មានមនុស្សប្រមាណជាង៥០% មិនបានបរិភោគផ្លែឈើ និងបន្លែគ្រប់គ្រាន់ឡើយ ជាពិសេសកុមារ ក្មេងជំទង់ និងយុវវ័យ។ ហេតុ អ្វីបានជាផ្លែឈើ និងបន្លែផ្ដល់សារៈសំខាន់ដល់សុខភាពរបស់យើង?
បរិមាណត្រូវពិសា
លោកអ្នកគួរតែពិសាផ្លែឈើ និងបន្លែរៀងរាល់ថ្ងៃ រយៈពេលពេញមួយឆ្នាំ ឱ្យបានច្រើនមុខ និងបរិមាណច្រើនគ្រប់គ្រាន់។ យ៉ាងហោចណាស់ លោកអ្នកត្រូវពិសាផ្លែឈើ និងបន្លែឱ្យបានប្រាំមុខ ឬស្មើនឹងចំនួនប្រមាណជា៤ខាំ (៤០០ក្រាម)ដែរ ក្នុង១ថ្ងៃ។ កុមារក៏ត្រូវបរិភោគផ្លែឈើ និងបន្លែឱ្យបានច្រើនមុខដូចមនុស្សពេញវ័យផងដែរ។ ប៉ុន្ដែបរិមាណ ត្រូវកំណត់ទៅតាមវ័យ និងអាយុ។
ផ្លែឈើ និងបន្លែជួយការពារសុខភាព
ការស្រាវជ្រាវវិទ្យាសាស្ដ្រថ្មីៗនេះ បានបង្ហាញថា ការទទួលទានផ្លែឈើ និងបន្លែអាចជួយកាត់បន្ថយការបង្កជម្ងឺបេះដូង សរសៃ ឈាម និងជម្ងឺមហារីកមួយចំនួន ដូចជាមហារីកមាត់ បំពង់ក បំពង់អាហារ ក្រពះ ពោះវៀន មហារីកសួតជាដើម។ ករណីជម្ងឺមហារីក ដទៃទៀត ក៏ពាក់ព័ន្ឋទៅនឹងអត្ថប្រយោជន៍បង្ការជម្ងឺរបស់ផ្លែឈើ និងបន្លែដែរ។ មានការសិក្សាស្រាវជ្រាវជាច្រើន កំពុងរកហេតុផលចំពោះ ករណីនេះ និងប្រហែលជាអាចចំណាយពេលយូរទៀតផង។
ម្យ៉ាងទៀត ដោយសារនៅក្នុងផ្លែឈើ និងបន្លែ មានកម្រិតអត្រាជាតិខ្លាញ់ និងថាមពលកាឡូរីទាប អ្នកដែលបរិភោគវាបានគ្រប់ គ្រាន់ មិនសូវមានជម្ងឺធាត់លើសគីឡូ និងជម្ងឺទឹកនោមផ្អែមឡើយ។ ហើយថែមទាំងអាចបញ្ចៀសបាន នូវផលប៉ះពាល់នៃជម្ងឺទាំងនោះទៀតផង។
លើសពីនេះ ការបរិភោគផ្លែឈើ និងបន្លែ ជួយសម្រួលដល់ដំណើរការរំលាយអាហាររបស់ចំណីអាហារ។
អត្ថប្រយោជន៍ការពារសុខភាពរបស់រុក្ខជាតិ ពាក់ព័ន្ធផងដែរទៅនឹងវត្ដមានសារធាតុសរសៃ ជីវជាតិវីតាមីន សារធាតុកម្រ និងជា ពិសេសសារធាតុប្រឆាំងអុកស៊ីដកម្ម។
ហេតុអ្វីបានជាកុមារត្រូវការផ្លែឈើ និងបន្លែដែរ?
