កាលណាម្ដាយមានកូនបន្ដបន្ទាប់គ្នាមួយហើយមួយទៀតញឹកពេក ដោយគ្មានរយាលនោះ សុខភាពរបស់គាត់ពិតជាចុះខ្សោយមិនខានទ្បើយ មានកូនមួយមិនទាន់បាត់ហត់ផង ត្រូវពពោះកូនមួយទៀត។ មិនត្រឹមតែសុខភាពម្ដាយទ្រុឌទ្រោមទេ កូនក៏ដូច គ្នាដែរ ព្រោះម្ដាយមិនមានពេលវេលាគ្រប់គ្រាន់ក្នុងការថែទាំកូនៗ។ ការប្រើមធ្យោបាយពន្យារកំណើតដោយប្រើថ្នាំគ្រាប់ ការដាក់ កងក្នុងស្បូន កងដាក់ដៃ និងការពន្យារកំណើតដោយប្រើថ្នាំចាក់រយៈពេលបីខែម្ដង ក៏កំពុងត្រូវបានស្ដ្រីដែលមានការរវល់ក្នុងកិច្ចការ ច្រើនជ្រើសរើសយកមកប្រើ។
កាលពីលេខទី០០៨ សម្រាប់ទំព័រសុខភាពផ្លូវភេទ និងសុខភាពបន្ដពូជ ទស្សនាវដ្ដី សុខភាពយើង បានជម្រាបជូនមក ហើយ អំពីមធ្យោបាយពន្យារកំណើតដោយថ្នាំគ្រាប់លេប។ នៅលេខនេះម្ដងវិញ យើងខ្ញុំសូមលើកយកកិច្ចសម្ភាសន៍ជាមួយលោកស្រី វេជ្ជបណ្ឌិត វង ដាវី ប្រធានគ្លីនិកភ្នំពេញទី២នៃសមាគមថែទាំសុខភាពគ្រួសាររ៉ាក់ ស្ដីពីមធ្យោបាយពន្យារកំណើតដោយថ្នាំចាក់ ជាបន្ដ ទៅទៀត។
ថ្នាំចាក់ពន្យារកំណើត ជាអ្វី?
ថ្នាំចាក់ពន្យារកំណើត ជាថ្នាំដែលផ្សំឡើងដោយជាតិអ័រម៉ូនប្រ៉ូហ្សេស្ទីន ដូចគ្នាទៅនឹងអ័រម៉ូនធម្មជាតិក្នុងខ្លួនស្ដ្រី។ ថ្នាំពន្យា រកំណើតដែលគេប្រើជាញឹកញាប់ ចាក់ម្ដងអាចការពារការមានផ្ទៃពោះបានរយៈពេល៣ខែ។
ជាធម្មតា ការបង្កកំណើតទារកក្នុងផ្ទៃកើតឡើងដោយការភពប្រសព្វរវាងមេជីវិតឈ្មោល(ដែលមានក្នុងទឹកកាមបុរស) ជាមួយនឹងមេជីវិតញី(ដែលបញ្ចេញដោយកន្សោមពងញី)។ បន្ទាប់ពីចាក់ថ្នាំចូលទៅក្នុងខ្លួន ជាតិអ័រម៉ូនដែលមាននៅក្នុងថ្នាំនោះនឹង សាយភាយបន្ដិចម្ដងៗ ចូលទៅក្នុងរាងកាយរបស់ស្ដ្រី ធ្វើឱ្យទឹករំអិលមាត់ស្បូនឡើងខាប់ ដែលអាចរារាំងដល់ការជ្រៀតចូលមេជីវិត ឈ្មោលទៅក្នុងស្បូន។ បន្ថែមពីលើនេះ ជាតិអ័រម៉ូនក៏បានទៅបញ្ឈប់ការខ្ជាក់មេជីវិតញី និងធ្វើឱ្យស្រទាប់ក្នុងរបស់ស្បូនប្រែប្រួល ដែលជាហេតុធ្វើឱ្យការបង្កកំណើតអាចការពារបានប្រហែល៩៩%។ ថ្នាំចាក់ពន្យារកំណើតមានប្រសិទ្ធភាពអាចការពារការមានផ្ទៃ ពោះបានភ្លាមៗ បន្ទាប់ពីបានចាក់រួច។
