កត្តាភូមិសាស្ត្រ អាកាសធាតុ និងអនាម័យ បានរុញច្រានប្រទេសកម្ពុជា ឲ្យប្រឈមមុខនឹងគ្រោះកើតជម្ងឺគ្រុនឈាម និងគ្រុនចាញ់មិនឈប់ឈរ។ នៅកំឡុងឆ្នាំនេះ ចាប់ពីខែដើមខែមករា រហូតមកទល់នឹងខែមេសានេះ មានករណីកុមារកើតមានជម្ងឺគ្រុនឈាម និងបានសម្លាប់កុមារអស់ជាច្រើននាក់ផងដែរ។ មន្ត្រីជាន់ខ្ពស់ក្រសួងសុខាភិបាល បានព្រមានថា ស្ថានការណ៍រីករាលដាលនៃជម្ងឺគ្រុនឈាមនៅកម្ពុជា ដើមឆ្នាំ២០១២ នេះ គឺកំពុងស្ថិតនៅក្នុងកម្រិតប្រកាសអសន្ន និងគួរឲ្យព្រួយបារម្ភជាខ្លាំង។
មន្ត្រីជាន់ខ្ពស់ក្រសួងសុខាភិបាល កាលពីថ្ងៃទី១៦ ខែមេសា ឆ្នាំ២០១២ បានឲ្យដឹងថា នៅក្នុងរយៈពេល ១៤សប្ដាហ៍ ដើមឆ្នាំ២០១២ នេះ ជម្ងឺគ្រុនឈាមបានសម្លាប់កុមារចំនួន ៨នាក់ និងមានកុមារកើតជម្ងឺគ្រុនឈាមចំនួន១.០៦៤នាក់។ បើប្រៀបធៀបទៅនឹងឆ្នាំ២០១១ កន្លងទៅ នៅក្នុងរយៈពេលដូចគ្នានេះ ជម្ងឺគ្រុនឈាមបានសម្លាប់កុមារចំនួន ៤នាក់ និងមានកុមារកើតជម្ងឺនេះចំនួន៣៣៩នាក់ គឺមានន័យថា ជម្ងឺគ្រុនឈាមបានកើនឡើងច្រើនជាងឆ្នាំ២០១១ ស្មើនឹងចំនួន៣០៣%។ នេះបើយោងតាមសារពត៌មានអាស៊ីសេរី។
ក្រសួងសុខាភិបាលកំពុងតែចាប់ផ្ដើមដំណើរការចែកថ្នាំអាប៊េត (Abet) ជូនប្រជាពលរដ្ឋនៅតាមខេត្តក្រុងនានា ដោយមិនយកកម្រៃនោះទេ ដើម្បីដាក់ក្នុងពាងទឹកសម្លាប់ដង្កូវទឹក ដែលកើតជាមូសខ្លាញីខាំនាំឲ្យកុមារកើតជម្ងឺគ្រុនឈាមនោះ។ ក្រសួងសុខាភិបាលកំពុងតែត្រៀមថ្នាំអាប៊េតចំនួនជាង១៧០តោន នៅឆ្នាំ២០១២ នេះ គឺកើនជាងឆ្នាំ២០១១ កន្លងទៅនេះ នៅគ្រាដែលស្ថានការណ៍ជម្ងឺគ្រុនឈាមកំពុងតែរីករាលដាលខ្លាំង។
ប្រធានមជ្ឈមណ្ឌលជាតិប្រយុទ្ធនឹងជម្ងឺគ្រុនចាញ់នៃក្រសួងសុខាភិបាល លោក ច ម៉េងចួ បានមានប្រសាសន៍ថា ក្រសួងសុខាភិបាលកំពុងតែធ្វើអន្តរាគមន៍ជាបន្ទាន់ ដើម្បីទប់ស្កាត់ការរីករាលដាលយ៉ាងឆាប់រហ័សនេះ៖ «យើងបានឆ្លើយ តបនឹងសភាពការណ៍នេះតាំងពីដើមទីមក។ យើងបានសហការជាមួយនឹងអង្គការដៃគូ ក្រសួងអង្គភាពពាក់ព័ន្ធ និងអាជ្ញាធរមូលដ្ឋាន គឺថាទី១ ផ្សព្វផ្សាយជាសាធារណៈសញ្ញាហានិភ័យ ដូចបានជម្រាបខាងលើហ្នឹង តាំងពីពាក់កណ្ដាលខែកុម្ភៈ មក»។ សូមបញ្ជាក់ថា រដូវជម្ងឺគ្រុនឈាម គឺភាគច្រើនកើតមាននៅកម្ពុជាចាប់ពីខែឧសភា ដល់ខែតុលា។ លោក ច ម៉េងចួ ក៏បានមានប្រសាសន៍បន្ថែមថា