យូ ឌីស្កូ បានប្រឡូកចូលក្នុងវិស័យសិល្បៈដំបូង គ្រាន់តែជាអ្នករាំអមនៅលើឆាកមួយរូបតែប៉ុណ្ណោះ។ បន្ទាប់មកបានក្លាយជាពិធីករនៅស្ថានីយទូរទស្សន៍ប៉ុស្ដិ៍លេខ៥។ ភាពស្រស់សង្ហា និងទេពកោសល្យដ៏ប៉ិនប្រសព្វទើបធ្វើឱ្យលោកក្លាយជាតារាសម្ដែង និងជាតារាចម្រៀងផង។ ការបង្ហាញមុខតាមកញ្ចក់ទូរទស្សន៍ ក៏ដូចជាថតចម្រៀងខារ៉ាអូខេធ្វើឱ្យរូបលោករងនូវកម្ដៅថ្ងៃនិងពន្លឺភ្លើង ហ្វារ។ប៉ុន្ដែ អ្វីដែល គួរឱ្យ កត់សម្គាល់ នោះគឺលោក នៅតែរក្សា បាននូវភាព ស្រស់សង្ហា មិនចាញ់តារា ថ្មីស្រករក្រោយឡើយ។
ចង់ដឹងថាតើលោក យូ ឌីស្កូ មានវិធីថែរក្សាសម្រស់ និងសុខភាពយ៉ាងណាសូមតាមដានជាមួយការស្រាយបំភ្លឺរបស់លោកតាមទស្សនាវដ្ដី សុខភាពយើង។
ការថែរក្សាស្បែកមុខ
រៀងរាល់ការចេញសម្ដែង ស្បែកមុខត្រូវប្រឈមមុខនឹងកម្ដៅថ្ងៃ និងការផាត់ម្សៅតុបតែងដែលងាយធ្វើឱ្យស្បែកមុខខូច ។ ដើម្បីបញ្ចៀសបញ្ហាទាំងនេះលោកបានជ្រើសរើសផលិតផលជំនួយស្បែកឱ្យមានសំណើមការពារកម្ដៅនៅពេលចេញក្រៅ ឬចេញ ទៅសម្ដែង។ សម្រាប់ពេលយប់ ឌីស្កូប្រើប្រេងជំនួយស្បែកនៅពេលណាស្បែកមុខបែកស្រកាឬស្ងួត។ ក្រៅពីនេះលោកចូលចិត្ដថែ រក្សាស្បែកមុខតាមធម្មជាតិដូចជាការទទួលទានផ្លែឈើ និងប្រើត្រសក់ប៉ិគក់យកមកបិតពីលើមុខដើម្បីជំនួយដល់ស្បែក។ ចំពោះ ការជ្រើសរើសផលិតផលប្រើប្រាស់មិនចោទជាបញ្ហាឡើយសំខាន់ឱ្យតែផលិតផលនោះត្រូវជាមួយស្បែកមុខរបស់លោក ទោះយីហោ អ្វីក៏ដោយ។ នៅពេលក្រោកពីដំណេកលោកតែងតែលុបលាងមុខជាមួយសាប៊ូដែលជួយបំបាត់ជាតិខ្លាញ់លើផ្ទៃមុខ។
ការថែរក្សាស្បែកខ្លួន
លោកយូ ឌីស្កូ ចូលចិត្ដស្បែកស្អាតតាមលក្ខណៈធម្មជាតិមិនទាមទារចង់បានស្បែកសហើយក៏មិនបណ្ដោយឱ្យខ្មៅពេកដែរ ។ ដើម្បីសម្អាត និងថែរក្សាស្បែកខ្លួន លោកយកចិត្ដទុកដាក់ជ្រើសរើសសាប៊ូណាដែលមានជាតិសំណើមនិងទឹកដោះគោ ជាពិសេស ត្រូវជាមួយប្រភេទស្បែករបស់លោក។ ឌីស្កូជ្រើសរើសផលិតផលជំនួយដល់ស្បែកបន្ថែមសម្រាប់លាបពេលថ្ងៃ និងពេលយប់ ព្រោះ ការចេញសម្ដែងត្រូវប្រឈមនឹងកម្ដៅថ្ងៃ។ ជាងនេះទៅទៀតការបែកញើសពេលសម្ដែងធ្វើឱ្យមានក្លិនខ្លួនមិនល្អ។ ដើម្បីដោះស្រាយ បញ្ហាទាំងនេះ ឌីស្កូប្រើសាប៊ូបំបាត់ក្លិនខ្លួនសម្រាប់សម្អាត និងជូតឱ្យស្ងួតព្រមទាំងប្រើទឹកអប់ដែលអាចរក្សាក្លិន២៤ម៉ោង។
ការថែរក្សាសក់
ទោះបីលោកជាតារាសម្ដែងមែន ប៉ុន្ដែចំពោះការថែរក្សាសក់គឺមិនខុសពីមនុស្សទូទៅឡើយ។ លោកគ្រាន់តែជ្រើសរើស សាប៊ូកក់សក់ណាដែលត្រូវជាមួយស្បែក និងសរសៃសក់តែប៉ុណ្ណោះ។
ការថែរក្សាភ្នែក
