សព្វថ្ងៃនេះ មានភេសជ្ជៈជាច្រើនមុខ ដែលលោកអ្នកអាចជ្រើសរើសបាន។ ភេសជ្ជៈមួយចំនួនល្អជាងមួយចំនួនទៀត។ ប្រជាពលរដ្ឋខ្លះចូលចិត្ដទទួលទានកាហ្វេ ឬតែ។ នៅតាមតៀមកាហ្វេ យើងឃើញមានមនុស្សអង្គុយពិសាកាហ្វេត្រៀបត្រា ពីព្រលឹមស្រាងៗ ទល់ព្រលប់។ កាហ្វេ និងតែមានឥទ្ធិពលជួយកម្លាំង ខួរក្បាល ប៉ុន្ដែភេសជ្ជៈទាំងពីរមុខនេះ ក៏អាចបង្កគ្រោះថ្នាក់ដល់សុខភាពយើងដែរ ពេលណាយើងផឹកវាច្រើនពេក។ តើត្រូវពិសាភេសជ្ជៈ ដែលសម្បូរទៅដោយ ជាតិកាហ្វេអ៊ីនក្នុងបរិមាណប៉ុន្មាន? មុននឹងផឹក ត្រូវគិតជាមុន។
កាហ្វេអុីនជួយកម្លាំងទាន់ចិត្ដ
ជាតិកាហ្វេអ៊ីន ជាសារធាតុដែលមាននៅក្នុងកាហ្វេ តែ(គេនិយមហៅវាថាជាតិតែអ៊ីន) កាកាវ និងភេសជ្ជៈហ្គាសលាយជាតិកូឡា។ កាហ្វេអ៊ីនសុទ្ធតែ នៅក្នុងភេសជ្ជៈទាំងនេះ គ្រាន់តែតិច ឬច្រើនវាមានឥទ្ធិពលទៅលើប្រព័ន្ធប្រសាទ ដោយភ្ញោចសកម្មភាពខួរក្បាល បង្កើនសកម្មភាពរ៉េផ្លិច និងបង្រឹងសតិស្មារតី។
ម្យ៉ាងទៀត ជាតិកាហ្វេអ៊ីនបង្កការពង្រីកទងសួត និងសរសៃឈាម។ វាបង្កើនចលនាផ្លូវដង្ហើម ចលនាបេះដូង និងចលនាពោះវៀនផងដែរ។ ឥទ្ធិពល មួយទៀតរបស់ជាតិកាហ្វេអ៊ីន គឺបង្កើនការបញ្ចេញរសផ្លូវរំលាយអាហារ(រសក្រពះ) និងបញ្ចុះទឹកនោម។
ពេលផឹកកាហ្វេចូលទៅក្នុងខ្លួន ជាតិកាហ្វេអ៊ីនជ្រាបចូលយ៉ាងលឿនទៅក្នុងចរន្ដឈាមរត់។ វាចេញពីក្នុងខ្លួនមកក្រៅវិញ ក្នុងរយៈ ពេលប្រមាណជាបី- បួនម៉ោង អាចតិចជាង ឬច្រើនជាងនេះទៅតាមបុគ្គលម្នាក់ៗ។ ដូច្នេះ អ្នកខ្លះមិនមានបញ្ហាទទួលទានដំណេកមិនលក់ ដោយផឹកកាហ្វេពេលទទួលទានអាហារល្ងាចឡើយ។ រីឯអ្នកខ្លះទៀត គ្រាន់តែផឹកកាហ្វេមួយក្រេបពេលល្ងាច លុះរហូតដល់ពេលពាក់កណ្ដាលអធ្រាត្រទៅហើយ នៅតែបិទភ្នែកមិនជិតទៀត។
ផលប៉ះពាល់របស់កាហ្វេ
ការទទួលអារម្មណ៍ល្អ និងសប្បាយមួយភ្លែត ដោយសារការទទួលទានជាតិកាហ្វេអ៊ីននេះ អាចបាត់ទៅវិញ ដោយបន្សល់នូវស្ថានភាពដើមដូចមុនពេល ទទួលទានកាហ្វេ។ ក្រោយពីអស់ជាតិកាហ្វេអ៊ីនពីក្នុងខ្លួន លទ្ធផលបន្សល់នៅ គឺអាការអស់កម្លាំង និងស្ថានភាពការតឹងអារម្មណ៍ខ្លះ។ ឥទ្ធិពលបែបនេះ ជម្រុញឱ្យ ចង់ទទួលទានកាហ្វេទៀត ដើម្បីទទួលបានឥទ្ធិពលប្រសើរដូចលើកមុនទៀត។ បែបនេះ ការញៀនកាហ្វេអ៊ីន អាចចាប់ផ្ដើមឡើងហើយ។
បរិមាណកាហ្វេអ៊ីនហួសកំណត់ អាចបង្កជាវិបត្ដិផ្សេងៗ ដូចជារំខានដំណេក(ដេកមិនលក់ យល់សប្ដិអាក្រក់) ក្ដៅខ្លួនអែៗ រំខានផ្លូវរំលាយអាហារ (ញ័រ បេះដូង ឆ្អល់ក្រពះ ភើជូរ) ញ័រដៃ លែងឃ្លានបាយជាដើម។ ម្យ៉ាងទៀត ជាតិកាហ្វេអ៊ីនអាចធ្វើទុក្ខដល់បេះដូង ធ្វើឱ្យឡើងឈាម ធ្វើឱ្យឈាមរត់មិនស្រួលចំពោះ ស្ដ្រីមានផ្ទៃពោះ(ដែលអាចបណ្ដាលឱ្យទារកកើតមកមិនគ្រប់ទម្ងន់) និងអាចធ្វើឱ្យប៉ះពាល់ដល់លទ្ធភាពមានកូន ឬអត់កូនរបស់ស្ដ្រីទៀតផង។
