ម៉ូដសម្លៀកបំពាក់ខ្មែរមានច្រើនបែបច្រើនសណ្ឋាន ដែលសមស្របទៅតាមប្រពៃណី និងវប្បធម៌ដ៏សម្បូរបែបរបស់ខ្មែរ។ បុរសនារីខ្មែរគួរជ្រើសរើសសម្លៀបំពាក់ ដែលសក្ដិសមនឹងខ្លួន មិនសិចស៊ីពេក មានលក្ខណៈសុភាពរាបសា និងស្របតាមពិធី នីមួយៗ។ ព្រោះការ ចេះប្រើប្រាស់សម្លៀកបំពាក់ មានសារៈសំខាន់ក្នុងការជួយលើកកម្ពស់កិត្ដិយស សេចក្ដីថ្លៃថ្នូរ និងសម្រស់យើង បានមួយកម្រិតដែរ។
បច្ចុប្បន្ននេះ សម្លៀកបំពាក់ខ្មែរមានម៉ូដស្អាតៗ ប្លែកៗ ហើយមានកាន់តែច្រើនឡើងៗ ដែលច្នៃចេញពីសូត្រ និងហូលខ្មែរ។ ការនិយមម៉ូដ គឺគេនិយមទៅតាមឆ្នាំ។ ចំពោះឆ្នាំ២០០៦នេះ ប្រជាពលរដ្ឋខ្មែរច្រើននិយមម៉ូដសម្លៀកបំពាក់ ដែលប្រើជាមួយផលិត ផលបរទេស ដូចជាកាប្រើក្រណាត់សារូលាយជាមួយក្រណាត់សូត្រ ឬក្រណាត់ប៉ាក់ជាដើម។
សម្លៀកបំពាក់នារី សម្រាប់ពិធីផ្សេងៗ
សម្រាប់ពិធីបុណ្យទាន ឬទៅវត្ត
បច្ចុប្បន្ននេះ ក្នុងឱកាសបុណ្យទាន ឬទៅវត្ដក្ដី នារីខ្មែរចូលចិត្ដប្រើក្រណាត់ហូល ឬសូត្រសម្រាប់កាត់ជាសំពត់។ ចំពោះអាវ គេច្រើនប្រើក្រណាត់ប៉ាក់ ព្រោះវាមិនសូវប្រឡាក់ និងមិនធ្វើឱ្យហប់ទ្រូងពេក ហើយយើងពានាជាមួយក្រមាសូត្រមើលទៅសម។
ចំណែកកអាវវិញ ពេលមានពិធីបុណ្យទាន ខ្មែរយើងច្រើនប្រើកអាវ ដែលតូចមានលក្ខណៈជិតមិនវាលធំពេកទេ។ យើងគួរ ប្រើសម្លៀកបំពាក់បែបបុរាណឱ្យបានច្រើន។ យើងអាចប្រើសម្លៀកបំពាក់ក្លាយបែបសម័យក៏បាន ប៉ុន្ដែមានលក្ខណៈជាខ្មែរសម័យ ឧទាហរណ៍ ក្រណាត់ប៉ាក់ យើងកាត់អាវកមូលជាម៉ូដបុរាណមែន ប៉ុន្ដែយើងអាចច្នៃ ឱ្យទៅជាម៉ូដសម័យបានដោយថែមភ្លី ឬជីពជាយ ឬធ្វើជាអំភាយនៅ ត្រង់ក ឬនៅចុងដៃអាវពីលើក្រណាត់ប៉ាក់។ ធ្វើបែបនេះ គឺដើម្បីឱ្យមានសម្រស់ថែមមួយកម្រិតទៀត នៅពេល ទៅវត្ដយើងមានពានាក្រមាថែមពីលើទៀតទៅរិតតែសក្ដិសម។
