ក្នុងចំណោមជម្ងឺកុមារដែលមានកញ្ជ្រិល គ្រុនស្វិតដៃជើង តេតាណូស ខាន់ស្លាក់ រលាកស្រោមខួរក្បាល ក្អកមាន់ រលាក ថ្លើមប្រភេទបេជាដើម សុទ្ធតែអាចការពារបានដោយការចាក់ថ្នាំការពារ ឬវ៉ាក់ស៊ាំង។ សព្វថ្ងៃនេះ ថ្នាំបង្ការទាំងនេះបានបញ្ចូលទៅ ក្នុងកម្មវិធីជាតិចាក់ថ្នាំបង្ការរបស់ក្រសួងសុខាភិបាលហើយ។ ដោយឡែកជម្ងឺរាកបែរជាមិនអាចការពារបានដោយការចាក់ថ្នាំបង្ការ ទៅវិញ ទោះបីជាជម្ងឺនេះអាចបណ្ដាលឱ្យកុមារស្លាប់នៅក្នុងរយៈពេលខ្លីដូចគ្នាក្ដី។ ជម្ងឺរាកអាចនឹងត្រូវបានព្យាបាលដោយវិធីងាយៗ តែទាមទារបច្ចេកទេសនៅក្នុងការព្យាបាល និងចំណេះដឹងនៅក្នុងការបង្ការ។
លោកស្រីវេជ្ជបណ្ឌិត លឹម ស៊ីវឡាំង ជាគ្រូពេទ្យឯកទេសជម្ងឺកុមារ នៃមន្ទីរពេទ្យកុមារជាតិ សូមបកស្រាយនូវវិធីការពារ ជម្ងឺរាកលើកុមារ។
ជម្ងឺរាក ជាអ្វី?
ជម្ងឺរាក គឺជាការបន្ទោរបង់បែបមិនធម្មតារបស់កុមារ ដែលអាចសម្គាល់ទៅលើលាមកមានលក្ខណៈរាវ ឬមានជាតិទឹក ច្រើនជាងធម្មតា ហើយកុមារជុះ ឬបន្ទោរបង់លើសពី៣ដងក្នុងមួយថ្ងៃ។ ករណីកុមារបៅដោះម្ដាយ ការជុះលើសពី៣ដងអាចជា អាការធម្មតា ទោះបីជាលាមកចេញមកទន់ ឬរាវក៏ដោយ។ កុមារច្រើនរាកចាប់ពីអាយុ៦ខែរហូតដល់ក្រោម២ឆ្នាំ ហើយបរិមាណនៃ លាមកក៏មិនដូចគ្នាដែរ កុមារខ្លះរាកតិច ខ្លះច្រើន តែការរាករបស់កុមារតូច(អាយុតិច)ងាយរងគ្រោះជាងកុមារធំ។
រោគសញ្ញា និងផលវិបាកជម្ងឺរាក
កុមាររាកមានរោគសញ្ញាបឋម គឺលាមកប្រែខុសពីធម្មតា ពីរឹងប្រែជារាវ មានជាតិរំអិល មានលាយឈាមជាដើម ហើយ ជុះញឹកញាប់ជាងសព្វដង គឺលើសពី៣ដងក្នុងមួយថ្ងៃ។ ជួនកាលកុមារស្គមមិនមែនបណ្ដាលមកពីមានជម្ងឺរាកទេ។
ការបន្ទោរបង់ញឹកញាប់ជាហេតុនាំឱ្យកុមារបាត់បង់ជាតិទឹកច្រើន។ ការបាត់បង់ជាតិទឹកច្រើននាំឱ្យកុមារមានសភាពភ្នែក រាងខូង មាត់ស្ងួត អណ្ដាតស្ងួត ស្រេកទឹក ព្រមទាំងពេលចាប់ស្បែកពោះក្ររលាមករកសភាពដើមវិញជាដើម។ បើកុមារខ្វះជាតិទឹក កម្រិតមធ្យម នាំឱ្យមានអាការរញ៉ាំរញ៉ូវ(ខឹងច្រើន)។ ករណីកុមារខ្វះជាតិទឹកក្នុងខ្លួនកម្រិតធ្ងន់ នោះកុមារមានលក្ខណៈសន្លឹម (លែង ចង់កម្រើកដៃជើង)។
មូលហេតុជម្ងឺរាក
