រាករូសអាចជាមូលហេតុនៃជម្ងឺមួយដ៏កាចសាហាវ ហើយដែលលោកអ្នកមួយចំនួនពុំមានការចាប់អារម្មណ៍ និងយកចិត្ដទុកដាក់នោះឡើយ។ ប៉ុន្ដែវាអាចធ្វើឱ្យអ្នកជម្ងឺស្លាប់បាត់បង់ជីវិតក្នុងរយៈពេលមួយដ៏ខ្លី គឺត្រឹមតែ២ទៅ៣ម៉ោងតែប៉ុណ្ណោះ។ ហើយ រាករូសបែបជម្ងឺអាសន្នរោគជាប្រភេទជម្ងឺឆ្លងដ៏មានគ្រោះថ្នាក់ទៀតផង។ តើជម្ងឺអាសន្នរោគអាចព្យាបាលបានទេ? ផ្ដល់នូវគ្រោះ ថ្នាក់យ៉ាងណា?
ជួបជាមួយលោកវេជ្ជបណ្ឌិត ហ៊យ គឹមហេង អ្នកឯកទេសរោគកុមារនៃមន្ទីរពេទ្យកុមារជាតិ ដែលចូលរួមស្រាយបំភ្លឺអំពី បញ្ហានេះជូនមិត្ដអ្នកអានដើម្បីស្វែងយល់តាមរយៈទស្សនាវដ្ដី សុខភាពយើង។
អាសន្នរោគ ជាអ្វី?
អាសន្នរោគជាជម្ងឺឆ្លងមួយប្រភេទដ៏កាចសាហាវ ដែលអាចឆ្លងពីមនុស្សម្នាក់ទៅមនុស្សម្នាក់ទៀតបានដោយងាយ។ លោក ឡាប៉េសុនអ្នកចិត្ដវិទូបានផ្ដល់និយមន័យថា រាល់ជម្ងឺរាកណាដែលធ្វើឱ្យមានការស្លាប់បាត់បង់ជីវិតក្នុងរយៈពេលត្រឹមតែ២ទៅ៣ម៉ោង នោះ គឺជាជម្ងឺអាសន្នរោគ។
មូលហេតុជម្ងឺអាសន្នរោគ
ជម្ងឺអាសន្នរោគជាជម្ងឺឆ្លងដ៏កាចសាហាវដែលអាចធ្វើឱ្យប៉ះពាល់ទៅដល់ជីវិតមនុស្ស។ ក្នុងនោះផងដែរ វាក៏បណ្ដាលមកពី មូលហេតុចម្បងពីរយ៉ាងដែលធ្វើឱ្យកើតមានជម្ងឺនេះ។
1. មូលហេតុចម្បង គឺបណ្ដាលមកពីការបរិភោគចំណីអាហារដែលមានមេរោគវីប្រ៊ីយ៉ុងកូឡេរិក។
2. ជម្ងឺអាសន្នរោគក៏អាចបណ្ដាលមកពីកត្ដាកង្វះអនាម័យដែរ ដូចជាការមិនបានលាងសម្អាតដៃមុនពេលទទួលទានអា ហារ កង្វះអនាម័យក្នុងការទទួលទាន កង្វះអនាម័យក្នុងការរស់នៅជាដើម។
រោគសញ្ញាជម្ងឺអាសន្នរោគ
អាសន្នរោគបានផ្ដល់នូវរោគសញ្ញាពិសេសមួយចំនួនសម្រាប់ជាការកត់សម្គាល់។
- ដំណាក់កាលដំបូង ៖ មានការហើមពោះ និងបត់ជើងញឹកញាប់។ មានរាកខុសប្លែកពីរាកដទៃច្រើនដង និងសុទ្ធតែទឹក ហើយមានសន្ទុះខ្លាំងដែលខ្មែរយើងនិយមហៅថាបាញ់ដូចទុយយ៉ូទឹក។ សភាពរបស់លាមកមានសណ្ឋានដូចទឹកអង្ករ ហើយមានក្លិន ឆ្អាប។
- ដំណាក់កាលបន្ទាប់ ៖ អ្នកជម្ងឺមានអាការក្អួតចង្អោរខ្លាំងញឹកញាប់។ រាល់អ្វីៗដែលទទួលទានចូលទៅត្រូវក្អួតចេញវិញ ទាំងអស់ ពេលខ្លះក្អួតដោយឯងៗ រហូតដល់មានទឹកកំអួតពណ៌លឿងថែមទៀតផង។ សញ្ញាទាំងពីរនេះតែងដើរទន្ទឹមគ្នាជានិច្ច។
- ដំណាក់កាលចុងក្រោយ ៖ អ្នកជម្ងឺនឹងបង្ហាញនូវរោគសញ្ញាពិសេស (សញ្ញាកង្វះជាតិទឹក) គឺភ្នែកឡើងរូង ត្រជាក់ខ្លួន ចុករោយជើងដៃ ឬសាច់ដុំ និងរហូតដល់សន្លប់បាត់បង់ស្មារតីតែម្ដង។
វិធីព្យាបាលជម្ងឺអាសន្នរោគ
ប្រការសំខាន់បំផុត ត្រូវបញ្ជូនអ្នកជម្ងឺទៅកាន់មន្ទីរពេទ្យជាបន្ទាន់ ព្រោះជម្ងឺអាសន្នរោគអាចធ្វើឱ្យលោកអ្នកស្លាប់តែក្នុង រយៈពេលត្រឹមតែ២ទៅ៣ម៉ោងតែប៉ុណ្ណោះ។ ជាធម្មតា រាកនឹងធ្វើឱ្យអ្នកជម្ងឺបាត់បង់ជាតិទឹកច្រើនពីក្នុងខ្លួន។ ដូចនេះនៅពេលមាន រោគសញ្ញាណាមួយនៃជម្ងឺអាសន្នរោគ ត្រូវឱ្យអ្នកជម្ងឺទទួលទានទឹកឱ្យបានច្រើន និងញឹកញាប់ដើម្បីបង្គ្រប់ជាតិទឹកដែលបាត់បង់ទៅ នោះ។
