គ្រប់ឆ្អឹងទាំងអស់នៃរាងកាយសុទ្ធតែអាចបាក់បែកបាន នៅពេលដែលមានការប៉ះទង្គិចជាមួយវត្ថុរឹងដោយកម្លាំងខ្លាំង។ ឆ្អឹងប្រៀបដូចជាសសរសម្រាប់ទ្រទ្រង់រាងកាយ បើបាក់ ឬបែកឆ្អឹងធ្វើឱ្យកាយសម្បទាមិនគ្រប់លក្ខណៈ មិនធម្មតា ឬមិនពេញលេញ ដែលអាចហៅបានថាពិការភាព។
ដោយសារការបាក់បែកឆ្អឹងមានច្រើនសណ្ឋាន ទើបយើងខ្ញុំមិនលើកមកជម្រាបជូនមិត្ដអ្នកអានក្នុងពេលតែមួយបានអស់ទេ ។ សម្រាប់លេខនេះ ទស្សនាវដ្ដីសុខភាពយើង សូមលើកយកការបាក់បែកឆ្អឹងមួយប្រភេទ គឺការបាក់ឆ្អឹងដងកាំបិត។ តាមរយៈការជួបសម្ភាសន៍ជាមួយលោកវេជ្ជបណ្ឌិត សុខ ប៊ុនថា អ្នកជំនាញជម្ងឺឆ្អឹង និងបែកបាក់នៅមន្ទីរពេទ្យកាល់ម៉ែត បានឱ្យដឹងថាឆ្អឹងដងកាំបិត គឺជាឆ្អឹងមួយក្នុងចង្កោមឆ្អឹងស្មា ដែលមានតួនាទីទ្រទ្រង់ចលនាទាំងឡាយរបស់ដៃទាំងពីរ។
មូលហេតុបាក់បែកឆ្អឹងដងកាំបិត
ដើមហេតុចម្បងនៃការបាក់បែកឆ្អឹងដងកាំបិត គឺដោយសារគ្រោះថ្នាក់ចរាចរណ៍។ ក្រៅពីនេះ អាចបណ្ដាលមកពីការដួល ឫធ្លាក់មកពីទីខ្ពស់ ដូចជាកម្មករសំណង់ធ្លាក់ជាដើម។ ជនរងគ្រោះភាគច្រើនស្ថិតក្នុងវ័យពី២០ទៅ៤០ឆ្នាំ។
ការព្យាបាលបាក់ឆ្អឹងដងកាំបិត
ការព្យាបាលមានពីរបែប គឺការព្យាបាលដោយអបម្នាងសិលា និងការវះកាត់តម្រៀបឆ្អឹងឡើងវិញ។
1. ការព្យាបាលដោយអប ៖ ការអបឆ្អឹងដោយម្នាងសិលាត្រូវបានយកមកព្យាបាលក្នុងករណីដែលការបាក់បែកឆ្អឹងនោះ មិនឃ្លាតឆ្ងាយពីគ្នាខ្លាំង ដោយគ្រាន់តែប្រេះស្រាំ។ ឆ្អឹងដងកាំបិតជាឆ្អឹងដែលងាយតភ្ជាប់គ្នាវិញបំផុត។ តាមធម្មតារយៈពេល៣ទៅ៤ សប្ដាហ៍ ឆ្អឹងដងកាំបិតអាចតភ្ជាប់គ្នាវិញបាន។
2. ការវះកាត់តម្រៀបឆ្អឹង ៖ ត្រូវធ្វើឡើងក្នុងករណីដែលមានការបាក់បែកឆ្អឹងក្នុងសភាពធ្ងន់ធ្ងរ ដូចជាឃ្លាតឆ្ងាយពីគ្នា លើសពីពីរសង់ទីម៉ែត្រ រហែកសាច់ និងប៉ះពាល់ដល់សរសៃឈាម។ គោលបំណងនៃការវះកាត់ គឺតម្រៀបតឆ្អឹងឱ្យត្រង់ក្នុងអ័ក្សដែល មានដាក់ដែក ដើម្បីជាជំនួយដល់ឆ្អឹងដែលបាក់។ ក្រោយដែលវះកាត់រយៈពេល៣ទៅ៤សប្ដាហ៍ អ្នកជម្ងឺត្រូវត្រឡប់មកមន្ទីរពេទ្យម្ដង ទៀត ដើម្បីវះកាត់យកដែកចេញ។ ជាប្រការមិនប្រសើរឡើយក្នុងការរក្សាទុកដែកអបឆ្អឹងក្នុងរយៈពេលយូរ។
ផលវិបាកនៃការបាក់ឆ្អឹងដងកាំបិត
ជាទូទៅការបាក់បែកឆ្អឹងដងកាំបិតមិនបណ្ដាលឱ្យជនរងគ្រោះពិការទេ គ្រប់ការបាក់បែកឆ្អឹងសុទ្ធតែអាចតភ្ជាប់វិញបាន ទាំងអស់។ ការតឆ្អឹងដងកាំបិតនេះ ជួនកាលអាចតភ្ជាប់វិញបានល្អ ជួនមិនអាចតភ្ជាប់វិញបានល្អទេ។ វាអាចធ្វើឱ្យជនរងគ្រោះឈឺចាប់ ជាងនេះទៅទៀត អាចបន្សល់ទុកស្នាមពក ឬស្នាមវះនៅលើស្មាដែលធ្វើឱ្យបាត់បង់សោភ័ណភាព ជាពិសេសបើកើតលើស្ដ្រី។
ប្រការគួរចៀសវាង ក្រោយពេលវះកាត់
ក្នុងអំឡុងពេល៣ ឬ៤សប្ដាហ៍ក្រោយពេលវះកាត់ អ្នកជម្ងឺត្រូវប្រុងប្រយ័ត្ន កុំយួររបស់ធ្ងន់ កុំសំយុងដៃចុះក្រោម ត្រូវព្យួរ ដៃដោយប្រដាប់ព្យួរ ឬក្រណាត់រុំ។
ដំបូន្មានអ្នកជំនាញ
ក្រោយពីមានការប៉ះទង្គិចហើយ មានអាការឈឺចាប់នៅត្រង់ស្មា ត្រូវប្រញាប់មកកាន់មន្ទីរពេទ្យដើម្បីពិនិត្យ និងព្យាបាល ជម្ងឺ។ បើយឺតយូរទុកឆ្អឹងបាក់លើសពីមួយសប្ដាហ៍ ឆ្អឹងនឹងលូតលាស់ទ្បើងវិញពិបាកតភា្ជប់គ្នា។
ប្រភព ៖ ទស្សនាវដ្តី សុខភាពយើង លេខ០០៨ ខែកញ្ញា ឆ្នាំ២០០៦
Leave a Reply