របៀបប្រើប្រាស់ថ្នាំចាក់ពន្យារកំណើត
ស្ដ្រីអាចចាក់ថ្នាំពន្យារកំណើតបានគ្រប់ពេលទាំងអស់ ឱ្យតែប្រាកដថាគ្មានផ្ទៃពោះ។ ជាទូទៅ ស្ដ្រីអាចចាក់ថ្នាំពន្យារ កំណើតនេះបាន ក្នុងករណីដូចតទៅ។
- ចាប់ពីថ្ងៃមានរដូវទី១រហូតដល់ថ្ងៃទី៧
- ក្រោយសម្រាលភ្លាម បើមិនមានបំបៅដោះកូន
- បន្ទាប់ពី៦សប្ដាហ៍ក្រោយពីសម្រាលដោយមានបំបៅដោះកូន
- ក្នុងកំឡុង៧ថ្ងៃក្រោយរលូត ឬរំលូតដោយគ្មានការក្លាយរោគ(ឆ្លងមេរោគ)
- សូមចាំថាស្ដ្រីត្រូវត្រឡប់មកចាក់ថ្នាំវិញ រៀងរាល់៣ខែម្ដង ដោយពុំចាំបាច់រង់ចាំដល់ពេលមានរដូវឡើយ។
ករណីហាមប្រើប្រាស់ថ្នាំចាក់ពន្យារកំណើត
មិនមែនគ្រប់ស្ដ្រីទាំងអស់សុទ្ធតែអាចប្រើប្រាស់ថ្នាំចាក់ពន្យារកំណើតបាននោះទេ។ ស្ដ្រីមិនអាចទទួលការពន្យារកំណើត ដោយថ្នាំចាក់បានក្នុងករណីមានបញ្ហាសុខភាពមួយចំនួនដូចជា ៖
- ស្ដ្រីដែលសម្រាលកូនមានរយៈពេលតិចជាង៦សបា្ដហ៍
- ស្ដ្រីដែលជក់បារីលើសពី១៥ដើមក្នុងមួយថ្ងៃ
- ស្ដ្រីដែលមានជម្ងឺលើសឈាម ជម្ងឺទឹកនោមផ្អែម ជម្ងឺបេះដូង ជម្ងឺមហារីកសុដន់ ជម្ងឺរលាកថ្លើមសកម្ម(ទាចទឹកធ្ងន់ធ្ងរ) ជម្ងឺប្រកាំង ឬក៏មានរោគសញ្ញាសរសៃប្រសាទ។
សារៈប្រយោជន៍នៃថ្នាំចាក់ពន្យារកំណើត
ថ្នាំចាក់ពន្យារកំណើតសមស្របចំពោះស្ដ្រីពេញវ័យ និងមិនទាន់មានរដូវវិញបន្ទាប់ពីសម្រាលកូនរួច ដែលចង់បានមធ្យោបាយពន្យារកំណើតដែលមានប្រសិទ្ធភាពខ្ពស់។ ស្ដ្រីដែលកំពុងបំបៅដោះកូនមិនអាចប្រើថ្នាំគ្រាប់ពន្យារកំណើត តែអាចប្រើថ្នាំចាក់ ពន្យារកំណើតបាន។ ថ្នាំចាក់ពន្យារកំណើតមានប្រសិទ្ធភាពអាចការពារការមានផ្ទៃពោះបានភ្លាមៗ បន្ទាប់ពីបានចាក់រួច។
- ចាក់ម្ដងការពារការមានផ្ទៃពោះបានរយៈពេល៣ខែ
- មិនរំខានដល់ការរួមរ័ក
- សមស្របចំពោះស្ដ្រីកំពុងបំបៅដោះកូន
- បន្ថយភាពស្លេកស្លាំងរបស់ស្ដ្រី និងបន្ថយអត្រាមហារីកស្បូន កន្សោមពង និងរលាកអាងត្រគាក។