ផ្លែឈើ និងបន្លែ ជាចំណីអាហារចាំបាច់មិនអាចខ្វះបានសម្រាប់កុមារដែលកំពុងលូតលាស់ធំធាត់។ ផ្លែឈើ និងបន្លែត្រូវចាត់ បញ្ចូលទៅក្នុងរបបអាហារមានលំនឹង។ លោកអ្នកអាចជួយបុត្រាបុត្រី ក្នុងការថែរក្សាសុខភាពយូរអង្វែងរបស់ពួកគេ ដោយគ្រាន់តែដាក់ បញ្ចូលទៅក្នុងម្ហូបអាហារប្រចាំថ្ងៃរបស់ពួកគេនូវបន្លែ និងផ្លែឈើ ជាពិសេសពេលពួកគេនៅវ័យក្មេង។ ទោះបីជាពួកគេស្រែកយំមិនព្រម បរិភោគក៏ដោយ គប្បីជម្រុញពួកគេ លួងលោម និងទម្លាប់ឱ្យពួកគេបរិភោគ តាំងពីទើបតែចេះញ៉ាំអាហារ ព្រមទាំងពេលនៅកុមារភាព និង ពេលវ័យជំទង់។
ព្រោះថារសជាតិ និងទម្លាប់ចំណីអាហារ គួរតែចាប់ផ្ដើមពីនៅកុមារភាព។ ប្រសិនបើលោកអ្នក ទម្លាប់ឱ្យបុត្រាបុត្រីរបស់លោក អ្នកបរិភោគបន្លែ និងផ្លែឈើនោះ ដល់ពេលពួកគេធំពេញរូបរាង និងពេញវ័យ ពួកគេនឹងមានទំនោរញ៉ាំវាដោយស្វ័យប្រវត្ដិ។
ផ្ទុយទៅវិញ ទម្លាប់អាក្រក់ក្នុងការបរិភោគចំណីអាហារ ដែលពួកគេបានទទួលតាំងពីកុមារភាព អាចបង្កបង្កើនកត្ដាគ្រោះថ្នាក់ដល់ ជម្ងឺបេះដូង សរសៃឈាម ដូចជាជម្ងឺធាត់ ជម្ងឺលើសឈាម ការឡើងខ្ពស់ជ្រុលនៃជាតិខ្លាញ់កូឡេស្ដេរ៉ុលជាដើម។ គេបានដឹងថា ដំណើរ វិវឌ្ឍន៍បង្កវិបត្ដិទាំងនេះ ជាទូទៅប្រើប្រាស់ពេលវេលាជាច្រើនឆ្នាំ មុនពេលជម្ងឺនោះចាប់ផ្ដើមទៅទៀត ជួនតាំងពីវ័យកុមារភាព។
តើបុត្រាបុត្រីរបស់លោកអ្នកមិនចូលចិត្ដផ្លែឈើ និងមិនចូលចិត្ដបន្លែឬ? ទោះបីពួកគេមិនចូលចិត្ដក្ដី ដាច់ខាតលោកអ្នកមិនត្រូវ បង្ខិតបង្ខំឱ្យធ្វើ និងដាក់ទណ្ឌកម្ម ព្រោះតែការបរិភោគនេះឡើយ។ សង្ឃឹមថាលោកអ្នកនឹងរិះរកវិធី ដើម្បីកែតម្រូវអាកប្បកិរិយាចំណីអាហារ បុត្រា ទាំងនេះ ជាទុលនៃជាតិខ្លាញ់ បុត្រីរបស់លោកអ្នក។ នៅឱកាសក្រោយ ទស្សនាវដ្ដី សុខភាពយើង នឹងលើកយកបញ្ហាទាក់ទងទៅនឹងកុមារ មកសរសេរបន្ថែម ទៀត។
សូមជ្រើសរើសផ្លែឈើ និងបន្លែឱ្យបានគ្រប់មុខ
សូមពិសាផ្លែឈើ និងបន្លែទៅតាមរដូវកាល ពេលរដូវផ្លែស្វាយត្រូវបរិភោគផ្លែស្វាយ រដូវមង្ឃុត ញ៉ាំមង្ឃុត។ នៅប្រទេសយើង សម្បូរផ្លែឈើ និងបន្លែស្រស់ណាស់ ដូច្នេះសូមទម្លាប់ញ៉ាំផ្លែឈើ និងបន្លែស្រស់ ពីព្រោះថា ការទុកយូរ ជាតិវីតាមីននៅក្នុងនោះត្រូវបាត់បង់ យ៉ាងលឿន។ បើលោកអ្នកពិសាមិនទាន់ សូមទុកដាក់វាក្លាសេ និងធ្វើជាចំណីអាហារបម្រុង។
បើលោកអ្នកមិនចូលចិត្ដផ្លែឈើ និងបន្លែមួយមុខណា សូមជ្រើសរើសយកមុខផ្សេង ព្រោះផ្លែឈើ និងបន្លែមានរសជាតិដោយ ឡែកផ្សេងៗពីគ្នាជាច្រើន មិនចូលចិត្ដមួយ ចូលចិត្ដមួយទៀត។ តាមការស្រាវជ្រាវបានឱ្យដឹងថា ពីផ្លែឈើ និងបន្លែមួយមុខ ទៅមួយមុខ ផ្សេងទៀត មានកម្រិតអាហារូបត្ថម្ភប្រហាក់ប្រហែលគ្នា និងអាចជំនួសគ្នាបានទៀតផង។ ពេលដែលក្មេងបដិសេធមិនព្រមចូលតុបរិភោគ ជាទូទៅ ពួកគេងាយទទួលយកការបរិភោគផ្លែឈើជាងបន្លែ។ ដូច្នេះចូរឱ្យពួកគេញ៉ាំផ្លែឈើជំនួសបន្លែបាន។
ចង់ឱ្យមានសុខភាពល្អបាន ដរាបណាការបរិភោគអាហារមានលំនឹង។ លើសពីនេះទៀត ត្រូវផ្សារភ្ជាប់ការបរិភោគ ទៅនឹង អនាម័យក្នុងជីវភាពរស់នៅ និងសកម្មភាពផ្លូវកាយជាប្រចាំ បើអាចធ្វើបាន។ ទាំងនេះមិនមែនសម្រាប់តែអ្នកណាម្នាក់ឡើយ ពោលសម្រាប់ សមាជិកគ្រប់រូបនៅក្នុងគ្រួសារ។
ដោយ វេជ្ជ. លី ចេងហ៊ុយ
ប្រភព ៖ ទស្សនាវដ្តី សុខភាពយើង លេខ០០២ ខែមីនា ឆ្នាំ២០០៦
Leave a Reply