ការធ្វើផ្ទះ គឺមិនមែនធ្វើសម្រាប់តែជ្រកទេ គឺធ្វើសម្រាប់ក្ដីសង្ឈឹមមួយថាយើងនឹងបោះទីតាំងមួយ ចាក់ឫសនៅកន្លែងនោះ ។ អ្វីៗដែលមាននៅក្នុងផ្ទះត្រូវមានការទាក់ទាញឱ្យយើងមានចិត្ដចង់រស់នៅ ហើយយើងក៏មិនចង់ផ្លាស់ប្ដូរទីលំនៅដែរ។ ការរៀបចំផ្ទះបាយ និងបន្ទប់គេងក៏ត្រូវឱ្យមានទៅតាមក្បួនខ្នាតត្រឹមត្រូវដែរ។
ទស្សនាវដ្ដី សុខភាពយើង សូមលើកយកវិធីរៀបចំបន្ទប់គេងមកបង្ហាញជូនដោយជួបសម្ភាសន៍ជាមួយលោក ទៀវ វីណ្ណូ សាស្ដ្រាចារ្យស្ថាបត្យកម្ម។
ទីតាំងបន្ទប់គេង
ជាទស្សនៈជប៉ុន បន្ទប់គេងត្រូវដាក់ឱ្យបែរទៅសួន ពេលបើកបង្អួច អាចមើលឃើញទៅខាងក្រៅឃើញសួនច្បារ។ ប្រសិន បើគ្មានសួនច្បារទេ សូមដាក់គ្រែគេងបែរទៅរកទេសភាពនៅខាងក្រៅ។ ស្ថានភាពបែបនេះ យើងហាក់មានអារម្មណ៍ថាយើងរស់នៅ ខាងក្នុងសួន។ តាមពិត មនុស្សត្រូវការរស់នៅជាមួយធម្មជាតិ ជារឿងសំខាន់ណាស់ វាសម្រួលដល់ចិត្ដសាស្ដ្ររបស់មនុស្ស។ មនុស្ស ត្រូវការរស់នៅក្បែរធម្មជាតិ ក្បែរខ្យល់ ក្បែរថ្ងៃ និងក្បែររុក្ខជាតិ។ បន្ទប់គេងត្រូវតែបែរទៅរកពន្លឺ។
វិធីរៀបចំក្នុងបន្ទប់គេង
ការរៀបចំបន្ទប់គេងត្រូវធ្វើទៅតាមចំណង់ចំណូលចិត្ដរបស់មនុស្សម្នាក់ៗ។ ប៉ុន្ដែក្នុងបន្ទប់គេង គួរមានទូសម្រាប់ដាក់ សម្លៀកបំពាក់។ គួរមានទូដែលមានថតជាថ្នាក់ៗសម្រាប់ដាក់ទូរទស្សន៍ និងសម្រាប់ដាក់សៀវភៅអានខ្លះ។ មានតុការិយាល័យ១ សម្រាប់ធ្វើការ ឬរៀនសូត្រ។ ទូសម្រាប់ដាក់សៀវភៅត្រូវដាក់នៅជិតតុធ្វើការ។ ទូដាក់សៀវភៅមិនត្រូវដាក់សៀវភៅច្រើនពេកទេ ព្រោះវាមិនមែនជាបណ្ណាល័យទេ។
1. ពន្លឺនៅក្នុងបន្ទប់ ៖ ពន្លឺនៅក្នុងបន្ទប់គេង ត្រូវប្រើចង្កៀងទំហំ៧០វ៉ាត់ ឫ១០០វ៉ាត់ជាការគ្រប់គ្រាន់ ត្រូវដាក់វានៅលើ តុការិយាល័យ។ ការដាក់អំពូលធ្វើឡើងទៅតាមទំហំបន្ទប់តូច ឬធំ។ ត្រូវជ្រើសរើសយកអំពូលណាដែលមានពណ៌ពងមាន់ មិនមែន ពណ៌សពេក និងកុំឱ្យងងឹតពេកនាំឱ្យខូចភ្នែក។
2. ការដាក់គ្រែបែរទៅទិសខាងកើត ៖ តាមទស្សនៈថ្មី គេដាក់គ្រែនៅកន្លែងណាដែលមានពន្លឺចេញចូលគ្រប់គ្រាន់ និងបែរ មុខទៅរកទេសភាពល្អ។ លោកសាស្ដ្រាចារ្យ ទៀវ វីណ្ណូ បានបញ្ចេញទស្សនៈថាគ្រែគេងគួរដាក់បែរមុខទៅទិសខាងកើតជាការល្អ ព្រោះថាពន្លឺនៅពេលព្រឹកព្រលឹមមិនមានកម្ដៅខ្លាំង។ ម្យ៉ាងទៀត ពន្លឺពេលព្រឹកមានកាំរស្មីអ៊ុត្រាវីយោឡេដែលមានប្រយោជន៍ក្នុង ការថែរក្សាស្បែក។ សម្រាប់កុមារត្រូវការកាំរស្មីនេះ ដើម្បីពង្រឹងឆ្អឹង។