រោគសញ្ញានៃជម្ងឺគ្រុនឈាម គឺធ្វើឲ្យកុមារក្ដៅខ្លួនជិត ៤០អង្សាសេ និងមានកន្ទួលក្រហមនៅលើស្បែក ដូច្នេះអាណាព្យាបាលទាំងឡាយត្រូវតែប្រញាប់ប្រញាល់នាំអ្នកជម្ងឺទៅពិនិត្យ និងព្យាបាលនៅឯមន្ទីរពេទ្យ និងហាមប្រើថ្នាំអាស្ពីរីន (Aspirin) ដែលអាចបង្កគ្រោះថ្នាក់ដល់ជីវិតកុមារ។
យោងតាមរបាយការណ៍របស់ក្រសួងសុខាភិបាល បានឲ្យដឹងថា នៅក្នុងរយៈពេល ១៤សប្ដាហ៍ដើមឆ្នាំ២០១២ នៅខេត្តកណ្តាល មានកុមារកើតជម្ងឺគ្រុនឈាមចំនួន ២២៥នាក់ ស្លាប់ម្នាក់ ប្រៀបធៀបឆ្នាំ២០១១ មានកុមារកើតជម្ងឺគ្រុនឈាមចំនួនតែ៥៤នាក់ និងស្លាប់ម្នាក់តែប៉ុណ្ណោះ។ រីឯនៅរាជធានីភ្នំពេញ មានកុមារកើតជម្ងឺគ្រុនឈាមចំនួន ២០៧នាក់ និងស្លាប់ ២នាក់ ប្រៀបធៀបឆ្នាំ២០១១ កន្លងទៅ មានកុមារកើតជម្ងឺគ្រុនឈាមចំនួន ១០៤នាក់ និងគ្មានអ្នកស្លាប់នោះទេ។ ក្រៅពីនេះ នៅដើមឆ្នាំ២០១២ នេះផងដែរ មានកុមារកើតជម្ងឺគ្រុនឈាមនៅខេត្តកំពង់ចាម ចំនួន ១៣៧នាក់ និងនៅខេត្តបន្ទាយមានជ័យ មានកុមារកើតជម្ងឺគ្រុនឈាមចំនួន ១២៧នាក់ ស្លាប់ ២នាក់ និងខេត្តកំពង់ស្ពឺ មានកុមារកើតជម្ងឺគ្រុនឈាមចំនួន ១២៥នាក់។
កាលពីថ្ងៃទី ១០ មិថុនា ឆ្នាំ២០១១ ក្រុមហ៊ុនផលិតឱសថ Sanofi Aventis បានអះអាងថា បានរកឃើញថ្នាំបង្ការប្រឆាំងនឹងជម្ងឺគ្រុនឈាម ដែលនឹងអាចធ្វើចរាចរណ៍នៅលើទីផ្សារ នៅឆ្នាំ២០១៥ខាងមុខ។ ប្រសិនបើប្រសិទ្ធិភាពនៃថ្នាំវ៉ាក់សាំងនេះ ត្រូវបានគេទទួលស្គាល់ជាផ្លូវការ វានឹងអនុញ្ញាតឲ្យគេសង្គ្រោះជីវិតមនុស្សបានជាច្រើនរយពាន់នាក់។
បើតាមអង្គការសុខភាពពិភពលោក បានឲ្យដឹងថា ជម្ងឺគ្រុនឈាម បានបង្កឲ្យមានអ្នករងគ្រោះប្រមាណ ៥០០ ០០០ នាក់ក្នុងមួយឆ្នាំៗ ដែលភាគច្រើនជាកុមារ។ ជាងនេះទៅទៀត នៅលើផែនដីយើងនេះ មានមនុស្សប្រមាណជាងពីរពាន់លាននាក់កន្លះ ដែលរស់នៅក្នុងតំបន់គ្រោះថ្នាក់ ងាយនឹងទទួលឆ្លងជម្ងឺគ្រុនឈាមនេះ (ជាពិសេសអ្នករស់នៅតាមតំបន់ត្រូពិក នៃទ្វីបអាមេរិក និងទ្វីបអាស៊ីប៉ាស៊ីហ្វិក)។
ចំណែកក្រសួងសុខាភិបាលកម្ពុជាត្រូវការថវិកាចំនួនជាង ២លានដុល្លារអាមេរិកក្នុងមួយឆ្នាំៗ ដើម្បីចំណាយលើយុទ្ធនាការទប់ទល់ការរីករាលដាលនៃជម្ងឺគ្រុនឈាមនេះ។
អត្តបទដោយ ៖ សៀង វិរៈ
ចេញផ្សាយ ៖ ថ្ងៃទី ១៧ មេសា ឆ្នាំ ២០១២
Leave a Reply