កអាវយើងមានច្រើនម៉ូដ ដូចជាមានកមូល កមូលខ្ទះ ខ្ទះស្ទើរមូល ស្ទើរខ្ទះ កខ្ទះចំ ឬកត្របុតត្រីជាដើម។ កអាវទាំងនេះជា កអាវបែបខ្មែរតាំងពីបុរាណមក ហើយងាយស្រួលពាក់ ព្រោះវាមានលក្ខណៈជិតកមិនសូវវាលជ្រៅពេក។ ប្រសិនបើយើងធ្វើកជ្រៅ ពេកនាំឱ្យពិបាកនៅពេលឱនសំពះព្រះសង្ឈ ហើយវាមិនសមរម្យទៅនឹងប្រពៃណីខ្មែរយើងផងដែរ។
ចំពោះនារីនៅលីវ គាត់អាចប្រើរូតអាវនៅពីក្រោយ ជួនកាលគាត់ប្រើអាវមានបិទឡេវពីក្រោយ ប៉ុន្ដែយើងដាក់អ្វីឱ្យប្លែក ដូចជាណ្រាត់សារូជីពជាម៉ូដបន្ថែម។ សម្រាប់ដៃអាវ យើងជ្រើសរើសយកដៃខ្លី ដៃក្លឹង ដៃត្រ័រកា ឬដៃបំពង់ក៏បានទៅតាមការចូល ចិត្ដ។ ជួនកាលបងប្អូននារីពាក់ទៅវត្ដអាវដៃវែង គាត់ពិបាកលើកសំពះព្រះសង្ឈពេក គាត់កាត់ត្រឹមដៃក្លឹង ឬដៃត្រ័រកា។
សម្រាប់ពិធីបុណ្យទាន គេច្រើនប្រើពណ៌អាវតែពីរពណ៌ទេ គឺពណ៌ស និងពណ៌ពងមាន់ខ្ចី។ សំពត់ប្រើពណ៌អ្វីក៏បាន ហើយ ប្រសិនបើ បងប្អូននារីអាចស្លៀកពាក់បានតាមថ្ងៃទៀតរឹតតែប្រសើរ។
សម្រាប់ពិធីរាត្រីសមោស ឬពិធីអាពាហ៍ពិពាហ៍
ចំពោះពិធីសមោសផ្សេងៗ បច្ចុប្បន្ននេះនារីខ្មែរចូលចិត្ដប្រើសំពត់បត់ជីពភ្លីពីរ ឬបីជាម៉ូដសម័យថ្មី ដែលទើបច្នៃចេញពីម៉ូដ ចាស់។ ចំពោះរ៉ូបមិនសូវមានប្រើច្រើនទេ ប្រសិនបើមានប្រើ គេច្រើនតែនិយមម៉ូដចាប់ភ្លីដោយប្រើក្រណាត់សូត្រលាយជាមួយ ក្រណាត់សារូ។ ចំពោះ ពិធីអាពាហ៍ពិពាហ៍ យើងគួរប្រើម៉ូដសម័យច្រើនបន្ដិចនៅពីលើអាវប៉ាក់ ឬយើងអាចប្រើកអាវដែលមានរាង វាលបន្ដិច ឬឆើតឆាយបន្ដិចដើម្បី ឱ្យទាន់សម័យ ដោយយើងប្រើកអាវ ដូចជាកមូលខ្ទះ ឬជ្រុងជីពភ្លីជ្រួញស្មាជាម៉ូដឱ្យទាន់សម័យ បន្ដិច។
សម្លៀកបំពាក់បុរស សម្រាប់ពិធីផ្សេងៗ
ម៉ូដសម្លៀកបំពាក់សម្រាប់បុរសគ្មានអ្វីប្លែកទេ មិនទាមទារនូវម៉ូដច្រើនពេកទេ គឺប្រើអាវកឌុប ដៃឌុប កតាំង ឬកកុត។ ប៉ុន្ដែនៅពេលមានកម្មវិធីផ្សេងៗ គេច្រើនប្រើម៉ូដបន្ដិចដែរ ដើម្បីឱ្យមើលទៅឃើញថ្លៃថ្នូរ។