ប្រការគួរប្រតិបត្ដិ ពេលកើតអាសន្នរោគ
មានប្រការមួយចំនួនដែលលោកអ្នកគួរប្រតិបត្ដិឱ្យបានខ្ជាប់ខ្ជួនដើម្បីចៀសវាងការចម្លងនៃជម្ងឺអាសន្នរោគ ជាពិសេសនៅ ពេលមានការរាតត្បាតជម្ងឺអាសន្នរោគ។
- ត្រូវផ្ដល់ជាតិទឹកឱ្យអ្នកជម្ងឺឱ្យបានគ្រប់គ្រាន់ដើម្បីចៀសវាងបញ្ហាកង្វះជាតិទឹកនៅក្នុងខ្លួន
- អ្នកជម្ងឺត្រូវបន្ទោរបង់ក្នុងបង្គន់ឱ្យបានត្រឹមត្រូវ
- មិនត្រូវប្រើប្រាស់របស់រួមគ្នាជាមួយអ្នកជម្ងឺ ពិសេសមិនត្រូវទទួលទានចំណីអាហារដែលសល់ពីអ្នកជម្ងឺ។
វិធីបង្ការជម្ងឺអាសន្នរោគ
ជម្ងឺអាសន្នរោគកើតឡើងដោយមេរោគវីប្រ៊ីយ៉ុងកូឡេរិកដែលមាននៅលើចំណីអាហារពុំមានអនាម័យត្រឹមត្រូវ។ ដូចនេះ ដើម្បីបង្ការកុំឱ្យកើតមានជម្ងឺនេះឡើង លោកអ្នកគួរធ្វើអនាម័យឱ្យបានល្អ ដូចជាអនាម័យខ្លួនប្រាណ បរិស្ថាន ចំណីអាហារជាដើម ជាពិសេសអនាម័យចំណីអាហារតែម្ដង។
អនាម័យខ្លួនប្រាណ ៖ ត្រូវលាងសម្អាតខ្លួនប្រាណឱ្យបានស្អាត ពិសេសគឺដៃ មុននឹងចាប់កាន់របស់ ឬចំណីអាហារ និងក្រោយពេលបន្ទោរបង់រួច។
អនាម័យបរិស្ថាន ៖ សម្អាតបរិវេណផ្ទះឱ្យបានស្អាត កុំឱ្យមានភក់ជ្រាំ សម្រាម។ គួរធ្វើបង្គន់ឱ្យបានត្រឹមត្រូវ សូមបន្ទោរ បង់ក្នុងបង្គន់អនាម័យ ចៀសវៀងការបន្ទោរបង់ពាសវាលពាសកាលដែលជាឱកាសក្នុងការចម្លងជម្ងឺ។
អនាម័យចំណីអាហារ ៖ ចំណីអាហារត្រូវចម្អិនឱ្យឆ្អិនល្អ និងគ្របទុកឱ្យមានរបៀប កុំឱ្យរុយរោម ព្រោះរុយជាកត្ដាចម្លង មេរោគសំខាន់បំផុត។ ចំណែកឯទឹកក៏ដូចគ្នាដែរ ត្រូវដាំឱ្យបានឆ្អិនល្អមុននឹងបរិភោគ និងត្រូវដឹងថាទឹកនោះមានប្រភពមកពីណា ហើយបរិវេណជំរុញទឹកនោះមានអនាម័យដែរឬទេ?
បច្ចុប្បន្នដោយសារការយល់ដឹងច្រើនអំពីសុខភាព និងការថែរក្សាបរិស្ថានមានកម្រិតប្រសើរធ្វើឱ្យការរីករាលដាលនៃជម្ងឺ អាសន្នរោគត្រូវបានកាត់បន្ថយ និងស្ទើរតែពុំមានសោះសម្រាប់អ្នករស់នៅទីក្រុង ឬទីប្រជុំជនធំៗ។ ប៉ុន្ដែក៏នៅមានប្រទេសមួយចំនួន នៅលើពិភពលោកនៅតែជួបប្រទះនូវបញ្ហានេះ។
ដំបូន្មានអ្នកប្រឹក្សា
ជម្ងឺអាសន្នរោគបង្កគ្រោះថ្នាក់យ៉ាងធ្ងន់ធ្ងរចំពោះជីវិតរបស់លោកអ្នក។ ដូចនេះសូមលោកអ្នកប្រញាប់ប្រញាល់ទៅកាន់ មន្ទីរពេទ្យដើម្បីទទួលយកការព្យាបាលជាបន្ទាន់។ ម្យ៉ាងទៀតសូមលោកអ្នកជ្រាបថាជម្ងឺអាសន្នរោគនេះជាជម្ងឺឆ្លង ហើយអាចចម្លង ពីមនុស្សម្នាក់ទៅមនុស្សម្នាក់ទៀតបានដោយងាយ។ សូមលោកអ្នករស់នៅមានអនាម័យដើម្បីបញ្ចៀសពីការចម្លងនៃជម្ងឺអាសន្ន រោគ។
ប្រភព ៖ ទស្សនាវដ្តី សុខភាពយើង លេខ០១៥ ខែមេសា ឆ្នាំ២០០៧
Leave a Reply