ជាតិកាហ្វេអុីនប្រើជាគ្រឿងផ្សំលាយក្នុងឱសថមួយចំនួន
សកម្មភាពភ្ញោចរបស់ជាតិកាហ្វេអ៊ីន ត្រូវបានប្រើប្រាស់ក្នុងថ្នាំពេទ្យ ឬឱសថសម័យមួយចំនួន ប្រយោជន៍កម្ចាត់ឥទ្ធិពលបែបបង្កការងងុយដេក របស់ ពួកថ្នាំប្រឆាំងអ៊ីស្ដាមីន(ថ្នាំអង់ទីអ៊ីស្ដាមីនិក)។ ពោលជាជំពូកថ្នាំដែលប្រើសម្រាប់ព្យាបាលប្រឆាំងនឹងគ្រុនផ្ដាសាយធម្មតា ផ្ដាសាយធំ រលាកបំពង់ក និងជម្ងឺ ប្រតិកម្ម(អាការអាឡែកហ្សី)ជាដើម។
ដោយសារឥទ្ធិពលជួយកម្លាំងសរសៃឈាមខួរក្បាល ជាតិកាហ្វេអ៊ិនត្រូវបានប្រើប្រាស់សម្រាប់ព្យាបាលអាការឈឺក្បាល ដូចជាឈឺមួយចំហៀងក្បាល ជាដើម។
ដំបូន្មានគួរប្រតិបត្ដិ
បរិមាណជាតិកាហ្វេអ៊ីននៅក្នុងកាហ្វេមានកម្រិតប្រែប្រួល កាហ្វេខ្លះមានតិច កាហ្វេខ្លះទៀតមានច្រើន។ របៀបធ្វើ ឬឆុងកាហ្វេ មិនមែនជាកត្ដាបង្កការ ថយចុះ ឬកើនឡើងបរិមាណកាហ្វេអ៊ីននៅក្នុងទឹកកាហ្វេនោះទេ។ ម្សៅ ឬគ្រាប់កាហ្វេដែលយកមកឆុងនោះទេ អាចមានកាហ្វេអ៊ីនតិច ឬច្រើន។
លោកអ្នកអាចនៅបន្ដទទួលទានកាហ្វេបាន ប៉ុន្ដែត្រូវទទួលទានវាក្នុងបរិមាណតិចល្មមបានហើយ។ ក្នុងមួយថ្ងៃ លោកអ្នកអាចពិសាកាហ្វេ ឬតែបន្ដិច បន្ដួច ដោយកំណត់យ៉ាងច្រើន៣ពែងតូច ឬ៣កែវតូច។ ព្រោះថា បរិមាណកាហ្វេបីបួនពែងតូចក្នុង១ថ្ងៃ មិនមានពិសពុលឡើយ។ ប៉ុន្ដែអ្នកខ្លះរងឥទ្ធិពល ឬផលប៉ះ ពាល់របស់កាហ្វេអ៊ីនច្រើនជាងអ្នកខ្លះទៀត។ បែបនេះជាការស៊ូទ្រាំនៃរាង្គកាយរបស់បុគ្គលម្នាក់ៗ។
ប្រសិនបើកាហ្វេធ្វើឱ្យលោកអ្នកសម្រាន្ដមិនលក់នៅពេលយប់ ហើយលោកអ្នកនៅតែចង់ទទួលទានកាហ្វេ គប្បីជ្រើសរើសទទួលទានកាហ្វេដែលគ្មាន ជាតិកាហ្វេអ៊ីន(ជាប្រភេទកាហ្វេ ដែលផលិតដោយដកយកជាតិកាហ្វេអ៊ីនចេញ)។ កាហ្វេគ្មានជាតិកាហ្វេអ៊ីននេះ ឃើញមានដាក់លក់នៅតាមទីផ្សារ ក្នុងរូបភាពជា ផ្លាកសញ្ញាផ្សេងៗ។
បើលោកអ្នកចង់កាត់បន្ថយការទទួលទានកាហ្វេ សូមចាប់ផ្ដើមធ្វើការបន្ថយបរិមាណទទួលទានបន្ដិចម្ដងៗ។ គន្លឹះមួយដែលលោកអ្នកអាចធ្វើបាន គឺ ដោយឆុងលាយកាហ្វេជាមួយនឹងកាហ្វេគ្មានជាតិកាហ្វេអ៊ីន។ ម្យ៉ាងទៀត លោកអ្នកអាចជ្រើសរើសយកកាហ្វេងាយរលាយក្នុងទឹក ពីព្រោះថាវាមានជាតិកាហ្វេអ៊ីន តិចជាងកាហ្វេគ្រាប់ ឬកាហ្វេកិន។
សូមប្រុងប្រយ័ត្នជាតិកាហ្វេអ៊ីន។ អ្នកដែលមានជម្ងឺបេះដូងសរសៃឈាម ឬចង្វាក់បេះដូងដើរមិនទៀងទាត់ មិនអាចទទួលទានជាតិកាហ្វេអ៊ីនបាន ឡើយ។ ចំពោះស្ដ្រីមានផ្ទៃពោះ ក៏ត្រូវកម្រិតការទទួលទានកាហ្វេដែរ ដាច់ខាតមិនត្រូវទទួលទានលើសពី២ពែងតូចឡើយក្នុង១ថ្ងៃ។
ដោយ វេជ្ជ. លី ចេងហ៊ុយ
ប្រភព ៖ ទស្សនាវដ្តី សុខភាពយើង លេខ០០២ ខែមីនា ឆ្នាំ២០០៦
Leave a Reply