អាវទ្រនាប់ជាកម្មសិទ្ធផ្ដាច់មុខរបស់ស្ដ្រី។ ការពាក់អាវទ្រនាប់ជារឿងសាមញ្ញរបស់មនុស្សស្រី។ ហើយនៅពេលបច្ចុប្បន្ន នេះទៀតសោត មានអាវទ្រនាប់ច្រើនប្រភេទណាស់ដែលដាក់លក់នៅលើទីផ្សារ។ នេះជាបញ្ហារបស់នារី តើត្រូវជ្រើសរើសអាវ ទ្រនាប់បែបណាដើម្បីឱ្យសក្ដិសមនឹងសុដន់របស់ខ្លួន។
សូមជ្រាបជាមួយទស្សនាវដ្ដី សុខភាពយើង តាមរយៈការបកស្រាយរបស់លោកស្រីវេជ្ជបណ្ទិត ជូ ពិន អ្នកឯកទេសសុដន់ សាស្ដ្រ និងរោគស្ដ្រី នៃមន្ទីរពេទ្យកាល់ម៉ែតស្ដីពីការជ្រើសរើសអាវទ្រនាប់ និងវិធីពាក់អាវទ្រនាប់។
អាវទ្រនាប់ ជាអ្វី?
អាវទ្រនាប់ជាសម្ភារៈសម្រាប់ទ្ររក្សាសុដន់មិនឱ្យធ្លាក់យារ ឬរយាក ដោយសារស្ថានភាពនៅពេលឈរ អង្គុយ ឬក៏ធ្វើពល កម្មជាដើម។ ក្រៅពីនេះអាវទ្រនាប់ជួយបង្កឱ្យរូបរាងសុដន់ទាំងពីរសមរម្យ។ ពេលខ្លះ គេប្រើអាវទ្រនាប់ជាគ្រឿងលើកសម្រស់ផង ដែរ។
របៀបជ្រើសរើសអាវទ្រនាប់
មានមតិខ្លះយល់ថា បើសិនជាមានសុដន់ស្អាត និងតឹងណែនល្អហើយ មិនចាំបាច់ពាក់អាវទ្រនាប់ទ្បើយ។ តាមពិតពាក់អាវ ទ្រនាប់ គឺមានប្រយោជន៍បំផុត ម្ល៉ោះហើយគួរតែប្រើអាវទ្រនាប់តាំងពីសុដន់ទើបចាប់ផ្ដើមរីកលូតលាស់។ ប៉ុន្ដែមិនត្រូវពាក់អាវ ទ្រនាប់រឹបសុដន់ទាំងពីរឱ្យតឹងចង្អៀតពេកទេ ព្រោះវាធ្វើឱ្យស្ទះចលនាឈាមរត់ទៅចិញ្ចឹមសុដន់។ ផ្ទុយមកវិញក៏មិនត្រូវពាក់អាវទ្រនាប់រលុងពេកដែរ ព្រោះអាចធ្វើឱ្យសុដន់ធ្លាក់យារដោយសារទម្ងន់របស់វាផ្ទាល់។ អាវទ្រនាប់ល្អត្រូវរក្សាសុដន់ទាំងពីរឱ្យនៅទីតាំង ធម្មជាតិ មិនត្រូវរឹបពេក និងមិនត្រូវរលុងពេកដែរ។ ពីព្រោះថាបើសរសៃភ្ជាប់សុដន់យឺតយា ជាហេតុអាចឱ្យសុដន់ធ្លាក់រយាក។ អាវ ទ្រនាប់មិនត្រូវដេរដោយក្រណាត់ក្រាស់ និងមិនត្រូវរឹងពេកទេ ពីព្រោះអាចបង្កឱ្យរលាកស្បែក និងបង្ករោគបាន។ សុភាពនារីគួរតែ ជ្រើសរើសប្រើប្រាស់ប្រភេទក្រណាត់កប្បាសទន់ ដើម្បីងាយស្រួលបឺតញើស។ នៅពេលយប់ មិនគួរពាក់អាវទ្រនាប់ទេ។
វិធីពាក់អាវទ្រនាប់
ការពាក់អាវទ្រនាប់ចាប់ផ្ដើមទ្បើងដោយស៊កដៃខាងមុខ ពុំមែនដាក់ទំពក់ខាងមុខ ហើយទើបបង្វិលទៅខាងក្រោយ រួច ស៊កដៃទាំងពីរចូលក្នុងខ្សែអាវនោះទេ។ សូមសាកល្បងពិនិត្យមើលថាតើការពាក់អាវទ្រនាប់ត្រឹមត្រូវដើម្បីឱ្យសុដន់មានទ្រង់ទ្រាយ ល្អ និងវិធីពាក់អាវទ្រនាប់របស់អ្នកនាងកញ្ញាផ្ទាល់មួយណាប្រសើរជាង។ មានវិធីពាក់អាវទ្រនាប់៥ដំណាក់កាលយកមកជម្រាបជូន។
1. ក្រោយពេលស៊កដៃទាំងពីរចូលទៅក្នុងអាវរួចហើយ គួរចាប់តម្រង់បរិវេណខាងក្រោមអាវទ្រនាប់ ហើយឈ្ងោកមុខ ទៅខាងមុខបន្ដិចដើម្បីឱ្យសុដន់របស់អ្នកធ្លាក់ចូលក្នុងរង្វង់អាវទ្រនាប់បានស៊ប់ល្អ។
2. លុះបិតទំពក់អាវរួចហើយ(គួរបិតទំពក់ខាងក្រៅបំផុត) យកដៃម្ខាងចាប់បង្ហើបខាងក្រោមអាវ ហើយយកដៃម្ខាង ទៀតរុញសាច់សុដន់ដែលនៅសល់ខាងក្រៅឱ្យចូលក្នុងរង្វង់អាវទ្រនាប់។ សូមធ្វើដូចគ្នានេះចំពោះសុដន់ម្ខាងទៀត។
3. សម្រួល ឬតម្រង់សាច់សុដន់ទាំងអស់ឱ្យល្មមជាមួយរង្វង់អាវទ្រនាប់ទាំងសងខាង។
4. រុញតម្រង់សាច់សុដន់ខាងលើឱ្យចូលស៊ប់ក្នុងរង្វង់អាវទ្រនាប់ម្ដងទៀត។
5. យកដៃទាញខ្សែអាវទ្រនាប់ឱ្យត្រូវកន្លែងម្ដងទៀត។ ខ្សែអាវទ្រនាប់គួរយឺតបានប្រមាណ២.៣សង់ទីម៉ែត្រ ហើយទំពក់ សម្រាប់រំកិលខ្សែអាវគួរឃ្លាតឆ្ងាយពីរង្វង់អាវប្រមាណ៥សង់ទីម៉ែត្រ។
ដំបូន្មានអ្នកជំនាញ
នៅពេលជ្រើសរើសទិញអាវទ្រនាប់ ត្រូវផ្ដោតជាសំខាន់ទៅលើគុណភាពដែលមាន ដូចជាប្រភេទសាច់ក្រណាត់ ទំហំសោភ័ណភាព។ ពីព្រោះសុដន់មិនត្រឹមតែមានភារៈសម្រាប់បញ្ចេញទឹកដោះប៉ុណ្ណោះទេ ថែមទាំងជាចំណុចមន្ដស្នេហ៍ទាក់ទាញបំផុតរបស់ ស្ដ្រីទៀតផង។
ប្រភព ៖ ទស្សនាវដ្តី សុខភាពយើង លេខ០១០ ខែវិច្ឆិកា ឆ្នាំ២០០៦
Leave a Reply