូវចិត្ដមិនល្អ ឬមិនប្រក្រតីណាមួយនាំឱ្យការផ្ដល់កំណើតឱ្យកូនមិន ល្អ។ ឧទាហរណ៍ ប្រសិនបើម្ដាយមានកើតជម្ងឺវិកលចរិត ហើយទោះបីឪពុកមានសុខភាពល្អក៏ដោយក៏កូនកើតមកអាចមានបញ្ហាដែរ។
- លោកអ្នកមិនគួរទទួលទានចំណីអាហារដែលសម្បូរទៅដោយជាតិពុលច្រើន ដូចជាបារី សុរា គ្រឿងញៀនឬគ្រឿង ស្រវឹងផ្សេងៗនោះទេ។
- ទារកដែលកើតមកពីឪពុក ឬម្ដាយដែលមានអាយុច្រើនអាចមានលក្ខណៈមិនប្រក្រតីជួនកាលកុមារអាចឈានទៅរក ជម្ងឺអាប់បញ្ញាទៀតផង។ ដូចនេះឪពុកម្ដាយដែលសមស្របសម្រាប់ការបង្កើតកូនគួរមានអាយុចាប់ពី១៨ឆ្នាំទៅ៣៥ឆ្នាំ។ ចំពោះ បុរសទោះបីជាមិនសូវកំណត់អាយុ តែក៏មិនត្រូវឱ្យអាយុច្រើនពេកនោះទេ។
- ការនិយមរៀបអាពាហ៍ពិពាហ៍តាមខ្សែស្រឡាយជិត ដើម្បីមិនឱ្យបែកទ្រព្យជាបច្ច័យ។ ឧទាហរណ៍ការរៀបអាពាហ៍ ពិពាហ៍រវាងបងប្អូនជីដូនមួយបង្កើត រវាងក្មួយនឹងពូជាដើម។ តាមការសិក្សាគេសង្កេតឃើញបុត្រភាគច្រើនដែលកើតមកច្រើនមាន ជម្ងឺអាប់បញ្ញា។
2. នៅពេលពពោះ ឬមានផ្ទៃពោះ
ក្នុងកំឡុងពេលនេះ ស្ដ្រីត្រូវថែរក្សាសុខភាពឱ្យបានហ្មត់ចត់ទាំងផ្លូវកាយ និងផ្លូវចិត្ដដើម្បីទារកកើតមកមានសុខភាពល្អ ប្រាជ្ញាវាងវៃ។
- សុខភាពផ្លូវកាយរបស់លោកស្រីអ្នកនាងត្រូវបំប៉នចំណីអាហារទ្វេដង ដើម្បីចិញ្ចឹមទារក និងខ្លួនឯងផងជាពិសេសចំណីអាហារដែលសម្បូរទៅដោយជាតិរ៉ែ ឬវីតាមីន ព្រោះជាប្រភេទចំណីអាហារផ្ដល់ជីវជាតិដល់ប្រព័ន្ធខួរក្បាល។ ចំណីអាហារមិនគ្រប់ គ្រាន់ធ្វើឱ្យកោសិកាខួរក្បាលលូតលាស់មិនបានល្អ អាចឈានទៅរកជម្ងឺអាប់បញ្ញា។ ចំណែកសុខភាពផ្លូវចិត្ដអ្នកម្ដាយត្រូវសប្បាយចិត្ដ ជានិច្ច សមាជិកគ្រួសារដែលរស់នៅជុំវិញគួរគាំទ្រលើកទឹកចិត្ដដើម្បីមានសុខភាពផ្លូវចិត្ដល្អ។
- ត្រូវតាមដានទារកក្នុងផ្ទៃដោយគ្រូពេទ្យជំនាញជាប្រចាំ ដើម្បីឱ្យបានដឹងថាទារកនោះខ្សោយ ឬទេ។ ព្រោះថាទារកនៅ ក្នុងផ្ទៃអាចខ្សោយដោយប្រការណាមួយ ដូចជាម្ដាយធ្វើការធ្ងន់ ឬទទួលទានអាហារមិនគ្រប់គ្រាន់ជាដើម។