ទោះបីការថត និងសម្ដែងខាងក្រៅត្រូវរងកម្ដៅថ្ងៃយ៉ាងណាក៏ដោយ ក៏ឌីស្កូមិនសូវនិយមប្រើវ៉ែនតាទេ។ ទាល់តែពេលធ្វើ ដំណើរទៅឆ្ងាយទើបប្រើវ៉ែនតា ព្រោះឌីស្កូយល់ថាការពាក់វ៉ែនតាញឹកញាប់អាចប៉ះពាល់ដល់ភ្នែក។ លោកជ្រើសរើសយកទឹកការពារ ភ្នែកម្យ៉ាងសម្រាប់ជំនួយដល់ភ្នែកកុំឱ្យក្រហមមុនពេលចេញសម្ដែង។
ការថែរក្សាធ្មេញ
ចំពោះការសម្អាតធ្មេញ លោកធ្វើជាប្រចាំក្នុងមួយថ្ងៃយ៉ាងតិច៣ដង ជាពិសេសក្រោយពេលទទួលទានអាហារនិងមុនចេញទៅសម្ដែង។ បន្ថែមពីនេះទៀត ឌីស្កូបានជ្រើសរើសផលិតផលទឹកខ្ពុរមាត់សម្រាប់បំបាត់ក្លិនមាត់និងដើម្បីសម្អាតកាកសំណល់ដែលជាប់នឹងធ្មេញ។ ពេលទំនេរពីការថត ឬសម្ដែង លោកចូលចិត្ដទំពារស្ករកៅស៊ូជំនួយដល់ក្លិនមាត់បន្ថែម។
ការថែរក្សាសុខភាពរាងកាយ
ការសម្ដែងធ្វើឱ្យការទទួលទានដំណេកមិនបានគ្រប់គ្រាន់ និងមិនទៀងទាត់ផងដែរ។ ទោះជាយ៉ាងណាក៏ដោយឌីស្កូចូលចិត្ដ គេងសងបង្គ្រប់នៅផ្ទះពេលទំនេរពីការថត និងការសម្ដែង។ ម្យ៉ាងទៀតពេលសម្ដែងធ្វើឱ្យហេវហត់ អស់កម្លាំងនិងងងុយគេងខ្លាំង ដូចនេះហើយលោកចូលចិត្ដទទួលទានភេសជ្ជៈណាដែលអាចទប់ស្កាត់អាការទាំងនោះ ដូចជាទឹកក្រូចទឹកផ្លែឈើ ផ្លែឈើជាដើម។ ប៉ុន្ដែទោះបីជាមានការងារមមាញឹកច្រើនយ៉ាងណាឌីស្កូនៅតែឆ្លៀតចន្លោះពេលសម្រាប់ទទួលទានអាហារក្នុងមួយថ្ងៃចំនួន៣ដងយ៉ាង ទៀងទាត់ ព្រោះការទទួលទានគ្រប់គ្រាន់ និងទៀងទាត់ពេលវេលាធ្វើឱ្យមានកម្លាំងសុខភាពរាងកាយមាំមួន និងជាពិសេសផ្ទៃមុខ មានភាពស្រស់ស្រាយជានិច្ច។ ឌីស្កូទទួលទានមិនរើសទេ ដូចជាបន្លែ ត្រីសាច់ ស៊ុតជាដើម។
ការហាត់កីឡា
ការហាត់ប្រាណរបស់លោកឌីស្កូគឺអាស្រ័យលើពេលវេលា ភាគច្រើនលោកមិនសូវមានពេលទំនេរក្នុងការហាត់ទេដោយ សារមមាញឹកថតសម្ដែង ពេលខ្លះឌីស្កូក្រោកទៅថតតាំងពីម៉ោង៣ទាបភ្លឺ ឬពេញមួយយប់ក៏មាន។ លោកចូលចិត្ដហាត់ប្រាណនៅ ពេលទំនេរ គឺការធ្វើចលនាដងខ្លួនលើកដៃ ពត់ជើង។
បណ្ដាំផ្ញើរបស់យូ ឌីស្កូ
ភាពស្រស់ស្អាតមិនមែនអាស្រ័យលើការតុបតែងខ្លួន និងរូបរាងស្រស់សង្ហានោះទេចំណុចដែលសំខាន់ជាងគេគឺសុខភាព រាងកាយមាំមួន។ ដូចនេះសូមលោកអ្នកយកចិត្ដទុកដាក់ថែរក្សាសុខភាពឱ្យបានល្អ ដោយទទួលទានអាហារនិងទទួលទានដំណេកឱ្យ បានត្រឹមត្រូវ និងទៀងទាត់ ព្រមទាំងមានអនាម័យផងដែរ។ ប្រការដែលសំខាន់សូមកុំសេពគ្រឿងស្រវឹង និងគ្រឿងញៀនដែល បណ្ដាលឱ្យប៉ះពាល់ដល់សុខភាពរាងកាយ និងបាត់បង់អនាគត។
ប្រវត្ដិរូបសង្ខេប
- អាយុ ៖ ២៨ឆ្នាំ
- កម្ពស់ ៖ ១,៧៨ ម៉ែត្រ
- ទម្ងន់ ៖ ៧២ គីឡូក្រាម
- ចាប់អាជីពការងារ ៖ ឆ្នាំ១៩៩៥
- អាជីព ៖ តារាសម្ដែង និងតារាចម្រៀង
- បងប្អូន ៖ ១០នាក់ (ជាកូនទី៥)
- ស្ថានភាពគ្រួសារ ៖ មិនទាន់រៀបការ រស់នៅជាមួយឪពុកម្ដាយ
ប្រភព ៖ ទស្សនាវដ្តី សុខភាពយើង លេខ០១៦ ខែឩសភា ឆ្នាំ២០០៧
Leave a Reply