ប្រសិនបើជាម្ចាស់កម្មវិធី ជាអ្នកទទួលភ្ញៀវគេច្រើនប្រើក្រណាត់សូត្រ និងហូលជាការល្អ ដើម្បីឱ្យមានទម្ងន់សក្ដិសមជា ម្ចាស់កម្មវិធី។ ម៉ូដអាវអាចប្រើអាវកឌុប ដៃឌុប ជួនកាលអាវអាចារ្យ ខោអាចារ្យ ឬខោថ្នេរប្រាំ ឬខោបារាំងក៏បាន។ ការតែងខ្លួន បែបបុរាណចំនោះ មើលទៅក៏ស្អាតម្យ៉ាងដែរ។ បុរសៗជួនកាលគាត់និយមប្រើក្រណាត់សូត្រលាត មិនសូវប្រើក្រណាត់ហូលទេ។ តែ បុរសសម័យឥឡូវនិយមបែបសម័យជាង។
ការជ្រើសរើសពណ៌សម្លៀកបំពាក់
ចំពោះអ្នកដែលមានសប្បុរខ្មៅស្រអែម គួរជ្រើសរើសពណ៌ស្រស់ ដើម្បីឱ្យលើកសាច់បានមួយកម្រិត។ បើប្រើពណ៌ល្ងិតនាំ ឱ្យគាត់មានសប្បុរកាន់តែស្រអាប់ថែមទៀត។ ឧទាហរណ៍ ពណ៌ក្រហម យើងប្រើពណ៌ឱ្យក្រហមស្រស់បន្ដិច តែមនុស្សវ័យរាងចាស់ មិនគួរប្រើពណ៌ស្រស់ពេកទេ។
ដំបូន្មានអ្នកជំនាញ
ប្រជាពលរដ្ឋខ្មែរទាំងប្រុសទាំងស្រី គួរចេះរៀបចំខ្លួនទៅតាមកាលៈទេសៈប្រើ។ ចូលកម្មវិធីសម័យ យើងស្លៀកពាក់បែប សម័យ។ ប៉ុន្ដែចំពោះកម្មវិធីប្រពៃណី យើងគួរប្រើសម្លៀកបំពាក់បែបប្រពៃណីឱ្យច្រើនជាងសម័យ កុំគួរសិចស៊ីវាលខ្នងពេក ឬកវាល ពេក។ ចំពោះពិធី រាត្រីសមោសផ្សេងៗ យើងត្រូវប្រើរបៀបសម័យបន្ដិច ប៉ុន្ដែមិនមែនមានន័យថាស្លៀកខើចលើខើចក្រោមនោះទេ។ ចំពោះស្ដ្រីនៅលីវ យើងត្រូវជ្រើសរើសពណ៌ណាដែលស្រាលមែនទែន ទើបជាការល្អបំផុត ដែលតំណាងឱ្យយើងនៅបរិសុទ្ធ។ ឧទាហរ ណ៍ ពណ៌ស៊ីជំពូ យើងជ្រើសរើសយកពណ៌រាងខ្ចីបែបផ្កាឈូក ពណ៌ទឹកសមុទ្រខ្ចី ពណ៌បែបនេះវាធ្វើឱ្យយើងមើលទៅនៅក្មេង។
បើយើងជ្រើសរើសពណ៌ទៅតាមវ័យយើងក៏មិនកើតដែរ វានាំឱ្យមើលទៅចាស់ថែមទៀត។ យើងត្រូវចេះជ្រើសរើសពណ៌ ណា ដែលមើលទៅលើកសាច់បន្ដិច នាំឱ្យយើងក្មេងបន្ដិចដែរ។ ការចេះច្នៃម៉ូដ ហើយចេះជ្រើសរើសពណ៌សម្លៀកបំពាក់ វានាំឱ្យយើង ក្មេងជាងវ័យមួយកម្រិតដែរ។
ប្រភព ៖ ទស្សនាវដ្តី សុខភាពយើង លេខ០០៣ ខែមេសា ឆ្នាំ២០០៦
Leave a Reply