ជាធម្មតាយុវវ័យ គិតរាប់ចាប់ពីអាយុ១០ ទៅ២៤ឆ្នាំ។ យុវវ័យ ជាវ័យមួយដែលមានការលូតលាស់ ផ្លាស់ប្ដូរទាំងផ្នែករូបរាងកាយ និងចិត្ដគំនិត។ យុវវ័យក៏ជាវ័យមួយងាយរងគ្រោះថ្នាក់អាក្រក់ដែរ ជាពិសេសយុវតី ប្រសិនបើគាត់មានផ្ទៃពោះ ដោយប្រការណាមួយនោះ។ ការមានផ្ទៃពោះទាំងវ័យក្មេងបែបនេះ នាំឱ្យគាត់ប្រឈមមុខនឹងគ្រោះថ្នាក់យ៉ាងធ្ងន់ធ្ងរចំពោះសុខភាព។
មានយុវតីខ្លះបានរៀបអាពាហ៍ពិពាហ៍ទាំងនៅវ័យក្មេង។ មានហេតុផលជាច្រើន ដែលធ្វើឱ្យយុវតីឆាប់ទទួលយកការរួមភេទ ជា ហេតុនាំឱ្យគាត់មានផ្ទៃពោះទាំងវ័យក្មេងនោះ។ យុវតីខ្លះមិនមែនមកពីភាពភ្លើតភ្លើន នៃយុវវ័យរបស់គាត់ទេ គឺមានកត្ដាផ្សេងៗទៀត ដូចជា គ្រួសារ ជីវភាពខ្សត់ខ្សោយ ការជួញដូរផ្លូវភេទ ការរៀបអាពាហ៍ពិពាហ៍ទាំងវ័យក្មេងជាដើម។ ជួនកាលយុវតីខ្លួនគាត់ផ្ទាល់ ចាញ់បោកការ ល្បួងលួងលោមរបស់បុរសជាសង្សារ។ ដោយហេតុផលថាបើមិនព្រមរួមភេទជាមួយទេ បុរសនោះនឹងបោះបង់គាត់ចោល។ ដោយសារគាត់ ស្រឡាញ់ពេក ធ្វើឱ្យគាត់ហ៊ានធ្វើការរួមភេទ ដើម្បីបញ្ជាក់ពីសេចក្ដីស្នេហា។
គ្រោះថ្នាក់ពេលមានផ្ទៃពោះ របស់យុវតីក្មេងពេក
យុវតី ដែលមានផ្ទៃពោះនៅវ័យក្មេងពេកនឹងប្រឈមមុខជាមួយគ្រោះថ្នាក់ តាំងពីពេលទារកនៅក្នុងផ្ទៃរបស់គាត់ រហូតដល់ពេល សម្រាល ជាពិសេសនៅពេលសម្រាលតែម្ដង។ រាងកាយរបស់គាត់វិវឌ្ឍន៍មិនទាន់គ្រប់លក្ខណៈ អាងត្រគាករបស់គាត់មិនអំណោយផល សម្រាប់ឱ្យគាត់ធ្វើជាមាតាគេនៅឡើយទេ។ គាត់អាចសម្រាលកូនមិនរួច ឬអាចធ្លាក់ឈាមខ្លាំងនៅពេលសម្រាល ប្រសិនបើមិនមានការជួយ សង្គ្រោះទាន់ពេលវេលាទេ គាត់អាចស្លាប់បាត់បង់ជីវិតទាំងម្ដាយទាំងកូនបាន។ ជួនកាលអាចរហែកទ្វារមាសខ្លាំង និងធ្លាក់ឈាមខ្លាំំង ធ្វើឱ្យ សុខភាពម្ដាយខ្សោយ។ ទារកអាចកើតមកមិនគ្រប់ខែ ឬមិនគ្រប់គីឡូ។ ម្យ៉ាងវិញទៀត ដោយសារគាត់នៅវ័យក្មេងពេក ចិត្ដគំនិតគាត់មិន ទាន់់ចាស់ទុំ គាត់អាចថែទាំកូនមិនបានដិតដល់់។
ដំបូន្មានអ្នកជំនាញ
សូមប្អូនៗយុវតីពិចារណាឱ្យបានល្អិតល្អន់មុននឹងសម្រេចចិត្ដធ្វើអ្វីមួយ។ ដូចប្អូនៗយុវតីបានឃើញហើយនូវទំហំគ្រោះថ្នាក់នៃការ មានគភ៌ពេលនៅក្មេងវ័យពេក។ យុវតីមិនគួរយកការរួមភេទទៅបញ្ជាក់ពីសេចក្ដីស្នេហាទេ។ បើគេចង់បានខ្លួនយើងបញ្ជាក់ថា គេមិនស្មោះ ត្រង់ជាមួយយើងទេ ប្រៀបដូចពាក្យមួយឃ្លាបានពោលថា បុរសប្រៀបដូចកន្លង់ បានក្រេបលម្អងផ្កាហើយ ហិចហើរចោល។ ប្អូនៗត្រូវយល់ ថាស្នេហាស្មោះត្រង់ គឺការចេះឱ្យតម្អៃគ្នាទៅវិញទៅមក មិនមែនត្រឹមតែការចង់បានខ្លួនប្រាណយើងនោះទេ។
ប្រភព ៖ ទស្សនាវដ្តី សុខភាពយើង លេខ០០៣ ខែមេសា ឆ្នាំ២០០៦
Leave a Reply