ការតុបតែងរាងកាយបានស្រស់ស្អាតជាបំណងប្រាថ្នារបស់មនុស្សគ្រប់វ័យទាំងអស់ ជាពិសេសស្ដ្រីតែម្ដង។ ការតុបតែងសំដៅឱ្យសម្រស់កាន់តែស្អាត លើសសម្រស់ធម្មជាតិ ឬក៏បិទបាំងនូវរាល់គុណវិបត្ដិរបស់ផ្ទៃមុខ។ ការតុបតែងមួយផ្នែកធំត្រូវពឹងផ្អែក ទៅលើការចេះជ្រើសរើសគ្រឿងសម្អាង និងបច្ចេកទេសនៃការតុបតែង មិនខុសពីជាងគំនូរឡើយ គឺទាមទារឱ្យចេះច្នៃប្រឌិតយ៉ាងអស្ចារ្យ។
ដើម្បីជាជំនួយដល់ការជ្រើសរើសគ្រឿងសម្អាង ដូចជាម្ស៉ៅ ឡេលាបជាដើម។ លោកស្រីសាពណ៌ អ្នកជំនាញនៅហាងសាពណ៌បានចូលរួមសម្ភាសន៍ជាមួយទស្សនាវដ្ដីសុខភាពយើង ក្នុងលេខនេះ ដើម្បីជម្រាបជូនអ្នកនាងកញ្ញា អំពីវិធីជ្រើសរើសគ្រឿងសម្អាងយកមកប្រើប្រាស់។ នៅពេលតុបតែងផ្ទៃមុខ មុនដំបូងអ្នកនាងកញ្ញាត្រូវស្គាល់ស្បែកមុខរបស់ខ្លួនប្រភេទណាពណ៌អ្វី ទម្រង់មុខបែបណាអាកាសធាតុបែបណា ស្ថានភាពបែបណាជាដើម។
ពណ៌សម្បុរនិងប្រភេទស្បែកមុខ
– ទោះបីស្បែកមុខមានសម្បុរសក្ដីស្រអែមក្ដីគប្បីជ្រើសរើសគ្រឿងសម្អាង ដូចជាម្ស៉ៅដែលមានពណ៌ក្រម៉ៅជាងស្បែក មុខបន្ដិច ទើបមើលទៅមិនសពេកកុំឱ្យដូចពាក្យគេថាមុខសកខ្មៅ។
– ស្បែកមុខដែលស្ងួត គួរប្រើម្ស៉ៅ ឬឡេលាបមុខដែលមានជាតិរលោងបន្ដិច ដើម្បីឱ្យផ្ទៃមុខមានសំណើមស្រស់ថ្លា។
– ស្បែកមុខរលោង ឬមុខខ្លាញ់ ប្រការដែលល្អ គួរតែប្រើម្ស៉ៅ ឬឡេដែលមានជាតិរលោងខ្លាំង ដើម្បីរំលួសជាតិរលោងចេ ញពីស្បែកមុខខ្លះ។
ការតុបតែងតាមទម្រង់មុខ
អ្នកនាងកញ្ញាចាំបាច់ត្រូវដឹងពីចំណុចខ្សោយរបស់រង្វង់មុខ ដូចជាបបូរមាត់ក្រាស់ ភ្នែកតូច ច្រមុះធំ ច្រមុះកំពិត ចង្កាស្រួច ចង្កាជ្រុងជាដើម ទើបអាចតុបតែងខ្លួនបានល្អស្អាត។
ចំពោះអ្នកនាងកញ្ញាដែលមានចង្កាជ្រុង ឬធ្លាក់ គួរតែជ្រើសរើសម្ស៉ៅពណ៌ផ្កាឈូកលាបនៅក្រោមត្រចៀករហូតដល់ពាក់ កណ្ដាលឆ្អឹងថ្គាមក្រោម។ ចំពោះចង្កាស្រួច គួរតែផាត់ម្ស៉ៅពណ៌ផ្កាឈូកសងខាងចង្កា ទើបមើលទៅមិនសូវឃើញខ្ពស់។ ច្រមុះធំ កំពិត គ្មានខ្ទង់ច្រមុះ គួរតែផាត់ម្ស៉ៅពណ៌សសងខាង និងលើក្ដោងច្រមុះ។ ចំពោះច្រមុះស្រួចវែង គួរតែលាបម្ស៉ៅពណ៌ផ្កាឈូកស្រាល នៅលើច្រមុះ។ បើសិនជាអ្នកនាងកញ្ញាមានថ្ពាល់ខ្ពស់ ពេលលាបមុខ ត្រូវលាបខាងក្រោមថ្ពាល់ស្មើពាក់កណ្ដាលត្រចៀក ហើយចុះមក ត្រឹមបបូរមាត់ក្រោម ធ្វើដូច្នេះមើលទៅឃើញថាថ្ពាល់មិនសូវខ្ពស់។
ការតុបតែងរាងកាយយ៉ាងណា គឺយោងទៅតាមទម្រង់មុខរបស់មនុស្សម្នាក់ គេមិនតុបតែងដូចគ្នានោះទេ។ ដូច្នេះប្រការ ល្អបំផុត អ្នកត្រូវផាត់ដោយខ្លួនឯង ឆ្លុះកញ្ចក់មើល និងដកពិសោធន៍ខ្លួនឯង។
ការតុបតែងតាមអាកាសធាតុ
សម្រាប់ឡេ ឬក្រែមស្ងួតទើបសមស្របជាមួយប្រទេសយើងដែលមានអាកាសធាតុក្ដៅ មិនគួរប្រើប្រភេទក្រែមសើមពេកទេ។ ព្រោះឡេ ឬក្រែមប្រភេទនេះសម្រាប់ប្រើនៅក្នុងប្រទេសដែលមានអាកាសធាតុត្រជាក់។
ការតុបតែងតាមស្ថានភាព
មានពេលខ្លះ ពុំចាំបាច់ការតុបតែងខ្លួនទេ គ្រាន់តែសិតសក់ឱ្យស្អាត ស្លៀកពាក់ឱ្យបានសមស្រប។ បើសិនជាអ្នកនាងកញ្ញា ទៅចូលរួមក្នុងរាត្រីស្រមោលសរ ឬពិធីអាពាហ៍ពិពាហ៍ ត្រូវស្លៀកពាក់ និងតុបតែងខ្លួនឱ្យឆើតឆាយបន្ដិច។
ដំបូន្មានអ្នកជំនាញ
សព្វថ្ងៃនេះ នៅលើទីផ្សារមានលក់ទំនិញសម្រាប់តុបតែងជាច្រើនប្រភេទ ដូចជាក្រែមលាបមុខ ក្រែមលាបបបូរមាត់ ឡេ លាយលាបមុខដែលផ្សំជាមួយវត្ថុធាតុផ្សេងៗទៀត ឡេ ឬម្ស៉ៅធ្វើឱ្យស្បែកមុខស្រស់ស្អាតបំបាត់ស្លាកស្នាម ធ្វើឱ្យស្បែកសជាដើម។ សុភាពនារីទាំងឡាយ គប្បីប្រុងប្រយ័ត្ន និងពិនិត្យឱ្យដិតដល់ ព្រោះថាមានផលិតផលខ្លះបំផ្លាញស្បែកមុខទៅវិញ។
ប្រភព ៖ ទស្សនាវដ្តី សុខភាពយើង លេខ០០៦ ខែកក្កដា ឆ្នាំ២០០៦
Leave a Reply