- ការមានផ្ទៃពោះត្រូវមានគម្លាតពីកូនមួយទៅកូនមួយយ៉ាងហោចណាស់ឱ្យបានពី២ទៅ៣ឆ្នាំមិនត្រូវឱ្យមានកូនញឹកពេកទេ។
3. ដំណាក់កាលសម្រាលបុត្រ
ស្ដ្រីគួរតាមដានមើលអាងត្រគាក ដើម្បីឱ្យដឹងថាតើទារកអាចសម្រាលតាមធម្មជាតិ ឬត្រូវធ្វើការវះកាត់ព្រោះថាបើអាង ត្រគាកម្ដាយតូចធ្វើឱ្យទារកពិបាកសម្រាល។ ការសម្រាលបុត្រដោយប្រើកែវជប់នាំឱ្យប៉ះពាល់ក្បាលទារក។
4. ក្រោយការសម្រាលបុត្រ
ដើម្បីការចម្រើនវ័យរបស់កុមារបានល្អ និងមានភាពឆ្លាតវៃ អ្នកម្ដាយត្រូវបំបៅកូនដោយទឹកដោះព្រោះទឹកដោះម្ដាយមាន សារជាតិគ្រប់គ្រាន់សម្រាប់ការលូតលាស់រាងកាយ និងបញ្ញាស្មារតីរបស់ទារក។
ឪពុកម្ដាយត្រូវគាំទ្រផ្លូវចិត្ដកូនតាំងពីតូច ព្រោះថាចាប់តាំងពីពេលកើតមកកុមារចាប់ផ្ដើមលូតលាស់គេត្រូវការភាពកក់ ក្ដៅពីឪពុកម្ដាយ។ ត្រូវថែរក្សាកុមារឱ្យមានសុខភាពល្អបរិបូណ៍ជានិច្ច។ តាមការសិក្សាបង្ហាញឱ្យឃើញថាកុមារដែលឧស្សាហ៍ឈឺមាន បញ្ញាស្មារតីមិនល្អឡើយ ជាពិសេសការថែទាំផ្លូវកាយមិនបានល្អដូចជាកុមារមានជម្ងឺរលាកស្រោមខួរក្បាលកុមារឧស្សាហ៍ដួល ប៉ះ ទង្គិចក្បាលជាដើម។ កុមារចាប់ពីអាយុ៦ខែត្រូវផ្ដល់ចំណីអាហារបន្ថែម មានសាច់ និងបន្លែដើម្បីបំប៉នឱ្យកុមារមានសុខភាពកាន់តែ រឹងមាំ លូតលាស់ទាំងផ្លូវកាយ និងបញ្ញាស្មារតី។
ឪពុកម្ដាយត្រូវតែមានសុខភាពផ្លូវកាយ ផ្លូវចិត្ដល្អ មិនឈ្លោះប្រកែកគ្នា ផ្ដល់ភាពកក់ក្ដៅដល់កូន និងក្រុមគ្រួសារ។ ត្រូវ ជួយគាំទ្រ និងលើកទឹកចិត្ដកូនគ្រប់ពេល ជាពិសេសនៅពេលដែលកូនធ្វើកិច្ចការជោគជ័យ ធ្វើយ៉ាងណាឱ្យកូនមានសុភមង្គលដែលផ្ដល់ ដោយគ្រួសារ។
5. ការអប់រំ