ដូច្នេះត្រូវធ្វើបន្ទប់បែរទៅទិសខាងកើត បង្អួចបើកបែរទៅទិសខាងកើត និងបែរទៅរកសួនច្បារ គឺជាការប្រសើរណាស់។ បើមានរានហាលទៀតរិតតែល្អ យើងអាចចេញទៅហាត់ប្រាណខាងក្រៅនៅពេលព្រឹក។ ទូរទស្សន៍ត្រូវដាក់ឱ្យបែរទៅរកគ្រែ មិនត្រូវ ដាក់បែរទៅរកបង្អួចទេ ព្រោះនៅពេលពន្លឺថ្ងៃចាំងមកវានាំឱ្យរំខាន។ បន្ទប់គេងត្រូវមានការតុបតែងខ្លះដែរ ដូចជាមានថូដាំដើមឈើ ដែលត្រូវការពន្លឺតិច។
3. ការតាំងរូបភាពនៅលើជញ្ជាំង ៖ ត្រូវមានដាក់ជាផ្ទាំងរូបភាពជារូបផ្ទាល់ខ្លួន ឫគ្រួសារព្យួរ ឬតាំងនៅលើជញ្ជាំង។ តាំងរូបឪពុកម្ដាយ នៅលើក្បាលដំណេក វាជាការល្អ។ ការដាក់រូបច្រើនពេកជាការមិនល្អទេ ព្រោះវានាំឱ្យមើលទៅឃើញស្មុគស្មាញ និងសាំញាំ។ បន្ទប់គេងត្រូវការភាពស្រ ឡះ មានខ្យល់អាកាសចេញចូលច្រើន និងត្រូវការពន្លឺគ្រប់គ្រាន់។ ភាពងងឹតជាកន្លែងកកកុញទៅដោយមេរោគ។ បន្ទប់គេងក៏ត្រូវ មានបង្អួចដែរ យ៉ាងហោចណាស់ឱ្យបាន១ភាគ៥នៃផ្ទៃបន្ទប់ដែរ។ បន្ទប់គេងតូចបំផុត១៦ម៉ែត្រការ៉េ សមរម្យអាចរស់នៅបាន។ បើ មានបន្ទប់គេងតូចយ៉ាងដូចម្ដេចក៏ដោយ ធ្វើយ៉ាងណាឱ្យបន្ទប់មានពន្លឺគ្រប់គ្រាន់ ហើយកុំឱ្យបិទជិតឈឹង។
4. ការដាក់បន្ទប់ទឹកនៅក្នុងបន្ទប់គេង ៖ មិនត្រូវដាក់បន្ទប់ទឹកនៅក្នុងបន្ទប់គេងទេ ព្រោះបន្ទប់ទឹកជារបស់មួយសើម បន្ទប់គេងជារបស់មួយត្រូវការស្ងួត។ ម្យ៉ាងទៀតបង្គន់ជារបស់មួយមិនស្អាត វាស្រួលមែនក្នុងការរស់នៅ ប៉ុន្ដែវាមិនល្អសម្រាប់សុខភាព និងការតុបតែងឡើយ។ នៅពេលដែលទ្វារចំហទៅឃើញបង្គន់ ជួនកាលទៀតនៅពេលចេញពីបន្ទប់ទឹក ធ្វើឱ្យសើមការូ ឬកម្រាល។ ដូច្នេះ បន្ទប់ទឹកគួរតែសាងសង់នៅដាច់ដោយឡែកពីបន្ទប់គេង។
5. ការលាបពណ៌ ៖ ការលាបពណ៌ជញ្ជាំងបន្ទប់គេងសម្រាប់ក្មេងគួរលាបពណ៌រាងឆើត ដូចជាពណ៌ផ្ទៃមេឃ ពណ៌សូកូឡាជាដើម។ សម្រាប់មនុស្សចាស់ គួរលាបពណ៌រាងស្រទន់បន្ដិច ដើម្បីកុំឱ្យចាំងភ្នែក ដូចជាពណ៌ពងមាន់ ពណ៌ស្លាទុំ ពណ៌កាកអំពៅ ជាដើម។
ដំបូន្មានអ្នកជំនាញ
លោកទៀវ វិណ្ណូ បានផ្ដល់ជាដំបូន្មានដល់ប្រជាពលរដ្ឋក្នុងការសាងសង់ផ្ទះថាបន្ទប់គេងគួរបែរមុខទៅទិសខាងកើត ជាការ ល្អ ព្រោះខាងជើង និងខាងលិចនៅខែចែត្រអាកាសធាតុក្ដៅខ្លាំង។ ចំពោះខាងកើត ក្ដៅនៅពេលព្រឹកព្រហាមរហូតដល់ម៉ោង១០ទើប ផុត ហើយពន្លឺពេលព្រឹកព្រហាមល្អសម្រាប់សុខភាពទៅវិញទេ។ ចំពោះការដាក់ម៉ាស៊ីនត្រជាក់ អាចរំខានដល់សុខភាព អាចទៅជាផ្ដាសាយ អ្នកខ្លះទៀតមិនអាចទ្រាំបានទេ។ ហេតុដូចនេះហើយបានជាយើងទាមទារឱ្យមានការរៀបចំផ្ទះទៅតាមក្បួនខ្នាត និងមានខ្យល់ អាកាសចេញចូលគ្រប់គ្រាន់។ យើងអាចប្រើកង្ហាម្ដងម្កាលជំនួសម៉ាស៊ីនត្រជាក់បាន។
ប្រភព ៖ ទស្សនាវដ្តី សុខភាពយើង លេខ០០៦ ខែកក្កដា ឆ្នាំ២០០៦
Leave a Reply