ក្រុមអ្នកជំនាញបានសម្ដែងក្ដីព្រួយបារម្ភកាន់តែខ្លាំងឡើង ចំពោះជម្ងឺមហារីកមាត់ស្បូន បន្ទាប់ពីអត្រាស្លាប់បានកើនឡើងដល់ទៅ៤១ភាគរយនៅក្នុងឆ្នាំ២០១០នេះ។
លោកវេជ្ជបណ្ឌិត អ៊ាវ សុខា ឯកទេសផ្នែកជម្ងឺមហារីកមាត់ស្បូនបានប្រាប់ទស្សនាវដ្ដី សុខភាពយើង ថា “បញ្ហាអ្នកស្លាប់ ដោយជម្ងឺមហារីកមាត់ស្បូន គឺជាករណីមួយដែលគួរឱ្យព្រួយបារម្ភ និងយកចិត្ដទុកដាក់បំផុតទៅលើអ្នកជម្ងឺ ព្រោះបច្ចុប្បន្ននេះ កង្វះ ខាតនូវឧបករណ៍បច្ចេកទេសគឺជាកត្ដាដែលនាំឱ្យមានការកើនឡើងនូវចំនួនអ្នកស្លាប់ដោយសារជម្ងឺប្រភេទនេះ។ លោកនិយាយថា បច្ចុប្បន្ននេះ មន្ទីរពេទ្យមិត្ដភាពខ្មែរ-សូវៀតមានឧបករណ៍ទំនើបតែមួយប៉ុណ្ណោះសម្រាប់ពិនិត្យ និងព្យាបាលអ្នកជម្ងឺមហារីកមាត់ ស្បូន ដូច្នេះលទ្ធភាពដែលយើងអាចទទួលអ្នកជម្ងឺបានគឺមានចំនួនប្រហែលតែ១ពាន់នាក់ប៉ុណ្ណោះ”។
បើតាមការប៉ាន់ប្រមាណ ស្ដ្រីកម្ពុជាដែលកើតជម្ងឺមហារីកមាត់ស្បូនមានចំនួនប្រមាណ១ម៉ឺននាក់ក្នុងពេលបច្ចុប្បន្ន ប៉ុន្ដែបើ យោងតាមរបាយការណ៍របស់មន្ទីរពេទ្យមិត្ដភាពខ្មែរ-សូវៀតនៅក្នុងរយៈពេល១១ខែដើមឆ្នាំ២០១០នេះ ចំនួនអ្នកឈឺមានប្រមាណ ១៥០០នាក់ ក្នុងនោះអត្រាស្លាប់មាន៤១ភាគរយ។ ចំនួននេះបើធៀបនឹងឆ្នាំ២០០៩រយៈពេលដូចគ្នា ករណីឈឺមានការកើនឡើងចំនួន ៦០នាក់ រីឯអត្រាស្លាប់បានកើនឡើង១ភាគរយ។ លោក អ៊ាវ សុខា បញ្ជាក់ថា : “គិតជាមធ្យមស្ដ្រីដែលកើតជម្ងឺនេះមានអាយុចាប់ពី ៤៨-៥៦ឆ្នាំ ចំណែកស្ដ្រីដែលបានស្លាប់ដោយសារជម្ងឺនេះ គឺមានអាយុ៥១ឆ្នាំឡើងទៅ”។
ពាក់ព័ន្ធនឹងបញ្ហានេះ រដ្ឋាភិបាលកម្ពុជាគ្រោងនឹងបង្កើតអគារមន្ទីរពេទ្យព្យាបាលជម្ងឺមហារីកទូទៅនៅទីក្រុងភ្នំពេញ ដើម្បី ផ្ដល់សេវាព្យាបាលទៅកាន់មហាជនឱ្យបានទាន់ពេលវេលា ខណៈដែលការព្យាបាលនៅតាមមន្ទីរពេទ្យរដ្ឋក្នុងពេលបច្ចុប្បន្ននេះ នៅ មានកម្រិតក្នុងការទទួលបានអ្នកជម្ងឺតិច។
លោកវេជ្ជបណ្ឌិត អ៊ាវ សុខា បានបន្ដថា វិស្វករគូសប្លង់ទាំងបីក្រុមដែលបានមកពីប្រទេសអឺរ៉ុប អាស៊ី និងកម្ពុជាផងនោះ កំពុងពិភាក្សាដើម្បីធ្វើឱ្យមន្ទីរពេទ្យនេះក្លាយទៅជាកន្លែងដែលរឹងមាំ និងមានស្ដង់ដារ។ លោកបន្ដថា : “មកដល់សព្វថ្ងៃនេះ យើង នៅមិនទាន់មានមន្ទីរពេទ្យព្យាបាលជម្ងឺផ្នែកមហារីកឱ្យបានធំដុំដាច់ដោយឡែកតែឯងនៅឡើយទេ គឺមានតែមន្ទីរពេទ្យរុស្សីដែល មានសមត្ថភាពទទួលអ្នកជម្ងឺនៅមានកម្រិត។ ដូច្នេះថ្នាក់ដឹកនាំនៃក្រសួងសុខាភិបាលបានសម្រេចបង្កើតឱ្យមានអគារនេះ គឺដើម្បីផ្ដល់ សេវាផ្នែកជម្ងឹមហារីកឱ្យបានទាន់ពេលវេលាទៅដល់ប្រជាជន ដោយផ្ដោតយ៉ាងសំខាន់ទៅលើជម្ងឺមហារីកទូទៅ ដែលមានមហារីក មាត់ស្បូន២៥ភាគរយ មហារីកដោះមាន១៩ភាគរយ និងមហារីកត្រចៀក បំពង់ក ច្រមុះ១៦ភាគរយ ក្នុងចំណោមជម្ងឺមហារីកទាំង អស់ដែលធ្លាប់ជួបប្រទះ។
គម្រោងសាងសង់អគារមន្ទីរពេទ្យឯកទេសផ្នែកជម្ងឺមហារីកទូទៅកំពុងចាប់ផ្ដើមសិក្សានៅក្នុងខែធ្នូឆ្នាំ២០១០នេះ ប៉ុន្ដែអ្នក ឯកទេសបានប៉ាន់ប្រមាណថា អគារនេះអាចនឹងត្រូវសង់ចប់ជាស្ថាពរនៅក្នុងឆ្នាំ២០១២ខាងមុខនេះ ហើយអាចចាប់ផ្ដើមដំណើរការ នៅឆ្នាំ២០១៣-២០១៤។
ប្រភព ៖ ទស្សនាវដ្តី សុខភាពយើង លេខ០៦០ ខែមករា ឆ្នាំ២០១១
Leave a Reply