នៅពេលកុមារចម្រើនវ័យគ្រប់អាយុចូលសិក្សាត្រូវបញ្ជូនកូនឱ្យទៅសាលារៀន ព្រោះសាលារៀនជាមូលដ្ឋានអប់រំសំខាន់។ សាលារៀនក៏ត្រូវមានលក្ខណៈគរុកោសល្យខ្ពស់ និងប្រកបដោយផាសុកភាពផងដែរ ទាំងចំណុះសិស្ស វិន័យសីលធម៌ល្អ គ្រូមាន គរុកោសល្យខ្ពស់ក្នុងការបង្រៀន មិនមានការសម្លុតកំហែងសិស្ស និងគ្មានបងតូចបងធំ។
ក្រៅពីនេះការលេងល្បែងកម្សាន្ដជាកត្ដាមួយជំរុញឱ្យកុមារកាន់តែឆ្លាត។ នៅបណ្ដាប្រទេសជឿនលឿននានាមានមជ្ឈ មណ្ឌលមួយដែលអនុញ្ញាតឱ្យកុមារចូលលេងល្បែងកម្សាន្ដផ្សេងៗដែលសុទ្ធសឹងជាល្បែងបណ្ដុះគំនិតស្មារតីឱ្យកុមារមានភាពវៃឆ្លាត។
លទ្ធផលដែលបានមកពីកុមារឆ្លាត
កុមារ ឬកូនមានបញ្ញាវាងវៃគឺប្រៀបប្រដូចទៅនឹងគ្រាប់ពូជល្អដែលជាមោទនភាពសម្រាប់ក្រុមគ្រួសារនិងសង្គមជាតិ ផងដែរ។ កុមារជាសសរទ្រូងរបស់ប្រទេសជាតិជាតិនឹងរឹងមាំរីកចម្រើនជឿនលឿនហើយពោរពេញដោយអ្នកប្រាជ្ញ។
ដំបូន្មានអ្នកប្រឹក្សា
សម្រាប់ឪពុកម្ដាយ ឬគូស្រករវ័យក្មេងដែលចង់ឱ្យបុត្រធីតាឆ្លាតមានបញ្ញាស្មារតីវាងវៃល្អនិងមិនឈានទៅរកជម្ងឺអាប់បញ្ញា លោកអ្នកគួរតែអនុវត្ដនូវកត្ដាមួយចំនួនដូចដែលបានរៀបរាប់ខាងលើព្រោះអាចជាកត្ដាចូលរួមឱ្យកុមារមានភាពឆ្លាតវៃ។ ឪពុកម្ដាយត្រូវអប់រំកូនឱ្យនៅឱ្យឆ្ងាយពីគ្រឿងញៀន និងគ្រឿងស្រវឹងទាំងឡាយ និងត្រូវបញ្ជូនកូនទៅសិក្សាឱ្យទាន់អាយុ។
ចំពោះឪពុកម្ដាយដែលយល់ឃើញថាបុត្រធីតារបស់ខ្លួនមានបញ្ញាមិនប្រក្រតីនោះ សូមបង្កើនការលើកទឹកចិត្ដនិងបំប៉ន ចំណីអាហារគ្រប់គ្រាន់បន្ថែមដល់កូន។ ប្រសិនបើគិតថាកូនមិនអាចមានសមត្ថភាពយល់ដឹងឬកូនមានជម្ងឺអាប់បញ្ញាធ្ងន់ធ្ង្ងរ ឪពុក ម្ដាយគួរបញ្ជូនកូនទៅមន្ទីរពេទ្យ ដើម្បីពិគ្រោះ ឬប្រឹក្សាជាមួយគ្រូពេទ្យជំនាញព្រោះថាជម្ងឺអាប់បញ្ញាស្រាលអាចព្យាបាលឱ្យជាសះ ស្បើយបាន។ ឪពុកម្ដាយគប្បីចិញ្ចឹមកូនដែលមានបញ្ហានេះដោយផ្ចិតផ្ចង់ជាងកូនដទៃទៀត។
ប្រភព ៖ ទស្សនាវដ្តី សុខភាពយើង លេខ០១៩ ខែសីហាឆ្នាំ២០០៧
Leave a Reply