អាការរាកអាចបណ្ដាលមកពីមេរោគ ដូចជាបាក់តេរី វីរុស បារ៉ាស៊ីតជាដើម ឬជួនកាលដោយសារកុមារមិនទទួលជាតិស្ករ ក្នុងទឹកដោះគោដែលកុមារបៅ។ ក្មេងក្រោមអាយុ៦ខែដែលបៅតែទឹកដោះម្ដាយមួយមុខគត់ មិនសូវឃើញមានជម្ងឺរាកទេ។ តែកុមារ ដែលបំបៅដោយទឹកដោះគោ អាចមានអាការរាក ហើយទឹកដោះគោខ្លះធ្វើឱ្យកុមារក្ដៅខ្លួនទៀតផង។ ដូច្នេះទើបមានកម្មវិធីអប់រំ ម្ដាយឱ្យបំបៅដោះកូនដោយទឹកដោះម្ដាយតែមួយមុខគត់ ដល់កុមារអាយុក្រោម៦ខែ សូម្បីតែទឹកក៏មិនត្រូវឱ្យដែរ។ ការទទួលទាន ទឹកឆៅ ឬទឹកមិនស្អាតក៏អាចនាំឱ្យកុមាររាកដែរ។ ចំពោះកុមារដែលបំបៅដោយទឹកដោះគោ ករណីមិនបានលាងដបឱ្យបានស្អាត នាំឱ្យ ងាយឆ្លងមេរោគពេលដែលបំបៅ ឬការដែលលាយម្សៅទឹកដោះគោជាមួយនឹងទឹកមិនស្អាត ឬទឹកឆៅក៏អាចបណ្ដាលឱ្យកុមាររាកដែរ ។ ជួនលាយមិនត្រឹមត្រូវតាមកម្រិតកំណត់ ក៏បង្កការរាកដែរ។ កុមារដែលមានដៃមិនស្អាតទៅចាប់កាន់ចំណី បៀមដៃលេង ម្ដាយ បញ្ចុកចំណីកូនដោយចំណីមិនស្អាត ឬមិនមានអនាម័យ នាំឱ្យកុមារងាយឆ្លងជម្ងឺរាក។
វិធីបង្ការជម្ងឺរាក
ជារួមមេរោគអាចឆ្លងចូលក្នុងខ្លួនបានដោយសារកង្វះអនាម័យ ឬការទទួលទានមិនបានត្រឹមត្រូវដែលនាំឱ្យមានអាការពុល ចំណីអាហារ ឬជម្ងឺរាក។ ដើម្បីបង្ការជម្ងឺរាក ត្រូវបង្កើនអនាម័យលើម្ហូបអាហារ និងអនាម័យខ្លួនប្រាណ កុំឱ្យមេរោគឆ្លងចូលក្នុងខ្លួន។ សូមមាតាបំបៅកូនដោយទឹកដោះម្ដាយតែមួយមុខគត់ រាប់តាំងពីពេលកើតរហូតដល់កុមារអាយុ៦ខែ។ វាមានប្រសិទ្ធភាពអាចជួយ កាត់បន្ថយជម្ងឺរាក ព្រោះទឹកដោះម្ដាយមានសុវត្ថិភាព ជាផលិតផលធម្មជាតិដែលមានសារធាតុបំប៉ន និងការពារគ្រប់គ្រាន់ មិនចាំបាច់ កម្ដៅដើម្បីសម្លាប់មេរោគទេ។ ត្រូវទទួលទានតែទឹកឆ្អិន(ទឹកដាំពុះ១០០អង្សាសេ)។
វិធីព្យាបាលជម្ងឺរាក
វិធីព្យាបាលកុមាររាក គឺត្រូវបង្គ្រប់ជាតិទឹកឱ្យកុមារ ដោយការផ្ដល់ទឹកអូរ៉ាលីត ទឹកដូង ទឹកបបរ ទឹកសម្ល ទឹកផ្លែឈើស្រស់ ទឹកឆ្អិន និងបន្ដបំបៅដោះម្ដាយឱ្យបានត្រឹមត្រូវ។ សូមឱ្យកុមារផឹកទឹកអូរ៉ាលីត សម្រាប់បង្គ្រប់ជាតិទឹកក្នុងខ្លួនកុមារ ព្រោះវាមាន ប្រសិទ្ធភាពអាចបង្គ្រប់ជាតិទឹកបានខ្ពស់។ ករណីកុមារអាយុក្រោម៦ខែ ដែលមានជម្ងឺរាក ឬសញ្ញាណខ្វះជាតិទឹក ឪពុកម្ដាយក៏អាចឱ្យ ទឹកអូរ៉ាលីត ហើយបន្ដបំបៅដោះម្ដាយបានដែរ។ ប្រសិនបើកុមាររាកធម្មតាមិនទាន់ចេញជាសញ្ញាណខ្វះជាតិទឹកធ្ងន់ធ្ងរ លោកអ្នកអាច