អលង្ការជាគ្រឿងលម្អសម្រាប់តុបតែងខ្លួនមានគុណប្រយោជន៍ជួយបង្កើតសោភ័ណភាពបានមួយកម្រិត។ ប្រសិនបើគ្រឿងអលង្ការធ្វើឡើងពីលោហៈធាតុមានតម្លៃដូចជាមាស បា្លទីន ស្ពាន់ ប្រាក់ជាដើម មិនសូវមានប្រតិកម្មនៅលើស្បែកប៉ុន្មានទេ។ ប៉ុន្ដែ បើផលិតឡើងពីលោហៈធាតុមួយចំនួនទៀត ដូចជានីកែលក្រូម ឬក្រូមេដែលស្រោបពីលើគ្រឿងអលង្ការក្រឡៃទោះជាពណ៌ស ឬ ពណ៌ក្រហមក៏ដោយ សុទ្ធតែអាចមានប្រតិកម្ម។ ប្រតិកម្មនៅលើស្បែកដោយសារគ្រឿងអលង្ការជួនកាលអាចបណ្ដាលឱ្យក្លាយទៅ ជាដំបៅរ៉ាំរ៉ៃក៏មាន។
បញ្ហាផ្សេងៗដែលបណ្ដាលមកពីគ្រឿងអលង្ការ លោកអ្នកនឹងបានទទួលជ្រាបតាមរយៈការបកស្រាយរបស់លោកវេជ្ជប ណ្ឌិត ថៃ គាអ្នកឯកទេសជម្ងឺសើស្បែក និងកាមរោគតាមរយៈ ទស្សនាវដ្ដី សុខភាពយើង។
គ្រឿងអលង្ការបង្កប្រតិកម្មលើស្បែក
មិនមែនតែគ្រឿងអលង្ការដែលមានដូចជាក្រវិល ខ្សែក ខ្សែដៃ ឬចិញ្ចៀនប៉ុណ្ណោះទេដែលអាចបង្កប្រតិកម្មជាមួយស្បែក សូម្បីតែនាឡិកា ខ្សែអាវទ្រនាប់ ឡេវអាវ ឬក្បាលខ្សែក្រវាត់ក៏អាចបង្កប្រតិកម្មដែរ។ ការបង្កប្រតិកម្មឬគ្មានក៏អាស្រ័យមួយចំណែកធំទៅលើប្រភេទស្បែករបស់អ្នកដែលប្រើប្រាស់ផងដែរ។ ប្រតិកម្មនៅលើស្បែកនេះ ពាក្យបច្ចេកទេសហៅឈ្មោះថាអ៊ិចសេម៉ា ដឺកុងតាក់ ដែលចែកចេញជាពីរប្រភេទទៀត។
- ប្រតិកម្មលើស្បែកដែលចេញពីក្នុងរាងកាយដោយសារចំណីអាហារ ឬការប្រើប្រាស់ឱសថមួយចំនួន
- ប្រតិកម្មលើស្បែកដោយសារសារធាតុដែលប៉ះពាល់ពីខាងក្រៅបង្កើតបានជាកន្ទួលរមាស់នៅលើស្បែក ជួនកាលអាចក្លាយជាពងទឹកបើព្យាបាលមិនទាន់ពេលវេលាទេ។
សញ្ញាណប្រតិកម្មលើស្បែក
ជារឿងងាយស្រួលបំផុតក្នុងការសម្គាល់ស្បែកដែលមានប្រតិកម្ម ព្រោះវាស្ដែងចេញជាអាការៈរមាស់ ឬកន្ទួលក្រហមនៅ ត្រង់កន្លែងដែលមានគ្រឿងអលង្ការ អាចមើលនឹងភ្នែកទទេបាន។ ជួនកាលអាការៈបែបនេះអាចធ្វើឱ្យលោកអ្នកច្រឡំជាមួយអាការៈ ជម្ងឺមួយចំនួនទៀតដូចជាត្រអក រមាស់សើស្បែកជាដើម។
ប្រការត្រូវធ្វើ ពេលមានប្រតិកម្ម
ប្រសិនបើមានប្រតិកម្មនៅលើស្បែក ជំហានដំបូងលោកអ្នកត្រូវធ្វើ និងត្រូវគិតដល់នោះគឺគ្រឿងអលង្ការទាំងឡាយដែលលោកអ្នកកំពុងលម្អលើរាងកាយ។ ពេលនោះ លោកអ្នកត្រូវដោះវាចេញជាបន្ទាន់ ហើយសូមរួសរាន់ទៅរកគ្រូពេទ្យផ្នែកជម្ងឺសើស្បែក ដើម្បីពិនិត្យ និងវិនិច្ឆ័យរោគ។ លោកអ្នកមិនអាចបណ្ដែតបណ្ដោយទុកយូរបានទេ ព្រោះអាចធ្វើឱ្យស្បែកលោកអ្នកខូចបាន។
ដំបូន្មានអ្នកជំនាញ
សូមលោកអ្នកមានការប្រុងប្រយ័ត្នបន្ដិចក្នុងការជ្រើសរើសគ្រឿងអលង្ការគ្រប់ប្រភេទយកមកលម្អប្រាណ។ បើចង់ស្អាត ដោយការតុបតែងគ្រឿងអលង្ការ សូមជ្រើសរើសយកគ្រឿងអលង្កការណាដែលផ្សំពីមាស ប្លាទីន ប្រាក់ជាដើម នោះស្បែកលោកអ្នក មិនខូចឡើយ។ បើមាន បញ្ហាសូមប្រញាប់ទៅជួបគ្រូពេទ្យជំនាញ។
ប្រភព ៖ ទស្សនាវដ្តី សុខភាពយើង លេខ០១៤ ខែមីនា ឆ្នាំ២០០៧
Leave a Reply