ផលរំខានដែលបង្កដោយថ្នាំចាក់ពន្យារកំណើត
ក្រោយពេលចាក់ថ្នាំពន្យារកំណើត ស្ដ្រីមិនត្រូវការតមអ្វីទាំងអស់ ហើយអាចធ្វើការបានដូចធម្មតា។ ស្ដ្រីគួរប្រាប់ស្វាមី ឬ សមាជិកក្នុងផ្ទះឱ្យជួយចងចាំពេលវេលាថ្ងៃកំណត់ក្នុងការចាក់ថ្នាំលើកក្រោយ។ ស្ដ្រីភាគច្រើនចាក់ថ្នាំពន្យារកំណើតមិនមានផលរំខាន ទេ។ ប៉ុន្ដែស្ដ្រីខ្លះ មានផលរំខានមួយចំនួនដូចជា ៖
- ដោះឡើងតឹង ឈឺដោះ ឈឺក្បាលជាដើម
- ប្រែប្រួលទម្ងន់បន្ដិចបន្ដួច
- ធ្លាក់ឈាមតិចៗចន្លោះរដូវ
- រាំងរដូវនៅក្នុងឆ្នាំដំបូងនៃការប្រើថ្នាំ
ផលរំខានទាំងនេះមិនមែនជារោគសញ្ញានៃជម្ងឺទេ ហើយក៏មិនធ្ងន់ធ្ងរ ឬបណ្ដាលឱ្យប៉ះពាល់ដល់សុខភាពរបស់ស្ដ្រីឡើយ។ ផលរំខានទាំងនេះនឹងបាត់ទៅវិញដោយឯកឯងនៅរយៈពេលក្រោយ។ ប៉ុន្ដែគ្រប់ស្ដ្រីដែលបានចាក់ថ្នាំទាំងអស់ ត្រូវមកមន្ទីរពេទ្យពេល មានសញ្ញាដូចខាងក្រោមនេះ។
- ធ្លាក់ឈាមតាមទ្វារមាសខ្លាំង មានធ្លាក់ឈាមលើសពី១៤ថ្ងៃ
- មានអារម្មណ៍មិនធម្មតា ឬមានបញ្ហានៅកន្លែងចាក់ថ្នាំ
- ចាប់ផ្ដើមឈឺក្បាលធ្ងន់ធ្ងរ
- ឈឺក្បាលខ្លាំង ឬឈឺមួយចំហៀងក្បាល
ក្រៅពីនេះ ស្ដ្រីត្រូវទៅជួបគ្រូពេទ្យតាមពេលណាត់ជួប ដើម្បីទទួលថ្នាំបន្ដនៅ៣ខែក្រោយ។ បើលោកស្រីអ្នកនាងទៅ ទទួលការចាក់ថ្នាំយឺតពេល គ្រូពេទ្យត្រូវធ្វើការពិនិត្យសុខភាពឡើងវិញមុននឹងចាក់ថ្នាំបន្ដ។ ស្ដ្រីទាំងអស់អាចឈប់ចាក់ថ្នាំនៅពេល ណាដែលខ្លួនចងឈប់ប្រើបាន។
ដំបូន្មានអ្នកជំនាញ
ទោះបីជាយ៉ាងណា គ្រប់ស្ដ្រីទាំងអស់មិនត្រូវសម្រេចចិត្ដប្រើប្រាស់ថ្នាំពន្យារកំណើតណាមួយដោយមិនបានទទួលការប្រឹក្សាពីគ្រូពេទ្យជំនាញ និងការពិនិត្យសុខភាពជាមុនទេ។ ព្រោះមានតែការពិនិត្យពិគ្រោះយោបល់ជាមួយគ្រូពេទ្យទេទើបអាចធានាថា លោកស្រីអ្នកនាងមានសុវត្ថិភាពក្នុងការប្រើប្រាស់ថ្នាំពន្យារកំណើត។ កន្លែងដែលធានាដល់ការផ្ដល់សេវាពន្យារកំណើត គឺមន្ទីរពេទ្យ ឬមណ្ឌលសុខភាព។
ប្រភព ៖ ទស្សនាវដ្តី សុខភាពយើង លេខ០០៩ ខែតុលា ឆ្នាំ២០០៦
Leave a Reply