ឱ្យផឹកទឹកអូរ៉ាលីតពី៥០ទៅ១០០មីលីលីត្រ(ចំពោះកុមារនៅតូចអាយុក្រោម២ឆ្នាំ)ក្រោយពីមារជុះម្ដងៗ ដើម្បីបង្ការការខ្វះជាតិ ទឹកធ្ងន់ធ្ងរ។ ករណីឈានដល់ការខ្វះជាតិទឹកធ្ងន់ធ្ងរ កុមារត្រូវតែបង្គ្រប់ជាតិទឹកនៅក្នុងរយៈពេល៤ម៉ោងបន្ទាប់ពីកុមាររាកច្រើនដង។ ករណីកុមារមិនអាចផឹកទឹកបាន ហើយមិនមានកម្លាំង គ្រូពេទ្យព្យាបាលនឹងបញ្ចូលជាតិទឹកតាមសរសៃ(ព្យួរសេរ៉ូម)។ ដូច្នេះ ពេល ដែលលោកអ្នកដឹងថាកុមារមានជម្ងឺរាក គប្បីមានការបង្គ្រប់ជាតិទឹកនៅក្នុងខ្លួនកុមារភ្លាម។
ប្រការគួរចងចាំ
- ឪពុកម្ដាយដែលមានកូនតូចៗ គួរមានការរក្សាទុកថ្នាំកញ្ចប់អូរ៉ាលីតនៅផ្ទះជាប្រចាំ។ ថ្នាំអូរ៉ាលីតមួយកញ្ចប់ត្រូវលាយ ជាមួយនឹងទឹកឆ្អិនមួយលីត្រ។ ថ្នាំអូរ៉ាលីត្រដែលលាយរួចអាចប្រើបានត្រឹមតែ២៤ម៉ោងប៉ុណ្ណោះ បើលើសពី២៤ម៉ោង ត្រូវចាក់ចោល។
- គួរបន្ដការបំបៅដោះកូនឱ្យបានជាប់ជាប្រចាំ ក៏អាចបង្គ្រប់ជាតិទឹកបានដែរ បន្ទាប់ពីទឹកដូង ទឹកបបរ ទឹកផ្លែឈើ ទឹកឆ្អិន ទឹកអូរ៉ាលីតជាដើម។
- ការបញ្ឈប់បំបៅដោះកូន ឬផ្ដល់ចំណីដល់កូន មិនមែនជាមធ្យោបាយដើម្បីព្យាបាលអាការរាកទេ។ ពេលកុមាររាក ឪពុកម្ដាយគួរបង្គ្រប់ជាតិទឹកដោយទឹកអូរ៉ាលិត។ តែបើមានការជុះកាន់តែខ្លាំង មានឈាមក្នុងលាមក ផឹកទឹកមិនបាន ញ៉ាំមិនបាន និង ក្អួត គួរនាំកុមារទៅកាន់មន្ទីរពេទ្យភ្លាម។
- ម្ដាយត្រូវបំបៅដោះកូនតែមួយមុខគត់ មិនត្រូវចិញ្ចឹមកូនដោយទឹកដោះគោទេ នៅពេលកុមារអាយុក្រោម៦ខែ សូម្បីតែ ទឹកក៏មិនចាំបាច់ឱ្យដែរ។
- ពេលក្មេងធំជាង៦ខែ ម្ដាយអាចឱ្យអាហារបន្ថែម និងគួរមានអនាម័យឱ្យបានខ្ពស់ រាល់ពេលបញ្ចុកចំណីអាហារដល់កូន។
- ត្រូវចេះសង្កេតមើលសញ្ញាធ្ងន់ធ្ងរលើកុមាររាក ការពារគ្រោះថ្នាក់ធ្ងន់ធ្ងរដែលពិបាកនៅក្នុងការព្យាបាល។
ដំបូន្មានអ្នកជំនាញ
សូមយកចិត្ដទុកដាក់នៅក្នុងការធ្វើអនាម័យលើម្ហូបអាហារ ដោយមិនត្រូវទុកដាក់ចំណីអាហារចោលឱ្យរុយរោមនោះទេ ត្រូវមានឧបករណ៍សម្រាប់គ្របចំណីអាហាររបស់កុមារឱ្យមានសុវត្ថិភាព។ មិនត្រូវបញ្ចុកចំណីអាហារដែលជូរផ្អូម ឬខូចគុណភាពដល់ កុមារ។ មុននឹងបញ្ចុកចំណីអាហារឱ្យកូន ត្រូវលាងសម្អាតដៃឱ្យបានស្អាតជាមុនសិន។
ប្រភព ៖ ទស្សនាវដ្តី សុខភាពយើង លេខ០១៣ ខែកុម្ភៈ ឆ្នាំ២០០៧
Leave a Reply