ស្ដ្រីខ្មែរមួយចំនួនមិនទាន់យល់ច្បាស់់ពីឈាមរដូវនៅឡើយទេ។ មានស្ដ្រីវ័យក្មេងខ្លះមិនចង់ឱ្យមានឈាមរដូវទេ ព្រោះគិត ថាជាការងាយស្រួល មិនចាំបាច់រំខានក្នុងការប្រើប្រាស់សំឡីអនាម័យ។ នេះជាការយល់ច្រឡំមួយ។ ជាធម្មជាតិ មនុស្សស្រីចាំបាច់ ត្រូវតែមានឈាមរដូវរហូតដល់អាយុចន្លោះពី៤៥ទៅ៥០ឆ្នាំ ទើបអស់ឈាមរដូវ។ ឈាមរដូវ គឺជាកញ្ចក់មួយឆ្លុះបញ្ចាំងពីសុខភាព របស់ស្ដ្រី។ នៅពេលអស់រដូវ តើសុខភាពស្ដ្រីនឹងជួបបញ្ហាអ្វីខ្លះ?
ដើម្បីស្វែងយល់ពីបញ្ហាអស់រដូវនេះ ទស្សនាវដ្ដី សុខភាពយើង បានជួបសម្ភាសន៍ជាមួយលោកសាស្ដ្រាចារ្យវេជ្ជបណ្ឌិត លៀង ច័ន្ទរិទ្ធ អនុប្រធានមន្ទីរពេទ្យមិត្ដភាពខ្មែរសូវៀត។
ការអស់រដូវ ជាអ្វី?
ការអស់រដូវជារឿងធម្មតារបស់ស្ដ្រីគ្រប់ៗរូប។ នៅពេលឈានចូលដល់វ័យកាន់តែចំណាស់ អូវែរលែងមានដំណើរការដោយឈប់បញ្ចេញអ័រម៉ូនតទៅទៀត មានន័យថាជាការបាត់ឈាមរដូវជារៀងរហូត។ ជាមធ្យម ស្ដ្រីអស់រដូវនៅចន្លោះអាយុពី ៤៥ទៅ ៥០ឆ្នាំ។ ប្រសិនបើស្ដ្រីបាត់រដូវរយៈពេលមួយឆ្នាំហើយ ទើបចាត់ទុកថាពិតជាអស់រដូវមែនទែន។ ប៉ុន្ដែបើស្ដ្រីទើបតែបាត់រដូវពីរខែ ហើយស្រាប់តែមានរដូវមកវិញនោះ មិនអាចចាត់ទុកថាអស់រដូវទាំងស្រុងនោះទេ។
អាការពេលជិតអស់រដូវ
រយៈពេលពី២ទៅ៦ឆ្នាំមុនពេលអស់រដូវ ឈាមរដូវស្ដ្រីធ្លាក់មកមិនទៀងទាត់ដូចពីមុនឡើយ ច្រើនមានការរអាក់រអួល។ នៅពេលមានរដូវម្ដងៗ ជួនកាលមានឈាមរដូវច្រើន ជួនកាលមានតិចៗ។ ឋិតក្នុងដំណាក់កាលនោះ ស្ដ្រីច្រើនមានការប្រែប្រួលទាំង ផ្លូវកាយ និងផ្លូវចិត្ដ ដូចជាធាត់ ឡើងទម្ងន់ ឈឺសុដន់ ហើមពោះ តឹងពោះ ឆាប់ខឹងឆេវឆាវជាដើម។ ពេលខ្លះរឿងបន្ដិចបន្ដួចចាត់ទុក ដូចជារឿងធំ ពិបាកចិត្ដនិងក្រៀមក្រំ។
ផលវិបាកពេលអស់រដូវ
ស្ដ្រីជួបផលវិបាកយ៉ាងច្រើនចំពោះសុខភាពនៅពេលអស់រដូវ ព្រោះស្ដ្រីខ្វះអរ័ម៉ូន។ នៅពេលឆាប់អស់រដូវពេក ស្រី្ដអាច មានបញ្ហា ដូចជាជម្ងឺបេះដូង ឆាប់ពុកឆ្អឹងជាដើម។ ជាទូទៅសញ្ញាណដំបូងនៅពេលអស់រដូវមានដូចជាមានអារម្មណ៍ក្តៅក្រហល់ក្រហាយក្នុងខ្លួន ពេលខ្លះក្រោកងូតទឹកពីរទៅបីដងក្នុងពេលយប់។ អារម្មណ៍ប្រែប្រួលក្លាយជាមនុស្សរញ៉ាំរញ៉ូវច្រើន។ អ្នកខ្លះទៅជាមាន អារម្មណ៍ស្រងូតស្រងាត់ហាក់ដូចជាមានវិបត្ដិផ្លូវចិត្ដ សម្រាន្ដមិនលក់ និងអស់កម្លាំងទោះជាទទួលទានឆ្អែតក៏ដោយ។ ស្រី្ដច្រើនស្ងួត នៅត្រង់ប្រដាប់ភេទ នាំឱ្យមានការឈឺចាប់នៅពេលរួមភេទ។ ដោយឡែកក៏មានស្ដ្រីខ្លះ នៅពេលអស់រដូវមានសុខភាពល្អធម្មតាមិន មានការប្រែប្រួលអ្វីទាំងអស់។
ការព្យាបាលឱ្យមានរដូវឡើងវិញ
ការព្យាបាលត្រូវធ្វើឡើងទៅតាមរោគសញ្ញានិមួយៗរបស់អ្នកជម្ងឺ។ ប្រសិនបើមានអាការដូចរៀបរាប់ខាងលើ ស្ដ្រីគប្បីមក ពិគ្រោះជាមួយគ្រូពេទ្យដើម្បីរករោគសញ្ញាថាតើជម្ងឺរបស់គាត់ពិតជាបណ្ដាលមកពីការអស់រដូវមែនឬទេ។ គ្រូពេទ្យនឹងធ្វើការព្យាបាលទៅតាមប្រភេទជម្ងឺ។ នៅប្រទេសជឿនលឿន គេមានការព្យាបាលធ្វើឱ្យមានរដូវឡើងវិញ ដោយប្រើថ្នាំដែលមានជាតិអរ័ម៉ូន។ ប៉ុនែ្ដការប្រើថ្នាំប្រភេទនេះ អាចផ្ដល់ទាំងផលល្អទាំងផលអាក្រក់ផងដែរ។ ផលល្អ គឺធ្វើឱ្យស្ដ្រីស្រួលខ្លួនជាងមុន សម្រាន្ដលក់ឡើងវិញ និងខ្លួនមិនឡើងកម្ដៅទៀតឡើយ។ ប៉ុន្ដែការព្យាបាលបែបនេះទាមទារឱ្យមានការពិគ្រោះ និងតាមដានសុខភាពជាមួយគ្រូពេទ្យជំនាញឱ្យបានត្រឹមត្រូវ ព្រោះថ្នាំជាអាវុធមុខពីរធ្វើឱ្យមានសុខភាពល្អផង និងផ្ដល់ផលវិបាកចំពោះសុខភាពផង។ ដោយឡែកនៅប្រទេស កម្ពុជាមិនទាន់មានប្រើថ្នាំធ្វើឱ្យមានរដូវឡើងវិញនេះនៅឡើយទេ។ ចំណែកឯផលអាក្រក់ គឺអាចបង្កឱ្យស្ដ្រីមានគ្រោះថ្នាក់បាន។ បើ មានធ្លាក់ឈាមខុសប្រក្រតី ស្ដ្រីក៏ត្រូវប្រញាប់ទៅជួបពិគ្រោះជាមួយគ្រូពេទ្យផងដែរ ព្រោះអាចបណ្ដាលមកពីជម្ងឺផ្សេងៗទៀត ដែល មិនទាក់ទងនឹងការអស់រដូវ ដូចជាជម្ងឺដុំស្បូន មហារីកស្បូនជាដើម។
ប្រការគួរធ្វើនៅក្នុងវ័យអស់រដូវ
1. សកម្មភាពប្រចាំថ្ងៃ
ក្នុងអស់រដូវស្រី្ដអាចប្រតិបត្ដិជារៀងរាល់ថ្ងៃនូវសកម្មភាពធម្មតារបស់ខ្លួន។ ចំពោះស្ដ្រីដែលអស់រដូវហើយមានសុខភាពល្អ ធម្មតា មិនមានអ្វីប្រែប្រួលនោះ មិនអីទេ។ ប៉ុន្ដែស្ដ្រីខ្លះទៀតទទួលរងឥទ្ធិពលខ្លាំងពីការអស់រដូវ ធ្វើឱ្យរំខានយ៉ាងខ្លាំងដល់ការងារប្រ ចាំថ្ងៃ ដូចជាឈឺសន្លាក់ឆ្អឹងដែលត្រូវប្រឈមមុខនឹងការពុកឆ្អឹង និងការអស់កម្លាំងល្ហិតល្ហៃជាដើម។ ដូច្នេះស្ដ្រីគួរប្រយ័ត្នប្រយែងកុំឱ្យ មានការដួលឬប៉ះទង្គិច ព្រោះអាចធ្វើឱ្យឆ្អឹងបាក់បាន។ ចំណែកអ្នកជិតខាងគួរតែមានការអត់ឱនឱ្យគាត់ ប្រសិនបើគាត់មានការជ្រុល ជ្រួសទៅដោយពាក្យសម្ដី ឬកាយវិការក្ដី ព្រោះអារម្មណ៍របស់គាត់ប្រែប្រួលឆាប់ខឹង។
2. ការទទួលទានចំណីអាហារ
ទន្ទឹមការអស់រដូវ ស្ដ្រីត្រូវប្រឈមមុខនឹងជម្ងឺផ្សេងៗជាច្រើនទៀត ដូចជាជម្ងឺលើសឈាម ជម្ងឺមហារីកសុដន់ ជម្ងឺទឹកនោម ផ្អែមជាដើម។ ដូចនេះការទទួលទានអាហារត្រូវមានការប្រយ័ត្នប្រយែង ហើយត្រូវប្រកាន់យកនូវរបបអាហារមួយត្រឹមត្រូវ និងមាន តុល្យភាព។ គួរចៀសវាងនូវការទទួលទានអាហារដែលមានជាតិផ្អែមពេក ប្រៃពេក ឬខ្លាញ់ពេក។ គួរទទួលទានចំណីអាហារណា ដែលសម្បូរដោយវីតាមីន សារជាតិអំបិលខនិជ ជាតិកាល់ស្យូម និងជាតិវីតាមីនដេដែលសម្បូរនៅក្នុងសណ្ដែកសៀង ដើម្បីជំនួយដល់ ឆ្អឹង។
3. ការហាត់ប្រាណ
ការហាត់ប្រាណជាការល្អប្រសើរណាស់សម្រាប់សុខភាពរបស់មនុស្សទូទៅ ក៏ដូចជាស្ដ្រីដែលមានវ័យចំណាស់។ ប៉ុនែ្ដស្ដ្រី មានវ័យចំណាស់មិនអាចហាត់ប្រាណ មិនអាចហក់លោត ឬរត់បានដូចមនុស្សវ័យក្មេងឡើយ។ ការដើរក៏ជាការហាត់ប្រាណមួយដែរ ដែលសមស្របសម្រាប់ស្ដ្រីអស់រដូវ។ ប្រសិនបើរត់ ស្ដ្រីអាចដួល ហើយអាចបាក់ឆ្អឹង ឬមានបញ្ហាផ្សេងជាច្រើនទៀត។
4. គ្រួសារ
នៅក្នុងគ្រួសារ ស្វាមីត្រូវយល់បញ្ហាប្រែប្រួលរបស់ប្រពន្ធ។ ដូចនេះគួរមានការអនុគ្រោះដើម្បីចៀសវាងនូវទំនាស់ដោយប្រ ការណាមួយ។
ដំបូន្មានអ្នកជំនាញ
ដោយរោគសញ្ញាខាងលើ ស្រី្ដទាំងឡាយអាចដឹងថានេះគឺជាបញ្ហាដែលកើតឡើងដោយសារការអស់រដូវ។ ស្ដ្រីចាំបាច់ត្រូវ ទៅពិគ្រោះជាមួយគ្រូពេទ្យជំនាញផ្នែករោគស្ដ្រី ដើម្បីរកការព្យាបាល និងការប្រឹក្សាជាបន្ទាន់ដើម្បីចៀសវាងការអូសបន្លាយពេលយូរ ។ ការសម្រេចចិត្ដប្រើថ្នាំ ឬមធ្យោបាយណាមួយដើម្បីពន្យាររដូវ ត្រូវជួបពិគ្រោះជាមួយគ្រូពេទ្យឯកទេសជាមុនសិន។
ប្រភព ៖ ទស្សនាវដ្តី សុខភាពយើង លេខ០១៣ ខែកុម្ភៈ ឆ្នាំ២០០៧
Leave a Reply